Prezident Putin Qələbə paradının vaxtını dəyişib

Rusiya Prezidenti Vladimir Putin Qələbə paradının vaxtını dəyişib. Rusiya KİV-ləri xəbər verir ki, Vladimir Putin Təhlükəsizlik Şurasının üzvləri ilə görüşündə COVID-19 pandemiyası səbəbindən Qələbə paradının 9 mayda keçirilməyəcəyini bildirib. Prezident qeyd edib ki, xəstəliyin yayılması ilə bağlı risk ona bayram hazırlıqları görməyə imkan vermir.Dövlət başçısının sözlərinə görə, Qələbə paradı və "Ölümsüz polkun" yürüşü də daxil olmaqla, bütün təntənəli tədbirlər 2020-ci ildə daha sonra keçiriləcək.xeber100.com

Moldovada bir sıra məhdudiyyətlər aradan qaldırıla bilər

Moldova Prezidenti İqor Dodon bəyan edib ki, COVID-19 koronavirusuna yoluxma sayının artım dinamikası olduğu kimi qalsa, ölkə Dünya Səhiyyə Təşkilatı ekspertləri tərəfindən təsvir edilmiş üçüncü ssenariyə keçəcək ki, bu da daha nikbin ssenaridir və infeksiyaya yoluxanların sayının 3 minə qədər olacağını nəzərdə tutur.Azərtac Moldova KİV-lərinə istinadla xəbər verir ki, İqor Dodon deyib: "DST ekspertlərinin proqnozlarına görə, Moldova Respublikasında epidemiyanın inkişafının üç ssenarisi mümkündür. Birinci ssenariyə görə, 28 minə qədər koronavirusa yoluxma qeydə alınacaq, üçüncüyə görə, təqribən 3 min".Onun sözlərinə görə, Moldovada epidemiya, məsələn, İtaliyadakı kimi inkişaf etsəydi, birinci ssenari baş verərdi. Lakin üçüncü ssenari daha nikbindir və nəzərdə tutur ki, aprelin sonuna qədər Moldova Respublikasında təqribən 3 min yoluxma qeydə alınacaq. Bu halda hakimiyyət bəzi məhdudiyyətləri aradan qaldırmaq barədə qərar qəbul edəcək və iqtisadi fəaliyyətin bərpasına icazə verəcək.xeber100.com

Qələbənin 75-ci ildönümü münasibətilə parad və bayram şənlikləri keçiriləcək

Böyük Vətən Müharibəsində Qələbənin 75-ci ildönümü münasibətilə parad və bayram şənlikləri mütləq keçiriləcək.Azərtac xəbər verir ki, bu barədə jurnalistlərə Kremlin mətbuat katibi Dmitri Peskov məlumat verib. O deyib ki, Qələbə paradının, “Ölümsüz alay” aksiyasının başqa vaxta keçirilməsi barədə hələlik heç bir qərar qəbul edilməyib. Qəti qərarın koronavirusla bağlı vəziyyət nəzərə alınmaqla qəbul ediləcəyini diqqətə çatdıran D.Peskovun sözlərinə görə, hazırda müxtəlif variantlar nəzərdən keçirilir.Tədbirlərin mayın 9-da və ya başqa vaxta keçiriləcəyi barədə dəqiq məlumatın olmadığını qeyd edən Kremlin mətbuat katibi vurğulayıb ki, Qələbə paradının və Qələbə Günü münasibətilə şənliklərin keçiriləcəyinə heç kimin şübhəsi olmasın.xeber100.com

İspaniya Konqresi fövqəladə vəziyyət rejiminin müddətini uzadacaq

İspaniya Konqresi COVID-19 pandemiyası ilə əlaqədar fövqəladə vəziyyət rejiminin müddətini aprelin 26-na qədər uzatmaq haqqında hökumətin təklifini bəyənib.Azərtac xəbər verir ki, Baş Nazir Pedro Sançes fövqəladə vəziyyət müddətinin üçüncü dəfə, mayın 10-na qədər uzadılacağı ehtimalını istisna etmir.Hökumətin başçısı deyib ki, əsas xidmətlərdə işləyənlərdən savayı hamı üçün özünütəcrid rejimini nəzərdə tutan çəkindirici tədbirlər davam etdiriləcək, lakin məsafədən işləyə bilməyənlərin iş başına qayıtmalarına aprelin 13-dən etibarən icazə veriləcək.Baş Nazirin sözlərinə görə, koronavirusa qarşı mübarizədə müvəffəqiyyət qazandığını heç bir hökumət iddia edə bilməz, lakin İspaniya zəruri tədbirlər görmüş ilk ölkədir.Son iki gündə vəziyyətin pisləşməsinə baxmayaraq, İspaniyanın səhiyyə orqanları əmindirlər ki, pandemiya pik həddinə çatıb, lakin xəbərdarlıq edirlər ki, bu meyil möhkəmləndirilməlidir.İspaniya yeni koronavirusdan ən çox zərər çəkmiş ölkələrdən biridir. İspaniya Səhiyyə Nazirliyinin məlumatına görə, ölkədə 157022 yoluxma, 15843 ölüm halı qeydə alınıb, 55668 xəstə sağalıb.xeber100.com

“Boeing” konserni proqram təminatında iki yeni problem aşkarlayıb

Amerikanın “Boeing” konserni 737 MAX laynerlərinin proqram təminatında iki yeni problem aşkarlayıb.Azərtac Bloomberg agentliyinə istinadla xəbər verir ki, nasazlıqlar uçuş idarəetməsi sisteminə aiddir və təyyarələrin 2020-ci ilin ortalarına qədər istifadəyə qaytarılması vaxtına təsir etməyəcək.Xatırladaq ki, Efiopiya və İndoneziyada baş verən iki aviasiya qəzasından sonra bütün dünyada “Boeing 737-MAX 8” təyyarələrinin uçuşları dayandırılıb. 2019-cu il martın 10-da “Ethiopian Airlines” aviakompaniyasına məxsus “Boeing 737 MAX” təyyarəsi Efiopiyanın paytaxtından 60 kilometr şərqdə qəzaya uğramışdı. Qəza nəticəsində təyyarənin göyərtəsindəki 157 sərnişin, o cümlədən 8 ekipaj üzvü həlak olmuşdu. 2018-ci il oktyabrın 29-da isə İndoneziyanın “Lion Air” aviakompaniyasına məxsus “Boeing 737 MAX” təyyarəsinin qəzaya uğraması 181 sərnişin və 8 ekipaj üzvünün ölümü ilə nəticələnmişdi.Aşkar edilən yeni problemlərdən biri mikroprosessorun müvafiq komanda olmadan təyyarəni hündürlük yığmağa və ya itirməyə məcbur edən “hipotetik səhvi” ilə bağlıdır. Hər iki qəza zamanı 737 MAX-ın təhlükəsizlik sistemi təyyarələrin avtomatik hündürlük itirməsinə gətirib çıxarıb.Daha bir nasazlıq isə təyyarənin enişə hazırlığı əsnasında avtopilot rejiminin söndürülməsinə səbəb ola bilər. Yeni problemlərin heç biri uçuş zamanı müşahidə edilməyib, lakin proqram təminatına edilən düzəlişlər onların yaranmasının qarşısını almağa imkan verəcək.xeber100.com

Cənubi Koreya Dövlət Seçki Komissiyasının məlumatı

Cənubi Koreya ölkədə yeni növ koronavirus (COVID-19) infeksiyası ilə qızğın mübarizənin davam etdiyi vaxtda parlament seçkilərinə hazırlaşır.Azərtac Cənubi Koreyanın Dövlət Seçki Komissiyasına istinadla xəbər verir ki, aprelin 15-nə təyin olunmuş seçkilərdə səsvermə prosesi 14 min 330 məntəqə seçki komissiyasında təşkil olunacaq. Seçicilərin rahatlığı üçün məntəqə seçki komissiyalarının əksəriyyəti binaların birinci mərtəbəsində, habelə lift və ya eskalatorla təmin olunmuş binalarda yerləşəcək.Seçicilərin sağlamlığının təminatı üçün məntəqə seçki komissiyalarının girişində hər bir seçicinin bədən hərarəti ölçüləcək, səsvermə qutuları dezinfeksiya olunacaq. Dövlət Seçki Komissiyası seçicilərə səsverməyə gələrkən qoruyucu maska taxmağı, ən azı 1 metr məsafə saxlamağı tövsiyə edib. Bundan başqa, COVID-19 infeksiyasına yoluxma əlamətləri olanlar üçün mobil səsvermə kabinələri təşkil olunacaq.Vətəndaşlara parlament seçkilərində iştirak edən partiyalar və namizədlər haqqında bukletlər göndərilib. Yaşadıqları binalarda və həyətlərdə səs vermək istəyən 10 mindən çox sakin seçki bülletenləri ilə təmin olunub. İnfeksiyaya yoluxmuş xəstələrin, habelə xüsusi məntəqələrdə və evlərində karantinə cəlb olunanların elektron poçt vasitəsi ilə səs verməsi mümkün olacaq. Bundan başqa, 394 gəmidə 2821 heyət üzvünün, habelə xaricdəki seçicilərin səs verməsi bir neçə gün əvvəldən təşkil olunacaq. ABŞ və Avropa ölkələri daxil olmaqla virusa yoluxma hallarının çox olduğu 51 dövlətdəki koreyalılar səs verə bilməyəcəklər.Siyasi partiyalar və namizədlər təbliğat-təşviqat kampaniyasında gündəmə uyğun olaraq ölkənin COVID-19 infeksiyası ilə mübarizəsi, habelə pandemiyanın Cənubi Koreya iqtisadiyyatına təsirinin azaldılması ilə də bağlı vədlər verirlər.xeber100.com

İran alimləri koronavirusa qarşı dərman preparatı hazırlayıblar

İranın Əhvaz şəhərinin Tibb Elmləri Universitetinin alimləri koronavirusa qarşı dərman preparatı hazırlayıblar.Azərtac xəbər verir ki, bu barədə universitetin elmi şurasının üzvü Mənsur Əmin Təsmini məlumat yayıb. O bildirib ki, bitkilərdən hazırlanan yeni preparat virusa yoluxmuş 10 nəfərin müalicəsində istifadə edilib və onlardan 5-i sağalıb. Digər 5 nəfərin isə bu preparat vasitəsilə müalicəsi davam etdirilir. Əgər onlar da sağalsalar, o zaman Səhiyyə Nazirliyinin icazəsi ilə preparatın kütləvi istehsalına başlanacaq və yoluxanların müalicəsində istifadə ediləcək.İranın Səhiyyə nazirinin müavini İrəc Hərirçi Tehranda keçirdiyi onlayn brifinqdə bildirib ki, 13 vilayətdə virusa yoluxma halları azalıb. Onun sözlərinə görə, ilk dəfədir ki, Tehranda da yoluxma hallarının azalması müşahidə edilib.İranın Xarici İşlər Nazirliyinin mətbuat katibi Abbas Müsəvi isə onlayn brifinqdə bəyan edib ki, Avropa dövlətləri İrana maddi dəstək göstərməyiblər. Onlar yalnız humanitar yardım ediblər.  

Hava limanlarında sərnişin və yük təyyarələrinin uçuşları bərpa olunub

Çində yeni növ koronavirus (COVID-19) infeksiyasının yayılması ilə əlaqədar Hubey vilayətində fəaliyyəti dayanmış hava limanlarında sərnişin və yük təyyarələrinin uçuşları bərpa olunub.Azərtac xəbər verir ki, vilayətin inzibati mərkəzi olan Uxan şəhəri istisna olmaqla vilayət ərazisindəki hava limanları 2 aylıq fasilədən sonra martın 29-da normal fəaliyyətə başlayıb. İlk uçuş "Fuzhou Airlines" şirkətinə məxsus təyyarənin 64 sərnişinlə İçan şəhəri hava limanından qalxaraq Fucou istiqamətində yola düşməsi olub.Çin Mülki Aviasiya Administrasiyasının məlumatına əsasən, uçuşlardan əvvəl hava limanları dezinfeksiya olunub, işçilərə isə xüsusi təlim keçirilib. Hava limanlarında sərnişinlərin bədən hərarətini ölçən termal kameralar quraşdırılıb. COVID-19 infeksiyasının əlamətləri olan sərnişinlərin izolyasiyası üçün xüsusi məntəqələr də hazırlanıb.Qeyd edək ki, dekabrın son günlərində Uxan şəhərində aşkarlanan COVID-19 infeksiyasının sürətlə yayılması ilə əlaqədar yanvarın 24-də Uxan ilə yanaşı Hubey vilayətinin bir neçə şəhərində xüsusi karantin rejimi tətbiqinə başlanılmışdı. Karantin rejimi ilə əlaqədar həmin şəhərlərdən kənara bütün nəqliyyatın hərəkəti dayandırılmışdı. Son günlər ölkədə, o cümlədən virusun ən çox yayıldığı Hubey vilayətində epidemioloji vəziyyətin yaxşılaşması nəticəsində karantin rejiminin aradan qaldırılması mülki aviasiyanın fəaliyyətinin bərpasına da imkan yaradıb. Martın 25-dən başlayaraq Uxan şəhəri istisna olmaqla Hubey vilayətindən kənara və əks istiqamətdə nəqliyyatın hərəkətinə tətbiq olunan məhdudiyyətlər aradan qaldırılıb. Uxanda isə şəhərdaxili ictimai nəqliyyatın hərəkəti bərpa olunub.xeber100.com  

Yaponiya Xarici İşlər Nazirliyinin məlumatı əsasında…

G7 ölkələrinin Xarici İşlər nazirləri yeni koronavirusa qarşı mübarizədə səylərin birləşdirilməsi barədə razılığa gəliblər.Yaponiya Xarici İşlər Nazirliyindən Azərtac-ın bu ölkədəki müxbir məntəqəsinə verilən məlumata görə, bu barədə razılaşma martın 25-də axşam saatlarında keçirilən telekonfrans zamanı əldə edilib.Qeyd edək ki, G7 ölkələrinin Xarici İşlər nazirlərinin görüşü ABŞ-da baş tutmalı idi, lakin pandemiya təhlükəsinə görə iclas videokonfrans şəklində keçirilib.Bildirilir ki, nazirlər antivirus tədbirləri ilə bağlı əldə olunan təcrübənin mübadiləsi, sərhəd nəzarətinin təşkili, dərman və vaksinlərin birlikdə hazırlanması barədə razılığa gəliblər.Onlar, həmçinin yeni koronovirusun yayıldığı inkişaf etməkdə olan ölkələrə yardım göstərilməsi təşəbbüsü ilə çıxış edəcəklərini də bildiriblər.Yaponiyanın Xarici İşlər naziri Toşimitsu Moteqi Tokioda keçiriləcək Olimpiya və Paralimpiya oyunlarının bir il müddətinə təxirə salınması məsələsinə toxunaraq, yarışların tam tərkibdə təşkilinin zəruriliyini vurğulayıb. Digər iştirakçılar bununla razılaşdıqlarını bildiriblər.Telekonfrans zamanı Şimali Koreyanın bu günlərdə keçirdiyi ballistik raket sınaqları məsələsinə də toxunulub. Qeyd edilib ki, beynəlxalq ictimaiyyət bu sınaqlarla barışa bilməz. Həmin ölkənin nüvə silahının ləğvi istiqamətində səylərin davam etdirilməsi barədə də razılıq əldə olunub.Qeyd edək ki, bu, G7 ölkələrinin Xarici İşlər nazirlərinin telekonfrans formatında keçirilən ilk görüşü olub.

“Curevac” biotexnologiya firması virusa qarşı vaksin hazırlayır

Almaniyanın “Curevac” biotexnologiya firması “21-ci əsrin taunu” sayılan COVID-19 virusuna qarşı vaksinin yaradılmasına yaxındır.Almaniya KİV-ləri xəbər verir ki, tezliklə kliniki sınaqlar başlanacaq. Şirkətin rəhbərləri bildirirlər ki, “Curevac” nikbin əhval-ruhiyyədədir və bu araşdırmanın müvəffəqiyyətlə başa çatacağına şübhə etmirlər. “Curevac” sınaqlara könüllülərin cəlb edilməsini gizlətmir. Bu insanlar öz üzərlərində test sınaqları keçirilməsinə icazə verəcəklər.