Voleybol üzrə yoxlama matçı keçirilib

Sloveniyada təlim-məşq toplanışında olan Azərbaycanın qadınlardan ibarət voleybol üzrə yığması ilk yoxlama matçını keçirib.Azərtac xəbər verir ki, Faiq Qarayevin yetirmələri Sloveniya millisi ilə qarşılaşıblar. Matç heç-heçə yekunlaşıb. İlk iki seti Sloveniya yığması qələbə qazansa da, növbəti iki hissədə komandamız üstün olub – 2:2 (23:25, 26:28, 25:20, 25:13).Yoxlama oyunundan sonra yığmamızın hücumçusu Yana Kulan bildirib ki, görüş heç də asan alınmayıb: “Sloveniyanın çox yaxşı komandası var, onlar texnikalı voleybol oynayırlar və çox güclüdülər. Bizim üçün çətin bir sınaq oldu. Artıq növbəti matçlara hazırlaşacağıq”.Qeyd edək ki, yığmamız Sloveniyada daha bir neçə sınaq matçı keçirəcək.Daha sonra İtaliyaya gedəcək millimiz qitə çempionatına hazırlığı bu ölkədə başa çatdıracaq.xeber100.com

Şahmat üzrə Dünya Kuboku yarışları keçiriləcək

Sentyabrın 2-dən 27-dək Tbilisidə şahmat üzrə Dünya Kuboku yarışları keçiriləcək. Yarışların qalibi və ikinci finalçı 2018-ci ildə dünya çempionu adı uğrunda iddiaçıların turnirinə vəsiqə qazanacaqlar.FIDE builki Dünya Kuboku yarışlarının 128 iştirakçısının siyahısını açıqlayıb. Azərbaycanı qrossmeysterlər Şəhriyar Məmmədyarov və Teymur Rəcəbov təmsil edirlər.Azərtac xəbər verir ki, turnirin mükafat fondu 600 min dollar təşkil edir. Bunun 120 min dolları qalib şahmatçı üçün nəzərdə tutulub.Şəhriyar Məmmədyarov ilk matçda Quançu Liu (Çin), Teymur Rəcəbov isə Xelgi Dam Ziska (Farer adaları) ilə qarşılaşacaqlar. Hər iki şahmatçımız ağ fiqurlarla oynayacaq.Dünya Kuboku nokaut-sistem üzrə keçiriləcək: iki klassik partiyada hesab bərabər olsa, rəqibləri tay-breq: rapid, blits, lazım gəldikdə “armageddon” gözləyir. Finalda dörd klassik partiya oynanılacaq.Turnirdə ilk dəfə dünya şahmat tacının sahibi Maqnus Karlsen iştirak edəcək.Şəhriyar turnirə vəsiqəni yüksək reytinqi sayəsində qazanıb, Teymur isə Təşkilat Komitəsinin nominantlarından biri olub.xeber100.com

“Neftçi” komandası “Qarabağ” klubunu qəbul edəcək

Bu həftə Topaz Premyer Liqasında 2017/2018-ci illər mövsümü start götürəcək. Üç günü əhatə edəcək ilk turun bütün görüşləri “CBC Sport” kanalı vasitəsilə canlı yayımlanacaq.Azərtac xəbər verir ki, oyun cədvəlinə görə avqustun 11-də “Bakcell Arena”da paytaxtın “Neftçi” komandası Ağdamın “Qarabağ” klubunu qəbul edəcək. Matç saat 21:00-da başlayacaq.İlk tur çərçivəsində bir gün sonra Bakının “İnter” klubu “İnter Arena”da “Qəbələ” komandası ilə görüşəcək. Bu qarşılaşmaya saat 20:00-da start veriləcək.Avqustun 13-də saat 19:00-da başlayacaq matçda isə “Zirə” komandası eyni adlı idman kompleksinin stadionunda “Səbail” ilə oynayacaq.Tura “Sumqayıt”–“Kəpəz” kollektivlərinin oyunu ilə yekun vurulacaq. “Kapital Bank Arena”da keçiriləcək qarşılaşma saat 21:00-da start götürəcək.xeber100.com

UEFA Superkubokunun qalibi müəyyən olunub

Makedoniyanın paytaxtı Skopyedə İspaniyanın “Real Madrid” və İngiltərənin “Mançester United” komandaları arasında keçirilən oyunda UEFA Superkubokunun qalibi müəyyən olunub.Azərtac xəbər verir ki, Çempionlar Liqasının son qalibi "Real Madrid" Avroliqanı qazanan "Mançester"i 2:1 hesabı ilə məğlub edərək superkubokun sahibi olub.Bakı vaxtı ilə saat 23:45-də qarşılıqlı hücumlarla başlayan matçın 24-cü dəqiqəsində "Real Madrid"in futbolçusu Kasemiro hesabı açıb. Fasiləyə 1:0 hesabı ilə üstün yollanan madridlilər ikinci hissənin əvvəlində daha bir dəfə fərqləniblər. İsko matçın 52-ci dəqiqəsində hesabı iki topa çatdırıb. Oyunun 62-ci dəqiqəsində Lukaku hesab arasındakı fərqi minumuma endirib - 2:1. Oyunda başqa qol vurulmayıb.Bununla da "Real Madrid" tarixində dördüncü dəfə superkuboka sahib çıxıb.Qeyd edək ki, 1972-ci ildən keçirilən Avropa superkubokunu ən çox hərəsi beş dəfə olmaqla “Barselona” və "Milan" komandaları qazanıblar.xeber100.com

“İnter” futbol klubu 2017-2018-ci il mövsümündə

Bakının “İnter” futbol klubu 2017-2018-ci il mövsümündə ev oyunlarını keçirəcəyi stadionu müəyyənləşdirib.“İnter” Bakı Peşəkar İdman klubundan Azərtac-a bildirilib ki, məsələ ilə bağlı “AFFA” və “Aqrarkredit” SKT arasında aparılan danışıqlar başa çatıb. Qərara alınıb ki, “İnter” PİK-in əsas və uşaq futbol komandaları 2017-2018-ci il mövsümü ərzində “İnter Arena” stadionunda fəaliyyət göstərəcək.xeber100.com

Güləş Federasiyasının məlumatına görə…

Güləş üzrə ölkə yığma komandaları təqvim planında nəzərdə tutulan qrafik üzrə qarşıdan gələn dünya çempionatına hazırlıqlarını davam etdirirlər.Bu barədə Azərtac-a Azərbaycan Güləş Federasiyasından məlumat verilib.Yunan-Roma və sərbəst güləş üzrə böyüklərdən ibarət yığma komandalar məşqlərini Olimpiya Güləş Mərkəzində, qadın güləşçilər isə Kiyev şəhərində Konça Zaspa təlim-məşq bazasında davam etdirirlər.Yunan-Roma güləşi yığmasının təlim-məşq toplanışı avqustun 3-dən başlayıb və çempionata yola düşənə qədər davam edəcək.Avqustun 7-də Ukraynaya yollanan qadın güləşçilərimiz isə ayın 21-dək bu ölkənin yığma komandası ilə birgə hazırlıqları davam etdirəcəklər.Sərbəst güləşçilərin təlim-məşq toplanışı avqustun 6-dan başlayıb, 20-dək davam edəcək.Məlumat üçün bildirək ki, dünya çempionatı avqustun 21-dən 26-dək Parisdə baş tutacaq. Proqrama əsasən, 21-22 avqustda yunan-Roma, 23-24 avqustda qadın güləşçilər arasında qaliblər müəyyənləşəcək. Sərbəst güləşçilər isə avqustun 25-26-da xalça üzərinə çıxacaqlar.xeber100.com

“Qəbələ” 2017/18 mövsümünün hazırlığını davam etdirir

“Qəbələ” komandası Topaz Premyer Liqasının 2017/18 mövsümünün hazırlığını davam etdirir.Azərtac xəbər verir ki, “Qırmızı-qaralar” bu həftə start götürəcək Premyer Liqaya Bakıda hazırlaşır.Roman Qriqorçukun yetirmələri avqustun 7-dən paytaxtdakı Bakı Olimpiya Stadionunda hazırlıq keçir. Məşqlərini ölkənin ən böyük arenasında keçirən “Qəbələ” klubu “İnter”lə ilk turun səfər matçını avqustun 12-də keçirəcək.Xatırladaq ki, birinci turun “İnter” – “Qəbələ” oyunu avqustun 12-də “İnter Arena”da olacaq. Görüş saat 20:00-da başlayacaq.xeber100.com

2017/2018-ci tədris ili üçün ixtisas seçimi başlayıb

2017/2018-ci tədris ili üçün ali təhsil müəssisələrinin və Azərbaycan Milli Elmlər Akademiyasının (AMEA) magistraturalarının boş qalan yerlərinə qəbul aprelin 9-u və iyunun 4-də keçirilmiş ikimərhələli qəbul imtahanında toplanılmış ballar əsasında müsabiqə yolu ilə aparılır.Dövlət İmtahan Mərkəzindən (DİM) Azərtac-a bildirilib ki, cari ildə ali təhsil müəssisələrinin magistraturalarına qəbul olub qeydiyyatdan keçən bakalavrların boş qalan yerlərə keçirilən müsabiqədə iştirak etmək hüququ yoxdur. Bakalavrlar boş qalan yerlərə keçirilən müsabiqədə iştirak etmək üçün avqustun 8-də saat 10:00-dan avqustun 14-də saat 23:59-dək DİM-in internet saytının müvafiq səhifəsinə (eservices.dim.gov.az/erizemag/ixtisas2) daxil olub, seçdikləri ixtisasların kodlarını “Bakalavrın elektron ixtisaslaşma seçimi ərizəsi”ndə qeyd edib təsdiqləməlidirlər.Boş qalan yerləri olan ixtisasların siyahısı “Magistr” jurnalının 6-cı sayında dərc olunub. Hər bir bakalavr imtahan verdiyi proqrama aid və bitirdiyi bakalavr ixtisasına müvafiq olan 20-dək ixtisas kodunu seçə bilər.Bakalavr ixtisaslaşma kodlarının sayını və ardıcıllığını istədiyi kimi seçib ərizəsini təsdiq edir. Seçilmiş ixtisasların ərizə formasında göstərilən ardıcıllığı müsabiqə zamanı hüquqi əsas kimi qəbul olunur və bakalavr topladığı bala əsasən müsabiqədən keçdiyi ixtisasların birincisinə yerləşdirilir.Dövlət hesabına magistraturada təhsil almış magistrlər dövlət sifarişi ilə qəbul aparılan yerləri seçə bilməzlər. Əcnəbilər və vətəndaşlığı olmayan şəxslər qüvvədə olan qanunvericilikdə və dövlətlərarası razılaşmalarda digər hallar nəzərdə tutulmayıbsa, dövlət sifarişi ilə qəbul aparılan yerləri seçə bilməzlər.xeber100.com    

Beynəlxalq Velosipedçilər İttifaqı “Ribas” turu keçirib

Ukraynanın Odessa şəhərində Beynəlxalq Velosipedçilər İttifaqının 1,2 kateqoriyalı “Ribas” turu keçirilib. Birgünlük yarışda Azərbaycan yığma komandasının 4 üzvü – Elçin Əsədov, Ənvər Asanov, İsmayıl İlyasov və Musa Mikayılzadə iştirak edib.Azərtac xəbər verir ki, velosipedçilərimizdən ən yüksək nəticəyə yığmamızın lideri Elçin Əsədov imza atıb. O, 154 km məsafəni 3 saat 42 dəqiqə 55 saniyəyə qət edərək finiş xəttini 3-cü keçib. Bu nəticə idmançımıza 25 reytinq xalı qazandırıb.xeber100.com

Futbol Tarixi və Statistikası Tədqiqatlar Mərkəzinin məlumatına görə…

İspaniyanın “Barselona” klubunun argentinalı hücumçusu Lionel Messi İspaniya Futbol Tarixi və Statistikası Tədqiqatları Mərkəzinin versiyasına görə bu ölkənin futbol çempionatları tarixində ən yaxşı futbolçu sayılıb.Azərtac xəbər verir ki, “Marca” qəzetinin yazdığına görə, 30 yaşlı Messi 349 qolla İspaniya çempionatları tarixində ən yaxşı bombardir olub.Bunun üçün 1929-cu ildə İspaniyada keçirilən ilk futbol çempionatından başlamış 9280 futbolçu və 86 çempionatın oyunları təhlil edilib. Hesablama zamanı bir sıra amillər - hər mövsümdə oynanılan dəqiqələr, oyun zamanı vurulan qollar, onbirmetrlik cərimə zərbələri (penalti), avtoqollar və qırmızı vərəqələr nəzərə alınıb.L.Messi 545 xal toplayıb. Madridin “Real” klubunun heyətində oynamış Raul (1994-2010) 528 xalla ikinci yerdədir. 1939-1955-ci illərdə “Barselona”nın idman şərəfini qorumuş Sesar Sançes 524 xalla üçüncü yeri tutub.Maraqlıdır ki, “Real”ın təmsilçisi Kriştiano Ronaldo 415 xalla indiki futbolçular siyahısında ikinci, ümumi reytinqdə isə 17-ci yerdə qərarlaşıb ki, bu da ortaya çoxlu suallar çıxarır.L.Messi 2004-cü ildən “Barselona”nın heyətində çıxış edir. Bu müddət ərzində o, səkkiz dəfə İspaniya çempionu, 5 dəfə İspaniya Kubokunun və 4 dəfə Çempionlar Liqasının qalibi olub. Argentinalı ilin ən yaxşı futbolçusuna təqdim edilən “Qızıl top” mükafatının beşqat sahibidir. O, Argentina yığmasının heyətində 2014-cü ilin dünya çempionatının gümüş mükafatçısı olub.xeber100.com