Roma papası Gürcüstana səfər etmək niyyətindədir

Roma papası Fransisk Azərbaycan, Gürcüstan və Ermənistana səfər etmək niyyətindədir. Bu barədə “TASS”a Papa administrasiyasındakı məlumatlı mənbə məlumat verib. İlkin məlumata görə, səfər 2016-cı ilin sentyabrına planlaşdırılıb. Politoloqlar  Papanın Ermənistana səfərinin Vatikan-Ankara münasibətlərinə təkrar ziyan vura biləcəyini qeyd edirlər. Qeyd edək ki, ötən il geri çağırılan Türkiyənin Vatikandakı səfiri bu yaxınlarda vəzifəsinin icrasına davam etməyə başlayıb. Xatırladaq ki, ötən il qondarma “erməni soyqırımı”nın 100 illiyi  ilə əlaqədar Roma papası Fransisk Ermənistan prezidenti Serj Sarkisyanın iştirakı ilə Romanın müqəddəs Pyotr kilsəsində dini ayin  keçirib. Buna cavab olaraq  Ankara Vatikandakı səfirini geri çağırmışdır.  

Hərbi sənayedə texnologiyaların inkişafına xüsusi diqqət

ABŞ öz ordusunun texnoloji təchizatını gücləndirmək üçün böyük maliyyə ayırmaq niyyətindədir. “Financial Times”ın verdiyi məlumata görə, Pentaqon təmsilçiləri bildiriblər ki, Rusiya və Çinə uğurla müqavimət göstərə bilmək üçün hərbi texnologiyaların maliyyələşdirilməsinin artırılması vacibdir. “Biz yüksək texnologiyalardan istifadə edən düşməni dəf etməyə hazır olmalıyıq”, - deyə müdafiə naziri Eşton Karter bildirib. Karter hesab edir ki, hərbi sənayedə texnologiyaların inkişafına xüsusi diqqət yetirilməlidir. O deyib ki, yaxın illərdə ABŞ artıq daha əvvəl İraq və Əfqanıstanda olduğu şəkildə döyüşməyəcək. Pentaqon yaxın illərdə “X-47B” tipli, aviadaşıyıcılara eniş edə bilən pilotsuz təyyarələrin istehsalı kimi innovasiya layihələrinə daha çox kapital qoymaq fikrindədir. Qeyd edək ki, Pentaqonun 2017-ci il üçün büdcəsi 582,7 milyard dollar həcmində nəzərdə tutulub.

Brüssel və Moskva arasında münasibətlər gərginləşə bilər

  NATO Rusiya ilə sərhəddə yerləşən Şərqi Avropa ölkələrinə 500-1000 nəfərlik batalyonlar göndərir. Britaniya KİV-ləri həmin qüvvələrin Latviya, Litva, Estoniya, Polşa, Bolqarıstan və Rumıniyaya yerləşdiriləcəyini yazır. Məqsəd Rusiyanın "Ukrayna stilində yeni münaqişə ocağı yaratmaq istədiyi halda alyansın ona cavab verəcəyini" sərgiləməkdir. Məlumata görə, Rusiya ilə sərhədboyu yerləşdiriləcək qüvvələrdə amerikalı, alman və ingilis əsgərlər xidmət edəcəklər. Britaniya jurnalistlərinin qənaətinə görə, Rusiyanın Şərqi və Mərkəzi Avropa ölkələrinə qarşı yeni hibrid müharibəsi aparmasına qarşı atılan bu addım Brüssel və Moskva arasında münasibətləri gərginləşdirə bilər.

Loran Fabius istefa verib

"BFM-TV" telekanalının məlumatına görə, Fransanın xarici işlər naziri Loran Fabius istefa verib. Məlumata görə, Fransa prezidenti Fransua Olland onu əvəz edəcək şəxsin adını bu gün açıqlayacaq. Xəbərə əsasən, Loran Fabius Fransa Konstitusiya Məhkəməsinin sədr təyin ediləcək. Qeyd edək ki, ötən ayın sonunda müstəntiqlər Loran Fabiusun oğlu Tom Fabiusu dələduzluq və çirkli pulların yuyulması işi ilə bağlı dindiriblər. Söhbət 2013-cü ildə yüksək vəzifəli diplomatın oğlunun gəlir mənbələrini müəyyən etmək məqsədilə açılan cinayət işindən gedir. Müstəntiqləri xüsusi olaraq Tom Fabiusa məxsus olan və 2012-ci ildə 7 milyon avroya alınan Parisdəki mənzil maraqlandırıb. Bu işlə bağlı fransalı nazirin oğlu dekabr ayının ortalarında 12 saat müddətinə həbs olunub.

Dünya ölkələrində benzinin qiyməti?

Dünyada neftin qiymətinin durmadan aşağı düşməsi benzinin qiymətinin bundan qaynaqlanan yeni iqtisadi gerçəkliyə nə dərəcədə adekvat olması ilə bağlı müzakirələrə yol açıb. Neftin qiymətinin aşağı düşməsinə baxmayaraq, bir çox ölkələrdə benzinin qiymətində ciddi ucuzlaşma nəzərə çaprmır. Haberturk.com hazırda dünya ölkələrində benzinin qiyməti ilə bağlı məlumatları təqdim edir: Benzinin 1 litri Venesuellada 0.2, Küveytdə 0.21, Səudiyyə Ərəbistanında 0.24, Qətərdə 0.27, Türkmənistanda 0.28, Əmmanda 0.31, İranda 0.33, Bruneydə 0.37, Qazaxıstanda 0.40, Bəhreyndə 0.41, Malayziyada 0.42, Nigeriyada 0.42, Birləşmiş Ərəb Əmirliklərində 0.43, Ekvadorda 0.44, Rusiyada 0.48, Boliviyada 0.52, Qırızıstan 0.54, ABŞ-da 0.59, Porto-Rikoda 0.60, Maldiv adalarında 0.62, Belarusda 0.62, İndoneziyada 0.62, Kolumbiyada 0.62,  Tayvanda 0.64, Əfqanıstanda 0.64,  Namibiyada 0.64, Panamada 0.66, Yəməndə 0.68, İsveçrədə 0.70, Pakistanda 0.73, Gürcüstanda 0.74, Taylandda 0.65, Çində 0.92  ABŞ dolları təşkil edir.  

Xoşbəxtlik və din azadlığı üzrə nazirliklər təsis ediləcək

Birləşmiş Ərəb Əmirlikləri (BƏƏ) hökuməti xoşbəxtlik və din azadlığı üzrə nazirliklər təsis etməyi qərara alıb. Hökumət strukturlarının yenidən təşkili haqqında məlumatı BƏƏ-nin Baş naziri və vitse-prezidenti, Dubay Əmiri Məhəmməd Əl-Məktum öz “Twitter” səhifəsində yazıb. Qeyd edilir ki, xoşbəxtlik naziri bütün dövlət planlarını, proqramlarını və siyasətini sıx birləşdirməklə “cəmiyyəti daha xoşbəxt edəcək”, digər nazir isə din azadlığını “əmirliklər cəmiyyətinin əsas dəyəri kimi” aşılayacaq. Baş nazir bildirir ki, BƏƏ-nin Prezidenti Xəlifə ibn Zayed Əl-Nəhyan təklif edilən yeniliyin həyata keçirilməsinə artıq razılıq verib.  

Ukrayna Qazaxıstana ixracı 8 mln. dollar azalacaq

Bu il Ukraynadan Rusiyaya əmtəə ixracı 30% azalaraq 4,2 mlrd. dollardan 2,9 mlrd. dollara enəcək. "APA-Economics" Ukrayna Milli Bankının cari il üzrə açıqladığı makroiqtisadi proqnozlara istinadən xəbər verir ki, buna səbəb həm qarşılıqlı sanksiyalar, həm də iqtisadi amillərdir. Bununla yanaşı, proqnozda qeyd edilib ki, Ukrayna məhsullarının Rusiya ərazisindən tranzit qaydada keçirilməsinə qoyulan qadağa səbəbindən 460 mln. dollar itirəcək. Milli Bankın hesablamalarına əsasən, Ukrayna Qazaxıstana ixracı 8 mln. dollar, Azərbaycana 86 mln. dollar, Türkmənistana 60 mln. dollar, Özbəkistana 52 mln. dollar azaldacaq.  

M.Saakaşvili: “Ukrayna əsgəri ən yüksək döyüş ruhuna malikdir”

Odessa qubernatoru Mixail Saakaşvili deyib ki, Ukrayna əsgərləri bütün Rusiyanı ələ keçirə bilər, əgər onlara müasir amerikan silahı verilsə. Rusiya mətbuatı xəbər verir ki, Saakaşvili əsas problem kimi köhnəlmiş Ukrayna silahını görür: “Ukraynanın əsas boşluğu köhnəlmiş tank əleyhinə silahlarıdır. Daha yeni silahlar ABŞ-da var. Əgər ABŞ Ukraynaya bu silahı versə, ilk partladılan 50 rus tankından sonra hər şey başqa cür olacaq”. Onun sözlərinə görə, Ukrayna əsgəri dünyada ən yüksək döyüş ruhuna malik əsgərdir. Əsas odur ki, lazımi biliklər, silah verəsən və bütün Rusiyanı fəth edərlər. Saakaşvili qeyd edib ki, bu haqda ona ukraynalılara təlim keçən gürcü instruktorlar deyib.  

I Pyotr gürcüdü?

Məşhur rus yazıçısı Aleksey Nikolayeviç Tolstoy “Birinci Pyotr” romanı üzərində işləyərkən, kifayət qədər qeyri-adi faktla rastlaşır: Rusiya monarxlarının ən böyüyü, Romanovlar ailəsinin fəxri I Pyotrun nə rus millətinə, nə də familiyasına hər hansı bir dəxli var! Rusiya mətbuatının məlumatına görə, bu fakt yazıçını son dərəcə həyəcanlandırır və digər böyük diktatorla (Stalinlə - red.) tanışlığından istifadə edib, elə ehtiyatsız digər yazıçıların taleyini də yada salaraq məsləhət üçün ona müraciət etmək qərarına gəlir. Həm də ona görə ki, məlumatın hansısa mənada rəhbərə kifayət qədər dəxli var idi. Məlumat fitnəkar və yayğın mənalı idi. Aleksey Nikolayeviç sənədi, yəni I Pyotrun mənşəcə rus deyil, gürcü olduğundan açıq şəkildə xəbər verən hansısa məktubu Stalinə gətirir! Maraqlıdır ki, Stalin bu qədər qeyri-adi insidentdən əsla təəccüblənmir. Hətta sənədlə tanışlıqdan sonra Tolstoydan bu faktı gizlətməyi xahiş edir və onun ictimailəşməməsi üçün öz istəyini kifayət qədər sadə şəkildə əsaslandırır: “Heç olmasa, onların fəxr edə biləcəyi bir “rus”u saxlayaq!” Bəs bu, hansı məktub idi ki, “xalqlar atası” onu gizlətməyi məsləhət bilmişdi? Söhbət İmeretiya çarı II Arçilin qızı Darya Arçilovna Baqration-Muxranskyanın öz əmisi qızı, minqrel knyazı Dadianinin qızına məktubundan gedir. Pyotrun atasının hansı gürcü knyazının olması barədəsə iki versiya var. I versiyaya görə, 1669-cu ildə çar Aleksey Mixayloviçin arvadı Mariya İlyiniçna Miloslavskaya doğuşdan sonra vəfat edib. Bundan sonra çara o vaxt Moskvada yaşayan Krım-tatar knyaginyası Natalya Krillovna Narışkinanın məsləhət görürlər. Və gündəmə varis məsələsi çıxır. Çünki birinci arvaddan doğulanlar çarın özü kimi xəstə və sısqa idilər. Lakin yeni varisi dölləşdirəsi ata da lazım idi. Tarixçilərin araşdırmasına görə, bu missiya üçün ən uyğun namizəd çar Aleksey Mixayloviçin yaxını, gürcü şahzadəsi İrakli idi. Gürcü şahzadəsi sarayda həm də "xaç atası" rolunu oynayırdı. Bu dəfə isə döl məsələsində də yardımçı olmağa məcbur oldu. O, uşağın adını Pyotr qoyduqdan sonra 1674-cü ildə Rusiyanı tərk etdi və Kaxetiya knyazlığının taxtına çıxdı. Amma bu rütbəni əldə etmək üçün İslamı qəbul etməli oldu... İkinci versiyaya görə, gələcək monarxın atası İran şahının basqısı altında Gürcüstandan qaçmış və bir neçə ay çarın sarayında qonaq olmuş İmeretiya çarı II Arçildir. Onu praktik olaraq knyaginyanın yataq otağına baş çəkməyə, daha doğrusu, gözlədikləri uşağın dölünü tutmağa  məcbur ediblər...

Rusiya talon sisteminə keçdi

“Reuters” agentliyinin məlumatına görə, Rusiya ərzaq talonlarının tətbiqinə hazırlaşır. Məlumata görə, Rusiyanın Ticarət Nazirliyi əhaliyə ünvanlı ərzaq yardımının göstərilməsi üçün xüsusi sxem hazırlayıb. İqtisadi böhran nəticəsində ölkədə ərzaq məhsullarını almağa ciddi çətinlik çəkən çoxlu vətəndaş var. Bu proqrama görə, aztəminatlı vətəndaşlara ərzaq almaq üçün elektron kartlar veriləcək. Nazir müavini Viktor Yevtuxov “Reuters”ə bildirib ki, yardım 2 istiqamətdə həyata keçiriləcək. Birincisi, ticarət müəssisələrindən kart vasitəsilə, ikincisi, ictimai iaşə müəssisələrində güzəştli, yaxud pulsuz yemək verməklə. Qeyd edək ki, Rusiyada kasıbların sayı hazırda 22 milyon nəfərə çatıb. “Komsomloski pravda”nın yazdığına görə, 2015-ci ildə kasıbların sayı 2.3 milyon nəfər artıb. Bu kateqoriyaya isə zəruri ərzaq mallarını almağa imkanı çatmayanlar daxildir. Xatırladaq ki, “ərzaq talonu” sistemi keçmiş SSRİ-də uzun müddət tətbiq olunub. Həmin sistemlə vətəndaşlara bir neçə ərzaq malları üzrə aylıq norma nəzərdə tutan talon verilirdi. O zaman bunu əsasən ərzaq çatışmazlığına görə edirdilər ki, ən zəruri qida məhsulları minimal həddə də olsa, bütün vətəndaşlara çatsın. İndi Rusiya hökumətinin tətbiq etməyə hazırlaşdığı talon sistemi isə göründüyü kimi, vətəndaşların zəruri ərzaq mallarını almağa belə, pul tapa bilməməsinə görədir.