“Sabah” və “Beşiktaş” klubları arasında xeyriyyə oyunu təşkil olunacaq

Bu gün Bakının “Sabah” və Türkiyənin “Beşiktaş” futbol klubları arasında xeyriyyə oyunu keçiriləcək. Tofiq Bəhramov adına Respublika Stadionunda keçiriləcək matçı baş hakim Tural Qurbanov idarə edəcək. Ona Vüsal Məmmədov və Rəhman İmami kömək edəcəklər. Dördüncü hakim funksiyasını isə İnqilab Məmmədov yerinə yetirəcək. Oyuna saat 18:00-da start veriləcək. Qeyd edək ki, matçdan əldə olunacaq gəlirlərin hamısı Türkiyədə zəlzələdən zərər görmüş insanlara yardım üçün göndəriləcək.xeber100.com

Azərbaycan Premyer Liqasının XXXIV turu çərçivəsində daha iki oyun keçiriləcək

Bu gün Azərbaycan Premyer Liqasının XXXIV turu çərçivəsində daha iki oyun keçiriləcək. Günün ilk qarşılaşmasında “Qəbələ” doğma meydanda "Turan Tovuz"u qəbul edəcək. Saat 18:00-da start götürəcək matç baş hakim Nicat İsmayıllıya həvalə olunub. Hesabında 48 xal olan “Qəbələ” turnir cədvəlində dördüncü, Tovuz klubu isə 35 xalla altıncı pillədə qərarlaşıb. Günün son oyununda “Səbail” klubu “ASCO Arena”da "Qarabağ” ilə qarşılaşacaq. Matça 20:30-da start veriləcək və qarşılaşmanı baş hakim Kamal Umudlu idarə edəcək. Səksən dörd xalla turnir cədvəlinə başçılıq edən Ağdam klubu qalib gələcəyi təqdirdə çempionluğu vaxtından əvvəl təmin edəcək. Elitada qalmaq uğrunda mübarizə aparan "Səbail" isə 25 xalla 9-cu sırada yer alıb. Qeyd edək ki, XXXIV turun açılış oyununda "Zirə" evdə "Kəpəz"lə 1:1 hesablı heç-heçəyə razılaşıb. Turun "Neftçi" - "Şamaxı" matçı mayın 14-də, "Sumqayıt" - "Sabah" qarşılaşması isə mayın 17-də keçiriləcək.xeber100.com

“Baku Open-2023” beynəlxalq şahmat festivalı çərçivəsində

“Baku Open-2023” beynəlxalq şahmat festivalı çərçivəsində keçirilən veteranlar arasında Azərbaycan çempionatına yekun vurulub. Azərbaycan Şahmat Federasiyası xəbər verir ki, doqquz turdan 6,5 xal toplayan Fikrət Sideifzadə üçüncü yeri tutdu. Yeddi xalı olan Asəf Abdullayev turniri ikinci pillədə başa vurub. Maksimum nəticə göstərən İlqar Xələfov (9 oyun və 9 qələbə) veteranlar arasında Azərbaycan çempionatının qalibi olub. Qeyd edək ki, Azərbaycan çempionatında yaşı 60-dan yuxarı olan 36 veteran şahmatçı iştirak edib.xeber100.com

“Baku Open-2023” beynəlxalq şahmat festivalına yekun vurulub

Ümummilli Lider Heydər Əliyevin xatirəsinə həsr olunan “Baku Open-2023” beynəlxalq şahmat festivalına yekun vurulub. Festivalın bağlanış mərasimində çıxış edən Azərbaycan Şahmat Federasiyasının prezidenti, Beynəlxalq Şahmat Federasiyasının vitse-prezidenti Mahir Məmmədov ölkə şahmatının inkişafında Ulu Öndər Heydər Əliyevin misilsiz xidmətlərinin olduğunu xatırladıb. Yarışın yüksək səviyyədə keçirildiyini bildirən Gənclər və İdman Nazirliyinin İdman şöbəsinin müdiri Elnur Məmmədov qalibləri təbrik edib, onlara gələcək turnirlərdə uğurlar arzulayıb. “Baku Open-2023”ün baş hakimi Faiq Həsənov festivalda 32 qrosmeysterin mübarizə apardığını və bütün qruplarda gərgin idman mübarizəsinin şahidi olduqlarını söyləyib. C qrupu üzrə qaliblərə sertifikatlar və hədiyyələr təqdim edilib. Festivalın C turnirində hər yaş qrupunda qalib olan şahmatçıların Rumıniyada keçiriləcək yeniyetmələrin Avropa çempionatına ezam olunacağı barədə məlumat verilib. B qrupunda 7,5 xalı olan Akaki Qaliçava (Gürcüstan) üçüncü olub. Səkkiz xal toplayan Fariz Əhmədov ikinci pillədə qərarlaşıb. Eyni xala malik Eldar Musayev əlavə göstəricilərə görə qalib olub. A qrupunda qadınların yarışında milli komandanın üzvü Xanım Balacayeva ikinci yerə layiq görülüb. Bolqarıstan təmsilçisi Nurgül Səlimova fəxri kürsünün ən yüksək pilləsinə qalxıb. Open turnirinin A kateqoriyasında Hindistan şahmatçısı Leon Luke Mendonca yeddi xalla yarışın qalibi adını qazanıb. Eyni xala malik digər şahmatçılar Aleksandr İndjic (Hindistan) və Vladislav Kovalyov (FIDE) əlavə əmsallara görə müvafiq olaraq ikinci-üçüncü yerləri bölüşüblər. Qeyd edək ki, turnirin ümumi mükafat fondu 55 min ABŞ dolları təşkil edib. Yarışın A qrupunun qalibi olan şahmatçı 12 min ABŞ dolları və xüsusi hazırlanan kuboka sahib çıxıb.xeber100.com

Futbol üzrə Uruqvay millisinin yeni baş məşqçisi bəlli olub

Futbol üzrə Uruqvay millisinin yeni baş məşqçisi bəlli olub. Bunu ölkənin futbol federasiyasının İcraiyyə Komitəsinin üzvü Xorxe Kasales açıqlayıb. O bildirib ki, yığmanı Marselo Byelsa çalışdıracaq. Argentinalı mütəxəssis ilə müqavilə imzalanmasa da, tərəflər arasında razılıq əldə olunub. Qeyd edək ki, Byelsanın son iş yeri “Lids” olub. Mütəxəssis 2018-2022-ci illərdə Argentina klubuna rəhbərlik edib.xeber100.com

Həndbol üzrə Azərbaycan kuboku yarışlarına yekun vurulub

Ümummilli Lider Heydər Əliyevin 100 illik yubileyinə həsr olunmuş həndbol üzrə Azərbaycan kuboku yarışlarına yekun vurulub. “AHF Arena”da təşkil olunan final mərhələsində meydançaya əvvəlcə qadın həndbolçular çıxıblar. Gərgin və maraqlı idman mübarizəsi ilə yadda qalan “Azəryol” - “Qarabağ” görüşündə fasiləyə 7 xallıq üstünlüklə yollanan “Qarabağ” ikinci hissədə 30:25 hesabı ilə qalib gələrək turnirin əsas mükafatına layiq görülüb. Kişilərin həlledici oyununda isə “İdman Akademiyası” “Təhsil” ilə qarşılaşıb. Ölkə çempionatına inamla liderlik edən “İdman Akademiyası” komandası kubok yarışında da etimadı doğruldub. Rəqibi 34:22 hesabı ilə məğlub edən “İdman Akademiyası” Azərbaycan kubokuna sahib çıxıb. Final oyunlarından sonra mükafatlandırma mərasimi olub. Qalibləri təbrik edən Azərbaycan Həndbol Federasiyasının idman şöbəsinin rəhbəri, Avropa Həndbol Federasiyasının nümayəndəsi İsgəndər Əsgərov XXIX Azərbaycan kuboku yarışlarının uğurla başa çatdığını vurğulayıb. İ.Əsgərov finalda uduzan komandaların üzvlərinə ruhdan düşməməyi tövsiyə edib. Olimpiya çempionu Lüdmila Şubinanın da qatıldığı mükafatlandırma mərasimində idmançılara diplom, kubok və hədiyyələr təqdim olunub. Qeyd edək ki, Azərbaycan Həndbol Federasiyası və Azərbaycan Gənclər və İdman Nazirliyinin birgə təşkilatçılığı ilə “AHF Arena”da keçirilən yarışda 7-si kişilərdən, 5-i qadınlardan ibarət olmaqla 12 komanda mübarizə aparıb.xeber100.com

UEFA Çempionlar Liqasında yarımfinal mərhələsinin ən yaxşı oyunçusu bəlli olub

UEFA Çempionlar Liqasında yarımfinal mərhələsinin ilk oyunlarından sonra həftənin ən yaxşı oyunçusu bəlli olub. Bu ada İngiltərənin "Mançester Siti" klubundan Kevin De Brüyne layiq görülüb. Belçikalı yarımmüdafiəçi səsvermədə İspaniyanın “Real Madrid” klubundan Vinisius Junior və İtaliyanın “İnter” komandasından Nikola Barella ilə Henrix Mxitaryanı geridə qoyub. Qeyd edək ki, Kevin De Brüyne İspaniyada "Real Madrid"lə 1:1 hesablı heç-heçə etdikləri matçda komandasının yeganə qolunun müəllifi olub.xeber100.com

Boksçular arasında yarımfinal mərhələsinin döyüşləri keçirilir

Özbəkistanın paytaxtı Daşkənddə kişi boksçular arasında dünya çempionatında yarımfinal mərhələsinin döyüşləri keçirilir. Finala gedən yolda Azərbaycan millisinin heyətində Alfonso Dominqesin (86 kq), ardınca isə Məhəmməd Abdullayev (+92 kq) rinqə çıxıblar. Məhəmməd Abdullayev 1/2 finalda kubalı Fernando Lopes Arzola ilə üz-üzə gəlib. Döyüşdə rəqib finala vəsiqə qazandığından M.Abdullayev dünya çempionatının bürünc medalla başa vurub. Bu, onun böyüklər arasında ardıcıl eyni əyarlı ikinci mükafatıdır. Qeyd edək ki, daha öncə A.Dominqes yarımfinalda Georgi Kuşitaşvilini (Gürcüstan) 5:0 (29:28, 29:28, 30:27, 30:27, 30:27) hesabı ilə məğlub edərək ikinci dəfə dünya çempionatının finalına vəsiqə qazanıb. Olimpiya mükafatçımız həlledici görüşdə rusiyalı Şarabutdin Atayevlə döyüşəcək. Qarşılaşma mayın 14-də olacaq.xeber100.com

Ulu öndərin 100 illik yubileyinə həsr olunmuş şahmat turniri keçirilib

Tbilisidə ulu öndər Heydər Əliyevin 100 illik yubileyinə həsr olunmuş şahmat turniri keçirilib. Azərbaycanın Gürcüstandakı səfirliyinin, Gürcüstan Xarici İşlər, Mədəniyyət, İdman və Gənclər nazirliklərinin, Şahmat Federasiyasının və “SOCAR Energy Georgia” şirkətinin birgə təşkilatçılığı ilə reallaşan turnirdə Azərbaycan, Gürcüstan, Qazaxıstan və digər ölkələrdən olan idmançılar iştirak ediblər. “Dairəvi sistem” üzrə keçirilən turnirdə 20 idmançı gücünü sınayıb. Turnirin açılışında çıxış edən Azərbaycan səfiri Faiq Quliyev deyib ki, Azərbaycan Prezidenti İlham Əliyevin müvafiq Sərəncamı ilə cari il “Heydər Əliyev İli” elan edilib. Azərbaycan səfirliyi də “Heydər Əliyev İli” ilə əlaqədar silsilə tədbirlər planı hazırlayıb. Plana əsasən Ulu Öndərin milli–mənəvi dəyərlərimizin qorunmasındakı roluna, idmana, gənclərə diqqət və qayğısına, enerji siyasətinə və neft strategiyasına həsr olunmuş tədbirlər keçirilib, kitablar nəşr olunub. Ümummilli Lider idmana da xüsusi qayğı göstərib. Diplomat vurğulayıb ki, Gürcüstan və gürcü xalqı da tarixi şəxsiyyət, dünyaşöhrətli siyasətçi Heydər Əliyevin diqqətindən kənarda qalmayıb. Bu turnir də Ulu Öndərimizin xatirəsinə həsr olunub. Gürcüstan Şahmat Federasiyasının prezidenti Akaki İaşvili turnirin keçirilməsi ilə bağlı təşəbbüsə və dəstəyə görə səfirliyə və digər təşkilatçılara minnətdarlıq edib. Onun sözlərinə görə, bu cür tədbirlər ölkələrimiz arasında əlaqələrin inkişafına və möhkəmlənməsinə xidmət edir. Eyni zamanda, fenomen şəxsiyyət Heydər Əliyevə olan sevgini özündə əks etdirir. Beynəlxalq Şahmat Federasiyasının vitse-prezidenti, Azərbaycan Şahmat Federasiyasının prezidenti Mahir Məmmədov Ulu Öndərin idmana olan qayğısından danışıb, idmançılara uğurlar arzulayıb. Türkiyənin Gürcüstandakı səfiri Ali Kaan Orbay, Türkiyənin Maarif Vəqfinin rəhbəri Birol Akgün də idmançıları salamlayıb və onlara uğurlar arzulayıblar. Sonda qaliblərə mükafatlar və sertifikatlar təqdim olunub. Qeyd edək ki, Ulu Öndər Heydər Əliyevin 100 illik yubileyinə həsr olunmuş bu turnir barədə Dünya Şahmat Nəticələri informasiya portalında da məlumat verilib.xeber100.com

“Barselona” futbol klubu qapıçısı ilə yeni müqavilə imzalayıb

İspaniyanın "Barselona" futbol klubu qapıçısı İnyaki Penya ilə yeni müqavilə imzalayıb. Futbolçu ilə 2026-cı ilin yayınadək müqavilə imzalanıb. İyirmi dörd yaşlı qapıçının satış qiyməti 400 milyon avro dəyərində müəyyənləşdirilib. Qeyd edək ki, "Barselona" akademiyasının yetirməsi olan İ.Penya 2021-2022 mövsümündə "Qalatasaray"a icarəyə verilmişdi.xeber100.com