Futbol üzrə İngiltərə Premyer Liqasının 20-ci turunda

Futbol üzrə İngiltərə Premyer Liqasının 20-ci turunda “Tottenhem” komandasının doğma meydanda “Sauthampton” üzərində 5:2 hesablı qələbəsi ev sahiblərinin heyətində ulduz futbolçu Harri Keyn üçün əlamətdar olub.Azərtac xəbər verir ki, görüşdə 22-ci, 39-cu və 67-ci dəqiqələrdə rəqib qapısına yol taparaq het-trik edən H.Keyn 2017-ci il ərzində rəsmi matçlarda ən çox qol vuran futbolçu kimi tarixə düşüb. O, 52 oyunda 56 qolla ilin ən məhsuldar futbolçusu adını qazanıb.İyirmi dörd yaşlı futbolçu bu göstərici ilə Lionel Messini (54), Robert Levandovskini, Kriştiano Ronaldonu və Edinson Kavanini (hər üçü 53 qol) qabaqlayıb.İngiltərəli futbolçu bu qollardan 49-nu Premyer Liqada, 7-sini isə milli komandanın heyətində vurub. H.Keyn 2017-ci ildə Premyer Liqada forma geydiyi 36 matçda rəqib qapılarına 39 dəfə yol tapıb. Bundan əvvəlki rekord 42 oyunda 36 qol vuran Alan Şirerə məxsus idi.O, Premyer Liqa tarixində bir ildə 6 dəfə het-trik edən ilk futbolçu olub.H.Keyn il ərzində klub matçlarında vurduğu qolların sayına (49) görə yalnız Lionel Messi və Edinson Kavanidən geri qalır. Hər iki futbolçunun aktivində 50 top var.xeber100.com

Cüdo üzrə Azərbaycan çempionatında ilk günün qalibləri məlum olub

Bakı İdman Sarayında cüdo üzrə Azərbaycan çempionatında ilk günün qalibləri məlum olub.Azərtac xəbər verir ki, çempionatın birinci gününün yekununda oğlanların yarışında fəxri kürsünün ən yüksək pilləsinə 60 kiloqram çəki dərəcəsində Vüqar Şirinli (Qəbələ), 66 kiloqram çəki dərəcəsində isə Tərlan Kərimov (Dinamo Sumqayıt) qalxıblar.Qızların mübarizəsində isə qızıl medallara Leyla Əliyeva (48 kq, Neftçi), Purevsuren Buyanxişiq (52 kq, Neftçi), Ülviyyə Rəhimli (57 kq, UGİM-1), İrina Jukovets (63 kq, Atilla), Günel Həsənli (70 kq, Zirvə), Nurana Muradova (78 kq, Sumqayıt idman məktəbi) və Gözəl Zutova (78 kq-dan yuxarı, Zaqatala) sahib olublar.Çempionatın mükafatçılarına medallar, diplom və pul hədiyyələri təqdim olunub.Mükafatları idmançılara Milli Olimpiya Komitəsinin vitse-prezidenti Çingiz Hüseynzadə, Dövlət Təhlükəsizlik Xidmətinin rəisi, general-leytenant Mədət Quliyev, Azərbaycan Cüdo Federasiyasının prezidenti Rövnəq Abdullayev, Avropa Cüdo İttifaqının Hakimlər Komitəsinin sədri Aleksandr Yatskeviç, Azərbaycan Cüdo Federasiyasının vitse-prezidenti Mikayıl İsmayılov, SOCAR-ın vitse-prezidenti Elşad Nəsirov, tanınmış cüdo xadimləri təqdim ediblər.Qeyd edək ki, respublika çempionatında 55 klubdan 497 cüdoçu mübarizə aparır.Yarışa dekabrın 28-də yekun vurulacaq.xeber100.com

Formula-1 Azərbaycan Qran-Prisinə akkreditasiya prosesi davam edir

“Bakı Şəhər Halqası” Əməliyyat Şirkəti (BŞH) gələn il aprelin 27-29-da üçüncü dəfə keçiriləcək Formula-1 Azərbaycan Qran-Prisinə yerli media nümayəndələrinin akkreditasiya prosesini davam etdirir.BŞH-dən Azərtac-a bildiriblər ki, Azərbaycan Qran-Prisi daxil olmaqla, bütövlükdə Formula-1 dünya çempionatında yer alan hər bir yarış üçün media nümayəndələrinin akkreditasiyası Beynəlxalq Avtomobil Federasiyası (FIA) və “Formula One Management” (FOM) şirkəti tərəfindən kurasiya olunur.Yerli media nümayəndələrinin yarışa qeydiyyatı Əməliyyat Şirkətinin vasitəçiliyi ilə həyata keçirilir. Akkreditasiya prosesi gələn il yanvarın 31-dək davam edəcək. Qeydiyyatdan keçmək istəyən jurnalistlər BŞH-nin rəsmi veb-səhifəsinə daxil olaraq müvafiq formanı doldurmalı və tələb olunan sənədləri sistemə yüklədikdən sonra onlayn qaydada müraciət etməlidirlər. Natamam və ya vaxtından gec göndərilmiş müraciət formaları nəzərə alınmayacaq.BŞH-nin marketinq və kommunikasiya şöbəsinin rəhbəri, milli mətbuat katibi Nigar Arpadarai yerli media nümayəndələrini tezliklə yarışa qeydiyyatdan keçməyə dəvət edərək deyib: “Hər ötən il daha çox sayda yerli media nümayəndəsinin yarışda iştirak etməsi bizi çox sevindirir. Bu il də bütün gücümüzü səfərbər etmişik ki, Azərbaycan Qran-Prisində çoxlu sayda yerli media təmsilçisi iştirak edərək yarışı ölkə ictimaiyyəti üçün yüksək səviyyədə işıqlandıra bilsin”.N.Arpadarai diqqətə çatdırıb ki, Formula-1 yarışlarında iştirak edəcək media nümayəndələri müəyyən kriteriyalara əsasən seçilir və yalnız müvafiq yüksək göstəricilərə malik jurnalistlər FIA və FOM-un təsdiqi ilə yarışa buraxılırlar. Çalışırıq ki, ölkəmizdə Formula-1-dən yazan jurnalistlərin sıraları genişlənməklə və xəbərlərin keyfiyyəti daha da yüksəlməklə akkreditasiyanın tələblərinə cavab verən yerli media nümayəndələrinin sayı artsın. O, bütün yerli jurnalistləri vaxt itirmədən Formula-1 Azərbaycan Qran-Prisinə qeydiyyatdan keçməyə dəvət edib.Əməliyyat Şirkəti yanvarın 8-də yerli media nümayəndələri üçün Formula-1 Azərbaycan Qran-Prisinin akkreditasiya prosesi ilə bağlı seminar keçirəcək. Seminarda iştirakçılara qeydiyyat prosesi ilə əlaqədar ətraflı məlumat veriləcək.xeber100.com

Bakı Futbol Liqasının məlumatına görə…

Azərbaycanda həvəskarlar arasında futbol üzrə 8x8 formatında fəaliyyət göstərən Bakı Futbol Liqası (BFL) xeyriyyə kampaniyaları keçirməkdə davam edir.BFL-dən Azərtac-a bildiriblər ki, Yeni il ərəfəsində liqa valideyn himayəsindən məhrum uşaqları unutmayıb. Bayram əhval-ruhiyyəli XII tura “SOS uşaq kəndləri”nin balacaları dəvət edilib. Uşaqlara əvvəlcə yemək süfrəsi açılıb, sonra həm həvəskar futbolçuların, həm də uşaqların unutmayacağı oyunlara start verilib. “Kristal R&R” – “AtaBank” oyununda komandalar Bakı Futbol Liqasının bu addımını alqışlayıblar. Futbolçular üzərində “Uşaqlar bizim gələcəyimizdir!” adlı yazılı plakat açaraq dəstəklərini nümayiş etdiriblər.Sonra Bakı Futbol Liqası və “AtaBank” adından uşaqlara hədiyyələr təqdim olunub. Rəmzi olaraq mərkəzdən topa ilk toxunuşu BFL-in balaca qonaqlarından biri edib.Oyunla bağlı fikirlərini bölüşən “SOS uşaq kəndləri”nin ailə əsaslı qayğı üzrə əlaqələndiricisi Seyfəddin Ağaməmmədov belə layihələrin əhəmiyyətini yüksək qiymətləndirib.Qeyd edək ki, XII turun yekununda liqanın şəriksiz lideri 30 xalla “İdman Azərbaycan” komandasıdır. Onu “Beerbaşa” və “Bakı FK” komandaları izləyir. Liqanın növbəti turu yanvarın 7-də start götürəcək.xeber100.com

Futbol üzrə növbəti yoldaşlıq oyunu keçirilib

Dubayda təlim-məşq toplanışını davam etdirən futbol üzrə 17 yaşadək qızlardan ibarət Azərbaycan millisi Birləşmiş Ərəb Əmirliklərinin müvafiq yaş qrupundan ibarət yığma komandası ilə növbəti yoldaşlıq oyunu keçirib.Azərtac AFFA-ya istinadla xəbər verir ki, millimizin 4:0 hesablı qələbəsi ilə başa çatan oyunda qolları Nigar Mirzəliyeva, Melis Ersoy, Alina Nəhmədova və Aslan Beyzanur vurublar.Qeyd edək ki, yığmamız Birləşmiş Ərəb Əmirlikləri millisi ilə keçirdiyi əvvəlki yoldaşlıq oyunlarında 2:0 və 3:0 hesablı qələbə qazanıb.xeber100.com

“Qəbələ” idman klubu yeni müqaviləyə imza atıb

Azərbaycanın və “Qəbələ” idman klubunun MMA döyüşlərindəki təmsilçisi Nəriman Abbasov yeni müqaviləyə imza atıb.Azərtac kluba istinadla xəbər verir ki, idmançı “Fight Night”la anlaşma imzalayıb. Müqaviləyə əsasən, yüngül çəkidə mübarizə aparacaq 23 yaşlı təmsilçimiz təşkilatın keçirdiyi 6 döyüşdə qüvvəsini sınayacaq.Peşəkar karyerasına 2013-cü ildə başlayan N.Abbasov indiyədək 20 döyüş keçirib. On yeddi qələbə qazanıb, 3 dəfə uduzan döyüşçümüz 6 rəqibinə nokautla qalib gəlib. 2016-cı ilin fevralında “Fight Night” çərçivəsində debüt edən Nəriman burada keçirdiyi 5 qarşılaşmadan dördündə qələbə qazanıb.xeber100.com

“Kəpəz” iki futbolçunu heyətinə qatıb

Qış fasiləsi dövründə transfer çalışmalarını davam etdirən “Kəpəz” iki futbolçunu heyətinə qatıb.Azərtac xəbər verir ki, Gəncə klubu mövsümün ilk yarısını “Keşlə”də keçirən Samir Zərgərov və “Zirə”dən ayrılan Murad Səttarlı ilə müqavilə bağlayıb.Yarımmüdafiə mövqeyində çıxış edən hər iki oyunçu ilə bir illik razılıq əldə olunub.Qeyd edək ki, Samir Zərgərov “Kəpəz” üçün yad sima deyil. S.Zərgərov 2010/2011-ci il mövsümündə komandamızın şərəfini qoruyub.xeber100.com

“Sumqayıt” futbol klubu təlim-məşq toplanışı keçəcək

TOPAZ Premyer Liqa təmsilçisi “Sumqayıt” futbol klubu yanvarın 21-də Türkiyəyə yollanacaq, fevralın 4-dək Antalya bölgəsində təlim-məşq toplanışı keçəcək. Komanda bu müddətdə 4 yoxlama görüşündə qüvvəsini sınayacaq. Artıq sumqayıtlıların yanvarın 31-də Rusiyanın “Anji” komandası ilə qarşılaşacağı dəqiqləşib.Futbol klubunun mətbuat xidmətindən Azərtac–a bildirilib ki, digər üç oyunun vaxtı bilinməsə də, rəqiblərdən daha ikisi məlumdur. Bunlar Makedoniya çempionatının II liqasında çıxış edən, tanınmış futbolçu Qoran Pandevin sahibi olduğu "Akademiya Pandev” və Serbiya Super Liqasından "Mladost”dur.Qeyd edək ki, yanvarın 20-dək Sumqayıtda hazırlıq keçəcək komandanın "Səbail” ilə yoxlama matçı da nəzərdə tutulub. Ayın 18-də keçiriləcək qarşılaşmanın yeri və saatı dəqiqləşməyib.“Sumqayıt” qış fasiləsinə 20 xalla 4-cü pillədə yollanıb.xeber100.com

Türkiyə Super Liqasında XVII turun növbəti oyunları keçirilib

Dekabrın 24-də futbol üzrə Türkiyə Super Liqasında XVII turun növbəti oyunları keçirilib.Azərtac xəbər verir ki, “Kayserispor” səfərdə “Malatyaspor”a 0:1 hesabı ilə məğlub olub, “Karabükspor”-“Trabzonspor” oyunu isə heç-heçə yekunlaşıb – 1:1.Turnir cədvəlinin lideri “Başakşehir” isə səfərdə “Kasımpaşa”ya 2:1 hesabı ilə qalib gəlib.Turun ən çox maraq doğuran görüşü isə “Qalatasaray”-“Göztepe” matçı olub. Yenidən “Qalatasaray”ın sükanı arxasına keçən Fatih Terimin rəhbərliyi ilə İstanbul təmsilçisi 3:1 hesablı qələbə qazanıb.Qeyd edək ki, bu, məşhur məşqçinin “Qalatasaray”a 4-cü qayıdışıdır. Daha əvvəl 1996-2000-ci il, 2002-2004-cü və 2011-2013-cü illərdə İstanbul klubuna rəhbərlik etmiş Fatih Terim 2000-ci ildə “sarı-qırmızılar”la UEFA Kubokunu qazanıb.XVII tura dekabrın 25-də keçiriləcək “Osmanlıspor”-“Akhisarspor” matçı ilə yekun vurulacaq.“Başakşehir” 36 xalla turnir cədvəlinin lideridir. “Qalatasaray” 35 xalla ikinci, “Fənərbağça” isə 33 xalla üçüncü pillədə qərarlaşıb.xeber100.com

Boks üzrə beynəlxalq turnir başa çatıb

Azərbaycan boksunun banisi Abbas Ağalarovun xatirəsinə həsr olunmuş gənclər arasında ənənəvi beynəlxalq turnir başa çatıb.Azərbaycan Boks Federasiyasından Azərtac-a verilən məlumata görə, Bakıda keçirilən yarışda yığmamızla yanaşı, Rusiya, Ukrayna, Tacikistan, Hindistan, İran, Türkmənistan, Pakistan, Qazaxıstan, Gürcüstan və Özbəkistan yığmaları güclərini yoxlayıblar. Komandamız turnirdə 3 qızıl, 2 gümüş və 7 bürünc medal qazanıb.Millimizin heyətində Maqsud Xasmətov (49 kq), Əflatun Babayev (52 kq) və Amid Əlizadə (56 kq) bütün rəqiblərinə qalib gələrək çempion tituluna yiyələniblər. Yalnız finalda uduzan Məhəmməd Yusifovla (75 kq) Zaur Musayev (81 kq) ikinci yeri tutublar. Digər boksçularımızdan Nurlan Səfərov (60 kq), Səlim Səlimov (64 kq), Cavid Qurbanov (69 kq), Elmir Süleymanov, İbrahim Məhəmmədhəbib (hər ikisi - 81 kq), İsmayıl Yaqubov (91 kq) və Elgün Nəzərli (91 kq-dan yuxarı) bürünc medalla kifayətləniblər.Bu nəticə Azərbaycanı komanda hesabında birinci edib. Yarışda ikinci yer Özbəkistana qismət olub. Asiyalılar Abbas Ağalarov turnirində 2 qızıl, 2 gümüş və 3 bürünc medala yiyələniblər. İlk üçlüyü isə Ukrayna yığması qapayıb. Ukraynalı boksçular 2 qızıl, 1 gümüş və 2 bürünc medala sahib olublar.Qaliblərə diplom və kubok verilib.xeber100.com