UEFA Avropa Liqasının final mərhələsindən…

UEFA Avropa Liqasının səkkizdəbir final mərhələsinin ilk turunun oyunları keçirilib.Azərtac xəbər verir ki, son yeddi ev oyununda məğlub olmayan Danimarkanın “Kopenhagen” komandası doğma meydanda Hollandiyanın “Ayaks” klubunu qəbul edib. Danimarkalılar görüşdə 2:1 hesabı ilə qalib gələrək ev oyunlarında məğlubedilməzlik seriyasını qoruyublar.Kiprin APOEL komandası isə evdə Belçikanın “Anderlext” klubu ilə qarşılaşıb. Bu qarşılaşma hər iki komandanın ilk dueli kimi əlamətdar olub. Bu oyunadək Belçika komandaları ilə keçirdiyi dörd görüşün hamısında məğlub olan APOEL komandası bu “ənənə”ni poza bilməyib və 0:1 hesabı ilə uduzub. Qeyd edək ki, belçikalıların heyətində çıxış edən rumıniyalı legioner Nikolae Stançiunun matçın 29-cu dəqiqəsində vurduğu qol “Anderlext”in avrokuboklarda 250-ci qolu olub.Digər maraqlı qarşılaşma isə Rusiyada “Rostov” komandası ilə “Mançester Yunayted” arasında keçirilib. İndiyədək Rusiyada keçirdiyi dörd oyunda məğlub olmayan (bir qələbə, üç heç-heçə) “Mançester Yunayted” ilk dəfə bir ingilis klubu ilə qarşılaşan “Rostov”un müqavimətini qıra bilməyib – 1:1.Yunanıstanın “Olimpiakos” komandasının qonağı olan İstanbulun “Beşiktaş” klubu isə ilk hissədə hesabda geri düşməsinə baxmayaraq, matçın 53-cü dəqiqəsində Vinsent Abubakarın qolu ilə heç-heçəyə nail olaraq, cavab qarşılaşması üçün əlverişli nəticəni təmin edib.Günün ən məhsuldar oyunu isə Belçika təmsilçiləri “Gent”-“Genk” oyununda qeydə alınıb – 2:5. Qarşılaşmada qeydə alınan altı qoldan beşi ilk hissədə vurulub. Matçın 68-ci dəqiqəsində 11 metrlik cərimə zərbəsini dəqiq yerinə yetirə bilməyən ev sahibləri 84-cü dəqiqədə sayca azlıqda qalıblar.Digər çoxqollu oyun isə Fransada baş tutub. “Roma” klubunu qəbul edən “Olimpik Lion” komandası 4:2 hesabı ilə qalib gəlib.İspaniyanın UEFA Avropa Liqasındakı yeganə təmsilçisi “Selta Viqo” doğma meydanda Rusiyanın “Krasnodar” klubunu 90-cı dəqiqədə vurduğu qol sayəsində 2:1 hesabı ilə məğlub edə bilib.Turnirdə Almaniya təmsilçiləri “Şalke” və “Mönxenqladbax” arasında keçirilən qarşılaşma 1:1 hesabı ilə başa çatıb.Qeyd edək ki, UEFA Avropa Liqasının səkkizdəbir final mərhələsinin cavab qarşılaşmaları martın 16-da oynanılacaq. Dörddəbir final mərhələsinin püşkü isə martın 17-də atılacaq. Turnirin final matçı mayın 24-də İsveçin Solna şəhərindəki “Friends Arena”da keçiriləcək.xeber100.com  

“Barselona” klubunun məlumatına görə…

“Barselona” klubunun rəhbərliyi komandanın xorvatiyalı yarımmüdafiəçisi İvan Rakitiç ilə müqavilənin müddətini uzadıb.Azərtac klubun saytına istinadla xəbər verir ki, 2021-ci il iyunun 30-dək qüvvədə olacaq müqaviləyə əsasən, xorvatiyalı legionerin sərbəst qalması üçün 125 milyon avro məbləğində qiymət müəyyən edilib.İvan Rakitiç “Barselona”ya 2014-cü ildə 26 yaşında olarkən “Sevilya”dan transfer edilib. Luis Enrikenin rəhbərliyi altında o, forma geydiyi 145 matçda 23 qol vurub. Futbolçu bu qollardan 9-na ilk mövsümdə nail olub. Cari mövsümdə onun aktivində 6 qol var.xeber100.com

Güləş üzrə dünya kuboku yarışları keçiriləcək

Martın 16-17-də İran İslam Respublikasının Abadan şəhərində böyüklər arasında yunan-Roma güləşi üzrə dünya kuboku yarışları keçiriləcək.Azərtac xəbər verir ki, yığma komandamız Türkiyə, Belarus və Ukrayna idmançıları ilə “B” yarımqrupunda mübarizə aparacaq. Rusiya, Qazaxıstan, İran və Almaniya komandaları isə “A” yarımqrupunda yarışacaqlar.Yığma komandamızın baş məşqçi əvəzi Akif Əliyev, böyük məşqçi İlqar Abdulov və məşqçi Nurəddin Rəcəbovun rəhbərliyi altında 12 güləşçimiz Abadana yollanacaq.Yarışda ölkəmizi Rövşən Bayramov, Taleh Məmmədov (hər ikisi 59 kq), Kamran Məmmədov, Nofəl Babayev (hər ikisi 66 kq), Rəsul Çunayev, Həsən Əliyev (hər ikisi 71 kq), Elvin Mürsəliyev (75 kq), Rafiq Hüseynov (80 kq), İslam Abbasov (85 kq), Orxan Nuriyev (98 kq), Sabah Şəriəti və Oyan Nəzəriani (hər ikisi 130 kq) təmsil edəcəklər.Yarışın proqramına əsasən, martın 16-da qrup görüşləri keçiriləcək. Qrup liderləri finalda, qrup ikinciləri isə 3-lük uğrunda görüşəcəklər.Görüşlərin idarə edilməsində ölkəmizi beynəlxalq dərəcəli hakim Qərib Əliyev təmsil edəcək.Xatırladaq ki, 2015-ci ildə keçirilən analoji yarışda yunan-Roma güləşçilərimiz dünya kubokunun sahibi olublar.xeber100.com

İdmançıların növbəti reytinq cədvəli açıqlanıb

Beynəlxalq Triatlon İttifaqı idmançıların növbəti reytinq cədvəlini açıqlayıb.Azərtac qurumun rəsmi saytına istinadla xəbər verir ki, Azərbaycan milli komandasının üzvü Rostislav Pevtsovun reytinq cədvəlində 1 pillə irəliləyib. Belə ki, R.Pevtsov 3196,01 xalla 16-cı pillədədir.Reytinq cədvəlinə ispaniyalı Mario Molaya liderik edir. Böyük Britaniya təmsilçisi Conatan Braunli ikinci, digər ispaniyalı triatlonçu Fernando Alarza isə üçüncüdür.xeber100.com

Milli komandaların növbəti reytinq cədvəli açıqlanıb

FIFA futbol üzrə milli komandaların növbəti reytinq cədvəlini açıqlayıb.Azərtac AFFA-ya istinadla xəbər verir ki, ötən ayla müqayisədə Azərbaycan millisinin mövqeyində dəyişiklik baş verməyib. Millimiz 380 xalla 89-cu yerdə qərarlaşıb.Dünyanın ən güclü 10 komandasının mövqeyində yalnız xal dəyişikliyi olub. 1644 xalla Argentina reytinq cədvəlinə liderlik edir. Braziliya 1534 xalla ikinci, Almaniya 1443 xalla üçüncü pillədə yer alıblar.xeber100.com

Qətər və Azərbaycan milli komandaları arasında yoldaşlıq oyunu keçiriləcək

Bu gün Doha şəhərindəki “Al Sadd” stadionunda futbol üzrə Qətər və Azərbaycan milli komandaları arasında yoldaşlıq oyunu keçiriləcək.Azərtac AFFA-ya istinadla xəbər verir ki, görüşü macarıstanlı hakimlər briqadası idarə edəcək. Qarşılaşmanın baş hakimi Ferenc Karako olacaq. Ona Peter Berettian və Balazs Buzas kömək edəcəklər. Dördüncü hakim funksiyasını Saud Al Athba (Qətər) yerinə yetirəcək.Qarşılaşma yerli vaxtla saat 19:00-da (Bakı vaxtı ilə 20:00) başlayacaq.xeber100.com

Şahmat üzrə Azərbaycan çempionatı keçirilir

Bakıda kişilər arasında şahmat üzrə Azərbaycan çempionatı keçirilir. Çempionatda 24 şahmatçı, o cümlədən dörd qrossmeyster iştirak edir.Azərtac xəbər verir ki, iki turdan sonra 2 xal toplamış beynəlxalq dərəcəli usta Misrəddin İsgəndərov çempionatda liderlik edir. Səkkiz şahmatçı - qrossmeysterlər Vüqar Rəsulov, Nicat Abbasov, Urfan Sevdimalıyev, beynəlxalq dərəcəli usta Nicat Ağayev, ustalığa namizəd Aydın Süleymanlı, habelə Fariz Əhmədov, Təbriz İdrisov və Zaur Bayramov ondan 0,5 xal geri qalır. Yeddi şahmatçının aktivində 1 xal var.İsveçrə sistemi üzrə keçən yarış 9 turdan ibarətdir.xeber100.com

Futbol əfsanələri arasında xeyriyyə matçı oynanılacaq

İyunun 17-də Fransa və İtaliyanın futbol əfsanələri arasında xeyriyyə matçı baş tutacaq.Azərtac “lequipe.fr” saytına istinadla bildirir ki, bir çox ulduzların iştirak edəcəyi matç ötən il iyulun 14-də Fransanın Nitsa şəhərində baş verən və 86 nəfərin ölümünə səbəb olan terror aktının qurbanlarının xatirəsinə həsr ediləcək. Xeyriyyə matçına bilet satışından əldə ediləcək gəlir “Mələklərin gəzintisi” assosiasiyasına köçürüləcək.Artıq bir sıra əfsanəvi futbolçular – Zidan, Pöti, Deşam, Qovu, Qallas, Vieri, Maldini, Barezi, Kostakurta, Del Piero Nitsadakı “Allianz Riviera” stadionunda keçiriləcək matçda iştiraklarını təsdiqləyiblər.xeber100.com

UEFA Çempionlar Liqasının final mərhələsinin cavab görüşü keçirilib

Martın 8-də UEFA Çempionlar Liqasının səkkizdəbir final mərhələsinin daha iki cavab görüşü keçirilib.Azərtac xəbər verir ki, turun mərkəzi matçı Kataloniyada “Barselona” ilə Fransanın “PSJ” komandaları arasında olub. İlk görüşdə rəqibinə 0:4 hesabı ilə uduzan Luis Enrikenin yetirmələri möcüzə yaratmağa nail olublar. Doğma meydanda rəqibinə 6:1 hesabı ilə qalib gələn kataloniyalılar növbəti mərhələyə vəsiqə qazanıblar.Günün digər qarşılaşması isə Almaniyada keçirilib. Dortmundun “Borussiya” klubu səfərdə 0:1 hesabı ilə uduzduğu “Benfika”ya doğma meydanda böyük hesabla qalib gəlib. Rəqibini 4:0 hesabı ilə məğlubiyyətə uğradan almanlar növbəti mərhələyə yüksəliblər.xeber100.com

Futbol yarışında mübarizə aparacaq komandalar müəyyənləşib

“Bakı-2017” IV İslam Həmrəyliyi Oyunlarının Əməliyyat Komitəsi (AİHOƏK) bu mötəbər turnirin futbol yarışında mübarizə aparacaq səkkiz komandanın adlarını açıqlayıb.Azərtac “Bakı-2017”nin saytına istinadla xəbər verir ki, ev sahibi Azərbaycan ilə yanaşı, Türkiyə, Səudiyyə Ərəbistanı, Kamerun, Mərakeş, Oman, Fələstin və Əlcəzair milliləri qələbə uğrunda mübarizə aparacaqlar. Hər bir komandanın heyəti 23 yaşadək futbolçulardan formalaşdırılıb. Bununla yanaşı, yaşı 23-dən yuxarı olan üç futbolçu da heyətdə yer ala bilər.Hər qrupda birinci və ikinci yeri tutacaq komandalar yarımfinala çıxacaqlar. Yarımfinalda məğlub olan komandalar üçüncü yer uğrunda görüşdə üz-üzə gələcəklər. Ümumilikdə futbol yarışında 16 matç oynanılacaq. Qarşılaşmalar “Bayıl Arena”, “Dalğa Arena”, Tofiq Bəhramov adına Respublika stadionu və “Azal Arena”da keçiriləcək. Mayın 18-21-də təşkil olunacaq yarımfinal və final oyunlarının Tofiq Bəhramov adına Respublika stadionunda keçirilməsi planlaşdırılır.“Bakı-2017”nin idman direktoru Mark Haniban Azərbaycanda futbola hər zaman böyük maraq göstərildiyini diqqətə çatdıraraq deyib: “IV İslam Həmrəyliyi Oyunlarında da futbol azarkeşlərin diqqət mərkəzində olacaq. Cəmi 16 matçdan ibarət yarış elə planlaşdırılıb ki, komandalar sonuncu mərhələlərdə lazımi vaxt qazanaraq, yarımfinal və final oyunlara yaxşı hazırlaşa bilsinlər. Biletlərə tələbatın çox olması gözlənilir. Əminəm ki, Azərbaycan azarkeşləri yalnız öz komandalarını deyil, digər ölkələrin də ulduz futbolçularını dəstəkləyəcəklər”.xeber100.com