Elektron bəyannamənin yeni sistemi işə salınır

Avstraliyada vergi xidməti 1999-cu ildən fəaliyyətdə olan “e-tax” onlayn platforma üzərindən vergi bəyannamələrinin təqdim edilməsini dayandırıb. Azərtac “vergiler.az” saytına istinadla bildirir ki, indi bu sistemi “myTax” əvəz edəcək. Yeni sistem vergi sənədləşməsini əhəmiyyətli dərəcədə sürətləndirməyə imkan yaradır. Bu sistemin əsas üstünlüklərindən biri də mobil cihazlardan və planşetlərdən istifadə imkanı yaratmasıdır. Ölkənin vergi xidmətindən qeyd olunub ki, 1999-cu ildən “e-tax” sisteminə alışmış ödəyicilər müəyyən çətinliklər çəkəcəklər. Lakin onlar yeni sistemə keçdikdə vergi sənədləşməsi üçün itirdikləri vaxt minimuma enəcək.xeber100.com

Kanada Senatı ölmək üçün tibbi yardım göstərilməsi barədə qanun qəbul edib

Uzun müzakirələrdən sonra Kanada Senatı iyunun 17-də ölmək üçün tibbi yardım göstərilməsi barədə qanun qəbul edib. Azərtac “lemonde.fr” saytına istinadla xəbər verir ki, bununla da Kanada dünyada nadir ölkələrdən olacaq ki, burada həkimlər xəstələrə ölmək üçün qanuni şəkildə kömək göstərəcəklər. Beləliklə, bu ölkə yaşlı insanlara əzablardan qurtulmaq üçün imkan yaradır. Senatorların 44 nəfəri ölümə tibbi yardım göstərmək barədə qanun layihəsinin lehinə, 28 nəfər isə əleyhinə səs verib. Hökumət bu qanunun yalnız yaşlı insanlara aid edilməsini istəsə də, Senat bunun, həmçinin dözülməz xəstəlikdən əziyyət çəkən və yaşama ümidi olmayan şəxslərə də şamil olunmasına səs verib.xeber100.com

“Ağıllı ev” sisteminin inkişaf etdirilməsi planlaşdırılır

Minsk Şəhər İcraiyyə Komitəsinin sədri Andrey Şorets jurnalistlərə bildirib ki, respublika paytaxtında “Ağıllı ev” sisteminin inkişaf etdirilməsi planlaşdırılır. BELTA agentliyi xəbər verir ki, 2016-2020-ci illər üçün Belarusun sosial-iqtisadi inkişafı proqramının layihəsində “Ağıllı ev” sisteminin yeni evlər və mənzillər üçün standart qismində tətbiq edilməsi nəzərdə tutulur. “Ağıllı ev” – idarəedici qurğular, simsiz ölçü cihazları (temperaturun, rütubətin, tüstünün ölçülməsi, qapı və ya pəncərələrin açılması və s.), habelə videomüşahidə qurğuları sistemidir. Bu xidmət kompyuter, planşet, mobil telefon və başqa qurğuların köməyi ilə informasiyanın toplanmasını, ötürülməsini və saxlanmasını təmin edir. İstifadəçi sistemi öz istədiyi kimi elə sazlaya bilər ki, o, həm qurğuların işə düşməsi barədə məlumat versin, həm də qurğular müəyyən hərəkətləri yerinə yetirsin (məsələn, hərəkət ölçmə qurğusu işə düşdükdə müşahidə kamerasının yazma funksiyası fəallaşır). Hadisə barədə müştəriyə push-bildiriş (mobil qurğuda proqram məlumatı), göstərilmiş telefon nömrələrinə SMS göndəriləcək və ya elektron poçt ünvanlarına elektron məktub vasitəsilə məlumat veriləcək. Videokameralar baş verən hadisələrdən real vaxt rejimində xəbər tutmağa, video yazmağa və ya təsviri sonradan baxmaq üçün saxlamağa imkan verəcək.xeber100.com

BMG tədqiqat mərkəzinin keçirdiyi sorğuya əsasən…

Birləşmiş Krallığın Avropa İttifaqında üzvlüyünün gələcək aqibəti barədə təşviqat yarışında Böyük Britaniyanın Aİ-dən çıxmasının əleyhdarları avroskeptikləri geridə qoymağı bacarıb. Bu barədə məlumat BMG tədqiqat mərkəzinin Şotlandiyanın “Herald” qəzetinin sifarişi ilə keçirdiyi telefon sorğusunun nəticələrində yer alıb. Azərtac TASS informasiya agentliyinə istinadla xəbər verir ki, tədqiqata əsasən sorğuda iştirak edənlərin 46 faizi Böyük Britaniyanın Avropa İttifaqındakı statusunun saxlanılmasının tərəfdarıdır. Ölkənin Aİ üzvlüyündən çıxmasını isə respondentlərin 43 faizi dəstəkləyib. Fikirlərini tam olaraq müəyyən edə bilməyən vətəndaşların sayı əvvəlki kimi çoxluq təşkil edir – 11 faiz. İctimai rəy sorğusu iyunun 11-15-də, Britaniya parlamentinin deputatı Co Koksun rezonans doğuran qətlindən və bu hadisə ilə əlaqədar hər iki düşərgənin təşviqat kampaniyasını dayandırmaq barədə qərarından əvvəl 1064 respondentin iştirakı ilə keçirilib. Xatırladaq ki, Böyük Britaniyanın Avropa İttifaqında sonrakı aqibəti barədə referendum iyunun 23-də keçirilməlidir. Bu, Birləşmiş Krallığın tarixi ərzində üçüncü ümummilli plebisitdir. 1975-ci ildə britaniyalılar referendumda ölkələrinin Avropa İqtisadi Cəmiyyətində üzvlüyünü dəstəkləmiş, 2011-ci ildə isə milli seçki sistemindəki dəyişiklikləri rədd etmişdilər.xeber100.com

Donald Trampla Hillari Klinton arasında olan fərq azalıb

Respublika partiyasından ABŞ-ın prezidenti postuna namizədliyini təmin edən milyarder Donald Tramp amerikalı seçicilər arasında populyarlığına görə seçki kampaniyasındakı əsas rəqibi – demokrat Hillari Klinton ilə arasında olan fərqi azaldıb. Bu məlumat iyunun 17-də dərc olunan “Ipsos” beynəlxalq sosioloji mərkəzi ilə “Reuters” agentliyinin müştərək keçirdikləri yeni ümummilli sorğunun nəticələrində əksini tapıb. Azərtac TASS informasiya agentliyinə istinadla xəbər verir ki, əldə olan məlumata əsasən bu ilin noyabrında keçirilməsi planlaşdırılan seçkidə rəyi soruşulanların 34,8 faizi Trampa, 45,5 faizi Klintona səs verməyə hazırdır. Sorğuda iştirak edən respondentlərin 19,7 faizi isə hələ fikirlərini tam olaraq müəyyən etmədiklərini bildirib. Beləliklə də hazırda namizədlər arasında populyarlıq fərqi 10,7 faiz təşkil edir. Halbuki bir həftə əvvəl bu göstərici 14,3 faiz olmuşdu. Sorğunu təşkil edən mütəxəssislərin fikrincə, son həftə ərzində Trampın populyarlığının artmasına Orlando ştatında 49 nəfərin öldürülməsi ilə nəticələnən hücuma sərt reaksiya səbəb ola bilər. “Gecə klubuna hücumdan sonra Tramp milli təhlükəsizlik barədə çıxışlarının tonunu yüksəldərək seçkilərdə qələbə qazanacağı təqdirdə ABŞ və onun müttəfiqlərinə qarşı “terror tarixi sübut olunan” bütün ölkələrdən miqrasiyanı qadağan edəcəyini bildirib”, - deyə “Reuters” agentliyi yazır. Son sorğunun nəticəsinə əsasən respondentlərin 45 faizi milyarderin müsəlmanların ABŞ-a daxil olmasını qadağan etmək barədə təklifini (keçən həftə bu göstərici 41,9 faiz təşkil edirdi), 70 faizi isə ölkədə silah dövriyyəsinin məhdudlaşdırılması ideyasını dəstəkləyib ki, bu da 2014-cü illə müqayisədə 10 faiz artıqdır.

Dünya Qaçqınlar Günü qeyd edilir

Dünya Qaçqınlar Günü Moldovada bu gün - iyunun 18-də bir sıra tədbirlərlə qeyd edilir. Azərtac infotag.md saytına istinadla xəbər verir ki, BMT-nin Qaçqınlar üzrə Ali Komissarı İdarəsinin (QAKİ) nümayəndəsi Lilliana Pavlova Kişineuda tədbirlərin Valea Morilor parkında keçiriləcəyini bildirib. Qaçqın uşaqları əl işlərini təqdim edəcək, Daxili İşlər Nazirliyinin (DİN) orkestri çıxış edəcək, interaktiv tədbirlər keçiriləcək. Tədbirlər QAKİ, DİN-in Miqrasiya və Qaçqınlar Bürosu, Vəkillərin Hüquq Mərkəzi İctimai Assosiasiyası, Qaçqınlar üçün Xeyriyyə Mərkəzi və AVE Copiii Uşaq Assosiasiyasının təşkilatçılığı ilə keçirilir.xeber100.com

“Kommersant.ru”nun verdiyi xəbərə görə…

Rusiya vətəndaşlarının 70%-i bu ilin yazında Ermənistan-Azərbaycan qoşunlarının təmas xəttində 1994-cü ildən bəri baş vermiş ən irimiqyaslı hərbi toqquşmalar barədə  məlumatlıdır. “Kommersant.ru”nun verdiyi xəbərə görə, bu barədə "Levada" sorğu mərkəzinin məlumatında deyilir. Mərkəzin keçirdiyi sosioloji sorğuya əsasən rəyi soruşulanların 59%-i baş verən son hərbi toqquşmalar barədə eşitdiyini, lakin detallı bilgiyə sahib olmadığını, 11%-i hadisələri izlədiyini, 30%-i isə ümumiyyətlə, hərbi toqquşmalar barədə məlumatlı olmadığını deyib. Respondentlərin 67%-i bu münaqişədə hər hansı tərəfi dəstəkləmədiyini söyləsə də, 15%-i Ermənistan tərəfinə, cəmi 4%-i Azərbaycana simpatiya duyduğunu bildirib. Rusiyanın hansı tərəfi dəstəkləməli olduğu sualına cavab olaraq respondentlərin 11%-i erməniləri müdafiə etməyin düzgün olduğunu, cəmi 3%-i isə Azərbaycana dəstək verilməli olduğunu vurğulayıb. 66% əhali ümumiyyətlə, bu münaqişədə Rusiyanın bitərəf qalmalı olduğunu düşünür.Rəyi soruşulanların 23%-i hərbi toqquşmaların başlamasının təşəbbüskarının ABŞ və NATO ölkələri, 19%-i Azərbaycan, 15%-i Türkiyə, 4%-i Ermənistan olduğunu bəyan edib.xeber100.com

Sülh müqaviləsi barədə məsləhətləşmələr keçiriləcək

Yaponiya hökuməti cari ayda Rusiya ilə Cənubi Kuril problemi və sülh müqaviləsi barədə daha ətraflı danışıqlar aparmağa ümid edir. Bu barədə Yaponiyanın xarici işlər naziri Fumio Kişida Tokioda təşkil edilən mətbuat konfransı zamanı məlumat verib. Nazir bildirib ki, iki ölkə arasında sülh müqaviləsi ilə bağlı məsləhətləşmələr iyunun 22-də Tokioda keçiriləcək. F.Kişidanın sözlərini sitat gətirən Kyodo agentliyi yazır: “Ümid edirik ki, həmin görüş zamanı Yaponiya və Rusiya liderlərinin əvvəlki danışıqlarının nəticələri əsasında şimal torpaqları və sülh müqaviləsi ilə bağlı müsbət istiqamətli və ətraflı müzakirələr aparılacaq”. Nazirin bildirdiyinə görə, qarşıdakı məsləhətləşmələrdə Rusiya xarici işlər nazirinin müavini İqor Merkulov və Yaponiya hökumətinin Rusiya ilə danışıqlar üzrə xüsusi nümayəndəsi Tikahito Harada iştirak edəcəklər. Məsləhətləşmələrin keçirilməsi barədə razılıq Rusiya Prezidenti V.Putinin Yaponiyanın Baş naziri Ş.Abe ilə Soçidə mayın əvvəllərində baş tutmuş görüşü zamanı əldə edilib.xeber100.com

İslahatlar aparılmasına 220 milyon dollar ayrılacaq

ABŞ Ukraynada siyasi, iqtisadi və enerji islahatlarının aparılmasına 220 milyon dollar ayıracaq. Apa-nın xəbərinə görə, bu barədə Ağ Ev ABŞ-ın vitse-prezidenti Co Bayden və Ukrayna baş naziri Vladimir Qroysman arasında keçirilən görüşündən sonra məlumat yayıb. Məlumata əsasən, ayrılacaq vəsait gömrük və məhkəmə sisteminin islahatı, həmçinin qeyri-mərkəzləşdirmə üzrə tədbirlərin genişləndirilməsi və enerji təhlükəsizliyinin dəstəyinə yönələcək.xeber100.com

“Boeing-777” təyyarəsinin axtarışları davam edir

2014-cü ilin martında itmiş “Malayziya Hava Yolları”na məxsus “Boeing-777-200” sərnişin təyyarəsinin axtarışları çox güman ki, avqustda başa çatacaq. Bu barədə məlumat verən Avstraliya Nəqliyyatda Təhlükəsizlik Agentliyinin (ANTA) nümayəndəsi bildirib ki, axtarış zonasında qış qasırğalarının başlanması işə ciddi mənfi təsir göstərəcək. ANTA-nın nümayəndəsi deyib: “İndiyədək ümumi sahəsi 120 min kvadratkilometr olan axtarış zonasının 105 min kvadratkilometri artıq təhqiq olunub. Əvvəlcə işin ilin birinci yarısında başa çatdırılması planlaşdırılsa da, hava şəraitini nəzərə alaraq, axtarışları avqustadək uzatmağı nəzərdə tuturuq. Bununla yanaşı, havanın yaxın zamanlarda pisləşəcəyini də unutmaq olmaz. Avstraliya, Malayziya və Çinin əldə etdiyi razılığa əsasən, təyyarənin dəqiq yerinin müəyyən edilməsi barədə hər hansı informasiya olmayacağı təqdirdə, hazırkı axtarış zonası genişləndirilməyəcək”. Hava şəraiti nəzərə alınmaqla “Fugro Discovery” və “Dong Hai Jiu 101” gəmiləri axtarış zonasında dənizin dibini tədqiq etməkdə davam edəcək. “Fugro Equator” gəmisi isə iyunun 16-da Frimentl limanını tərk edərək, axtarış zonasına qayıdacaq. ANTA-nın əməkdaşı, həmçinin ötən həftə Madaqaskar və Avstraliyanın Kenquru adası sahillərində itmiş təyyarəyə məxsus olduğu güman edilən yeni parçalar barədə də məlumat verib. Həmin parçaların Kanberradakı laboratoriyada tədqiq olunması barədə razılıq əldə olunub.xeber100.com