“Mançester Yunayted” klubu “Lester Siti”nin müdafiəçisini transfer edəcək

İngiltərənin “Mançester Yunayted” digər ingilis klubu “Lester Siti”nin müdafiəçisi Harri Maquayrı transfer etmək niyyətindədir.Azərtac “Manchester Evening News” nəşrinə istinadla xəbər verir ki, “qırmızı şeytan”lar futbolçuya görə 101 milyon avrodan keçməyə hazırdır.Həmçinin qeyd olunur ki, bu transfer reallaşarsa H.Maquayr ən bahalı müdafiəçisi kimi futbol tarixinə düşəcək. Hazırda ən bahalı müdafiəçi “Sauthemton” klubundan “Liverpul”a keçən Virjil van Deykdır (84,5 milyon avro).Qeyd edək ki, Harri Maquayr 2018-ci ilin axırlarında “Lester Siti” klubu ilə illik 5,3 milyon avroluq yeni müqavilə imzalayıb. O, keçən mövsüm “Lester Siti”nin heyətində 32 dəfə meydana çıxıb və 3 dəfə qolla yadda qalıb. İngiltərə millisinə 2017-ci ildən çağırılan futbolçu 20 dəfə meydana əsas heyətdə çıxıb və 1 qolla meydanı tərk edib.xeber100.com

Azərbaycanı təmsil edəcək boksçuların adları müəyyənləşib

Azərbaycanı ikinci Avropa Oyunlarında təmsil edəcək boksçuların adları müəyyənləşib.Azərbaycan Boks Federasiyasından Azərtac-a verilən məlumata görə, komandamız iyunun 21-dən 30-dək keçiriləcək “Minsk-2019”da 11 idmançı ilə təmsil olunacaq. Kişilərin yarışında ölkəmizin idman şərəfini Rüfət Hüseynov (49 kq), Məsud Yusifzadə (52 kq), Tayfur Əliyev (56 kq), Cavid Çələbiyev (60 kq), Bəxtiyar Qazıbəyov (64 kq), Lorenzo Sotomayor (69 kq), Kamran Şahsuvarlı (75 kq), Dominqes Alfonso (81 kq), Rahil Məmmədli (91 kq) və Məhəmməd Abdullayev (+91 kq) qoruyacaqlar.Qadın boksçuların mübarizəsində isə rinqə Məryəm Cəbrayılova (69 kq) çıxacaq.Boks yarışları Minskin “Uruçye” İdman Sarayında keçiriləcək.Qeyd edək ki, artıq təlim-məşq toplanışını yekunlaşdıran yığmamız iyunun 18-də Belarusa yola düşəcək.xeber100.com

Badminton Federasiyasının hesabat-seçki konfransı keçirilib

Bu gün Azərbaycan Badminton Federasiyasının növbəti hesabat-seçki konfransı keçirilib.Azərtac xəbər verir ki, konfransda Milli Olimpiya Komitəsinin vitse-prezidenti Çingiz Hüseynzadə, Gənclər və İdman Nazirliyinin səlahiyyətli nümayəndəsi Dəniyar Teymurlu, Azərbaycan Badminton Federasiyasının prezidenti Mikayıl Cabbarov, federasiyanın rəsmi şəxsləri, idmançı və məşqçi heyəti iştirak edib.Milli Qurtuluş Günü münasibətilə iştirakçıları təbrik edən Çingiz Hüseynzadə ötən 4 il ərzində Azərbaycan Badminton Federasiyasının kifayət qədər tərəqqi etdiyini bildirib. MOK-un vitse-prezidenti, xüsusilə badminton üzrə beynəlxalq turnirin Bakıda keçirilməsinin bu idman növünün gələcək inkişafı baxımından böyük əhəmiyyətə malik olduğunu bildirib. O, badmintonçumuzun II Avropa Oyunlarına vəsiqə qazanmasını böyük nəticə olduğunu qeyd edib.Konfransda Azərbaycan Badminton Federasiyasının baş katibi Nəsimi Musayevin hesabatı dinlənilib.Azərbaycan Badminton Federasiyasının prezidenti vəzifəsinə seçki keçirilib. Konfrans nümayəndələri Mikayıl Cabbarovu yenidən Azərbaycan Badminton Federasiyasının prezidenti seçiblər. Hesabat-seçki konfransında keçirilən səsverməyə əsasən Mirzə Orucov, Emin Zeynalov, Balakişi Qasımov növbəti 4 il müddətində federasiyanın vitse-prezidentləri, Nəsimi Musayev isə baş katib vəzifələrini icra edəcəklər.Konfransın sonunda gündəlikdəki cari məsələlər müzakirə olunub. İnteraktiv şəkildə keçirilən iclasda məşqçilərlə müxtəlif məsələlər ətrafında fikir mübadiləsi aparılıb. Gələcək üçün hədəflər müəyyənləşdirilib.xeber100.com

Pauerliftinq üzrə Avropa çempionatı keçirilib

İyunun 7-dən 12-dək Rusiyanın Soçi şəhərində pauerliftinq üzrə Avropa çempionatı keçirilib. Bu yarışda milli komandamız da təcrübəli idmançılarla təmsil olunub. Bu barədə Azərtac-a Daxili İşlər Nazirliyinin mətbuat xidmətindən məlumat verilib.Milli komandanın tərkibində mütləq çəki dərəcəsində gücünü sınayan Səbail Rayon Mühafizə İdarəsinin əməkdaşı, polis baş serjantı Razim Hüseynov üç hərəkətin cəmində 885 kiloqram ağırlığı qaldıraraq yaxın izləyicisi olan erməni rəqibini məğlub edərək turnirin qalibi olub.Qeyd edək ki, R.Hüseynov pauerliftinq üzrə bir dəfə dünya çempionu və dünya ikincisi, üç dəfə Avropa çempionu və səkkizqat Azərbaycan birincisidir.xeber100.com

Güləş Federasiyasının məlumatı əsasında…

Sərbəst və yunan-Roma güləşi üzrə yığmalarımız Minskdə keçiriləcək II Avropa Oyunlarına hazırlığı davam etdirir.Azərbaycan Güləş Federasiyasından Azərtac-a bildirilib ki, Olimpiya Güləş Mərkəzində təşkil olunan təlim-məşq toplanışı məsul yarış ərəfəsində son hazırlıq prosesidir. Yunan-Roma güləşi üzrə millimiz Estoniya və İsveçdən olan pəhləvanlarla birgə məşqləri davam etdirir. Qonaqlar federasiyanın rəsmi saytına verdikləri açıqlamada toplanışın gedişindən, onlara yaradılan şəraitdən, güləş bazasından razı qaldıqlarını bildiriblər.İsveç millisinin məşqçisi Cimmi Samuelsson deyib: “Azərbaycana ikinci dəfədir gəlirəm. İlk dəfə 2007-ci ildə Bakıda keçirilən dünya çempionatında idmançı kimi iştirak etmişəm. Təbii ki, İsveçlə Azərbaycanın iqlimi çox fərqlidir. Burada hava çox istidir. Ancaq problem deyil. Mən isti havanı sevirəm. Bakı gözəl şəhərdir. Xüsusən də “Alov qüllələri” və İçərişəhəri çox bəyəndim. Bakıya iki güləşçi ilə gəlmişik. Dünən onlardan biri zədələndiyi üçün bugünkü məşqdə iştirak etmir. Ümid edirəm ki, Aleks Kessidis Avropa Oyunlarına qədər zədəsini tam sağaldacaq. Həmçinin Bakıda sentyabrda keçiriləcək dünya çempionatına hazırlaşırıq. Olimpiya Güləş Mərkəzini çox bəyəndim. Bizim üçün bu zal çox böyükdür. İsveçdə bir zalda maksimum 2-3 güləş xalçası olur. Burada isə 14 xalçanın olması güləşçilərin eyni vaxtda məşq etməsinə imkan verir. Bu da güləşin Azərbaycanın milli idman növü olduğunu göstərir. Gələcəkdə də burada toplanış keçməyi planlaşdırırıq”.Estoniya yığma komandasının baş məşqçisi İvar Kotkas isə Bakı və idmançılar haqqında bunları söyləyib: “Estoniya ilə müqayisədə temperatur çox yüksəkdir. Lakin toplanışda hər şey qaydasındadır. Gətirdiyimiz üç güləşçi güclü sınaqçı-rəqiblərlə işləyir. Güləşçilərimizdən biri ən ağır çəkidə London Olimpiadasının gümüş medalçısı, ikiqat dünya çempionu Heyki Nabidir. Bu toplanış Avropa Oyunlarına hazırlıq xarakteri daşıyır. Ancaq Nabi Minskdə güləşməyəcək. Digər iki güləşçimiz Belarusda çıxış edəcək. Bakıda 3-4 dəfə olmuşam. İlk Avropa Oyunları zamanı da məşqçi kimi ölkənizə səfər etmişdim. Paytaxtınız haqqında ancaq xoş sözlər deyə bilərəm. Xüsusən də Bakının mərkəzi çox gözəldir. Bazar günü şəhərdə ekskursiya etməyi planlaşdırırıq”.xeber100.com

Atletika üzrə Azərbaycan çempionatına yekun vurulub

İyunun 15-də Azərbaycan Dövlət Bədən Tərbiyəsi və İdman Akademiyasının stadionunda 2004-2005-ci il təvəllüdlü yeniyetmələr arasında atletika üzrə Azərbaycan çempionatına yekun vurulub. Yarışlar Azərbaycan Atletika Federasiyasının (AAF) və Gənclər və İdman Nazirliyinin birgə təşkilatçılığı ilə keçirilib.Azərtac xəbər verir ki, yarışda 10 komandadan 80-ə yaxın atlet iştirak edib.Çempionatda oğlanlar arasında uzunluğa tullanmada Kəsgin Abbaszadə, hündürlüyə tullanmada Nikita Neftyakov, üç təkanla tullanmada Emil İlyasov və nüvəitələmədə isə Şakir Azakov qalib adını qazanıblar. Qızlar arasında uzunluğa tullanmada Aysel Mehrəliyeva, hündürlüyə tullanmada Veronika Andropova və nüvəitələmədə isə Aysun Əhmədova birinci yerə layiq görülüb.Qaçış növləri üzrə oğlanların yarışında Elcan Cəfərov (100 m, 200 m), İbrahim Orucov (400 m) və Roman Məmmədov (800 m, 1500 m) birinci yerdə qərarlaşıblar. Qızların yarışında isə Aysel Mehrəliyeva (100 m), Samirə Cəbrayılzadə (200 m) və İradə Əliyeva (400 m, 800 m) birinci olublar.Qaliblər federasiya tərəfindən medal və diplomlarla təltif olunublar.xeber100.com

Futnet Federasiyasının təşkilatçılığı ilə yarış keçiriləcək

İyunun 16-da Bakıda Azərbaycan Futnet Federasiyasının təşkilatçılığı ilə futvolley üzrə Azərbaycan kuboku yarışı keçiriləcək.Federasiyanın mətbuat xidmətindən Azərtac-a verilən məlumata görə, yarışda 6 komanda iştirak edəcək.Turnir dairəvi sistem üzrə təşkil ediləcək. Sonda ən yüksək xal toplamış komanda qalib olacaq.Qeyd edək ki, iyulda futvolley üzrə Azərbaycan çempionatı, avqustda isə ənənəvi beynəlxalq tunir təşkil olunacaq. Beynəlxalq turnirdə 20-dən çox ölkənin komandaları mübarizə aparacaq.xeber100.com

“Dorados” klubunun baş məşqçisi karyerasını başa vurub

Argentina yığmasının heyətində dünya çempionu olmuş Dieqo Maradona Meksikanın “Dorados” futbol klubunun baş məşqçisi karyerasını başa vurub.TASS informasiya agentliyi xəbər verir ki, bu barədə onun vəkili Matias Morla özünün “Twitter” hesabında bildirib.Vəkilin sözlərinə görə, Maradona səhhətində yaranmış problemlərə görə “Dorados”dakı postunu tərk edib.“Həkimlər ona sağlamlığına vaxt ayırmağı məsləhət gördülər. O, iki çiynində və dizində cərrahi əməliyyat keçirəcək”, - Morla qeyd edib.Məşqçinin gedişi haqqında informasiyanı futbol klubundan da təsdiqləyiblər.Dieqo Maradona Meksikanın ikinci divizionunda “Dorados” futbol komandasına 2018-2019-cu illər mövsümündə başçılıq edib.xeber100.com

Milli komandaların yeni reytinq siyahısı açıqlanıb

FIFA milli komandaların yeni reytinq siyahısını açıqlayıb.Azərtac xəbər verir ki, siyahıda Azərbaycan yığması 1188 xalla 110-cu yerdə qərarlaşıb.Nikola Yurçeviçin rəhbərlik etdiyi kollektiv daha öncə açıqlanan reytinqlə müqayisədə iki pillə geriləyib. Buna səbəb millinin “Avro 2020”nin son mərhələsinin oyunlarında Macarıstana 1:3, Slovakiyaya isə 1:5 hesabı ilə məğlub olmasıdır.Komandanın seçmə mərhələdəki rəqiblərindən Xorvatiya bir pillə geriləyib və 1625 xalla 6-cı pillədə qərarlaşıb. 1514 xalı olan və 4 pillə geriləyən Uels isə 1514 xalla 23-cü olub. Son iki oyunda qələbə qazanan Macarıstan 9 pillə irəliləyərək 42-ci yerə çıxıb. Slovakiya isə bir pillə irəliləyib və hazırda 1491 xalla 31-cidir.Siyahıda ilk üç pillənin sahibi dəyişməyib. Belçika (1746) birinci, Fransa (1718) ikinci, Braziliya (1681) isə üçüncü yerdədir. Türkiyə yığması (1467) isə 2 pillə irəliləyərək 37-ci yeri tutub.xeber100.com

Şahmat üzrə səkkizinci turun oyunları keçirilir

Rusiyanın Poykovski qəsəbəsində təşkil edilən şahmat üzrə ənənəvi Anatoli Karpov turnirində səkkizinci turun oyunları keçirilir.Azərtac xəbər verir ki, XII dünya çempionu Anatoli Karpovun təşəbbüsü ilə təsis olunan və 2000-ci ildən keçirilən ənənəvi turnirdə ölkəmizi Rauf Məmmədov təmsil edir. Ötən turda xorvatiyalı şahmatçı İvan Şariçlə mübarizə aparan idmançımız yeddinci dəfə heç-heçə edərək aktivinə 0,5 xal əlavə edib. Turnirdə yeddi turdan 3,5 xal toplayan R.Məmmədov rusiyalı şahmatçı Dmitri Yakovenkodan 1 xal geri qalaraq, 2-9-cu yerləri bölüşür.Raufun növbəti rəqibi rusiyalı şahmatçı Andrey Yesipenkodur.xeber100.com