Basketbolçuları arasında 17-ci turun növbəti oyunu keçirilib

Fevralın 12-də Şəki Olimpiya İdman Kompleksində "Olimpik Şəki BK" və "Sərhədçi PİK" basketbolçuları arasında 17-ci turun növbəti oyunu keçirilib. Görüşə üstünlüklə başlayan "Sərhədçi PİK" 106-83 hesablı qələbə qazanaraq, turnir cədvəlinin ikinci pilləsindəki mövqeyini qoruyub saxlayır. Ən məhsuldar basketbolçular "Olimpik Şəki BK"dən Larri Robinson (27 xal, 6 asist), "Sərhədçi PİK"dən Endar Poladxanlıdır (41 xal, 13 ribaund). Qeyd edək ki, 17-ci turun son oyunu ("Sabah BK" - "Neftçi İK") fevralın 13-də keçiriləcək.xeber100.com

Azərbaycan Triatlon Federasiyasının növbəti yarışı keçirilib

Fevralın 11-i və 12-sində Bakı Su İdmanı Sarayında “Triterra Triathlon Club”-ın təşkilatçılığı ilə Azərbaycan Triatlon Federasiyasının növbəti “Aquathlon” yarışı keçirilib. Federasiyadan bildirilib ki, 45 idmançının iştirak etdiyi yarış “Absolute” və müxtəlif yaş kateqoriyalarından ibarət idi. Yarışın ilk günündə 1500 metr məsafədə üzgüçülük mərhələsi yer aldı. İkinci gün isə 10 km məsafə üzrə qaçış yarışına həsr olundu. “Absolute” kateqoriyasının kişilər arası qalibləri ardıcıl olaraq Togrul Məmmədli, Kam Bular və Vitaliy Yakovlev oldular. Qadınlardan birinci yerə Fatimə Əlkərəmova, ikinci yerə Nataliya Mordasova, üçüncü yerə Adilə Süleymanova yiyələndi. Komandalar arası gərgin rəqabətdə 3 qalib təyin olundu: birinci yer “Triterra” idman klubu, ikinci yer “Alphatriclub” idman klubu, üçüncü yer isə “TriStar” idman klubu.xeber100.com

“Real” Mərakeşdə keçirilən klublararası dünya çempionatının qalibi olub

Madrid klubu "Real" Mərakeşdə keçirilən klublararası dünya çempionatının qalibi olub. interfax.ru xəbər verir ki, Mərakeşin paytaxtı Rabatda keçirilən final görüşündə "Real" Səudiyyə Ərəbistanının "Əl-Hilal" komandasını 5:3 hesabı ilə məğlub edib. 3-cü yeri isə Braziliyanın "Flamenqu" komandası tutub. Onlar Misirin "Əl-Əhli" komandasına 4:2 hesabı ilə qalib gəlib.xeber100.com

Azərbaycan çempionatında növbəti oyunların vaxtı dəqiqləşib

Voleybol üzrə qadınlar arasında Azərbaycan çempionatında növbəti oyunların vaxtı dəqiqləşib. Qadın voleybolçuların Yüksək Liqasında III dövrənin oyunlarına fevralın 13-də start veriləcək. Voleybol Mərkəzində təşkil olunacaq VII turun ilk matçı saat 16:00-da “Azərreyl” və “Murov” komandaları arasında baş tutacaq. Bu qarşılaşmadan 2 saat sonra “Abşeron” - UNEC dueli start götürəcək.xeber100.com

Futbol üzrə İtaliya çempionatında növbəti tura start verilib

Fevralın 10-da futbol üzrə İtaliya çempionatında növbəti tura start verilib. Turun ilk matçında son çempion “Milan” “Torino” ilə qarşılaşıb. Oyun 1:0 hesabı ilə “Rossonyerlər”in xeyrinə başa çatıb. Oyunda yeganə qolu Olivye Jiru vurub. Beləliklə, “Milan” yeddi oyunluq qələbəsizlik seriyasına son qoyub. Qeyd edək ki, hesabında 41 xal olan Piolinin yetirmələri turnir cədvəlinin 3-cü pilləsində qərarlaşıb.xeber100.com

Azərbaycan Premyer Liqasında XXII turun daha bir oyunu keçirilib

Futbol üzrə Azərbaycan Premyer Liqasında XXII turun daha bir oyunu keçirilib. Günün sonuncu matçında “Qarabağ” komandası paytaxtın “Sabah” klubunu qəbul edib. “Azersun Arena”dakı görüş 1:1 hesabı ilə yekunlaşıb. Hesabı 15-ci dəqiqədə Ağdam təmsilçisinin heyətində Musa Qurbanlı açıb. İlk hissə meydan sahiblərinin üstünlüyü ilə başa çatıb. 75-ci dəqiqədə Bəxtiyar Həsənalızadə “Sabah”ın bərabərlik qolunu vurub. Bu qarşılaşmadan sonra xallarının sayını 58-ə çatdıran Ağdam komandası vahid liderdir. Bakı təmsilçisi 53 xalla ikinci pillədə yer alıb. Qeyd edək ki, günün ilk görüşündə “Turan Tovuz” komandası “Kəpəz”in qapısından iki top keçirib. Turun “Səbail” – “Zirə” və “Sumqayıt” – “Şamaxı” matçları fevralın 12-də keçiriləcək.xeber100.com

İtaliya Futbol Federasiyasının məlumatı əsasında…

İtaliyada keçiriləcək liqa matçlarında Türkiyə və Suriyada baş vermiş dəhşətli zəlzələlər nəticəsində həlak olanların xatirəsi bir dəqiqəlik sükutla yad olunacaq. Bu barədə İtaliya Futbol Federasiyası məlumat yayıb. Bildirilib ki, Türkiyə və Suriyada baş vermiş zəlzələlərdə həlak olanların xatirəsi həftəsonu oynanılacaq futbol matçlarından əvvəl bir dəqiqəlik sükutla yad ediləcək. Federasiyasının prezidenti Qabriele Qravina bildirib ki, futbol dünyası zəlzələ qurbanlarının xatirəsini anır. Heç kəs bu faciəni görməzlikdən gələ bilməz. Qeyd edək ki, əsrin fəlakəti adlandırılan Türkiyədəki zəlzələlər nəticəsində 21 min 848 nəfər həlak olub, 80 min 104 nəfər yaralanıb.xeber100.com

Meksika Futbol Federasiyası: Dieqo Kokka Meksika millisinə baş məşqçi təyin olunub

Dieqo Kokka futbol üzrə Meksika millisinə baş məşqçi təyin olunub. Bu barədə Meksika Futbol Federasiyasının mətbuat xidməti məlumat yayıb. Mütəxəssis yanvarın 1-də Meksikanın “Tiqres” klubu ilə anlaşıb. O, daha sonra Meksika yığmasında işləmək istədiyini rəhbərliyə bildirib. Buna görə də klub bir ay sonra argentinalı mütəxəssis ilə yollarını ayırıb. Qeyd edək ki, ötən il Qətərdə keçirilən dünya çempionatından sonra Meksika millisinin baş məşqçisi Xerardo Martino istefa vermişdi.xeber100.com

UEFA Konfrans Liqasının pley-off mərhələsində…

UEFA Konfrans Liqasının pley-off mərhələsində Ağdamın “Qarabağ” klubunun Belçikanın “Gent” komandası ilə Bakıda keçirəcəyi ilk oyunun biletləri satışa çıxarılıb. Ağdam təmsilçisinin saytına istinadən xəbər verir ki, biletlərin qiyməti müvafiq olaraq 5, 30, 40, 75 və 100 manat təşkil edir. Azarkeşlər biletləri Tofiq Bəhramov adına Respublika Stadionunun kassalarından, “Iticket.az”ın satış məntəqələrindən (iticket.az-da onlayn satış), “Qarabağ”ın Park Bulvardakı “Fan şop”undan, eləcə də, “28 Mall” və “Gənclik Mall” ticarət mərkəzlərindən əldə edə bilərlər. Qeyd edək ki, fevralın 16-da Tofiq Bəhramov adına Respublika Stadionunda keçiriləcək “Qarabağ” – “Gent” görüşü saat 21:45-də başlayacaq.xeber100.com

Milli Gimnastika Arenasında keçiriləcək dünya kuboku yarışları üçün heyət açıqlanıb

Misir milli komandasının fevralın 18-19-da Bakıda Milli Gimnastika Arenasında keçiriləcək batut gimnastikası üzrə dünya kuboku yarışları üçün heyəti açıqlanıb. Yarışda üç misirli batutçu – Mələk Hamza, Xaled Hussein və Omar Zayed medallar uğrunda mübarizə aparacaq. Turnirdə Azərbaycanla yanaşı, 16 ölkədən 63 gimnastın fərdi və sinxron proqramda çıxışı gözlənilir. Dünya kuboku yarışlarında ölkəmizi Selcan Mahsudova təmsil edəcək.xeber100.com