Güllə atıcılığı üzrə Azərbaycan çempionatına yekun vurulub

Bakı Atıcılıq Mərkəzində güllə atıcılığı üzrə Azərbaycan çempionatına yekun vurulub. Çempionatda 48 idmançı pnevmatik tapançadan, 19-u isə tüfəngdən atəşaçma yarışlarında mübarizə aparıblar.Azərtac xəbər verir ki, “Neftçi İdman Klubu”nun təmşilçiləri ölkə çempionatını 4 medalla başa vurublar.Qadınların pnevmatik tapançadan atəşaçma yarışında Lalə Mirzəzadə 550 xalla gümüş medala layiq görülüb. Zeynəb Abbasova isə 547 xallıq nəticə ilə bürünc medal qazanıb. Kişilərin mübarizəsində Rəsul Məmmədov 574 xalla fəxri kürsünün ən yüksək pilləsinə qalxıb. Ruslan Lunyov (560 xal) isə üçüncü yeri tutub.xeber100.com

Güləşçilərin dünya çempionatı start götürüb

Xorvatiyanın paytaxtı Zaqrebdə yeniyetmə güləşçilərin dünya çempionatı start götürüb.Azərtac xəbər verir ki, ilk yarış günündə 48, 55, 65, 80 və 110 kiloqram çəki dərəcəsində sərbəst güləşçilər yarışırlar.İlk gündə mübarizə aparan güləşçilərimizdən dördü – Əlihəsən Əmirli (48 kq), Turan Bayramov (65 kq), Saqadulla Ağayev (80 kq) və İslam Abuyev (110 kq) yarımfinala yüksəlib. Yarımfinal görüşləri Bakı vaxtı ilə saat 20:00-da başlayacaq.Görüşlərin idarə edilməsində ölkəmizi beynəlxalq dərəcəli hakim Əbdül Nuriyev təmsil edir.xeber100.com

Dünya çempionatının qrup mərhələsinin yekunlarına əsasən…

Seneqal Futbol Federasiyası (FSF) FIFA-ya iki məktub göndərib. Bu məktublarda dünya çempionatında pley-off mərhələsində çıxış üçün feyr-pley meyarı qaydasına yenidən baxılması xahiş olunur.Azərtac BBC-yə istinadla xəbər verir ki, 2018-ci il dünya çempionatının qrup mərhələsinin yekunlarına əsasən Seneqal və Yaponiya yığmalarının göstəriciləri eyni olub, lakin seneqallılarla müqayisədə daha az sarı vərəqə almış Yaponiya yığması əlavə göstəricilərə görə pley-off mərhələsinə çıxıb. DC-2018-in qrup mərhələsində Asiya komandası Polşa yığması ilə yekun matçının 75-ci dəqiqəsindən etibarən hücumu dayandırıb. Nəticədə Yaponiya yığması bu görüşdə 0:1 hesabı ilə məğlub olub.Seneqal Futbol Federasiyasının məktublarından birində deyilir: “Federasiya belə hesab edir ki, Yaponiya yığması Polşa ilə matçın hesabı onu qane etməyə başlayanda Yaponiya yığması sözün hərfi mənasında oyunu dayandırıb. Yaponiya yığmasının məşqçisi matçdan sonra mətbuat konfransında bu faktı inkar etmədi. Biz buna görə şokda idik. Gələcəkdə FIFA bu cür oynayan komandaları cəzalandırmalıdır.Seneqal Futbol Federasiyası təəssüflənir ki, Yaponiya yığması özünün cəzasız qalacağını hiss edərək feyr-pley prinsiplərinə əməl etməyib. Belə hallarda vərəqələrin sayılması qaydasının mənası yoxdur”.xeber100.com

1/8 final mərhələsinin daha 2 görüşü baş tutacaq

Rusiyada keçirilən dünya çempionatı davam edir. Apasport.az saytının məlumatına görə, bu gün 1/8 final mərhələsinin daha 2 görüşü baş tutacaq.İlk olaraq meydana meydan sahibi Rusiya yığması çıxacaq. Şimal qonşularımız turnirin favoritlərindən olan İspaniya ilə üz-üzə gələcək. Qrup səddini çətinliklə aşan və 3 matçda qapısından 5 qol buraxan ispanların işi heç də asan olmayacaq. Ruslar doğma meydan və azarkeş amilindən yararlanıb sensasiya etməyə çalışacaq.Günün ikinci qarşılaşması Xorvatiya ilə Danimarka arasında oynanılacaq. Öz qrupunu maksimum nəticə ilə tamamlayan xorvatlar bir anda favoritlər arasında göstərilməyə başlayıb. Danimarka isə etibarlı müdafiə xətti sayəsində yoluna davam etmək əzmindədi. Dünya çempionatı 1/8 final mərhələsi 1 iyul 18:00. İspaniya – Rusiya Baş hakim: Byörn Kuypers (Hollandiya) Moskva. “Lujniki” stadionu 22:00. Xorvatiya – Danimarka Baş hakim: Nestor Pitana (Argentina) Nijni Novqorod. Mərkəzi stadion.xeber100.com

“Neftçi” klubu transfer çalışmalarını davam etdirir

Transfer çalışmalarını davam etdirən "Neftçi” daha bir keçidi rəsmiləşdirib.Apasport.az saytının məlumatına görə, qanalı futbolçu Kvame Karikari ilə 2 il müddətinə müqavilə imzalanıb.26 yaşlı hücumçu komandada 11 nömrəli formanı geyinəcək.Sonuncu klubu "Əl Ərəbi” (Qətər) olan Kvame Karikari Qananın "İnternational Ellies”, İsveçin AİK, "Deqerfors”, "Halmstad”, Türkiyənin "Balıkesirspor”, Norveçin "Hauqesund”, Ukraynanın "Stal”, Qətərin "Əl Marhiya” və Qananın gənclərdən ibarət milli komandasında çıxış edib.Qeyd edək ki, "Neftçi” bundan əvvəl cinah müdafiəçisi Tural Axundov, mərkəz müdafiəçisi Slavko Braliç, yarımmüdafiəçilər – Rəşad Eyubov, Qoran Paratski, hücumçular – Dario Frederiko və Baqali Dabonun keçidini rəsmiləşdirmişdi.xeber100.com

DÇ-2018-də 1/8 final mərhələsinə start veriləcək

Bu gün DÇ-2018-də 1/8 final mərhələsinə start veriləcək. Apasport.az saytının məlumatına görə, ilk oyun günündə iki cütlük meydana çıxacaq.Dünya çempionatı başlamamışdan əvvəl turnirin əsas favoritlərindən hesab olunan iki komanda ilk 1/8 final mübarizəsində üz-üzə gələcəklər. C qrupunda Danimarka, Peru və Avstraliya ilə mübarizəni lider tamamlayan Fransa D qrupunun ikincisi Argentina ilə qarşılaşacaq. Müasir dünya futbolunun ən güclü oyunçularını qarşı-qarşıya gətirəcək matç gərgin mübarizə və maraqlı oyun vəd edir.Qrup mərhələsinə istədiyi kimi başlamayan, yalnız son oyundan sonra pley-offlara yüksəlməyi bacaran cənubi amerikalılar həlledici məqamda onlara bəslənən ümidləri doğrultmaq üçün əllərindən gələni edəcəklər. Fransızlar isə qrup liderliyinin təsadüfi olmadığını sübuta yetirmək iddiasındadır.Günün ikinci matçında isə Uruqvayla Portuqaliya münasibətlərinə aydınlıq gətirəcəklər. Qrupu qol buraxmadan və naməğlub lider kimi bitirən ilk dünya çempionu Uruqvay bu uğurunu pley-offda da davam etdirmək əzmindədir. Portuqaliya millisi isə çətinliklə yüksəldiyi növbəti mərhələdə işini şansa buraxmaq istəmir.xeber100.com

“Neftçi” futbol klubu təlim-məşq toplanışı çərçivəsində

“Neftçi” futbol klubu Türkiyədəki təlim-məşq toplanışı çərçivəsində ikinci yoxlama oyununu keçirib.Azərtac xəbər verir ki, komandamız Rumıniyanın “Dunarea Kalarası” klubuna 2:0 hesabı ilə qalib gəlib.“Neftçi”nin heyətində Dario Frederiko və Mirabdulla Abbasov fərqləniblər.Qeyd edək ki, ilk yoxlama oyununda Makedoniyanın "Şkupi” klubunu məğlub edən (2:0) “Neftçi” iyulun 5-də “Politexnika” (Rumıniya) ilə üz-üzə gələcək. Bakı təmsilçisinin iyulun 2-dəki rəqibinin kimliyi yaxın günlərdə müəyyənləşəcək.xeber100.com

“Qəbələ” futbol klubu ikinci yoxlama oyununu keçirib

Sloveniyada təlim-məşq toplanışını davam etdirən “Qəbələ” futbol klubu ikinci yoxlama oyununu keçirib. “Qırmızı-qaralar” Xorvatiyanın “Dinamo” klubu ilə qarşılaşıb və 0:2 hesabı ilə məğlub olublar.Azərtac xəbər verir ki, gərgin idman mübarizəsi şəraitində keçən matçın ilk yarısında hesab açılmayıb. Fasilədə və ikinci hissənin gedişində hər iki komandanın heyətində dəyişikliklər olub.Matçdakı hər iki qol da ikinci 45 dəqiqəyə təsadüf edib. İki qol vuran xorvatiyalılar qalib gəliblər. “Qəbələ” Sloveniya toplanışında ilk məğlubiyyətini alıb.Xatırladaq ki, “Qəbələ” Sloveniyadakı ilk matçında Albaniyanın “Kukesi” klubu ilə heç-heçə edib – 1:1.xeber100.com

“Qarabağ” klubu 2018/2019-cu il mövsümünün hazırlığını davam etdirir

2018/2019-cu il mövsümünün hazırlığını davam etdirən Ağdamın “Qarabağ” klubu daha bir futbolçu ilə yollarını ayırıb.Azərtac xəbər verir ki, ukraynalı qolkiper Anton Kanibolotski ilə müqaviləyə qarşılıqlı razılaşma əsasında xitam verilib.“Qarabağ” klubunun rəhbərliyi Kanibolotskiyə göstərdiyi xidmətlərə görə, təşəkkür edib və gələcək karyerasında uğurlar arzulayıb.xeber100.com

Futbol üzrə dünya çempionatının qrup mərhələsində

Futbol üzrə dünya çempionatında ötən gün keçirilən İngiltərə-Belçika və Panama-Tunis matçları ilə qrup mərhələsinə yekun vurulub. Səkkiz qrupda 32 komandanın mübarizə apardığı mundialın qrup mərhələsində ümumilikdə 48 qarşılaşma oynanılıb.Azərtac xəbər verir ki, qrup mərhələsində 48 qarşılaşmada qapılara 122 top vurulub. Məhsuldarlıq hər oyuna orta hesabla 2,5 qol təşkil edir. Qrup mərhələsində ən məhsuldar futbolçu İngiltərə yığmasının hücumçusu Harri Keyndir. Onun aktivində 5 qol var. H.Keyn bu qollardan ikisini Tunis, üçünü isə Panama yığmasının qapısından keçirib. İngilis futbolçunu 4 qolla portuqaliyalı Kriştiano Ronaldo və belçikalı Romelu Lukaku təqib edirlər. Rusiyalı Deniş Çerişev və ispaniyalı Dieqo Kosta üç dəfə fərqləniblər. Bu futbolçuların yer aldığı komandalar səkkizdəbir finala vəsiqə qazandığından onlar öz göstəricilərini daha da yaxşılaşdıra bilərlər.Xatırladaq ki, Harri Keyn və Romelu Lukaku 1986-cı ildəki dünya çempionatında Maradonadan sonra ilk dəfədir ardıcıl iki oyunda dubl ediblər.Bu çempionatda ən maraqlı göstəricilərdən biri də qeydə alınan 122 qolun 27-sinin (22 faiz) son on dəqiqədə və artırılan vaxtda vurulmasıdır. Neymarın Braziliya – Kosta-Rika görüşünün 90+7-ci dəqiqəsində rəqib komandanın qapısından keçirdiyi top mundiallar tarixində ən gec vurulan qol kimi qeydə alınıb.Ümumiyyətlə, XXI dünya çempionatının qrup mərhələsində statistik göstəricilərə görə ən yaxşı nəticə Belçika millisinə məxsusdur. Bütün görüşləri qələbə ilə başa vuran belçikalılar rəqib qapılarına 9 top vurub, öz qapılarında isə cəmi iki qol görüblər. Qrup mərhələsinin ən məhsuldar görüşü də (7 qol) Belçika yığmasının Tunis millisi ilə keçirdiyi görüşdə qeydə alınıb. Həmin görüşdə belçikalılar 5:2 hesabı ilə qalib gəliblər.Öz qapısından top buraxmayan yeganə komanda ikiqat dünya çempionu Uruqvay yığmasıdır. Belçikadan əlavə, Xorvatiya və Uruqvay milliləri də bütün görüşləri qələbə ilə başa vurublar.Qrup mərhələsində Belçika ən çox qol vuran (9), Almaniya ən çox hücum edən (252), İspaniya ən yaxşı ötürmə edən (2089), İran isə ən yaxşı müdafiə olunan (149) komanda olub. Futbolçular üzrə göstəricilərə gəldikdə isə, qol cəhdinə görə ən çox fərqlənən braziliyalı Neymar olub – 17 dəfə. Ən çox məsafə qət edən oyunçu danimarkalı Kristian Erikksen (36 km), ən çox ötürmə edən almaniyalı Toni Kroos (310), ən çox zərbə dəf edən qapıçı isə Meksika millisinin qolkiperi Gilyermo Okoçadır (17).Futbol tarixində ilk dəfə videonəzarət sistemindən (VAR) istifadə olunduğu bu çempionatın qrup mərhələsində qapılara 24 dəfə 11 metrlik cərimə zərbəsi təyin edilib ki, bu da rekord göstəricidir. Belə ki, bundan əvvəl bir çempionatda ən çox 11 metrlik cərimə zərbəsinin sayı cəmi 18 olub.Tunis millisinin üzvü Faxreddin Ben Yussefin Panama ilə görüşün 51-ci dəqiqəsində vurduğu top futbol üzrə dünya çempionatları tarixində 2500-cü qol olub. Argentina-Nigeriya oyunun 14-cü dəqiqəsində Lionel Messi XXI dünya çempionatının 100-cü qolunun müəllifi kimi tarixə düşüb.Mundialda Avropanı təmsil edən milli komandalardan dördü – Almaniya, Polşa, İslandiya və Serbiya qrup mərhələsində mübarizəni dayandırıb. Almaniya dünya çempionatları tarixində ilk dəfə qrupdan çıxa bilməyib. Cənubi Amerikadan bu mundialda çıxış edən beş komandadan dördü səkkizdəbir finala yüksəlib. Mundialda debüt edən Panama yığması qrupda mübarizəni dayandırıb. Afrika qitəsini təmsil edən bütün milli komandalar qrupdan çıxa bilməyiblər.xeber100.com