“Zirə” futbol klubu bu gün növbəti yoxlama oyununu keçirib

Antalyada təlim-məşq toplanışını davam etdirən Bakının “Zirə” klubu bu gün növbəti yoxlama oyununu keçirib. Paytaxt təmsilçisi Macarıstanın İkinci Liqasında mübarizə aparan “Szeged-Csanad” kollektivi ilə qarşılaşıb. Oyun rəqibin 3:1 hesablı qələbəsi ilə yekunlaşıb. “Zirə”nin matçda yeganə qolunu 34-cü dəqiqədə Toni Qomes vurub. Baş məşqçi Rəşad Sadıqovun komandası bu gün daha 1 yoxlama oyununa çıxacaq. Komandanın ikinci matçda rəqibi Serbiya Super Liqa təmsilçisi “Radniçki" olacaq. Oyun saat 16:30-da start götürəcək. Qeyd edək ki, “Zirə” Antalyadakı ilk yoxlama görüşündə Rumıniyanın “Çindia” komandasına qalib gəlib - 3:2.xeber100.com

Avropa Voleybol Konfederasiyası azərbaycanlı hakimə təyinat göndərib

Avropa Voleybol Konfederasiyası (CEV) azərbaycanlı hakimə təyinat göndərib. Azərbaycan Voleybol Federasiyası xəbər verir ki, beynəlxalq dərəcəli hakim Eldar Zülfüqarov yanvarın 18-də Türkiyənin İstanbul şəhərində keçiriləcək qadın voleybolçular arasında Çempionlar Liqasının D qrupunun matçını idarə edəcək. E.Zülfüqarov “Burhan Felek” voleybol salonunda baş tutacaq “Fənərbağça Opet” (Türkiyə) - “Allianz MTV Ştutqart” (Almaniya) klublarının qarşılaşmasında baş hakim olacaq. Oyunda ikinci hakim funksiyasını rumıniyalı Pol Katalin Şabo-Aleksi yerinə yetirəcək.xeber100.com

Avropa Futbol Assosiasiyaları İttifaqının İcraiyyə Komitəsinin iclası keçiriləcək

Yanvarın 25-də Avropa Futbol Assosiasiyaları İttifaqının (UEFA) İcraiyyə Komitəsinin iclası keçiriləcək. Bu barədə UEFA-nın mətbuat xidməti məlumat yayıb. Komitənin iclasının gündəliyi gələn həftə açıqlanacaq. Gündəlikdə Rusiya futbol komandalarının Avropa turnirlərinə qayıtması məsələsi ilə bağlı işçi qrupunun yaradılmasının müzakirə olunacağı da gözlənilir. Qeyd edək ki, 2022-ci il fevralın 28-də UEFA və Beynəlxalq Futbol Federasiyası (FIFA) Ukraynadakı vəziyyətlə əlaqədar Rusiya klublarının və milli komandalarının beynəlxalq yarışlarda iştirakını dayandırıb.xeber100.com

Beynəlxalq Futbol Federasiyası müvəqqəti transfer qadağası qoyub

Beynəlxalq Futbol Federasiyası (FIFA) Türkiyənin "Qalatasaray" klubuna müvəqqəti transfer qadağası qoyub. Türkiyə KİV-ləri xəbər verir ki, buna səbəb İstanbul təmsilçisinin yarımmüdafiəçi Lukas Torreyranın transferi zamanı onun menecerinə ödəniş etməməsidir. Bundan sonra ali futbol qurumuna müraciət edən menecer istəyinə çatıb. Yarımmüdafiəçi 18 min 500 dollarlıq ödənişi etdikdən sonra qadağa aradan qalxacaq. Qeyd edək ki, Lukas Torreyra cari mövsümün əvvəlindən "Qalatasaray"da çıxış edir.xeber100.com

Yanvarın 17-22-də boksçular arasında Millətlər kuboku yarışı keçiriləcək

Yanvarın 17-22-də Serbiyanın Sombor şəhərində qız və qadın boksçular arasında Millətlər kuboku yarışı keçiriləcək. İlin ilk yarışında Azərbaycan millisi baş məşqçi Yadigar Məmmədov və İlkin Ağayevin rəhbərliyi altında 4 yaş kateqoriyasında mübarizə aparacaq. Azərbaycan Boks Federasiyası xəbər verir ki, 14 ölkənin qatılacağı turnirdə Səma Hüseynova (54 kq) məktəblilərin, Banuçiçək Nəsirli (46 kq) yeniyetmələrin, Aysu İsmayılova, Lalə Mədətova (hər ikisi 48 kq), Nərmin Əlizadə (50 kq), Aynur Mikayılova (52 kq) və Emili Rzayeva (66 kq) gənclərin yarışında güclərini sınayacaqlar. Böyüklərin mübarizəsində isə rinqə Günel Rəhimova (48 kq), Anaxanım İsmayılova (50 kq), Məhsəti Həmzəyeva (57 kq), Esmira Məmmədova (63 kq) və Şəhla Allahverdiyeva (66 kq) çıxacaqlar.xeber100.com  

Həndbolçulardan ibarət Böyük Britaniya millisi növbəti qələbəsini qazanıb

Kişi həndbolçulardan ibarət Böyük Britaniya millisi Bakıda növbəti qələbəsini qazanıb. Komanda 2026-cı ildə keçiriləcək Avropa çempionatının təsnifat turnirində Malta millisi ilə qarşılaşıb. Bakı İdman Sarayında təşkil olunan matçda Böyük Britaniya millisi rəqibini 44:14 hesabı ilə məğlub edib. Qeyd edək ki, britaniyalılar ilk oyunda Kipr seçməsi ilə heç-heçə ediblər - 25:25. İkinci turda komanda Azərbaycan millisini 39:22 hesabı ilə məğlub edib. Təsnifat turnirinə saat 15:00-da start götürəcək Azərbaycan–Kipr oyunu ilə yekun vurulacaq.xeber100.com

“Qəbələ” futbol klubu bu gün növbəti yoxlama oyununu keçirəcək

Mövsümün ikinci yarısına Türkiyədə hazırlaşan “Qəbələ” futbol klubu bu gün növbəti yoxlama oyununu keçirəcək. Elmar Baxşıyevin baş məşqçisi olduğu komanda Almaniyanın “Lukenvalde” klubu ilə üz-üzə gələcək. Əsası 1963-cü ildə qoyulan bu komanda Şimal-Şərq regional liqasında çıxış edir. Rəqib ötən mövsümü 12-ci yerdə başa vurub. Xatırladaq ki, yanvarın 12-də Rumıniyanın “Sepsi” klubu ilə məhsuldar heç-heçə (2:2) edən “Qəbələ” Antalyadakı sonuncu görüşündə Çexiya təmsilçisi “Teplitse” ilə qarşılaşacaq. Matç ayın 16-da baş tutacaq.xeber100.com

“Kəpəz” futbol klubu bu gün ilk yoxlama oyununa çıxacaq

Antalyada təlim-məşq toplanışında olan Gəncənin “Kəpəz” futbol klubu bu gün ilk yoxlama oyununa çıxacaq. Komanda Macarıstanın İkinci Liqa təmsilçisi “MTK Budapeşt” ilə qarşılaşacaq. Görüş Bakı vaxtı ilə saat 15:00-da başlayacaq. Qeyd edək ki, “Kəpəz” yanvarın 16-da Serbiyanın “Novi Pazar”, ayın 18-də isə Qazaxıstanın “Kaysar” komandası ilə qarşılaşacaq.xeber100.com

“Səbail” futbol komandası yeni futbolçu heyətinə cəlb edib

“Səbail” komandası yeni futbolçu heyətinə cəlb edib. Klubun saytı xəbər verir ki, paytaxt təmsilçisi Qvineya-Bisau əsilli fransalı hücumçu David Qomislə bir illik müqavilə imzalayıb. Qeyd edək ki, David Qomisin sonuncu klubu Fransa Liqa 2-də çıxış edən “Pau” komandası olub.xeber100.com

Mərakeşdə keçiriləcək futbol üzrə klublararası dünya çempionatının püşkü atılıb

Bu il Mərakeşdə keçiriləcək futbol üzrə klublararası dünya çempionatının püşkü atılıb. Turnirin ilk oyunu Misirin "Əl-Əhli" və Yeni Zelandiyanın "Oklend Siti" komandaları arasında dörddəbir finala vəsiqə uğrunda olacaq. Qarşılaşma fevralın 1-də baş tutacaq. İlkin mərhələ çərçivəsində “Sietl Saunders” (ABŞ) klubu “Əl-Əhli” - "Oklend Siti" cütünün qalibi, Mərakeşin "Vidad" komandası isə "Əl-Hilal" (Səudiyyə Ərəbistanı) ilə qarşılaşacaq. Birinci cütün qalibi yarımfinalda “Real Madrid”ə, ikinci görüşün qalibi isə “Flamenqo”ya (Braziliya) rəqib olacaq. Qeyd edək ki, yarımfinal matçları fevralın 7-8-də keçiriləcək.xeber100.com