“Daily Express” qəzetinin məlumatına görə…

Böyük Britaniyada həkimlərə xəbərdarlıq olunub.Həkimlərə göndərilən xəbərdarlıqda, son üç həftədə uşaqlar arasında koronavirusla əlaqəli yeni bir xəstəliyin peyda olduğu bildirilib.Xəbərdarlıqda bildirilib ki, bu xəstəlik həm koronavirus testləri müsbət çıxan, həm də bu virusa tutulmayan uşaqlarda görülüb.Valideynlərdən uşaqlarında qarın ağrısı, ürək bulanması və mədə-bağırsaq problemləri müşahidə olunarsa dərhal xəstəxanaya müraciət edilməsi tələb olunur.Yeni xəstəliyin Britaniyada nə qədər geniş yayıldığı barədə məlumat yoxdur. Lakin xəstəliyin müxtəlif şəhərlərdə, xüsusən də paytaxt Londonda müşahidə olunduğu açıqlanıb.xeber100.com

İtaliya hökuməti karantindən çıxmanın ikinci mərhələsini müzakirə edəcək

İtaliya hökuməti aprelin 22-də karantindən çıxmanın ikinci mərhələsini müzakirə edəcək.Azərtac xəbər verir ki, mayın 4-dən başladılması nəzərdə tutulan yumşaldılma tədbirləri hələ ki, qüvvəsində qalır. İtaliyanın İnfrastruktur və Nəqliyyat naziri Paola de Mikeli iclasdan öncəki açıqlamasında deyib ki, yumşaltmadan sonra hər hansı bir kritik durum qeydə alınarsa məhdudiyyətlər məhz həmin əraziyə tətbiq olunacaq.Paola de Mikeli bildirib ki, İtaliya hökuməti Avropa Komissiyasının təklif etdiyi 37 milyard avro yardımı da qəbul edə bilər, lakin bu zaman ölkə qarşısına heç bir öhdəlik qoyulmamalıdır. Bu məbləğ ölkədə iqtisadi stabilliyi bərpa etməyə yönəlməlidir.xeber100.com  

“Volkswagen Group”un Çindəki satışları 35,1 faiz azalıb

Almaniyanın məhşur avtomobil istehsalçısı “Volkswagen Group”un Çindəki satışları ilin birinci rübündə ötən ilin eyni dövr ilə müqayisədə 35,1 faiz azalıb.Azərtac xəbər verir ki, “Volkswagen Group China” və onun 3 birgə müəssisəsi bu dövrdə Çinin materik hissəsində və Honkonq xüsusi inzibati bölgəsində bazara ümumilikdə 613 min 900 avtomobil çıxarıb. “Volkswagen Group China”nın idarə heyətinin sədri Stefan Vollenşteyn bildirib ki, şirkət Çinin avtomobil bazarının tezliklə bərpa olunacağına və yayın əvvəlində normal vəziyyətə qayıdacağına ümid edir.Şirkətin Çindəki müəssisələrinin fəaliyyətini 75 faiz bərpa etdiyini bildirən Stefan Vollenşteyn, ölkədə təxminən 2 min diler şəbəkəsinin hamısının işə başladığını və satışların getdikcə yüksəldiyini deyib. “Volkswagen Group”un Çindəki investisiya proqramı dəyişməyib, cari il üçün nəzərdə tutulan 4 milyard avroluq layihələrin icrası davam edəcək.Qeyd edək ki, Çin bazarına 1978-ci ildə daxil olan “Volkswagen”in ilk birgə müəssisəsi 1984-cü ildə, ikincisi isə 1990-cı ildə yaradılıb. “Volkswagen”, “Audi”, “SEAT”, “ŠKODA”, “Bentley”, “Bugatti”, “Lamborghini”, “Porsche”, “Ducati”, “Scania” və “MAN” brendlərinin sahibi olan “Volkswagen” konserni, həm də Çində birgə müəssisə yaradan ilk xarici avtomobil istehsalçısıdır. Ötən il Çində yerli istehsal avtomobillərin satışında “Volkswagen Group” birinci olub.xeber100.com

Fövqəladə hallar haqqında qanunda dəyişiklik edilib

Misir parlamenti ölkənin fövqəladə hallar haqqında qanununa dəyişiklik edərək, dövlət başçısı Əbdülfəttah əs-Sisiyə koronavirus pandemiyası ilə mübarizəyə dair əlavə səlahiyyətlər verib.Azərtac xəbər verir ki, qanuna edilən yeni dəyişiklik Misir Prezidentinə COVID-19 pandemiyası ilə əlaqədar zəruri addımların atılması səlahiyyəti verir. Belə ki, dövlət başçısı məktəblərdə və universitetlərdə təhsil prosesini, hökumət strukturlarının və özəl qurumların fəaliyyətini dayandıra, elektrik, qaz və suya olan kommunal ödənişləri təxirə sala bilər.Qanuna edilən yeni dəyişiklik dövlət başçısına şəxsi və ictimai görüşlərin, nümayişlərin, məhkəmə proseslərinin, bayram şənliklərinin də qadağan edilməsi, xarici ölkələrdən gələn vətəndaşlara karantin rejimi tətbiqi, bəzi malların və məhsulların ixracının dayandırılması, ticarətin, nəqliyyatın fəaliyyətinin məhdudlaşdırılması səlahiyyəti də verir. Eyni zamanda, Prezident üç ay müddətinə bir sıra vergilərin ertələnməsi barədə də sərəncam verə bilər. Parlamentin yeni düzəlişində, həmçinin karantin xəstəxanalarının da birbaşa prezident administrasiyasının tabeliyinə verilməsi nəzərdə tutulur. Bundan başqa, ölkədə bioloji materiallarla bağlı bütün elmi və laboratoriya tədqiqatlarına ali icra orqanı nəzarət edəcək.xeber100.com

Karantin qaydalarının yumşaldılması ilə bağlı qərar qəbul edilib

Polşa hökuməti koronavirusla bağlı elan etdiyi karantin qaydalarının yumşaldılması ilə bağlı qərar qəbul edib.Azərtac xəbər verir ki, bu barədə ölkənin Baş Naziri Mateuş Moravetski məlumat verib.Baş Nazirin sözlərinə görə, aprelin 20-dən etibarən ölkənin bütün parkları və meşələri ictimaiyyətə açıq olacaq, ərzaq mağazalarında bir dəfəyə olmasına icazə verilən insan sayı çoxaldılacaq, kilsələr yenidən ayinlərin icrası üçün açıq olacaq. Ölkə sərhədləri isə ən azı mayın 3-dək bağlı qalacaq.Mateuş Moravetski vurğulayıb ki, alınan qərarlar əhalinin kütləvi istirahəti üçün yox, onların ruh yüksəkliyini qaldırmaq üçün vacibdir. Təbii ki, park və meşələrdə hər hansı kütləvi tədbirə icazə verilməyəcək, lakin insanlar gəlib asudə vaxtlarını və istirahətlərini normal keçirməlidirlər.Polşa hökuməti mayın 3-dən etibarən isə ticarət və xidmət obyektlərindəki fəaliyyəti bərpa etməyi planlaşdırır. Ölkənin Səhiyyə naziri Lukaş Şumovskiy hələlik bütün ticarət və xidmət obyektlərində maska taxılmasının məcburi olduğunu bildirib.xeber100.com

Prezident Putin Qələbə paradının vaxtını dəyişib

Rusiya Prezidenti Vladimir Putin Qələbə paradının vaxtını dəyişib. Rusiya KİV-ləri xəbər verir ki, Vladimir Putin Təhlükəsizlik Şurasının üzvləri ilə görüşündə COVID-19 pandemiyası səbəbindən Qələbə paradının 9 mayda keçirilməyəcəyini bildirib. Prezident qeyd edib ki, xəstəliyin yayılması ilə bağlı risk ona bayram hazırlıqları görməyə imkan vermir.Dövlət başçısının sözlərinə görə, Qələbə paradı və "Ölümsüz polkun" yürüşü də daxil olmaqla, bütün təntənəli tədbirlər 2020-ci ildə daha sonra keçiriləcək.xeber100.com

Moldovada bir sıra məhdudiyyətlər aradan qaldırıla bilər

Moldova Prezidenti İqor Dodon bəyan edib ki, COVID-19 koronavirusuna yoluxma sayının artım dinamikası olduğu kimi qalsa, ölkə Dünya Səhiyyə Təşkilatı ekspertləri tərəfindən təsvir edilmiş üçüncü ssenariyə keçəcək ki, bu da daha nikbin ssenaridir və infeksiyaya yoluxanların sayının 3 minə qədər olacağını nəzərdə tutur.Azərtac Moldova KİV-lərinə istinadla xəbər verir ki, İqor Dodon deyib: "DST ekspertlərinin proqnozlarına görə, Moldova Respublikasında epidemiyanın inkişafının üç ssenarisi mümkündür. Birinci ssenariyə görə, 28 minə qədər koronavirusa yoluxma qeydə alınacaq, üçüncüyə görə, təqribən 3 min".Onun sözlərinə görə, Moldovada epidemiya, məsələn, İtaliyadakı kimi inkişaf etsəydi, birinci ssenari baş verərdi. Lakin üçüncü ssenari daha nikbindir və nəzərdə tutur ki, aprelin sonuna qədər Moldova Respublikasında təqribən 3 min yoluxma qeydə alınacaq. Bu halda hakimiyyət bəzi məhdudiyyətləri aradan qaldırmaq barədə qərar qəbul edəcək və iqtisadi fəaliyyətin bərpasına icazə verəcək.xeber100.com

Qələbənin 75-ci ildönümü münasibətilə parad və bayram şənlikləri keçiriləcək

Böyük Vətən Müharibəsində Qələbənin 75-ci ildönümü münasibətilə parad və bayram şənlikləri mütləq keçiriləcək.Azərtac xəbər verir ki, bu barədə jurnalistlərə Kremlin mətbuat katibi Dmitri Peskov məlumat verib. O deyib ki, Qələbə paradının, “Ölümsüz alay” aksiyasının başqa vaxta keçirilməsi barədə hələlik heç bir qərar qəbul edilməyib. Qəti qərarın koronavirusla bağlı vəziyyət nəzərə alınmaqla qəbul ediləcəyini diqqətə çatdıran D.Peskovun sözlərinə görə, hazırda müxtəlif variantlar nəzərdən keçirilir.Tədbirlərin mayın 9-da və ya başqa vaxta keçiriləcəyi barədə dəqiq məlumatın olmadığını qeyd edən Kremlin mətbuat katibi vurğulayıb ki, Qələbə paradının və Qələbə Günü münasibətilə şənliklərin keçiriləcəyinə heç kimin şübhəsi olmasın.xeber100.com

İspaniya Konqresi fövqəladə vəziyyət rejiminin müddətini uzadacaq

İspaniya Konqresi COVID-19 pandemiyası ilə əlaqədar fövqəladə vəziyyət rejiminin müddətini aprelin 26-na qədər uzatmaq haqqında hökumətin təklifini bəyənib.Azərtac xəbər verir ki, Baş Nazir Pedro Sançes fövqəladə vəziyyət müddətinin üçüncü dəfə, mayın 10-na qədər uzadılacağı ehtimalını istisna etmir.Hökumətin başçısı deyib ki, əsas xidmətlərdə işləyənlərdən savayı hamı üçün özünütəcrid rejimini nəzərdə tutan çəkindirici tədbirlər davam etdiriləcək, lakin məsafədən işləyə bilməyənlərin iş başına qayıtmalarına aprelin 13-dən etibarən icazə veriləcək.Baş Nazirin sözlərinə görə, koronavirusa qarşı mübarizədə müvəffəqiyyət qazandığını heç bir hökumət iddia edə bilməz, lakin İspaniya zəruri tədbirlər görmüş ilk ölkədir.Son iki gündə vəziyyətin pisləşməsinə baxmayaraq, İspaniyanın səhiyyə orqanları əmindirlər ki, pandemiya pik həddinə çatıb, lakin xəbərdarlıq edirlər ki, bu meyil möhkəmləndirilməlidir.İspaniya yeni koronavirusdan ən çox zərər çəkmiş ölkələrdən biridir. İspaniya Səhiyyə Nazirliyinin məlumatına görə, ölkədə 157022 yoluxma, 15843 ölüm halı qeydə alınıb, 55668 xəstə sağalıb.xeber100.com

“Boeing” konserni proqram təminatında iki yeni problem aşkarlayıb

Amerikanın “Boeing” konserni 737 MAX laynerlərinin proqram təminatında iki yeni problem aşkarlayıb.Azərtac Bloomberg agentliyinə istinadla xəbər verir ki, nasazlıqlar uçuş idarəetməsi sisteminə aiddir və təyyarələrin 2020-ci ilin ortalarına qədər istifadəyə qaytarılması vaxtına təsir etməyəcək.Xatırladaq ki, Efiopiya və İndoneziyada baş verən iki aviasiya qəzasından sonra bütün dünyada “Boeing 737-MAX 8” təyyarələrinin uçuşları dayandırılıb. 2019-cu il martın 10-da “Ethiopian Airlines” aviakompaniyasına məxsus “Boeing 737 MAX” təyyarəsi Efiopiyanın paytaxtından 60 kilometr şərqdə qəzaya uğramışdı. Qəza nəticəsində təyyarənin göyərtəsindəki 157 sərnişin, o cümlədən 8 ekipaj üzvü həlak olmuşdu. 2018-ci il oktyabrın 29-da isə İndoneziyanın “Lion Air” aviakompaniyasına məxsus “Boeing 737 MAX” təyyarəsinin qəzaya uğraması 181 sərnişin və 8 ekipaj üzvünün ölümü ilə nəticələnmişdi.Aşkar edilən yeni problemlərdən biri mikroprosessorun müvafiq komanda olmadan təyyarəni hündürlük yığmağa və ya itirməyə məcbur edən “hipotetik səhvi” ilə bağlıdır. Hər iki qəza zamanı 737 MAX-ın təhlükəsizlik sistemi təyyarələrin avtomatik hündürlük itirməsinə gətirib çıxarıb.Daha bir nasazlıq isə təyyarənin enişə hazırlığı əsnasında avtopilot rejiminin söndürülməsinə səbəb ola bilər. Yeni problemlərin heç biri uçuş zamanı müşahidə edilməyib, lakin proqram təminatına edilən düzəlişlər onların yaranmasının qarşısını almağa imkan verəcək.xeber100.com