İdman-Sağlamlıq Klubunun təşkilatçılığı ilə…

Fövqəladə Hallar Nazirliyinin (FHN) İdman-Sağlamlıq Klubu və FHN işçilərinin həmkarlar ittifaqının təşkilatçılığı ilə nazirliyin qurumları arasında voleybol çempionatı keçirilib.Azərtac xəbər verir ki, çempionatın ilk üç günü nazirliyin Tikintidə Təhlükəsizliyə Nəzarət Dövlət Agentliyinin idman zalında, yarımfinal və final mərhələsi isə Azərbaycan Voleybol Federasiyasında təşkil olunub.Oktyabrın 26-da final görüşündə FHN-in Dövlət Yanğından Mühafizə Xidmətinin komandasını (DYMX) 3:0 hesabı ilə məğlub edən Tikintidə Təhlükəsizliyə Nəzarət Dövlət Agentliyinin kollektivi (TTNDA) yarışın qızıl medalına layiq görülüb.Sonda qalib komandalara kubok, medal və diplomlar təqdim edilib.xeber100.com

İspaniya çempionatının 21-ci turunda…

Beynəlxalq Futbol Federasiyası (FlFA) İspaniya çempionatının 21-ci turunda “Barselona” ilə “Jirona” arasında matçın ABŞ-da keçirilməsini qadağan etmək niyyətindədir.İspaniyanın “Sport” saytı bildirir ki, La Liqa bu ilin yayında futbolçuların həmkarlar ittifaqları və klublarla məsləhətləşmədən İspaniya çempionatının bəzi matçlarının ABŞ-da və Kanadada keçirilməsi barədə 15 illik kontrakt imzalayıb.Liqanın üzvü olan bütün 20 komandanın kapitanları avqust ayında növbədənkənar yığıncaqda bu qərardan narazı olduqlarını bildirib və Liqa rəhbərliyini tətil keçirməklə hədələyiblər. Sentyabrın əvvəlində “Barselona”, “Jirona” və İspaniya La Liqası gələn il yanvarın 26-da milli birinciliyin 21-ci turundakı matçın Mayamidəki “Hard Rock” stadionunda keçirilməsi üçün sorğu veriblər.İspaniya Kral Futbol Federasiyası (RFEF) bundan əvvəl həmin oyunun ABŞ-da keçirilməsinin əleyhinə olduğunu bildirib. TASS xəbər verir ki, çox güman, FIFA da RFEF-i dəstəkləyəcək və çempionatın həmin görüşünün Mayamidə keçirilməsini qadağan edəcək.İspaniya çempionatında 9 turdan sonra 18 xal toplamış “Barselona” turnir cədvəlində liderdir, aktivində 13 xal olan “Jirona” isə 13-cü yeri tutur.xeber100.com

“Qarabağ” futbol klubu “Vorskla” klubu ilə qarşılaşacaq

Oktyabrın 25-də Ağdamın “Qarabağ” klubu futbol üzrə UEFA Avropa Liqasının qrup mərhələsinin üçüncü turunda Ukraynanın “Vorskla” klubu ilə qarşılaşacaq.Azərtac xəbər verir ki, qarşılaşmanı İsraildən olan hakimlər briqadası idarə edəcək. Matçın referisi Roi Raynşrayber olacaq. Danni Krasiku və David Elias Bitton yan xətt hakimi funksiyasını yerinə yetirəcəklər.Alon Yefet ilə Daniel Bar Natan əlavə köməkçi, Amihay Yehoşua Mozes isə dördüncü hakim olacaq.Qarşılaşmanın hakim-inspektoru rusiyalı Sergey Zuyev, UEFA nümayəndəsi isə polşalı Kazimirj Olesjekdir.“Qarabağ” ilk turda səfərdə “Sportinq”ə 0:2, növbəti görüşdə Bakı Olimpiya Stadionunda “Arsenal”a 0:3 hesabı ilə məğlub olub.Qeyd edək ki, görüş Bakı Olimpiya Stadionunda saat 20:55-də başlayacaq.xeber100.com

UEFA Çempionlar Liqasında namizədlərin siyahısı açıqlanıb

Oktyabrın 25-də UEFA Çempionlar Liqasında həftənin ən yaxşı oyunçusu və ən yaxşı qolunun müəllifi adına namizədlərin siyahısı açıqlanıb.Azərtac UEFA-nın saytına istinadla xəbər verir ki, qitənin ən nüfuzlu klub turnirinin qrup mərhələsinin üçüncü turundakı qarşılaşmalarda göstərdikləri oyuna görə həftənin ən yaxşı futbolçusu adına bosniya və herseqovinalı Edin Ceko (“Roma”, İtaliya), misirli Məhəmməd Salah (“Liverpul”, İngiltərə), ispaniyalı David Silva (“Mançester Siti”, İngiltərə) və mərakeşli Aşraf Hakimi (“Borussiya” Dortmund, Almaniya) iddialıdırlar.Həftənin ən yaxşı qolu nominasiyasının qalibi isə PSJ klubunun argentinalı hücumçusu Anxel Di Mariya, “Real Madrid”in braziliyalı müdafiəçisi Marselo, “Mançester Siti”nin portuqaliyalı hücumçusu Bernardo Silva və “Napoli” klubunun hücumçusu Lorenso İnsinyanın vurduqları qollar arasından seçiləcək.Qaliblər UEFA-nın saytında aparılan səsvermə nəticəsində oktyabrın 27-də müəyyənləşəcək.xeber100.com

Budapeştdə güləş üzrə dünya çempionatı davam edir

Macarıstanın paytaxtı Budapeştdə güləş üzrə dünya çempionatı davam edir.Azərtac xəbər verir ki, çempionatın beşinci günündə qadınlardan ibarət yığmamızın son 4 üzvü mübarizəyə qatılıb. Azərbaycan güləşçilərindən ikisi 1/8 finaldan, ikisi isə təsnifat mərhələsindən yarışa başlayıb.Qadınlardan ibarət yığmamızın kapitanı Mariya Stadnik (50 kq) 1/8 finalda isveçli rəqibinə vaxtından əvvəl qalib gəlib. Millimizin ən titullu güləşçisi 1/4 finalda dünya çempionu və Rio Olimpiadasının bürünc medalçısı olan çinli rəqibinə də heç bir şans tanımayıb və adını yarımfinala yazdırıb. Finalın bir addımlığında 4 il əvvəl yeniyetmələr arasında Olimpiya çempionu olan Şimali Koreya təmsilçisi ilə çətin qarşılaşmadan qalib ayrılan Stadnik karyerasında 4-cü dəfə dünya çempionatının finalına vəsiqə qazanıb. Mariya oktyabrın 25-də qızıl medal uğrunda Yaponiya güləşçisi ilə mübarizə aparacaq.Anjela Doroqanın (53 kq) da startı parlaq alınıb. Yığmamızın üzvü 1/8 finalda Çin Taypeyindən olan güləşçini çətinlik çəkmədən məğlub edib. Amerikalı rəqiblə görüş ağır keçib və güləşçimiz məğlub olub. Rəqib finala çıxdığından Anjela təsəlliverici görüşə qatılıb və qazaxıstanlı idmançıya məğlub olub.Alyona Kolesnik (57 kq) ilk mərhələdə son Olimpiya və ikiqat dünya çempionu ilə üz-üzə gəlib. Güləşçimiz amerikalı rəqibinə ikinci hissədə tuşe ilə qalib gəlib. Ancaq növbəti mərhələdə çinli həmkarına müqavimət göstərə bilməyib. Rəqib finala çıxdığı üçün Alyona təsəlliverici görüşdə iştirak hüququ qazanıb və Hindistan təmsilçisinə uduzub.Elmira Qəmbərovanın (62 kq) Bolqarıstan təmsilçisi ilə görüşü gərgin idman mübarizəsi şəraitində keçib. Hesabda 3:0 önə keçən həmyerlimiz üstünlüyünü qoruya bilməyib. Sonda bərabərlik qeydə alınsa da, rəqib ilk hissənin sonunda 4 xallıq fəndi dəqiq icra etdiyindən növbəti mərhələyə yüksəlib. Ancaq rəqibin finaladək irəliləməsi güləşçimizə təsəlliverici görüşdə özünü göstərmək imkanı verib. E.Qəmbərova təsəlliverici görüşdə çinli rəqibinə də yenilib.xeber100.com

Beynəlxalq şahmat turnirinin dördüncü raundunda

Men adasında (Böyük Britaniya) keçirilən beynəlxalq şahmat turnirinin dördüncü raundunda Azərbaycan qrossmeystri Arkadi Naydiç rusiyalı şahmatçı Pavel Trequbova qalib gəlib.Azərtac xəbər verir ki, Azərbaycan nümayəndəsinin ağ fiqurlarla oynadığı bu turda 40-cı gedişdən sonra onun rəqibi təslim olub.Yarışların dörd turundan sonra hərəyə dörd xal toplamış Arkadi Naydiç və Çin şahmatçısı Van Hao liderdirlər. Hindistanlı Santoş Qujrati Vidit, onun həmyerlisi Abxicit Qupta, fransız Maksim Vaşye-Laqrav, polyak Radoslav Voytaşek, rumın Mirçea-Emilyan Pırliqras, macar Riçard Rapport və amerikalı Cefferi Syun liderlərdən yarım xal geri qalır.Beşinci tur üçün püşkatmanın nəticələrinə görə, turnirin liderləri öz aralarında görüşəcəklər.Men adasında keçirilən beynəlxalq şahmat turniri oktyabrın 28-də başa çatacaq. 165 oyunçunun iştirak etdiyi turnir İsveçrə sistemi üzrə doqquz turdan ibarət olacaq.Kişilər arasında birinci mükafatın məbləği 50 min funta, ikinci mükafat 25 min, üçüncü mükafat 12500, qadınlar arasında birinci mükafatın məbləği 7 min funta bərabərdir.Oyunlarda nəzarət vaxtı belə müəyyən edilib: ilk 40 gediş üçün 100 dəqiqə, sonrakı 20 gediş üçün 50 dəqiqə, daha sonra partiyanın sonuna qədər 15 dəqiqə və hər gediş üçün əlavə 80 saniyə.xeber100.com

Cüdo üzrə “Böyük dəbilqə” turniri keçiriləcək

Oktyabrın 27-dən 29-dək Əbu-Dabidə cüdo üzrə “Böyük dəbilqə” turniri keçiriləcək.Azərtac xəbər verir ki, reytinq xarakterli turnirdə ölkəmizi Oruc Vəlizadə (60 kq), Telman Vəliyev (73 kq), Tural Səfquliyev, Məmmədəli Mehdiyev (hər ikisi 90 kq), Elmar Qasımov (100 kq), Şahin Qəhrəmanov (100 kq-dan yuxarı), Aişə Qurbanlı (48 kq) və İrina Kindzerskaya (78 kq-dan yuxarı) təmsil edəcəklər.Qeyd edək ki, turnirdə 64 ölkədən 400-dək cüdoçu birincilik uğrunda mübarizə aparacaq.xeber100.com

Bədii gimnastika üzrə növbəti yarış baş tutacaq

Noyabrın 2-dən 3-dək Bakı Olimpiya İdman Kompleksində bədii gimnastika üzrə növbəti yerli yarış baş tutacaq. Bu dəfə zərif gimnastlar öz güclərini Bakı çempionu adı uğrunda mübarizədə sınayacaqlar.Azərtac xəbər verir ki, sayca 25-ci olan çempionatda Ocaq Sport Klubu, Bakı Gimnastika Məktəbi, Respublika Kompleks İdman Məktəbi, Su İdman Sarayı, AyUlduz Klubu, Daxili İşlər Nazirliyinin İdman Cəmiyyəti, “Sərhədçi” Olimpiya İdman Mərkəzi və Zabrat İdman Klubunun yetirmələri iştirak edəcəklər.İki gün davam edəcək turnirdə 100-dək gimnastın çıxış edəcəyi gözlənilir. Yarışların ilk günü məhz balaca gimnastların çıxışları ilə əlamətdar olacaq. Belə ki, azyaşlı gimnastlar alətsiz, ip, halqa ilə öz proqramlarını təqdim edəcəklər və günün sonunda onlar fərdi çoxnövçülükdə öz aralarında qalibləri müəyyənləşdirəcəklər.Növbəti yarış gününə isə yeniyetmələr start verəcəklər. Onlar da hakimlər qarşısına alətsiz, ip və halqa ilə çıxaraq, yüksək xal almaq üçün çalışacaqlar. Gənclər və böyüklər yaş kateqoriyasına bölünmüş gimnastlar isə halqa, top, gürzlər və lent ilə proqramlarını icra edəcəklər. Beləliklə, turnirin sonunda bütün alətlər üzrə yekun xal əsasında fərdi çoxnövçülükdə fərqlənmiş gimnastlar fəxri kürsüyə yüksələcəklər.xeber100.com

“Çelsi” futbol klubu müqavilə müddətini uzadıb

İngiltərənin “Çelsi” klubu aparıcı müdafiəçisi Markos Alonso ilə müqaviləni uzadıb.Azərtac xəbər verir ki, 27 yaşlı ispaniyalı futbolçu daha beş il “Çelsi” klubunun şərəfini qoruyacaq. Klub müqavilənin maliyyə tərəflərini açıqlamayıb.“Çelsi” klub ilə yeni müqaviləmə görə, çox xoşbəxtəm. Ümidvaram ki, qarşıdakı illərdə də kluba faydalı olacağam”, – deyə ispaniyalı bildirib.Qeyd edək ki, Markos Alonso “Çelsi” klubuna İtaliyanın “Fiorentina” komandasından 2016-ci ildə transfer olunub.xeber100.com

Stolüstü Tennis Federasiyasının təşkilatçılığı ilə…

Oktyabrın 22-də “Şüa” İdman Sağlamlıq Mərkəzində Azərbaycan Stolüstü Tennis Federasiyasının təşkilatçılığı ilə gənclər və yeniyetmələr arasında Azərbaycan kuboku yarışlarına start verilib.Federasiyadan Azərtac-a bildiriblər ki, şəxsi və komanda xarakteri daşıyan yarışlarda gənclər üzrə dörd qız və dörd oğlan, yeniyetmələr üzrə isə doqquz qız və doqquz oğlan komandası olmaqla, ümumilikdə 100-dək idmançı mübarizə aparacaq.Yarışlara oktyabrın 25-də yekun vurulacaq.xeber100.com