Aerobika gimnastikası üzrə Avropa çempionatı davam edir

İtaliyanın Pesaro şəhərində aerobika gimnastikası üzrə Avropa çempionatı davam edir.Çempionatın ilk günündə Azərbaycanın iki idmançısı mübarizəyə qoşulub.Kişilərin fərdi yarışında ölkəmizi təmsil edən Vladimir Dolmatov təsnifat mərhələsində 22,500 bal toplayaraq doqquzuncu olub. Qadınların mübarizəsində isə Nurcan Cabbarlı 17,100 balla 32-ci sırada qərarlaşıb. Hər iki idmançımız finala vəsiqə qazana bilməyib.Qeyd edək ki, sentyabrın 19-dək davam edəcək qitə çempionatına 22 ölkədən 325 gimnast qatılıb.xeber100.com

Güləş üzrə dünya çempionatı keçiriləcək

Oktyabrın 2-dən 10-dək Norveçin paytaxtı Osloda güləş üzrə dünya çempionatı keçiriləcək.Azərtac xəbər verir ki, mundialda iştirak edəcək sərbəst güləş üzrə yığmamız məsul yarışa Bakıda hazırlaşır.Baş məşqçi Namiq Abdullayev, böyük məşqçi Zəlimxan Hüseynov və məşqçi Arif Abdullayevin rəhbərliyi altında baş tutan təlim-məşq toplanışı sentyabrın 30-dək davam edəcək. Məşqlər Olimpiya Güləş Mərkəzində keçirilir.Qeyd edək ki, millimiz Osloya sentyabrın 30-da yollanacaq. Oktyabrın 1-də sərbəst güləş üzrə püşkatma mərasimi keçiriləcək. Növbəti gün 61, 74, 86 və 125 kiloqram çəki dərəcələrində yarışa start veriləcək. Oktyabrın 3-də 57, 65, 79 və 92, ayın 4-də isə 70 və 97 kiloqram çəki dərəcələrində çıxış edən sərbəst güləşçilər mübarizəyə qoşulacaqlar. Sərbəst güləş üzrə yarışa oktyabrın 5-də yekun vurulacaq.xeber100.com

Beynəlxalq Cüdo Federasiyasının məlumatına görə…

Noyabrın 5-7-də Bakıda cüdo üzrə “Böyük dəbilqə” turniri keçiriləcək.Beynəlxalq Cüdo Federasiyasının saytı xəbər verir ki, turnirə qatılacaq Çexiya komandasının heyəti açıqlanıb. Belə ki, kişilərin yarışında David Pulkrabek (60 kq), David Klammert və Jiri Petr (hər ikisi 90 kq) komandada yer alıblar. Qadınlar arasında isə Vera Zemanova (57 kq), Renata Zaxova (63 kq) və Marketa Paulusova (+78 kq) mübarizə aparacaqlar.Paytaxtımızda keçiriləcək nüfuzlu yarışda iştirak edəcək Azərbaycan komandasının heyəti isə hələ açıqlanmayıb.Cüdo üzrə “Böyük dəbilqə” turniri Bakıda 2013-cü ildən keçirilir.xeber100.com

Şahmatçılar arasında Avropa kuboku yarışları start götürəcək

Sentyabrın 18-də Makedoniyanın Struqa şəhərində qadın və kişi şahmatçılar arasında klublararası Avropa kuboku yarışları start götürəcək.Kişilərin yarışında Azərbaycanı “Vüqar Həşimov” klubu təmsil edəcək. Komandamızın heyətində Rauf Məmmədov, Kiril Şevçenko, Vüqar Əsədli, Aydın Süleymanlı, Əhməd Əhmədzadə, Ülvi Sadıqov və Murad İbrahimli yer alıblar. Komandanın kapitanı isə Əməkdar məşqçi Anar Allahverdiyev olacaq.Azərbaycanın digər qrossmeysterləri Şəhriyar Məmmədyarov yarışın reytinq favoriti olan Makedoniyanın "Alkaloid" komandasının heyətində çıxış edəcək. Yığmamızın başqa bir üzvü Nicat Abasov isə İspaniyanın "C.A Silla" komandasını təmsil edəcək.Qeyd edək ki, kişilərin yarışında 38, qadınların turnirində isə 8 komanda mübarizə aparacaq.xeber100.com

“Neftçi” futbol klubu növbəti transferini reallaşdırıb

Bakının “Neftçi” futbol klubu növbəti transferini reallaşdırıb.Argentinalı futbolçu Xorxe Korrea ilə 2 il müddətinə müqavilə bağlanıb. İyirmi səkkiz yaşlı hücuma meyilli yarımmüdafiəçi 7 nömrəli formanı geyinəcək.Qeyd edək ki, Xorxe Korrea Argentinanın “Veles Sarsfild”, “Defensores de Belqrano” və Portuqaliyanın “Maritimu” klublarında çıxış edib. O, 2013-cü ildə “Veles Sarsfild”lə Argentina Super Kubokunu qazanıb.xeber100.com

Azərbaycan milli komandası dünya çempionatının seçmə mərhələsində

Qadın futbolçulardan ibarət Azərbaycan milli komandası dünya çempionatının seçmə mərhələsində sentyabrın 17-də ilk oyununu keçirib.Moskvada Rusiya millisi ilə oyun rəqib komandanın 2:0 hesablı qələbəsi ilə başa çatıb.xeber100.com

Voleybolçular arasında Avropa çempionatının yarımfinalçıları müəyyənləşib

Kişi voleybolçular arasında Avropa çempionatında mübarizə sona yaxınlaşır. Artıq yarışda yarımfinalçılar müəyyənləşib.Dörddəbir finalın ilk oyunu Niderland və Serbiya millisi arasında olub. Gözlənildiyi kimi serblər sürprizə imkan verməyiblər. Gərgin keçən ilk hissədə 25:23 hesabı qeydə alınıb. İkinci setdə Serbiya yığması daha asan qələbə qazanıb 25:20. Üçüncü hissədə Niderland voleybolçuları çox çalışsalar da, oyunda dönüş yaratmaq mümkün olmayıb. Bu dəfə 27:25 hesabı qeydə alınıb. Beləliklə, hər 3 setdə qalib gələn Serbiya yığması yarımfinala adlayıb.Polşa millisi də azarkeşlərini sevindirib. Komanda Rusiya kollektivini mübarizədən kənarlaşdırıb. İlk setdə rusiyalılar yalnız 14 xal qazana biliblər. İkinci hissədə polşalılar rəqibin müqaviməti ilə üzləşsələr də, qalib gəliblər - 26:24. Üçüncü setdə də görüşün ssenarisi dəyişməyib. Bu dəfə 25:19 hesablı qələbə qazanan Polşa millisi yarımfinala yüksəlib.Digər oyunlarda İtaliya millisi Almaniyanı, Sloveniya yığması isə Çexiyanı 3:0 hesabı ilə məğlub edib.Yarımfinalda Polşa millisi Sloveniya, İtaliya seçməsi isə Serbiya ilə qarşılaşacaq. Görüşlər sentyabrın 18-də Polşada təşkil olunacaq.xeber100.com  

“Qarabağ” futbol klubu UEFA Konfrans Liqasının qrup mərhələsində

Ağdamın “Qarabağ” futbol klubu bu gün UEFA Konfrans Liqasının qrup mərhələsində mübarizəyə başlayır.Qurban Qurbanovun baş məşqçi olduğu komanda H qrupundakı birinci oyununda İsveçrənin “Bazel” klubunu qəbul edəcək. Bakı Olimpiya Stadionunda oynanılacaq qarşılaşmanı belçikalı FIFA referisi Erik Lambrexts idarə edəcək.Ağdam təmsilçisinin heyətində zədəli olan müdafiəçilər Bədavi Hüseynov, Elçin Cəfərquliyev və zədəsini yeni sağaldan Rahil Məmmədov meydana çıxamayacaqlar.Qonaqlarda isə qapıçı Feliks Gebhardt, müdafiəçilər Andrea Padula, Eray Cömert, Nasser Jiqa, yarımmüdafiəçilər Jordi Kintilya, Edon Jeqrova və hücumçu Sebastyano Espozito eyni səbəbdən oyunda iştirak etməyəcəklər.Oyun “Qarabağ”ın vitse-kapitanı Qara Qarayev üçün əlamətdar olacaq. Azərbaycan millisinin üzvü avrokuboklarda 100-cü qarşılaşmasına çıxacaq.Qeyd edək ki, qrupun digər görüşündə “Kayrat” Qazaxıstanda Kiprin “Omoniya” klubunu qəbul edəcək.xeber100.com

2021-2022-ci il mövsümünün birinci turunun oyunları keçiriləcək

Sentyabrın 16-da futbol üzrə UEFA Avropa Liqasının və UEFA Konfrans Liqasının 2021-2022-ci il mövsümünün qrup mərhələsinin birinci turunun oyunları keçiriləcək.Turun ilk oyun günündə Avropa Liqasında 15, Konfrans Liqasında isə 14 görüş baş tutacaq.Ölkəmizi Konfrans Liqasında təmsil edən “Qarabağ” klubu yer aldığı “H” qrupundakı ilk oyunda İsveçrənin “Bazel” komandası ilə üz-üzə gələcək. Bakı Olimpiya Stadionunda keçiriləcək görüş saat 20:45-də başlayacaq. Bu qrupun digər görüşü Qazaxıstanın “Kayrat” və Kiprin “Omoniya” komandaları arasında keçiriləcək.UEFA Avropa Liqasında Türkiyənin turnirdəki təmsilçilərindən “Qalatasaray” İtaliyanın “Latsio” klubunu qəbul edəcək. “Fənərbağça” isə Almaniyada “Ayntraxt Frankfurt” komandasının qonağı olacaq.xeber100.com  

Milli Karate Federasiyasının məlumatına görə…

Sentyabrın 25-26-da Vətən müharibəsində qələbəyə həsr ediləcək karate üzrə Bakı birinciliyi və çempionatı keçiriləcək.Azərbaycan Milli Karate Federasiyasının (AMKF) mətbuat xidmətindən bildiriblər ki, "ASK Arena" stadionunun mini futbol meydançasında açıq havada kata və kumite üzrə keçiriləcək fərdi yarışlarda 8-13 yaşlı uşaqlar, 14-15 yaşlı yeniyetmələr və 16-17 yaşlı gənclər iştirak edəcəklər.Qalib və mükafatçılara Bakı Şəhər Gənclər və İdman Baş İdarəsi, AMKF və Azərbaycan Karate Təşkilatı tərəfindən müvafiq diplom, medal və kuboklar təqdim ediləcək.xeber100.com