Milli komandanın keçirəcəyi oyunun başlama vaxtı müəyyənləşib

İyirmi bir yaşadək futbolçulardan ibarət Azərbaycan milli komandasının iyunun 20-də Qırğızıstanın müvafiq yaş qrupundan ibarət yığmasına qarşı keçirəcəyi oyunun başlama vaxtı müəyyənləşib. AFFA xəbər verir ki, “Dalğa Arena”da keçiriləcək qarşılaşma saat 19:30-da başlayacaq. Qeyd edək ki, millimiz bu oyundan əvvəl iyunun 17-də İstanbulda Türkiyənin U-21 yığması ilə qarşılaşacaq.xeber100.com

Atletika üzrə Azərbaycan birinciliyinə start veriləcək

Mayın 26-da Gənclər və İdman Nazirliyi, Azərbaycan Atletika Federasiyasının təşkilatçılığı ilə yeniyetmələr arasında atletika üzrə Azərbaycan birinciliyinə start veriləcək. Azərbaycan Atletika Federasiyasından verilən məlumata görə, iki gün davam edəcək yarışda paytaxtın müxtəlif idman klubları və cəmiyyətlərinin atletləri ilə yanaşı, Gəncə, Sumqayıt, Naxçıvan, Bərdə, Astara, Quba, İsmayıllı, Xızı və Beyləqan təmsilçiləri mübarizə aparacaqlar. Yarış Azərbaycan Dövlət Bədən Tərbiyəsi və İdman Akademiyasının stadionunda keçiriləcək.xeber100.com

Azərbaycan Badminton Federasiyasının məlumatı əsasında…

Bir nömrəli idman liseyində 13 yaşadək badmintonçular arasında ölkə birinciliyinə yekun vurulub. Azərbaycan Badminton Federasiyasının mətbuat xidmətindən bildiriblər ki, Bakı ilə yanaşı, Gəncə, Lənkəran, Siyəzən, Qusar, Şirvandan 64 oğlan və 50 qız iştirakçı 5 kateqoriya üzrə qalibləri müəyyənləşdirib. Şəxsi oğlanlar arasında Fərəc Kərimli, qızlarda Qəndab Niftəlizadə, qoşa oğlanlar arasında Malik Cəfərov - İlham Məhərrəmov, qoşa qızlarda Aysel Kazımova - Qəndab Niftəlizadə, qarışıq qoşa yarışda isə Fərəc Kərimli - Aysel Kazımova ilk yeri tutublar. Gənclər və İdman Nazirliyi ilə Azərbaycan Badminton Federasiyasının birgə təşkilatçılığı ilə keçirilən ölkə birinciliyinin mükafatçıları diplom və medallarla təltif olunublar.xeber100.com

Azərbaycan Premyer Liqasının 2022-2023-cü il mövsümündə

“Qarabağ” klubu Azərbaycan Premyer Liqasının 2022-2023-cü il mövsümündə ilk ev məğlubiyyətini alıb. Peşəkar Futbol Liqası xəbər verir ki, XXXV turda “Sumqayıt”a 1:2 hesabı ilə uduzan Qurban Qurbanovun yetirmələri öz meydanındakı 17-ci matçda xalsız qalıb. Əvvəlki 16 görüşdə Ağdam təmsilçisi 12 qələbə qazanıb və 4 heç-heçə edib. 2021-2022-ci il mövsümünün 14 ev qarşılaşmasında da uduzmayan “Qarabağ” sonuncu dəfə 2021-ci il fevralın 13-də ev məğlubiyyəti alıb. Həmin gün “Neftçi”yə 1:2 hesabı ilə yenilən bölgə təmsilçisi ardıcıl 36 ev qarşılaşmasından xalla ayrılmağı bacarıb. Öz meydanında 828 gündən sonra məğlub olan Ağdam klubu bu müddətdə 29 qələbə qazanıb, 7 heç-heçə edib. Evdəki 36 oyunluq məğlubiyyətsizlik seriyası “Qarabağ”ın tarixində rekorddur. Qeyd edək ki, Azərbaycan çempionatları tarixinin rekordu “Neftçi”yə məxsusdur. Bakı klubu ardıcıl 57 ev matçında uduzmayıb.xeber100.com

Azərbaycan Basketbol Liqasında final seriyasının ikinci oyunu keçiriləcək

Bu gün Azərbaycan Basketbol Liqasında final seriyasının ikinci oyunu keçiriləcək. Azərbaycan Basketbol Federasiyası  xəbər verir ki, "Sabah" və "Gəncə" komandaları "Sərhədçi" İdman Mərkəzində üz-üzə gələcəklər. Qarşılaşma saat 19:30-da start götürəcək. Mayın 20-də keçirilən ilk görüşdə paytaxt təmsilçisi qələbə qazanıb - 71:69. Final seriyasının növbəti matçı mayın 24-də oynanılacaq. Çempion üç qələbənin nəticəsinə əsasən müəyyənləşəcək. Üç oyundan sonra qalib bilinməsə, mayın 27-də dördüncü və mayın 30-da beşinci duel baş tutacaq. Qeyd edək ki, daha əvvəl NTD "AAAF Xırdalan"ı 100:79 hesabı ilə məğlub edərək bürünc medala sahib çıxıb.xeber100.com

Azərbaycan Şahmat Federasiyası: Şahmat üzrə Avropa çempionatı başa çatıb

Albaniyada keçirilən məktəblilər arasında şahmat üzrə Avropa çempionatı başa çatıb. Azərbaycan Şahmat Federasiyası xəbər verir ki, 25 ölkədən 208 şahmatçının iştirak etdiyi qitə birinciliyində təmsilçilərimiz beş medal qazanıblar. Şahmatçılarımız iki qızıl, iki gümüş və bir bürünc medala layiq görülüb. Bununla komandamız medal sıralamasında üçüncü yeri tutub. On yeddi yaşadək oğlanların yarışında Aqil İsrailov və 9 yaşadək oğlanların mübarizəsində Yasin Əzimov çempionatın qızıl medalına sahib çıxıblar. On üç yaşadək olan kateqoriyada Səadət Bəşirli qızların, Mirsaleh Seyidli isə oğlanların yarışında gümüş mükafat qazanıb. On beş yaşadək qızlar kateqoriyasında çıxış edən Nurtən Nuriyeva bürünc medalla mükafatlandırılıb.xeber100.com

Qılıncoynatmanın Bakı birinciliyinə yekun vurulub

Qılıncoynatmanın sablya və şpaqa növləri üzrə Bakı birinciliyinə yekun vurulub. Azərbaycan Texniki Universitetinin İdman Sarayında keçirilən yarışda sablyaçı oğlanların mübarizəsində Saleh Məmmədov, qızlar arasında isə Zərifə Hüseynova birinci olublar. Şpaqa yarışlarında Səid Əliyev və Xədicə Həsənli qızıl medala yiyələniblər. Azərbaycan Qılıncoynatma Federasiyası və Bakı Şəhər Gənclər və İdman Baş İdarəsinin birgə təşkilatçılığı ilə keçirilən birinciliyin mükafatçıları diplom və medallarla təltif olunublar.xeber100.com  

“Real Madrid” basketbol klubu Avroliqanın qalibi olub

İspaniyanın “Real Madrid” basketbol klubu Avroliqanın qalibi olub. Çempionluq uğrunda görüşdə Madrid təmsilçisi Yunanıstanın “Olimpiakos” komandasını 79:78 hesabı ilə məğlub edib. Matç Litvanın Kaunas şəhərindəki “Jalgiris Arena”da keçirilib. Üçüncü yer uğrunda görüşdə isə “Monako” klubu “Barselona”dan üstün olub – 78:66. Turnirin yarımfinal mərhələsində “Olimpiakos” komandası “Monako”ya 76:62, “Real Madrid” klubu isə “Barselona”ya 78:66 hesabı ilə qalib gəlib. “Olimpiakos” sonuncu dəfə 2013-cü, “Real Madrid” isə 2018-ci ildə turnirin qalibi olub.xeber100.com

Bədii gimnastika üzrə 39-cu Avropa çempionatına yekun vurulub

Bakıda təşkil olunan bədii gimnastika üzrə 39-cu Avropa çempionatına mayın 21-də yekun vurulub. Çempionatın bağlanış mərasimində əvvəlcə iştirakçı ölkələrin paradı olub. Sonra Azərbaycan Gimnastika Federasiyasının vitse-prezidenti Altay Həsənov Avropa Gimnastikasının bayrağını qitə qurumunun vitse-prezidenti Edvard Kolara təqdim edib. Avropa Gimnastikasının rəsmisi isə bayrağı 2024-cü ildə qitə çempionatına ev sahibliyi edəcək Macarıstan nümayəndəsinə verib. Bayrağı Avropa çempionatının Təşkilat Komitəsinin sədri Andraş Tari təhvil alıb. Avropa Gimnastikasının vitse-prezidenti E.Kolar bədii gimnastika üzrə 39-cu Avropa çempionatının yüksək təşkilatçılığına görə qurumun rəhbərliyi adından Azərbaycan Gimnastika Federasiyasına minnətdarlığını bildirib və çempionatı bağlı elan edib. Xatırladaq ki, “Ulduz kimi parla” şüarı ilə keçirilən qitə çempionatında 38 ölkədən 315 gimnast (böyüklər – 191, gənclər 124) mübarizə aparıb. Gənclərdən ibarət qrup komandamız çoxnövçülükdə və beş topla yarışlarda bürünc medal qazanıb. Böyüklərdən ibarət komandamız çoxnövçülükdə üçüncü pillədə yer alsa da, üç lent və iki topla yarışda Avropa çempionu olub. Gimnastımız Zöhrə Ağamirova isə topla yarışda bürünc mükafata layiq görülüb.xeber100.com

Azərbaycan Premyer Liqasının XXXV turuna start verilib

Mayın 21-də “Kəpəz”-“Neftçi” oyunu ilə futbol üzrə Azərbaycan Premyer Liqasının XXXV turuna start verilib. Turun açılış matçında paytaxt təmsilçisi 3:1 hesabı ilə qələbə qazanıb. Kamran Əliyevin idarə etdiyi oyunda hesabı ilk hissənin sonunda (45+3) “Kəpəz”in heyətində Abdullahi Şuaybu açıb. “Neftçi” hesabda geri düşməsinə baxmayaraq, Ataa Caber (65), Ömər Buludov (87) və Kilan Lebonun (90+4) qolları sayəsində qələbə qazanıb. Tur çərçivəsində keçiriləcək digər dörd qarşılaşma mayın 22-də oynanılacaq. Çempionluğunu ötən turda rəsmiləşdirən “Qarabağ” komandası “Azersun Arena”da “Sumqayıt”ı qəbul edəcək. “Səbail” klubu “Turan Tovuz”un, “Qəbələ” isə “Şamaxı”nın qonağı olacaq. Çempionatın XXXV turuna “Sabah” – “Zirə” matçı ilə yekun vurulacaq. Hazırda Ağdam klubunun aktivində 87 xal var. “Sabah” 80 xalla ikinci, “Neftçi” 65 xalla üçüncü sıradadır. Sonrakı yerləri “Qəbələ” (48 xal), “Zirə” (46 xal), “Turan Tovuz” (38), “Kəpəz” (30), “Sumqayıt” (28), “Səbail” (25), “Şamaxı” (24) qərarlaşıblar.xeber100.com