Siyasi dialoqa hazırlıq üçün mühüm addım…

Yaponiya və Rusiya arasında sülh müqaviləsinin imzalanması üçün yaxın vaxtlarda yüksək vəzifəli rəsmilərin görüşünün keçirilməsi barədə razılıq əldə edilib. AzərTAC-ın verdiyi məlumata görə, Həmin danışıqların mayda keçirilməsi planlaşdırılır. Bu barədə razılıq Yaponiyanın xrici işlər naziri Fumio Kişidanın onun rusiyalı həmkarı Serqey Lavrovla aprelin 15-də Tokioda keçirilən görüşündə əldə edilib. F.Kişida bildirib ki, bu görüş yüksək səviyyəli siyasi dialoqa hazırlıq üçün mühüm addımdır. S.Lavrov isə öz növbəsində, ikitərəfli münasibətlərin bütün istiqamətlərdə dərinləşəcəyinə ümidvar olduğunu bildirib.xeber100.com

Parlament seçkilərində 250 yer uğrunda 3500 namizəd mübarizə aparıb

Suriyada keçirilmiş parlament seçkilərində 5 mln 85 min 444 insan iştirak edib. “RİA Novosti”nin verdiyi xəbərə görə, bu barədə Suriya Mərkəzi Seçki Komissiyasının sədri Hişam Əş-Şaer bildirib.  “Suriyanın daxilində 8 mln 834 min 994 nəfər seçki hüququna malik olub, onlardan 5 mln 85 min 444 nəfər səs verib”, - deyə o bildirib. Hər bir namizədin üç gün ərzində seçkilərin nəticələrindən şikayət etmək hüququna malik olduğu bildirilir.  Qeyd edək ki, Suriyada parlament seçkiləri aprelin 13-də başa çatıb. Parlamentdə 250 yer uğrunda 3 500 namizəd mübarizə aparıb. xeber100.com

Santyaqoda 3 mln sakin içməli sudan məhrum olub

Çilinin paytaxtı Santyaqoda 3 mln sakin içməli sudan məhrum olub. “Frans Press”in verdiyi xəbərə görə, buna səbəb leysan yağışlara görə Maypo çayının çirklənməsi olub. Yerli mətbuat su qıtlığının azı bir sutka davam edəcəyini proqnozlaşdırır.xeber100.com  

Türk investisiyasının Belarusda artırılması ilə bağlı müzakirə

“Belarus-Türkiyə əməkdaşlığını aktivləşdirməyin vaxtı çatıb”. Türkiyə mətbuatının məlumatına görə, bunu Belarus prezidenti Aleksandr Lukaşenko Türkiyə prezidenti Rəcəb Tayyib Ərdoğanla görüşü zamanı söyləyib. Prezidentlər həmçinin türk investisiyasının Belarusda artırılması ilə bağlı müzakirə aparıblar. Ərdoğan ən qısa zamanda Minskə səfər edəcəyini bildirib.Qeyd edək ki, Aleksandr Lukaşenko Ərdoğanın dəvəti ilə İstanbula İslam Əməkdaşlıq Təşkilatının iclasında iştirak etmək üçün gedib.xeber100.com

Sülhməramlı aksiya keçirilib

Aprelin 16-da Çexiyada fəaliyyət göstərən Azərbaycan Tələbə Şəbəkəsi, Azərbaycan icmasının üzvlərinin iştirakı ilə Praqanın mərkəzində Ermənistanın Azərbaycana qarşı təcavüzünə son qoyulmasını tələb edən sülhməramlı aksiya keçirilib. Trend-ə Azərbaycanın Çexiyadakı səfirliyindən verilən məlumata əsasən, Praqada turistlərin ən çox səfər etdiyi Çexiya Prezident sarayının (Pražský Hrad) qarşısında keçirilən aksiyada Azərbaycanlı gənclər tərəfindən Ermənistanın işğalçı hərəkətlərini pisləyən, Azərbaycanın ərazi bütövlüyünün bərpa edilməsinə çağıran, işğalçı Ermənistan qoşunlarının ölkəmizin ərazisindən çıxarılmasını və işğala son qoyulmasını tələb edən şüarlar səsələndirilib.  Sülhməramlı aksiya zamanı Ermənistanın Azərbaycana qarşı təcavüzü, xüsusilə cari ilin aprel ayının əvvəllərində Ermənistan qoşunlarının təmas xətti boyunca təxribat xarakterli hücumları, Azərbaycan mövqelərinin atəşə tutulması, xüsusilə dinc sakinlərimizin qətlə yetirilməsi haqqında müvafiq məlumat vərəqləri yerli sakinlər və turistlərə paylanılıb. Sülhməramlı aksiya ilə bağlı Çexiya prezidentinə ünvanlanan petisiya tərtib edilib və aksiya iştirakçıları tərəfindən imzalanıb. Sülhməramlı aksiya Azərbaycanlı tələbə və gənclər tərəfindən ölkəmizin himninin oxunması ilə başa çatıb.xeber100.com  

BMT Şimali Koreyanın siyasətini beynəlxalq təhlükəsizliyə təhdid kimi qiymətləndirib

BMT Təhlükəsizlik Şurası Şimali Koreyanın ballistik raket buraxmasını pisləyib. TASS agentliyinin verdiyi məlumata görə, bu barədə BMT TŞ-nın bəyanatında bildirilir. Rəsmi Pxenyanı bu cür addımlardan çəkinməyə çağıran BMT Təhlükəsizlik Şurası Şimali Koreyanın yürütdüyü siyasəti beynəlxalq təhlükəsizliyə təhdid kimi qiymətləndirib “Şimali Koreya növbəti raket sınağı keçirməklə BMT Təhlükəsizlik Şurasının beş qətnaməsini pozub. Təhlükəsizlik Şurası hadisələrin gedişini diqqətlə izləyərək müvafiq tədbirlərə əl atacaq ”, sənəddə vurğulanıb. Bununla belə, Şimali Koreyanın aprelin 15-də keçirdiyi ballistik raket sınağının uğursuz nəticələndiyi bildirilir. Cənubi Koreyanın kəşfiyyatının məlumatına əsasən, uçuş radiusu 3 min km-dən çox olan “Musudan” raketi buraxılışdan dərhal sonra radarlardan itib. Ehtimallara görə, raket havada partlayıb.xeber100.com

Giorgi Kvirikaşvili: “Ölkəmizin suveren hüquqları ilə bağlı heç bir kompromisə getməməliyik”

“İşğal edilmiş ərazilərin tanınmaması siyasəti dəyişməyəcək, lakin Rusiya ilə dialoqu davam etdirmək lazımdır”. “Georgia Online” saytının verdiyi xəbərə görə, bunu Gürcüstanın baş naziri Giorgi Kvirikaşvili yerli telekanalların nümayəndələri ilə görüşü zamanı deyib. “Ölkəmizin suveren hüquqları ilə bağlı heç bir kompromisə getməməliyik, lakin Rusiya ilə problemlərin həlli istiqamətində danışıqlar aparmamaq da məntiqsizdir”, - deyə o vurğulayıb. Beynəlxalq institutlar, eləcə də tərəfdaş ölkələrin iştirakı ilə yaradılmış beynəlxalq Cenevrə formatının gücləndirildiyini deyən G. Kvirikaşvili danışıqların son bir neçə raundunda müəyyən pozitiv tendensiyaların olduğunu diqqətə çatdırıb.xeber100.com

Coş Ernest: “Obama Bəşər Əsədi güc yolu ilə devirməyi planlaşdırmayıb”

ABŞ Suriya prezidenti Bəşər Əsədi güc yolu ilə devirməyi planlaşdırmayıb. Apa-nın məlumatına görə, bunu Ağ Evin rəsmi nümayəndəsi Coş Ernest bildirib: "Prezident Obamanın təşəbbüsləri arasında belə bir təklif heç vaxt olmayıb", - deyə Ernest qeyd edib.   Qeyd edək ki, ötən gün Rusiya prezidenti Vladimir Putin bildirib ki, "Barak Obama qabiliyyətli insandır, çünki ABŞ-ın Liviyadakı səhvlərini etiraf edib". Putin Obamanı Suriyadakı səhvləri təkrarlamamağa çağırıb. xeber100.com  

Beynəlxalq turizm sərgisinin açılış mərasimi

"İqtisadiyyat Nazirliyinin hazırladığı yeni strategiyaya əsasən,Gürcüstanda turistlərin sayı 11 mln nəfərə çatdırılmalıdır". Apa-nın məlumatına görə, bu sözləri Tiflisdə beynəlxalq turizm sərgisinin açılış mərasimində çıxışı zamanı Gürcüstanın iqtisadiyyat naziri Dimitri Kumsişvili deyib. "Bizim hazırladığımız turizmin inkişaf strategiyasına əsasən, ölkəyə gələn xarici turistlərin sayı   5.9 mln nəfərdən 11 mln nəfərədək çatdırılmalıdır", - deyə nazir bildirib.  Qeyd edək ki, Tiflisdə açılan beynəlxalq turizm sərgisində Estoniya, Latviya, Belarus, Türkiyə, İndoneziya, Qazaxıstan, Tailand və Ukrayna daxil olmaqla 68 ölkə və təşkilat iştirak edir. Beynəlxalq sərgi aprelin 16-dək davam edəcək. xeber100.com  

Yaponiyada güclü zəlzələ baş verib

Aprelin 14-də axşam saatlarında Yaponiyanın cənub-qərbində yerləşən Kumamoto prefekturasında güclü zəlzələ baş verib. Təkrar təkanların hələ də davam etdiyi regiondan əhali təxliyə olunub. Faciə nəticəsində 9 nəfərin həlak olduğu bildirilir. NHK televiziya kanalının avtomatik kameralarının çəkdiyi görüntülərdə 6,5 bal gücündə zəlzələnin axşam saat 21:30-da qeydə alındığı bildirilir. Güclü təkanlar nəticəsində mühüm mədəniyyət obyekti hesab olunan Kumamoto qəsrinin hasarının müəyyən hissəsi uçub.  NHK-nın kamerasının qeydə alındığı görüntülərdə qəsrin yaxınlığında yerləşən müxbir məntəqəsində divarların silkələndiyi aydın görünür. Azərtac Prefekturanın rəsmi nümayəndələri bildiriblər ki, bu gün saat 12:00-dək 1000-ə yaxın şəxsə tibbi yardım göstərilib. Həlak olanlardan birinin uçmuş divarlar altında qaldığı, digərinin isə yanğın nəticəsində dünyasını dəyişdiyi bildirilir. Həmin regionda 120-dən çox təkrar təkan qeydə alınıb. Bu təkanlar binaların daha çox ziyan çəkməsinə səbəb olub. Yerli qaz, su, elektrik enerjisi şirkətləri mindən çox ailənin susuz, işıqsız və qazsız qaldığını bildirib. Sürətli “Şinkansen” qatarlarının hərəkətində fasilə yaranıb. Rəsmi nümayəndələrin sözlərinə görə, prefekturadan 45 minədək insan təxliyə olunub. Şəhər hakimiyyət orqanları öz qərargahlarını təxliyə mərkəzlərinə köçürməli olublar.xeber100.com