Sumo üzrə XXIII Avropa çempionatına yekun vurulub

Tallində sumo üzrə XXIII Avropa çempionatına yekun vurulub.Azərbaycan Sumo Federasiyasından (ASF) Azərtac-a bildiriblər ki, yarışlarda ölkəmizi Camal Feyziyev (115 kq), Avropa çempionları Məhərrəm Eyvazov (60 kq) və Çingiz Səmədov (100 kq), qitə birinciliyinin mükafatçısı Cavid Feyziyev (115 kq) və Azərbaycan çempionu Nahid Vəliyev (60 kq) təmsil ediblər.Yarışın birinci günündə C.Feyziyev mütləq və 115 kiloqramdan yuxarı çəki dərəcələrində Avropa çempionu olub. Çempionatın ikinci günündə Ç.Səmədov 100 kiloqram çəki dərəcəsində qitə birinciliyinin qalibi adını qazanıb. C.Feyziyev isə 23 yaşadək idmançılar arasında mütləq çəki dərəcəsində gümüş, 115 kiloqramdan yuxarı çəki dərəcəsində isə bürünc medala layiq görülüb.Yarışların sonunda Avropa Sumo Federasiyasının vitse-prezidenti, ASF-in prezidenti Samir Abdullayev Avropa Sumo Federasiyasının prezidenti Dariuş Rozum tərəfindən sumo üzrə 5-ci Dan sertifikatı ilə təltif olunub.Çempionatda qarşılaşmaların idarə olunmasında Azərbaycanı beynəlxalq dərəcəli hakim Rəsul Həsənov təmsil edib.Qeyd edək ki, Avropa çempionatında 17 ölkədən 300-dən çox idmançı gücünü sınayıb.xeber100.com

İngiltərə Premyer Liqasında 35-ci turun oyunu keçirilib

Aprelin 21-də futbol üzrə İngiltərə Premyer Liqasında 35-ci turun növbəti oyunu keçirilib.Azərtac xəbər verir ki, “Everton” öz meydanında “Mançester Yunayted” klubunu qəbul edib. Görüş meydan sahiblərinin 4:0 hesablı qələbəsi ilə başa çatıb.“Everton”un heyətində Ricarlison (13), Qilfi Siqurdsson (28), Luka Din (56) və Teo Volkot (56) fərqləniblər.Bu qələbə sayəsində “Everton” 49 xalla 9-cu, “Mançester Yunayted” isə 64 xalla 6-cı yerdə qərarlaşıb.xeber100.com

Türkiyə Superliqasının XXIX turu çərçivəsində

Aprelin 21-də futbol üzrə Türkiyə Superliqasının XXIX turu çərçivəsində “Başakşəhər” doğma meydanda “Rizəspor”u qəbul edib.Azərtac xəbər verir ki, “Fateh Terim” stadionunda baş tutan görüş hər iki tərəfin qarşılıqlı hücumları ilə yadda qalıb. Görüşün 62-ci dəqiqəsində “Rizəspor”un hücumçusu Vedat Muriqi hesabı açıb. İstanbul klubu isə 90-cı dəqiqədə Edin Viskanın onbirmetrlik cərimə zərbəsindən vurduğu qolla hesabı bərabərləşdirib. Beləliklə “Başakşəhər” və “Rizəspor” oyununda qalib müəyyənləşməyib. Hal-hazırda “Başakşəhər” turnir cədvəlinə 62 xalla liderlik edir.Günün digər oyununda isə “Alanyaspor” səfərdə “Fənərbağça”nı 1:0 hesabla məğlub edib. Oyunda yeganə qolu 57-ci dəqiqədə “Alanyaspor”un hücumçusu Efecan Karaca vurub.“Ankaragücü” ilə “Konyaspor” matçında isə qapılara qol vurulmayıb.Türkiyə Superliqasında XXIX turun son oyunu aprelin 22-də “Sivasspor” və “Beşiktaş” arasında keçiriləcək.xeber100.com

UEFA Avropa Liqasının “KİA Kubok Turu” keçirilir

Moskvadakı "Aviapark" ticarət-əyləncə mərkəzində UEFA Avropa Liqasının “KİA Kubok Turu” keçirilir.Tədbirin ilk günündə rusiyalı tanınmış futbolçu Andrey Arşavin, bu gün isə turnirin bu il mayın 29-da Bakıda keçiriləcək final qarşılaşmasının səfirləri – futbol veteranı Vəli Qasımov və hazırda Samara şəhərinin "Krılya Sovetov" klubunda çıxış edən, Rusiya millisinin sabiq üzvü Aleksandr Səmədov iştirak edib.Sərgidə iştirak edən azərbaycanlı tələbələrlə görüşən futbolçular onların suallarını cavablandırıb, futbolla bağlı maraqlı fikir mübadiləsi aparıblar. Sonra görüş futbol azarkeşləri ilə daha geniş formatda davam etdirilib.Azərtac AFFA-nın saytına istinadla xəbər verir ki, Vəli Qasımov və Aleksandr Səmədov çıxış edərək Bakıda keçiriləcək final oyununun nəinki Azərbaycanda, ümumilikdə regionda futbolun inkişafına təkan verəcəyini və futbola marağın artmasına müsbət təsir göstərəcəyini bildiriblər.UEFA Avropa Liqası Final 2019-un səfirlərinin avtoqraf mərasimi və azarkeşlərlə xatirə şəkilləri çəkdirməsindən sonra viktorina keçirilib. Qalib Bakıda keçiriləcək final oyununa bilet qazanıb.UEFA Avropa Liqasının kuboku Rusiyaya İtaliyanın Milan şəhərindən gətirilib. Martın 9-dan İsveçrənin Cenevrə şəhərindən başlayan kubok səyahəti martın 22-23-də İspaniyanın Sevilya, martın 29-30-da Almaniyanın Berlin, aprelin 5-də və 6-da İngiltərənin paytaxtı London, aprelin 12-də isə İtaliyanın Milan şəhərində davam edib. Mayın 10-da Fransa paytaxtı Parisdə olacaq UEFA Avropa Liqası kuboku mayın 16-dan etibarən yenidən Bakıya gətiriləcək və final gününə qədər ölkəmizdə olacaq. UEFA Uşaq Fondu ilə birgə keçirilən kubok turu, eyni zamanda, xeyriyyə məqsədi daşıyır. Kubokun sərgiləndiyi şəhərlərdə toplanan futbol ayaqqabıları İordaniyada məskunlaşmış yeniyetmə və gənc Suriya qaçqınlarına veriləcək.xeber100.com

Şahmatçılar arasında on birinci turun oyunlarına start verilib

Aprelin 22-də Antalyada qadın şahmatçılar arasında Avropa çempionatının on birinci turunun oyunlarına start verilib.Azərtac xəbər verir ki, ötən turu şahmatçılarımızdan üçü - Ülviyyə Fətəliyeva (6,5 xal), Nərmin Söyünlü (5 xal), Fidan Ağasıyeva (4,5 xal) qələbə ilə başa vurublar. Günay Məmmədzadə (6,5 xal), Xanım Balacayeva (6 xal), Gülnar Məmmədova (5 xal) heç-heçə ediblər. Türkan Məmmədyarova (6 xal), Xəyalə Abdulla (5 xal), Zeynəb Məmmədyarova (4,5 xal), Gövhər Beydullayeva (4,5 xal) isə məğlub olublar.On turdan sonra 8 xal toplayan ukraynalı şahmatçı İnna Qaponenko ilk pillədədir.On bir turdan ibarət yarışda 32 ölkədən 130-dan çox şahmatçı mübarizə aparır. Ölkəmizi yarışda 10 şahmatçı təmsil edir. Turnir cədvəlinin reytinq favoriti rusiyalı Aleksandra Qoryaçkinadır (2534).xeber100.com

“Yuventus” klubu 8-ci dəfə İtaliyanın çempionu olub

İtaliyanın "Yuventus" futbol klubu ardıcıl olaraq 8-ci dəfə İtaliyanın çempionu olub.Trend-in məlumatına görə, İtaliya Çempionatının 33-cü turunda "qoca senyora" öz meydanında "Fiorentina"ya 2:1 hesabı ilə qalib gəlib və vaxtından əvvəl çempion adını qazanıb."Yuventus"un heyətindən Aleks Sandro (37-ci dəqiqə) fərqlənib, "Fiorentina"dan isə Nikola Milenkoviç (6-cı dəqiqə) və öz qapısına qolu vuran Herman Pesselya (53-cü dəqiqə) fərqləniblər.Yuventus 87 xal toplayıb və çempionatın bitməsinə 5 tur qalmış onun izləyicisi "Napoli" (67 xal) üçün əlçatmaz olub.xeber100.com

“Mançester Yunayted” futbol klubu “Everton”un qonağı olub

İngiltərə Premyer Liqasında 35-ci turun oyunları davam edir.Milli.az xəbər verir ki, "Mançester Yunayted" bu tur səfərdə "Everton"un qonağı olub. "Qırmızı şeytanlar" rəqibinə 0:4 hesabı ilə uduzub. 21 aprel "Everton" - "Mançester Yunayted" - 4:0 Qollar: Rişarlison, 13 (1:0), Q. Siqurdsson, 28 (2:0), L. Din, 56, T. Uolkott, 64 (4:0) Qeyd edək ki, "Mançester Yunayted" bu məğlubiyyətdən sonra 64 xalla 6-cı pillədə qalıb. Xallarının sayını 49-a çatdıran "Everton" isə 7-ci sıraya yüksəlib. Turnir cədvəlinə isə 86 xalla "Mançester Siti" başçılıq edir. Bir xal az toplayan "Liverpul" isə 2-cidir.xeber100.com

“Fənərbağça” klubu bir neçə futbolçuyla yollarını ayıracaq

Türkiyənin "Fənərbağça" klubu mövsümün sonunda bir neçə futbolçusuyla yollarını ayıracaq.Milli.az xəbər verir ki, Super Liqa təmsilçisi Karlos Kameni, Martin Şkrtel, Roman Noyştadter, Şener Özbayraklı, İsmayıl Köybaşı, Yassin Benzia, Tolqa Ciğerci, İslam Slimani və Andre Ayyu ilə yollarını ayıracaq.Roberto Soldadoun durumu isə şübhəlidir. İspan hücumçuya yaxşı təklif gələcəyi təqdirdə, satılacaq. Komandanın digər hücumçusu Mixael Frayın isə icarəyə göndəriləcəyi gözlənilir."Fənərbağça" Super Liqada 28 turdan sonra 33 xalla 14-cü sırada qərarlaşıb.xeber100.com

“AGF Junior Trophy” beynəlxalq turnirində

"AGF Junior Trophy" beynəlxalq turnirinin Belarusdan olan iştirakçısı Kseniya Steşits öz çıxışından məmnun qaldığını bildirib.İdmançı həm paytaxtımızla, həm də Milli Gimnastika Arenasında təşkil olunmuş oyunlarla bağlı təəssüratlarını Trend-lə paylaşıb:"İştirak etdiyim digər yarışlarla müqayisə etsək, Bakıdakı çıxışımdan razı qaldım. Özümü topladım və bütün tapşırıqları yaxşı yerinə yetirməyə çalışdım. Bakıya ilk dəfə gəlirəm və burada hər şey xoşuma gəldi. Buradakı Milli Gimnastika Arenası çox gözəldir, tamaşaçıların dəstəyi isə adama daha da güc verir. Yarışlar hələ davam edir və mən finala çıxmağa ümid edirəm".K.Steşits şəhərlə hələ yaxşı tanış olmağa imkanı olmadığını, bazar günü Bakıda gəzintiyə çıxacağını da bildirib.Qeyd edək ki, Bakıda Milli Gimnastika Arenasında bədii gimnastika üzrə 2-ci "AGF Junior Trophy" beynəlxalq turniri keçirilir. Yarışda 20 ölkədən 130-a yaxın gənc bədii gimnast iştirak edir.Dünya Kubokundan bir neçə gün öncə (26-28 aprel) keçirilən gənclərin yarışında Beynəlxalq Gimnastika Federasiyasının (FIG) qaydalarında əsasən, yalnız 2004-2006-cı il təvəllüdlü gimnastlar çıxış edirlər. İştirakçılar həm fərdi, həm də qrup hərəkətləri proqramında mübarizə aparırlar.Ayın 21-dək davam edəcək yarışda qaliblər çoxnövçülük və ayrı-ayrı alətlər üzrə müəyyənləşəcək.Ölkəmizi bu turnirdə fərdi gimnastlar Nərminə Səmədova, Nərmin Bayramova, 2018-ci il Avropa çempionatının gənclər arasında bürünc medalçısı Arzu Cəlilova, qrup komandasının tərkibində isə Mədinə Əsədova, Ləman Əlimuradova, Selcan Hacızadə, Milana Əkbərova və Fəridə Səfiyarzadə təmsil edirlər.xeber100.com

Avropa çempionatının səkkizinci turunun oyunları keçirilir

Antalyada qadın şahmatçılar arasında Avropa çempionatının səkkizinci turunun oyunları keçirilir.Azərtac xəbər verir ki, Azərbaycan şahmatçılarından yalnız Türkan (4,5 xal) və Zeynəb Məmmədyarovalar (4 xal) ötən turu qələbə ilə başa vurublar. Xanım Balacayeva (4,5 xal), Günay Məmmədzadə (4,5 xal), Xəyalə Abdulla (3 xal) heç-heçə ediblər. Digər təmsilçilərimiz isə məğlub olublar.Yeddi turdan sonra 6 xal toplayan rusiyalı şahmatçı Alina Kaslinskaya liderliyini davam etdirir.On bir turdan ibarət yarışda 32 ölkədən 130-dan çox şahmatçı mübarizə aparır. Ölkəmizi yarışda 10 şahmatçı təmsil edir. Turnir cədvəlinin reytinq favoriti rusiyalı Aleksandra Qoryaçkinadır (2534).Ümumi mükafat fondu 60 min avro olan turnirə aprelin 21-də yekun vurulacaq.xeber100.com