Beynəlxalq “PACK LINE Israel Youth 2023” turnirində

Yeniyetmə badmintonçularımız İsrailin Rişon-le-Sion şəhərində keçirilən beynəlxalq "PACK LINE Israel Youth 2023" turnirində 4 qızıl və 1 gümüş medal qazanıblar. Azərbaycan Badminton Federasiyası  xəbər verir ki, turnirdə ən yaxşı nəticəni böyük perspektiv vəd edən yeniyetmə idmançımız Leyla Camalzadə göstərib. O, 15 yaşadək badmintonçuların şəxsi, qoşa və qarışıq qoşa yarışlarında qızıl medal qazanaraq mütləq çempion kimi Azərbaycan badminton tarixində ilkə imza atıb. Badmintonçumuz daha əvvəl ötən il Serbiyada keçirilən beynəlxalq "Youth International" turnirində də fəxri kürsüdə yer almağı bacarmışdır. Şəxsi yarışda qrup mərhələsində keçirdiyi bütün görüşlərini qələbə ilə bitirən L.Camalzadə uğurlu çıxışın davamını pley-offda da gətirib. Badmintonçumuz yarımfinal və final qarşılaşmalarında qalib gələrək qızların şəxsi kateqoriyasında ən güclü olub. L.Camalzadə və Qəndab Niftəlizadə 15 yaşadək qız badmintonçuların qoşa yarışında da turniri qalib kimi başa vurub. Dairəvi sistem üzrə keçirilən bu kateqoriyada qız badmintonçularımız mütləq nəticə göstərərək qrupda birinci yerə layiq görülüblər. On beş yaşadək badmintonçuların qarışıq qoşa kateqoriyasında da qızıl medal qazanan tərəf Azərbaycan təmsilçiləri olub. Əli Gözəlov-Leyla Camalzadə tandemi ardıcıl qələbələr sayəsində fəxri kürsünün ilk pilləsində yer alıb. Daha bir qızıl medalı komandamızın hesabına 13 yaşadək qız badmintonçuların şəxsi yarışında Qəndab Niftəlizadə yazdırıb. On üç yaşadək badmintonçuların qarışıq qoşa yarışında isə Fərəc Kərimli və Qəndab Niftəlizadə yalnız finalda uduzaraq gümüş medal əldə ediblər. Qeyd edək ki, İsrailə əvvəlcədən yollanan yeniyetmə badmintonçularımız məşqçi Yevgen Poçtaryovun rəhbəriyi altında Aşdod şəhərində təlim-məşq toplanışında olublar.

İsveçrə çempionatında 26-cı turun oyunları keçirilib

Futbol üzrə İsveçrə çempionatında 26-cı turun oyunları keçirilib. Azərbaycan millisinin hücumçusu Renat Dadaşovun formasını geyindiyi “Qrasshopper” bu turda doğma meydanda “Luqano" ilə qarşılaşıb və 2:1 hesabı ilə qalib gəlib. R.Dadaşov da bu görüşün iştirakçısı olub. O, start heyətdə meydana çıxıb və 90+2-ci dəqiqədə əvəzlənib. İyirmi üç yaşlı hücumçu 76-cı dəqiqədə sarı vərəqə alıb. Qeyd edək ki, “Qrasshopper” 26 turdan sonra 34 xalla 10 komanda arasında 6-cı pillədə qərarlaşıb.xeber100.com

Boksçular arasında beynəlxalq turnir davam edir

Bakıda yeniyetmə boksçular arasında Ümummilli Lider Heydər Əliyevin 100 illiyinə həsr olunan beynəlxalq turnir davam edir. Boks Mərkəzində keçirilən yarışın üçüncü günündə dörddəbir final mərhələsi başa çatıb. Turnirdə 52, 54, 57 və 60 kiloqram çəki dərəcələrində yarımfinala yüksələn boksçular bəlli olub. Azərbaycan millisinin altı idmançısı da dörddəbir final döyüşünü qələbə ilə bitirib və mərhələ adlamaqla özü üçün ən azı bürünc medalı təmin edib. Həmçinin 46 və 50 kiloqram çəki dərəcələrində finalçılar müəyyənləşib. Döyüşlərin nəticəsinə əsasən yığmamızın daha iki boksçusu həlledici görüşə vəsiqə qazanıb.xeber100.com  

Futbolçulardan ibarət Azərbaycan millisinin heyəti açıqlanıb

Qadın futbolçulardan ibarət Azərbaycan millisinin heyəti açıqlanıb. AFFA xəbər verir ki, Türkiyə ilə keçiriləcək yoldaşlıq görüşlərinə 23 oyunçu çağırılıb. Millimizin heyətində Aytac Şərifova, Nərgiz Hacıyeva (hər ikisi “Trabzonspor”, Türkiyə), Günay İsmayılova, Sona Rəhimova, Vüsalə Hacıyeva, Vüsalə Seyfəddinova (hamısı “Amedspor”, Türkiyə), Nərgiz Əliyeva, Jalə Məhsimova (hər ikisi “KDZ Ereğli Bələdiyyə Spor”, Türkiyə), Göknur Güləryüz, Nazlıcan Parlak (hər ikisi “Fənərbağça”, Türkiyə), Ayşən Əhmədova (“Fomget ve Genclik Spor”, Türkiyə), Kamilla Məmmədova, Coşqunə Əliyeva (hər ikisi “Kayseri””, Türkiyə), Kristina Bakarandze (“Qalatasaray”, Türkiyə), Yeliz Acar, Peritan Bozdağ, Bilge Su Koyun (hamısı “Fatih Vatan”, Türkiyə), Esra Manya (“Beşiktaş”, Türkiyə), Nigar Mirzəliyeva (“Zenit”, Rusiya), Diana Məmmədova (“Yenisey”, Rusiya), Sevinc Cəfərzadə (“Krasnodar”, Rusiya), Manə Mollayeva və Firəngiz Teymurova (8 – İOEUGiM) yer alıblar. Qeyd edək ki, Azərbaycanla Türkiyə arasında yoldaşlıq oyunları aprelin 8-də və 11-də “Dalğa Arena”da keçiriləcək.xeber100.com

Voleybol üzrə yarımfinal mərhələsinin oyunlarının vaxtı dəqiqləşib

Kişi və qadın voleybolçular arasında Azərbaycan çempionatlarında yarımfinal mərhələsinin növbəti oyunlarının vaxtı dəqiqləşib. Azərbaycan Voleybol Federasiyası xəbər verir ki, qadınların Yüksək Liqasında ikinci qarşılaşmalar aprelin 5-də keçiriləcək. Bir gün sonra isə kişi voleybolçuların Yüksək Liqasında ikinci görüşlər baş tutacaq. Aprelin 5-də “Murov” - “Abşeron”, UNEC - “Azərreyl”, ertəsi gün isə “Neftçi” - “Xarı bülbül” və MOİK - “Murov” görüşləri keçiriləcək. Qeyd edək ki, yarımfinal mərhələsi iki qələbəyə, final mərhələsi isə üç qələbəyə kimi oynanılacaq.xeber100.com  

Dünyanın ən çox məvacib alan məşqçilərinin siyahısı

Dünyanın ən çox məvacib alan məşqçilərinin siyahısı açıqlanıb. Fransanın nüfuzlu “Ekip” nəşrinin tərtib etdiyi siyahıya “Atletiko”nun çalışdırıcısı Dieqo Simeone başçılıq edir. Argentinalı mütəxəssis Madrid klubunda ilə 34 milyon avro məvacib alır. Argentinalı mütəxəssis “böyük beşlik” ölkələrində həm də “Frayburq”a rəhbərlik edən Kristian Ştrayxla birgə bir klubda ən uzun müddət işləyən məşqçidir. Simeone 2011-ci ildən “Atletiko”nun sükanı arxasındadır. Siyahıda ikinci pillədə “Mançester Siti”nin çalışdırıcısı Xosep Qvardiola qərarlaşıb. İspaniyalı mütəxəssis “Mançester Siti”də ilə 22,4 milyon avro məvacib alır. Üçüncü yerdə isə illik qazancı 17,8 milyon avro olan “Liverpul”un baş məşqçisi Yürgen Kloppdur. Dördüncü pillədə də Premyer Liqada işləyən mütəxəssis qərarlaşıb. Söhbət ilə 13,5 milyon avro gəlir əldə edən “Çelsi”nin baş məşqçisi Qrem Potterdən gedir. Beşinci sırada qərarlaşan “Yuventus”un baş məşqçisi Massimiliano Alleqrinin illik maaşı 12,8 milyon avrodur. Bir neçə gün əvvəl “Bavariya” ilə müqavilə imzalayan Tomas Tuxel isə 12 milyon avro ilə altıncı yeri tutur. “Real Madrid”in baş məşqçisi Karlo Ançelottinin adı isə yeddinci sırada qeyd olunub. İtaliyalı mütəxəssis ilə 11 milyon avro məvacib alır.xeber100.com

Güləşçilər arasında Azərbaycan çempionatına yekun vurulub

Bakı İdman Sarayında 20 yaşadək güləşçilər arasında Azərbaycan çempionatına yekun vurulub. Yarışın sonuncu – üçüncü günündə yunan-Roma güləşi üzrə 67, 72, 77, 82, 87, 97 və 130 kiloqram çəki dərəcələrində görüşlər keçirilib. Gərgin idman mübarizəsi şəraitində keçən yarışda Fərid Xəlilov (67 kq), Ruslan Nurullayev (72 kq), Davud Məmmədov (77 kq), İsmayıl Rzayev (82 kq), Etibar Rzayev (87 kq), İsa Hüseynov (97 kq) və Məzahim Mərdanov (130 kq) bütün rəqiblərini qabaqlayaraq Azərbaycan çempionu adına sahib olublar. Çempionatda mükafatçılar sırasında yer alan güləşçilər yığma komandalara cəlb ediləcəklər. Qeyd edək ki, aprelin 1-dən 4-dək Bakı İdman Sarayında yeniyetmə güləşçilər arasında ölkə birinciliyi təşkil olunacaq.xeber100.com

Azərbaycan Yüksək Liqasının yarımfinal mərhələsi start götürüb

Kişi voleybolçular arasında Azərbaycan Yüksək Liqasının yarımfinal mərhələsi start götürüb. Voleybol Mərkəzində təşkil olunan yarımfinalın ilk oyunları çərçivəsində “Murov”la MOİK, “Xarı bülbül” komandası ilə “Neftçi”qarşılaşıb. Günün ilk matçı “Murov” və MOİK komandaları arasında olub. Görüş “Murov”un 25:20 hesablı üstünlüyü ilə başlayıb. Fərid Cəlalovun komandası rəqibindən üstün oyun göstərərək sonrakı hissələrdə də (25:18, 25:14) qalib gəlib. Beləliklə “Murov” yarımfinalda ilk qələbəsini qazanıb – 3:0. Günün digər qarşılaşmasında “Xarı bülbül"lə “Neftçi” üz-üzə gəlib. Oyuna daha yaxşı başlayan "Xarı bülbül" ilk iki seti 25:22 və 25:17 hesabları ilə öz xeyrinə yekunlaşdırıb. Növbəti hissədə "Neftçi" 25:21 hesablı qələbə ilə ümumi hesabı azalda bilib. Lakin təşəbbüsü yenidən ələ alan Şuşa təmsilçisi 25:19 hesabı ilə qalib gələrək meydandan 3:1 hesablı qələbə ilə ayrılıb. Qeyd edək ki, yarımfinal mərhələsi iki qələbəyə kimi, final mərhələsi isə üç qələbəyə kimi oynanılacaq.xeber100.com

Azərbaycan çempionatının yarımfinal mərhələsində

Bu gün qadın voleybolçular arasında Azərbaycan çempionatında yarımfinal mərhələsinin ilk oyunları keçiriləcək. Oyun günündə "Abşeron" klubu "Murov"la, "Azərreyl" isə UNEC-lə qarşılaşacaq. Martın 30-da isə kişi voleybolçuların mübarizəsinə start veriləcək. İlk yarımfinal matçlarında "Murov"la MOİK, "Xarı bülbül"lə isə "Neftçi" üz-üzə gələcək. Qeyd edək ki, əsas mərhələdə baş tutmuş dörd dövrənin nəticələrinə görə, turnir cədvəlində birinci olan komanda dördüncü yerin sahibi ilə, ikinci olan komanda isə üçüncü yeri tutan klubla qarşılaşır. Yarımfinal mərhələsi iki qələbəyə, final mərhələsi isə üç qələbəyə kimi oynanılacaq.xeber100.com

Bədii gimnastika üzrə dünya kuboku yarışları keçiriləcək

Martın 31-dən aprelin 2-dək Bolqarıstanın paytaxtı Sofiyada bədii gimnastika üzrə dünya kuboku yarışları keçiriləcək. Azərbaycan Gimnastika Federasiyası xəbər verir ki, yarışda Azərbaycan fərdi növdə təmsil olunacaq. Ölkəmizin idman şərəfini Zöhrə Ağamirova və Alina Gözəlova qoruyacaqlar. Artıq gimnastlarımız Bolqarıstana yollanıblar. Bolqarıstan yarışı cari il Z.Ağamirovanın ilk beynəlxalq turniri olacaq. Digər təmsilçimiz A.Gözəlova bir müddət əvvəl İspaniyada Qran-Pri turnirində çıxış edib və topla proqramın finalında səkkizinci olub. Qeyd edək ki, Bakıda bədii gimnastika üzrə növbəti dünya kuboku yarışları aprelin 21-23-də keçiriləcək. Ölkəmizin gimnastika növləri üzrə bu il ev sahibliyi edəcəyi üçüncü beynəlxalq yarışda qeydiyyat siyahısına əsasən, 46 ölkədən idmançıların fərdi və qrup hərəkətləri proqramında mübarizə aparacağı gözlənilir. Üç gün ərzində baş tutacaq yarışlarda gimnastlar ayrı-ayrı alətlər və çoxnövçülük üzrə mübarizə aparacaqlar. Ənənəyə uyğun olaraq, yarışlarda ən çox icra xalını toplamış gimnast və qrup komandasına “AGF Trophy” kuboku təqdim olunacaq. Bu, ölkəmizdə bədii gimnastika üzrə təşkil ediləcək onuncu dünya kuboku yarışları olacaq. Paytaxtımız 2005-ci və 2019-cu illərdə bu növ üzrə dünya çempionatına ev sahibliyi edib.