“Zirə” futbol klubunun iki legioneri milli komandaya dəvət alıb

Bakının “Zirə” klubunun iki legioneri milli komandaya dəvət alıb. Bunlar İssa Cibriela və Toni Qomesdir. Cibriela Niger, Qomes isə Qvineyu-Bisau yığmasına çağırılıb. Niger yığması Afrika Millətlər kuboku yarışlarının seçmə mərhələsində martın 23-də və 27-də Əlcəzairlə qarşılaşacaq. Qvineya-Bisau isə həmin yarışda Nigeriyaya (24 və 27 mart) rəqib olacaq.xeber100.com

İdman gimnastikası üzrə dünya kuboku yarışları keçiriləcək

Martın 9-dan 12-dək Bakıda idman gimnastikası üzrə dünya kuboku yarışları keçiriləcək. Azərbaycan Gimnastika Federasiyası xəbər verir ki, yarışlarda iştirak edəcək İsrail yığmasının heyəti açıqlanıb. Heyətdə “Tokio-2020” Yay Olimpiya Oyunlarının qalibi Artyom Dolqopyat, Eyal İndiq, Andrey Medvedev, Aleksandr Myakinin və Lihi Raz yer alıblar. Turnirdə rekord sayda - 49 ölkədən 170 idmançının iştirakı gözlənilir. Dörd gün davam edəcək yarışların yekununda ən yüksək icra xalını toplamış gimnastlara ənənəvi “AGF Trophy” kuboku təqdim olunacaq.xeber100.com

Azərbaycan Futzal Federasiyası: Azərbaycan kubokunun püşkü atılacaq

Martın 10-da Azərbaycan kubokunun 1/8 final mərhələsinin püşkü atılacaq. Azərbaycan Futzal Federasiyası xəbər verir ki, püşkatma mərasimi Bakı İdman Sarayında saat 12:00-da başlayacaq. Qeyd edək ki, bu mərhələdə Araz-Naxçıvan, “Baku Fire”, “Neftçi” İK, “Record club”, “Alyans”, U-19, “Baku Fire-3”, U-17, MUM, “Flaqman”, “Advokat”, “Şamaxı”, “Dalğa”, ADBTİA, “Baku Fire-2” ilə bərabər, Alyans Qrup - Rəvan matçı barədə İntizam Komitəsinin qərarına uyğun olaraq bu komandalardan biri iştirak edəcək.xeber100.com

Azərbaycan Yüksək Liqasında bu gün IV dövrəyə start verilib

Qadın voleybolçular arasında Azərbaycan Yüksək Liqasında bu gün IV dövrəyə start verilib. Onuncu turun ilk matçında “Azərreyl” və “Murov” komandaları arasında olub. Tay-brekə kimi davam edən matçın ilk hissəsində 25:18 hesabı ilə “Azərreyl” qalib gəlib. İkinci setdə toparlanan “Murov” 25:23 hesabı ilə rəqibini məğlub edərək ümumi hesabı bərabərləşdirib - 1:1. Üçüncü set isə “Azərreyl”in xeyrinə başa çatıb - 25:18. Matçın dördüncü hissəsini “Murov” 25:22 hesabı ilə aktivinə yazdırsa da, həlledici setdə “Azərreyl” daha səhvsiz oynayaraq qalib olub (15:10) və görüşün hesabını rəsmiləşdirib - 3:2. Azərbaycan Voleybol Mərkəzində təşkil olunan X turun son qarşılaşması “Abşeron” və UNEC komandaları arasında olub. Bu görüşdə isə qalib üç setdə müəyyənləşib. Turnir cədvəlində üçüncü olan Famil Ağayevin komandası bu matçda 25:21, 25:23, 25:10 hesabı ilə qalib gələrək aktivinə üç xal yazdırıb və ikinci pilləyə yüksəlib. Onuncu turdan sonra “Azərreyl” 25 xalla turnir cədvəlində liderliyini davam etdirir. “Abşeron”un 18, “Murov”un 17 xalı var. Cədvəldə sonuncu pillədə olan UNEC-in isə xalı yoxdur.xeber100.com

Həndbolçular arasında Avropa çempionatının püşkü atılıb

Bu il Bakıda keçiriləcək 17 yaşlı qız həndbolçular arasında Avropa çempionatının püşkü atılıb. Avstriyanın paytaxtı Vyanada təşkil edilən mərasimdə Azərbaycan millisinin də rəqibləri bəlli olub. Milli yığmamız Bosniya və Herseqovina, Sloveniya, Litva və Gürcüstanla birlikdə A qrupunda mübarizə aparacaq. B qrupunda isə İspaniya, İsrail, Yunanıstan, Lüksemburq və Farer adaları seçmələri qüvvələrini sınayacaq. Qeyd edək ki, Avropa çempionatı avqustun 5-13-də keçiriləcək.xeber100.com

Peşəkar Futbol Liqası tərəfdaşlıq müqaviləsi imzalayıb

Peşəkar Futbol Liqası (PFL) və “Modern Hospital” arasında tərəfdaşlıq müqaviləsi imzalanıb. PFL xəbər verir ki, müqaviləni liqanın media və marketinq direktoru Sənan Abdullayev və “Modern Hospital”ın marketinq və ictimaiyyətlə əlaqələr şöbəsinin müdiri Azər Rza imzalayıblar. Sənan Abdullayev bildirib ki, idman, xüsusən də futbol sahəsində böyük təcrübəyə malik “Modern Hospital”la tərəfdaş olmaq çox xoşdur. Bilirik ki, futbol klubları ilə əməkdaşlıq etmisiniz. Bu, bizim üçün də sevindirici haldır. Qarşıda geniş planlarımız olduğundan bizi daha gərgin iş gözləyir. Əməkdaşlarımızın bu yeniliklərə daha sağlam, daha hazırlıqlı olması üçün sizinlə tərəfdaşlığımızın önəmli rol oynayacağına əminik. Ümid edirik ki, bu anlaşmadan hər iki tərəf razı qalacaq və tərəfdaşlığımız uzunmüddətli olacaq. Azər Rza da öz növbəsində anlaşmadan məmnunluq ifadə edərək deyib: “İdman sahəsində fəaliyyət göstərən müəssisələrlə əməkdaşlıq bizim üçün artıq ənənə halını alıb. Bu sahədə beynəlxalq təcrübəyə sahib tibbi personalımıza güvənimiz sonsuzdur. Bunun məntiqi nəticəsidir ki, hər il onlarla beynəlxalq idman yarışının tibbi tərəfdaşı oluruq”. Tərəflər arasında tərəfdaşlıq müqaviləsi 1 il müddətinə nəzərdə tutulub.xeber100.com

Azərbaycan çempionatlarında növbəti oyunların vaxtı dəqiqləşib

Kişi və qadın voleybolçular arasında Azərbaycan çempionatlarında növbəti oyunların vaxtı dəqiqləşib. Dördüncü dövrənin oyunlarına martın 2-də və 3-də start veriləcək. Azərbaycan Voleybol Federasiyası xəbər verir ki, martın 2-də qadın voleybolçular arasında Yüksək Liqada X turun oyunları keçiriləcək. Həmin gün ilk olaraq meydana “Azərreyl” və “Murov” klubları çıxacaqlar. Görüş saat 16:00-da başlanacaq. Turun növbəti qarşılaşmasında isə “Abşeron” və UNEC üz-üzə gələcəklər. Bu oyunun start fiti isə saat 18:00-da çalınacaq. Kişi voleybolçular arasında Yüksək Liqada X turun oyunları martın 3-də keçiriləcək. Voleybol Mərkəzində təşkil olunacaq turun ilk matçı saat 16:00-da “Neftçi” və “Murov” komandaları arasında olacaq. Saat 18:00-da isə MOİK - “Xarı bülbül” dueli start götürəcək.xeber100.com

Beynəlxalq Şahmat Federasiyası yeni reytinq siyahısını açıqlayıb

Beynəlxalq Şahmat Federasiyası (FIDE) yeni reytinq siyahısını açıqlayıb. FIDE-nin rəsmi saytında yerləşdirilən reytinqdə Azərbaycan şahmatçısı Teymur Rəcəbov yenidən ilk onluğa qayıdıb. Hesabında 2747 xalı olan 36 yaşlı qrosmeyster 10-cu pillədə yer alıb. Milli komandanın digər qrosmeysteri Şəhriyar Məmmədyarov 2738 xalla 15-ci pillədə qərarlaşıb. Şahmatçılarımızdan Qədir Hüseynov (2661) 83-cü, Rauf Məmmədov (2646) isə 100-cü yerdədir. Siyahıya əvvəlki kimi norveçli dünya çempionu Maqnus Karlsen (2852) başçılıq edir. Rusiyalı Yan Nepomnyaşi (2795) ikinci, çinli Liren Dinq (2788) üçüncüdür. Qadın şahmatçılardan ibarət Azərbaycan yığmasının üzvlərindən Günay Məmmədzadə (2472) 22-ci, Ülviyyə Fətəliyeva (2427) 42-ci, Gövhər Beydullayeva (2388) 61-ci, Xanım Balacayeva (2372) 70-ci, Gülnar Məmmədova (2358) 88-ci pillədədirlər. Qadınların reytinqinə çinli Xou Yifan (2628) başçılıq edir.xeber100.com

Azərbaycan Şahmat Federasiyası silsilə tədbirlər keçirəcək

. Bu barədə federasiyadan məlumat verilib. Bildirilib ki, federasiya “Heydər Əliyev İli”nə həsr olunan geniş tədbirlər planını təsdiqləyib. İl ərzində paytaxt Bakıda və digər şəhərlərdə Ulu Öndərə həsr olunan yerli və beynəlxalq turnirlər təşkil ediləcək. Silsilə tədbirlər sırasında Bakıda və digər regionlarda 100 lövhədə eyni anda seanslar, rapid yarışlar, tanınmış azəraycanlı şahmatçıların gənclərlə görüşü, beynəlxalq OPEN turniri və digər tədbirlər daxil edilib. Qeyd edək ki, Azərbaycan Şahmat Federasiyası ölkədə fəaliyyət göstərən şahmat məktəblərinə qədim oyunla bağlı ləvazimatların təqdim olunmasına başlayıb. Artıq Quba və Bakının bir neçə məktəbinə müvafiq şahmat vəsaitləri hədiyyə olunub. Azərbaycanda zəngin tarixə malik şahmatın inkişaf strategiyasının əsası ötən əsrin 70-ci illərində Ümummilli Lider Heydər Əliyev tərəfindən qoyulub. Ulu Öndər şahmatın inkişafını daim diqqət mərkəzində saxlayıb. Məhz Heydər Əliyevin təşəbbüsü ilə respublikada ilk şahmat məktəbləri inşa olunub, istedadlı şahmatçılara müxtəlif yarışlarda iştirak etmək üçün şərait yaradılıb. Ulu Öndərin qayğısı və dəstəyi sayəsində dünya idmanına Şəhriyar Məmmədyarov, Teymur Rəcəbov, Vüqar Həşimov və digər nəhəng şahmatçılar bəxş olunub.xeber100.com

İdman Gününə həsr olunan stolüstü tennis turnirinə yekun vurulub

Azərbaycan dövlət qurumlarının əməkdaşları arasında 5 Mart - Bədən Tərbiyəsi və İdman Gününə həsr olunan stolüstü tennis turnirinə yekun vurulub. Bu barədə Gənclər və İdman Nazirliyinin mətbuat xidmətindən məlumat verilib. Bildirilib ki, yarışda 44 qurumdan 104 kişi, 43 qadın stolüstü tennis həvəskarı şəxsi mübarizədə bacarığını göstərib. İki gün davam edən yarışın nəticələrinə əsasən qadınlar arasında Svetlana Kayumova (SOCAR) baş mükafata layiq görülüb. Rəna Vahabzadə (Mədəniyyət Nazirliyi) ikinci, Leyla Bağırova (Rəqəmsal İnkişaf və Nəqliyyat Nazirliyi) ilə Yeganə Əlizadə (Mərkəzi Ordu İdman Klubu) üçüncü yeri tutub. Kişilərin turniri Əli Bayramovun (Fövqəladə Hallar Nazirliyi) qələbəsi ilə nəticələnib. Vüqar İbrahimov (Fövqəladə Hallar Nazirliyi) fəxri kürsünün ikinci, Yaşar Mövlamovla (Dövlət Turizm Agentliyi) və Fəxrəddin İsmayılov (Dövlət Təhlükəsizliyi Xidməti) üçüncü pilləyə qalxıb. Gənclər və İdman Nazirliyi və Azərbaycan Stolüstü Tennis Federasiyasının təşkil etdiyi turnirdə fərqlənən iştirakçılar diplom və mükafatlarla təltif olunublar.xeber100.com