UFC döyüşçülərin yeni reytinq siyahısını açıqlayıb

UFC (Ultimate Fighting Championship) oktyabrın 9-da döyüşçülərin yeni reytinq siyahısını açıqlayıb.Azərtac xəbər verir ki, Həbib Nurməhəmmədov yeni reytinq siyahısında altı pillə irəliləyərək ikinci sıraya yüksəlib. ABŞ-ın Las-Veqas şəhərində keçirilən “UFC 229” turnirində yüngül çəki dərəcəsində irlandiyalı Konor Makqreqor üzərində qələbə qazanaraq çempion titulunu qoruması onun sürətli irəliləyişinə səbəb olub. Konor Makqreqor isə ikinci pillədən səkkizinci pilləyə geriləyib.Qeyd edək ki, UFC-nin yeni reytinq siyahısının birinci pilləsində ağır və orta çəki dərəcələrində döyüşən amerikalı Daniel Kormye qərarlaşıb. Üçüncü yerdə isə digər amerikalı idmançı Ti Ceydir. O, hazırda ən yüngül çəki dərəcəsində çempion kəmərin sahibidir.xeber100.com

Güllə atıcılığı üzrə Avropa kubokunun final yarışları başa çatıb

Portuqaliyanın paytaxtı Lissabonda keçirilən güllə atıcılığı üzrə Avropa kubokunun final yarışları başa çatıb.Güllə atıcılığı üzrə yığma komandanın baş məşqçisi İradə Aşumova Azərtac-a bildirib ki, qitə birinciliyində 25 metr məsafəyə kiçik çaplı tapançadan atəşaçma yarışlarında ölkəmizi Ruslan Lunyov təmsil edib. IV İslam Həmrəyliyi Oyunlarının beşqat çempionu final yarışlarında uğurla çıxış edərək ayrı-ayrı növlər üzrə 581 xalla qızıl və 573 xalla gümüş medal qazanıb.Qeyd edək ki, Ruslan Lunyov dünya çempionatında 10 metr məsafəyə pnevmatik tapançadan atəşaçma yarışlarında 582 xalla beşinci olub. O, bu nəticə ilə “Tokio-2020”yə lisenziya qazana bilməsə də, dünya reytinqində xeyli irəliləyərək 93-cü pillədən 10-cu yerə yüksəlib. Həm 10, həm də 25 metr məsafələrə atəşaçma üzrə dünya reytinqindəki nəticələri onun gələn il Minskdə keçiriləcək II Avropa Oyunlarında iştirakına imkan verir. Belə ki, bu ilin sonunda dünya reytinqində ilk 24-lükdə qərarlaşan atıcılar “Minsk-2019”da iştirak edə biləcəklər.xeber100.com  

Türkiyə Superliqasının VIII turuna yekun vurulub

Oktyabrın 7-də Futbol üzrə Türkiyə Superliqasının VIII turuna yekun vurulub.Turun son oyununda turnir cədvəlinin dördüncü pilləsində yer alan “Beşiktaş” komandası səfərdə “Konyaspor”la qarşılaşıb.Azərtac xəbər verir ki, qarşılıqlı hücumlar şəraitində keçən oyunda hesabı 31-ci dəqiqədə meydan sahibləri açıblar. Domaqoy Vidanın cərimə meydançasında əllə oynamasından sonra qonaqların qapısına penalti təyin olunub. Bu qayda pozuntusuna görə baş hakim “Beşiktaş”lı futbolçuya ikinci sarı vərəqə ilə cəzalandırıb və meydandan qovub. Mustafa Yatabara on bir metrlik cərimə zərbəsini dəqiq yerinə yetirərək, komandasını hesabda irəli çıxardıb - 1:0.Fasilədən sonra baş hakim Ümit Öztürk İstanbul təmsilçisinin qapısına ikinci dəfə penalti təyin edib. Lakin Mustafa Yatabara bu dəfə imkandan yararlana bilməyib.Yetmiş doqquzuncu dəqiqədə “Beşiktaş”ın hücumçusu Vaqner Lov baş zərbəsi ilə hesabı bərabərləşdirib - 1:1. Bundan 1 dəqiqə sonra isə Rayan Babelin ötürməsini qola çevirən Cermeyn Lens komandasını hesabda önə çıxardıb - 2:1. Lakin oyuna əlavə edilmiş dəqiqələrdə ev sahibi komanda Paolo Hurtadonun vurduğu qolla hesaba tarazlıq gətirib - 2:2.Beləliklə, “Beşiktaş” təxminən altmış dəqiqə 10 nəfər oynadığı görüşdə heç-heçə edərək, xallarının sayını 15-ə yüksəldib turnir cədvəlinin üçüncü pilləsinə yüksəlib.Səkkiz oyundan sonra 18 xal toplayan “Qalatasaray” turnir cədvəlində ilk sıradadır. Hər birinin aktivində 15 xal olan “Başakşehir”, “Beşiktaş” və “Kasımpaşa” ikinci-dördüncü yerləri bölüşürlər. On üç xalı olan "Trabzonspor" beşincidir.xeber100.com

Həndbol üzrə Azərbaycan çempionatının ikinci turu başlayıb

Qadınlar arasında həndbol üzrə Azərbaycan çempionatının ikinci turu başlayıb.Azərtac Azərbaycan Həndbol Federasiyasının saytına istinadla xəbər verir ki, turun ilk günündə Gürcüstanın “Olimpiya” komandası ilə qarşılaşan “Azərsu” həndbolçuları 34:21 hesabı ilə asan qələbə qazanıblar.Oktyabrın 13-də keçiriləcək turun digər oyunlarında “Gənclər Birliyi” komandası “Azərsu” ilə, “Azəryol” isə “Qarabağ” kollektivi ilə üz-üzə gələcək.xeber100.com

2018-ci ilin ən yaxşı futbolçularının adları açıqlanıb

FIFA və “France Football” jurnalı 2018-ci ilin ən yaxşı futbolçusuna veriləcək “Qızıl top” mükafatına namizədlərin adlarını açıqlayıb.Azərtac xəbər verir ki, siyahıya ilk olaraq beş namizədin adı daxil edilib. İlk beşlikdə Serxio Aqüero (“Mançester Siti”; Argentina), Qaret Beyl (“Real Madrid”; Uels), Kərim Benzema (“Real Madrid”; Fransa), Alisson Bekker (“Liverpul”; Braziliya), Edinson Kavani (“PSG”; Uruqvay) yer alıblar.Mükafat uğrunda 30 futbolçu mübarizə aparacaq. Qalan namizədlərin adları gün ərzində açıqlanacaq.“Qızıl top” mükafatının təqdimatı dekabrın 3-də Parisdə keçiriləcək. Təqdimetmə mərasimində, həmçinin ilk dəfə olaraq ən yaxşı gənc oyunçu və ən yaxşı qadın futbolçuya da mükafatlar təqdim ediləcək.“France Football” jurnalı 1956-cı ildən etibarən ilin ən yaxşı futbolçusunu təltif edir. Bu mükafatın ilk qalibi ingiltərəli Stenli Metyuz olub. Kriştiano Ronaldo və Lionel Messi bu mükafatı ən çox qazanan futbolçulardır – hərəyə beş dəfə.xeber100.com

Boks Federasiyasının məlumatına görə…

Yeniyetmə boksçulardan ibarət Azərbaycan yığmasının heyətində dəyişiklik edilib. Oktyabrın 8-dən 17-dək Rusiyanın Anapa şəhərində keçiriləcək Avropa birinciliyində ölkəmiz 7 deyil, 8 idmançı ilə təmsil olunacaq.Azərbaycan Boks Federasiyasından Azərtac-a bildiriblər ki, milli komandamız oğlanların yarışı ilə yanaşı, qızların da mübarizəsində çıxış edəcək. Komandamızın heyətinə Zeynəb Rəhimova (57 kq) əlavə olunub. Boksçumuz yarışa baş məşqçi Elbrus Rzayevin rəhbərliyi ilə qatılacaq.Oğlanlardan ibarət yığmamızın baş məşqçisi Vaqif Kazımov qitə çempionatında Əli Zamanov (48 kq), Əzrək Bəbirov (54 kq), Eldar Babayev (60 kq), Elmir Novruzov (63 kq), Mehman Quliyev (70 kq), Murad Allahverdiyev (80 kq) və Əhməd Əhmədova (+80 kq) şans verəcək.Boksçularımız oktyabrın 8-də gecə saatlarında Anapa şəhərinə yola düşəcəklər.xeber100.com

Voleybol komandası dünya çempionatının II mərhələsində

Bu gün voleybolçu qadınlardan ibarət Azərbaycan milli komandası Yaponiyadakı dünya çempionatının II mərhələsində ilk oyununa çıxıb.Milli.az bildirir ki, komandamız İtaliya yığması ilə qarşılaşıb. Görüş rəqibin 3:0 (25:12, 25:19, 15:10) hesablı qələbəsi ilə yekunlaşıb.Millimiz növbəti oyununu oktyabrın 8-də Çin yığmasına qarşı keçirəcək."F" qrupunda İtaliya millisi 18 xalla birinci pillədə qərarlaşıb. ABŞ 16 xalla ikinci, Rusiya 15 xalla üçüncü, Çin 12 xalla dördüncü, Tailand 10 xalla beşinci yerdədir. Hesabında 9 xal olan Türkiyə yığması altıncıdır. Azərbaycan və Bolqarıstan isə 6 xalla yeddinci-səkkizinci pilləni bölüşürlər.Qaydalara görə, ikinci mərhələdə qrup daxilində I-III yerləri tutan komandalar növbəti mərhələyə adlayacaqlar.xeber100.com

“Ştutqart” futbol klubu Bundesliqanın son turunda

Almaniyanın "Ştutqart" klubu Bundesliqanın son turunda "Hannover"ə məğlubiyyətdən sonra (1:3) baş məşqçi Tayfun Korkutla bağlı qərar verib.Milli.az xəbər verir ki, klub rəhbərliyi uğursuz nəticələrə görə baş məşqçi Tayfun Korkut və köməkçiləri İliya Ararik, Steven Çerundolo ilə yollarını ayırdığını açıqlayıb."Ştutqart" bu mövsüm Bundesliqada keçirdiyi 7 oyunda 1 qələbə qazana bilib, 4 oyunda məğlub olub, 2 heç-heçə edib."Ştutqart" bu ilin iyun ayında türk mütəxəssis və köməkçiləri ilə 2020-ci ilədək nəzərədə tutulmuş yeni müqavilə imzalamışdı.xeber100.com

UEFA Millətlər Liqasındakı növbəti iki oyun üçün heyət açıqlanıb

Azərbaycan millisinin UEFA Millətlər Liqasındakı növbəti iki oyun üçün heyəti açıqlanıb.Milli.az xəbər verir ki, baş məşqçi Qurban Qurbanov 23 oyunçuya dəvət göndərib.Həmin futbolçular oktyabrın 11-də səfərdə Farer adaları, 14-də isə Bakı Olimpiya Stadionunda Malta ilə qarşılaşmada baş məşqçinin ixtiyarında olacaqlar."23-lük"dən yalnız 5 nəfər karyerasını ölkə xaricində davam etdirir ki, bunlar Pavel Paşayev, Riçard Almeyda, Dmitri Nazarov, Ramil Şeydayev və Rüfət Dadaşovdu.Qapıçılar: Kamran Ağayev ("Keşlə"), Səlahət Ağayev ("Neftçi"), Şahruddin Məhəmmədəliyev ("Qarabağ").Müdafiəçilər: Maksim Medvedov, Bədavi Hüseynov, Rahil Məmmədov (hamısı "Qarabağ"), Məhəmməd Mirzəbəyov ("Neftçi"), Təmkin Xəlilzadə, Urfan Abbasov (hər ikisi "Qəbələ"), Bəxtiyar Həsənalızadə ("Sumqayıt"), Pavel Paşayev ("Aleksandriya", Ukrayna).Yarımmüdafiəçilər: Qara Qarayev, Araz Abdullayev (hər ikisi "Qarabağ"), Emin Mahmudov, Namiq Ələsgərov (hər ikisi "Neftçi"), Rahid Əmirquliyev ("Səbail"), Cavid İmamverdiyev ("Sabah"), Riçard Almeyda ("Astana", Qazaxıstan), Dmitri Nazarov ("Aue", Almaniya).Hücumçular: Mahir Mədətov ("Qarabağ"), Ramil Şeydayev ("Krılya Sovetov", Rusiya), Rüfət Dadaşov ("Proysen", Almaniya), Ruslan Qurbanov ("Səbail").xeber100.com

Çempionlar Liqasının II turunda…

İtaliya təmsilçisi "Napoli"nin baş məşqçisi Karlo Ançelotti komandasını Çempionlar Liqasının (ÇL) II turunda İngiltərə "Liverpul"u ilə matça qeyri-adi formada motivasiya edib.Milli.az xəbər verir ki, 59 yaşlı italiyalı mütəxəssis evdə 1:0 hesabı ilə qalib gəldikləri oyundan əvvəl futbolçulara "Napoli"nin "Liverpul" ilə görüşün autsayderi olmasına dair yazılı mətbuatdan bir neçə başlıq və televiziyalarda yayımlanan sujetlər göstərib.Baş məşqçi bundan sonra üzünü futbolçulara tutaraq belə söyləyib: "Buna nə deyirsiniz? Biz çıxaq və "Liverpul"a xoşagəlməz sürpriz edək?"Qeyd edək ki, "Napoli" ÇL-də 4 xalla C qrupunun lideridir.xeber100.com