Cüdo Federasiyasının beynəlxalq dərəcəli imtahanı keçirilib

Polşanın Qdansk şəhərində gənclərin Avropa Kuboku yarışı zamanı Beynəlxalq Cüdo Federasiyasının beynəlxalq dərəcəli hakimlik üçün imtahanı keçirilib.Azərtac xəbər verir ki, imtahanda Azərbaycan Cüdo Federasiyasının respublika dərəcəli hakimi Nazim Umbayev də iştirak edib. Sınaqdan uğurla keçən N.Umbayev beynəlxalq dərəcəli hakim adını qazanıb.Bununla da, hazırda fəaliyyət göstərən beynəlxalq dərəcəli hakimlərimizin sayı 6-ya çatıb.Qeyd edək ki, beynəlxalq dərəcəli hakimlərdən üçü – Mətin Rəhimli, Arzu Acalova və Nazim Umbayev federasiyamızın son 2 ildəki səmərəli fəaliyyəti nəticəsində bu dərəcəyə sahib olub.xeber100.com

Avropa Liqasının ikinci təsnifat mərhələsi çərçivəsində…

AFFA-nın Beynəlxalq əlaqələr şöbəsinin müdiri Könül Mehtiyeva UEFA tərəfindən yeni təyinat alıb.AFFA-dan Azərtac-a bildirilib ki, K.Mehtiyeva Avropa Liqasının ikinci təsnifat mərhələsi çərçivəsində iyulun 20-də keçiriləcək “Dinamo Brest” (Belarus)-“SCR Altach” (Avstriya) matçının UEFA nümayəndəsi olacaq.xeber100.com

Güləş üzrə 48-ci beynəlxalq turnir keçirilib

Rusiya Federasiyası Dağıstan Respublikasının Kaspiysk şəhərində beşqat dünya çempionu Əli Əliyevin xatirəsinə həsr olunmuş sərbəst güləş üzrə 48-ci beynəlxalq turnir keçirilib.Azərbaycan Güləş Federasiyasından Azərtac-a verilən xəbərə görə, turnirdə iştirak edən sərbəst güləş yığmamızın üzvləri 2 qızıl, 2 gümüş və 4 bürünc medal qazanıblar.Keçirdikləri bütün görüşləri qələbə ilə başa vuran Mahir Əmiraslanov (57 kq) və Aslanbek Alborov (97 kq) fəxri kürsünün ən yüksək pilləsində qərarlaşıb və turnirin qızıl medalını qazanıblar.Yalnız final görüşündə uduzan Ağahüseyn Mustafayev (65 kq) və Aleksandr Qostiyev (86 kq) gümüş medalla kifayətləniblər.Bürünc medalları isə yığmamıza Georgi Edişeraşvili, Pərviz İbrahimov (hər ikisi 57 kq), Qalib Əliyev (61 kq) və Məhəmməd Müslümov (65 kq) qazandırıblar.xeber100.com

“Səbail” klubu transfer çalışmalarını davam etdirir

“Səbail” klubu heyətinə daha bir futbolçu cəlb edib.Azərtac kluba istinadla xəbər verir ki, Maudo Lamine Jarjue paytaxt təmsilçisində çıxış edəcək.On doqquz yaşlı mərkəz müdafiəçisi ilə ikiillik müqavilə imzalanıb. Qvineya-Bisaulu futbolçu son mövsümü Portuqaliyanın 1-ci liqa komandası “Gil Visente”də keçirib.Bakıya gələrək müqaviləyə qol çəkən Maudo Türkiyə toplanışına komanda ilə birlikdə yollanacaq.xeber100.com

“Qarabağ” – “Samtredia” oyununun hakim təyinatları açıqlanıb

Futbol üzrə UEFA Çempionlar Liqasının ikinci təsnifat mərhələsində keçiriləcək “Qarabağ” (Ağdam)–“Samtredia” (Gürcüstan) oyununun hakim təyinatları açıqlanıb.Azərtac xəbər verir ki, qarşılaşmanı Türkiyədən olan hakimlər briqadası idarə edəcək. Görüşün baş hakimi Mete Kalkavan olacaq. Ona Esat Sancaktar və Erdem Bayik kömək edəcəklər. Dördüncü hakim funksiyasını Halit Umut Meler yerinə yetirəcək.Hakimlərin işinə Moldovadan olan Vladimir Antonov qiymət verəcək. Matçın UEFA nümayəndəsi ingiltərəli Qraham Hover olacaq.Qeyd edək ki, iyulun 11-də Tofiq Bəhramov adına Respublika stadionunda keçiriləcək oyun saat 21:00-da başlayacaq.xeber100.com

“Kəpəz” futbol klubu ilk yoxlama oyununa çıxıb

Yeni mövsümün hazırlığını Bakıda davam etdirən “Kəpəz” futbol klubu ilk yoxlama oyununa çıxıb.Azərtac xəbər verir ki, “sarı-göylər” həvəskarlar liqasının təmsilçisi olan “Bakı” ilə qarşılaşıblar. Rəqib meydanında baş tutan görüş Gəncə klubunun 2:1 hesablı qələbəsi ilə nəticələnib.“Kəpəz”dən qolları yeni transferlər İlyas Səfərzadə və Kamran Abdullazadə vurublar.Xatırladaq ki, gəncəlilər növbəti yoxlama oyununu iyulun 11-də “Neftçi”yə qarşı keçirəcəklər.xeber100.com

UEFA Avropa Liqasının ikinci təsnifat mərhələsi çərçivəsində…

Futbol üzrə UEFA Avropa Liqasının ikinci təsnifat mərhələsi çərçivəsində keçiriləcək “İnter” (Bakı)–“Fola” (Lüksemburq) matçının hakimləri müəyyənləşib.Azərtac xəbər verir ki, UEFA ilk qarşılaşmanı israilli hakimlər briqadasına həvalə edib.İyulun 12-də keçiriləcək görüşün baş hakimi Eytan Şmuelevits olacaq. Ona həmyerliləri Nissan Davidu və Saqi Mazamber kömək edəcəklər. Dördüncü hakim funksiyasını Daniel Bar Natan yerinə yetirəcək.Qeyd edək ki, “İnter”–“Fola” görüşü “Dalğa Arena”da saat 20:00-da start götürəcək.xeber100.com

Formula-1 üzrə dünya çempionatının doqquzuncu yarışında

Formula-1 üzrə dünya çempionatının doqquzuncu yarışı – Avstriya Qran-Prisində “Mercedes” komandasının pilotu Valtteri Bottas qalib gəlib.Azərtac xəbər verir ki, doqquzuncu yarışda pilotlar Şpilberqdəki “Redd Bull Ring”də 4326 metrlik trasda 71 dövrə vurublar.Valtteri Bottas 1 saat 21 dəqiqə 48,523 saniyəlik nəticə ilə aktivinə 25 xal yazdırıb. Liderdən 0,658 saniyə geri qalan Sebastian Fettel (“Ferrari”) yarışı 18 xalla ikinci pillədə yekunlaşdırıb. İlk üçlüyü liderdən 6,012 saniyə sonra finişə çatan Daniel Rikkardo (“Red Bull Racing”, 15 xal) tamamlayıb.Pilotların yarış cədvəlinə 171 xalla Sebastian Fettel başçılıq edir. Luis Hamilton (“Mercedes”) 151 xalla ikinci, V.Bottas isə 136 xalla üçüncü pillədə qərarlaşıb.Konstruktorlar kubokunda isə “Mercedes” 287 xalla birinci, “Ferrari” 254 xalla ikinci, “Red Bull Racing” isə 152 xalla üçüncü pillədə yer alıb.Çempionatın növbəti – onuncu yarışı olan Böyük Britaniya Qran-Prisi iyulun 14-16-da keçiriləcək.xeber100.com

İkinci Avropa Oyunlarının loqotipinin təqdimatı keçiriləcək

İyulun 8-də belarusluların Kupalye xalq bayramı çərçivəsində ikinci Avropa Oyunlarının loqotipinin təqdimatı keçiriləcək və turnirin talismanı üçün müsabiqənin başlandığı elan ediləcək.Azrtac Belarus Milli Olimpiya Komitəsinə istinadla xəbər verir ki, tədbirdə adlı-sanlı belaruslu idmançılar – Olimpiya çempionu və mükafatçısı, kanoyedə avarçəkmə üzrə birinci Avropa Oyunlarının qalibi Aleksandr Boqdanoviç, birinci Avropa Oyunlarının çempionu, sambo üzrə dünya və qitə birinciliklərinin dəfələrlə qalibi Stepan Popov, yuniorlar arasında dünya və Avropa çempionu, gənclər arasında Olimpiya Oyunlarının gümüş mükafatçısı, Belarus Prezidentinin “Belarusun Olimpiya Olimpi” xüsusi mükafatının sahibi Elvira German iştirak edəcəklər.Bundan əlavə, tədbirdə Belarus Milli Olimpiya Komitəsinin çadırı işləyəcək.İkinci Avropa Oyunlarının rəsmi devizi “Bright Year, Bright You” (“Parlaq il, parlaq sən”) sözləri olacaq.Belarus ikinci Avropa Oyunlarını keçirmək hüququnu Avropa Olimpiya Komitələri Baş Assambleyasının 2016-cı ilin oktyabrında Minskdə keçirilən 45-ci iclasında alıb. Birinci Avropa Oyunları 2015-ci ilin iyununda Azərbaycanın paytaxtı Bakıda keçirilib. Belaruslu atletlər bu yarışlarda 43 mükafat qazanıblar.xeber100.com

UEFA Çempionlar Liqasının ilk oyunları çərçivəsində…

Futbol üzrə UEFA Çempionlar Liqasının ikinci təsnifat mərhələsinin ilk oyunları çərçivəsində keçiriləcək “Qarabağ” (Ağdam)-“Samtredia” (Gürcüstan) qarşılaşmasının biletləri iyulun 7-dən satışa çıxarılıb.Azərtac xəbər verir ki, azarkeşlər biletləri hər gün saat 10:00-dan 19:00-dək Tofiq Bəhramov adına Respublika stadionunun kassalarından əldə edə bilərlər.Biletlərin qiyməti sektorlara görə 1-5 manatdır. VİP sektoruna isə biletlər 30 manat təşkil edir.Qeyd edək ki, “Qarabağ”–“Samtredia” matçı iyulun 11-də saat 21:00-da Tofiq Bəhramov adına Respublika stadionunda start götürəcək.xeber100.com