Avtobusların hərəkət sxemində dəyişiklik edilib

Bakı Olimpiya Stadionundan Heydər Əliyev prospektinə keçid və müxtəlif səviyyəli yol qovşağının istifadəyə verilməsi ilə əlaqədar “Koroğlu” Nəqliyyatı Mübadilə Mərkəzi ilə ətraf kənd və qəsəbələri əlaqələndirən 22 marşrut xətti üzrə (24, 62, 93, 101, 107, 131, 136, 139, 148, 150, 160, 163, 166, 171, 172, 173, 187, 189, 198, 204, 216, 217) avtobusların hərəkət sxemində dəyişiklik edilib.Azərtac xəbər verir ki, bu barədə Bakı Nəqliyyat Agentliyindən məlumat verilib.Bildirilib ki, “Koroğlu” Nəqliyyatı Mübadilə Mərkəzindən çıxan avtobuslar artıq Ziya Bünyadov prospekti və “Böyük Şor” qovşağına daxil olmadan yollarına davam edəcək. Dəyişiklik sayəsində ətraf kənd və qəsəbələrə gedən avtobusların artıq məsafə qət etməsinin qarşısı alınır ki, bu da sərnişinlərin mənzilbaşına daha tez çatması və digər nəqliyyat vasitələrinin hərəkətinin intensivliyinin artması baxımından əhəmiyyətlidir.xeber100.com  

Mayın 8-nə olan USD/AZN rəsmi məzənnəsi açıqlanıb

Azərbaycan Mərkəzi Bankı (AMB) mayın 8-nə olan USD/AZN rəsmi məzənnəsini açıqlayıb.Bankdan Azərtac-a bildiriblər ki, Azərbaycan Mərkəzi Bankının mayın 8-dən etibarən USD/AZN rəsmi məzənnəsi 1,7000 manat səviyyəsində müəyyən olunub.xeber100.com

XXIII Beynəlxalq Neft-Qaz və Neft-Kimya Sərgisi açılıb

Tehranın Sərgilər Mərkəzində XXIII Beynəlxalq Neft-Qaz və Neft-Kimya Sərgisi açılıb. Sərginin açılış mərasimində İranda səfərdə olan Azərbaycanın energetika naziri Pərviz Şahbazov iştirak edib.Azərtac xəbər verir ki, İranın dövlət rəsmilərinin iştirakı ilə açılan sərgidə 1200 yerli və 880 xarici şirkət təmsil olunub. Mayın 9-dək davam edəcək sərgidə Azərbaycanı SOCAR təmsil edir. Azərbaycanla yanaşı sərgidə İspaniya, Almaniya, Türkiyə, Yaponiya, Finlandiya, Qazaxıstan, İsveç, Rusiya və başqa ölkələrin şirkətləri öz məhsullarını sərgiləyir və xidmətlərini təqdim edir.İrana səfəri çərçivəsində Azərbaycanın energetika naziri Pərviz Şahbazov bu ölkənin neft naziri Bijən Namdar Zəngənə ilə görüşüb.Görüşdə digər sahələrdə olduğu kimi enerji sahəsində də Azərbaycan ilə İranın əməkdaşlıq əlaqələrinin inkişaf etdiyi vurğulanıb. Nəzərə çatdırılıb ki, Xəzər dənizində müvafiq blokların birgə işlənməsi ilə bağlı imzalanan sənəd hər iki dövlətin enerji sahəsinin inkişafına öz töhfəsini verəcək.xeber100.com  

“AtaSığorta” ASC-nin məlumatı əsasında…

“Son 50 ildə rəqəmsal texnologiyalar sahəsində nə qədər irəliləyiş baş veribsə, növbəti 5 ildə 10 dəfə daha sürətlə inkişaf gedəcək”.Apa-Economics”in məlumatına görə, bunu bu gün Bakıda “Pullman” otelində ölkəmizin aparıcı şirkətlərinin dəstəyi və iştirakı ilə “Rəqəmsal Biznes Trendləri” devizi altında keçirilən II Maliyyə və İnvestisiya Forumunda (FIF2018) "AtaSıorta" ASC-nin İdarə Heyətinin sədr müavini Orxan Məmmədov deyib.Onun sözlərinə görə, ənənəvi rəqabət sərhədləri pozulub: "Bu gün banklarla super marketlər rəqabət aparır. Yəni, bu gün sahələr arasında rəqabət gedir. Bu da daha da böyük inkişafa səbəb olacaq".Sığorta şirkətinin rəsmisi bildirib ki, hazırda bu tendensiyalardan istifadə edən şirkətlər qazanır: “Bəzi şirkətlər müştərinin sosial şəbəkəsini öyrənməklə onun barəsində məlumatları toplayır. Bu gün şirkətlər qarşısında duran əsas məsələ kibertəhlükəsizlikdir. Bu kibertəhlüksizlik qorxusundan bəzi şirkətlər yenilənməyə, elektronılaşmaya, rəqəmsalaşmaya getmirlər. Onlar məlumatların bu rəqəmsallaşma ilə oğurlana biləcəyindən və ya hakerlərin əllərinə keçməsindən qorxurlar”.xeber100.com

Vergi qanunvericiliyinə dəyişiklik paketi hazırlanıb

“2019-cu il üçün vergi qanunvericiliyinə dəyişiklik paketi hazırlanıb”. “Apa-Economics”in məlumatına görə, bunu bu gün Bakı şəhəri “Pullman” otelində ölkəmizin aparıcı şirkətlərinin dəstəyi və iştirakı ilə “Rəqəmsal Biznes Trendləri” devizi altında keçirilən II Maliyyə və İnvestisiya Forumunda (FIF2018) Vergilər Nazirliyinin Vergi siyasəti və strateji araşdırmalar departamentinin baş direktorunun müavini Nicat İmanov deyib.“Məlumdur ki, dövlətin əsas hədəfləri gəlir və vergi siyasətinin, biznes mühitinin yaxşılaşdırılması, əlverişli vergi mühitinin yaradılmasıdır. Vergi orqanının və ödəyicisinin arasında portnyorluğun yaxşılaşdırılmasıdir ki, burada etibarlılıq mühitinin yaradılması əsas şərtdir. Məhz bu məqsədlə hər il qanunvericilikdə edilən dəyişikliklər sahibkarlıq mühinin yaxşılaşdırılması, vergi yükünü optimallaşdırılması, vergi nəzarəti mexanizmlərinin həyata keçirilməsindən ibarətdir”, - deyə N.İmanov vurğulayıb.N.İmanov qeyd edib ki, 2017-ci ildə vergi qanunvericiliyində dəyişiklik həyata keçirilməyib: “2016-cı ilin dekabr ayında böyük bir paket dəyişilkliklər olub. Böyük dəyişiklikdən sonra ən azı 1 il gözləmək lazımdır ki, bu, öz effektini göstərsin. Əlbəttə qanunvericiliyin tez-tez dəyişməsi məqsədimiz deyil. Ancaq qanunvericilikdə olan müəyyən qaydaların dəyişilməsi uyğunlaşma xarakterlidir. 2018-ci il üçün dəyişiklik olmasa da 2019-cu il üçün dəyişiklik paketi hazırlanıb. Qarşıda duran bu məqsədlərə çatmaq üçün şəffaf mühitin olması zərurudir. Dövlət orqanı və sahibkar arasıda ədalətlilik prinsipi olmalıdır. Vergi nəzarətinin sahibkar tərəfindən bəyan edilməsi əsas məqsəddir. Məhz bu məqsədlə də bir neçə normativ sənədlər təsdiq olunub. Əldə edilmiş gəlir və xərclərin uçotunun aparılması, elektron- qaimə fakturaların tətbiqi artıq oz effektini göstərir. Sahibkarlar artıq anlayırlar ki, vergini yayındırmaq olmaz. Dövlət orqanı nə qədər açıq olsa, şəffalıq mühiti, vergi nəzarəti tədbirlərinin azalmasına şərait yaratmış olarlar”.xeber100.com

“Azeri Light” markalı neftin bir barrelinin qiyməti…

Dünya birjalarında neftin qiyməti yenidən bahalaşıb.Azərtac xəbər verir ki, “Azeri Light” markalı neftin bir barrelinin qiyməti 0,41 dollar bahalaşaraq 74,23 dollar təşkil edib.Londonun ICE (“InterContinental Exchange Futures”) birjasında “Brent” markalı neftin bir barrelinin qiyməti 0,02 dollar artaraq 73,64 dollar, Nyu-Yorkun NYMEX (“New York Mercantile Exchange”) birjasında “Light” markalı neftin bir barrelinin qiyməti isə 0,04 dollar bahalaşaraq 68,47 dollar olub.xeber100.com

“Azəriqaz” İstehsalat Birliyinin məlumatı

Cari ildə SOCAR-ın “Azəriqaz” İstehsalat Birliyi (İB) tərəfindən 26 yaşayış məntəqəsinə təbii qaz verilib.Birlikdən Azərtac-a bildirilib ki, “Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”nın icrası məqsədilə “Azəriqaz” tərəfindən təxirə salınmaz işlər həyata keçirilir. Belə ki, əhali istehlakçılarının mənzillərində istismar edilən istismar müddəti başa çatmış sayğaclar yenisi ilə əvəz olunur, yeni qaz kəmərləri çəkilir və istismara yararsız vəziyyətdə olan qaz tənzimləyiciləri yeniləri ilə əvəz edilir.İstehlakçıların qaz təchizatının yaxşılaşdırılması, şəbəkənin qaz nəqletmə imkanlarının artırılması və yaşayış məntəqələrinin qazlaşdırılması üçün birlik tərəfindən 2018-ci ilin yanvar-aprel ayları ərzində 775,4 kilometr yeni qaz kəməri quraşdırılmış, qaz kəmərləri şəbəkəsinin təhlükəsiz və normal rejimdə istismarının təmin olunması üçün isə 78,7 kilometr qaz kəməri əsaslı təmir edilib. Cari il ərzində aparılan tikinti-quraşdırma işləri nəticəsində Bərdə, Şəki, Göyçay, Ucar, Xaçmaz, Beyləqan, Sabirabad, Lerik, Salyan, Cəlilabad və Masallı rayonları üzrə 26 yaşayış məntəqəsi təbii qazla təmin olunub.xeber100.com

Vergilər Nazirliyi sənəd qəbulu elan edib

Vergilər Nazirliyi işə qəbulla bağlı əlavə sənəd qəbulu elan edib. Müsabiqənin test mərhələsində bir sıra yeniliklər də nəzərdə tutulub.Azərtac xəbər verir ki, vergi orqanlarına işə qəbul olunmaq istəyənlər üçün əlavə sənəd qəbuluna aprelin 30-dan başlanılıb. Proses mayın 9-dək davam edəcək.Müsabiqədə iştirak etmək istəyənlər Vergilər Nazirliyinin internet saytında elektron ərizə formasını doldurmalıdırlar. Beş gün ərzində isə namizədin elektron poçt ünvanına onun iş nömrəsi göndərilir. Dövlət vergi orqanlarına işə qəbulla əlaqədar 2017-ci ilin dekabrın 5-dən 30-dək qeydiyyatdan keçmiş və elektron ərizələri qəbul edilən vətəndaşların müsabiqədə iştirak hüququ saxlanılıb. Müsabiqənin test imtahanı mayın 26-da Dövlət İmtahan Mərkəzinin müəyyən etdiyi yerdə və vaxtda keçiriləcək. Bu mərhələdə bir sıra yeniliklər də planlaşdırılıb.Müsabiqə Vergilər Nazirliyinin kadr ehtiyat bazasının formalaşdırılması üçün də nəzərdə tutulub. Vakant vəzifələrə təyin olunmamış namizədlərin kadr ehtiyatında saxlanma müddəti 2 ildir.xeber100.com

“Human Capital-2018” forumu keçirilib

Bakıda “Human Capital-2018” forumu keçirilib. Azərbaycan Banklar Assosiasiyası və İnsan Resursları Cəmiyyətinin birgə təşkil etdiyi tədbirdə ümumilikdə 63 dövlət qurumu və kommersiya şirkətləri, o cümlədən bankların HR nümayəndələri iştirak ediblər.Azərtac xəbər verir ki, "Human Capital Forum”un əsas məqsədi insan resursları sahəsində çalışan mütəxəssisləri bir araya gətirmək, onların peşəkar inkişafına dəstək vermək, təcrübə mübadiləsi aparmaqdır.Azərbaycan Banklar Assosiasiyasının prezidenti Zakir Nuriyev insan kapitalının formalaşmasında İnsan Resursları Cəmiyyətinin menecerlərinin rolundan danışıb. O, Banklar Assosiasiyasının nəzdində fəaliyyət göstərən “Tədris strategiyaları və İR üzrə” Ekspert Qrupunun fəaliyyətindən də danışıb.Azərbaycan Bank Tədris Mərkəzinin direktoru Cavanşir Abdullayev bildirib ki, bu sahədə təlimlərin rolu danılmazdır.İki panel üzrə keçirilən iclasda bir sıra təqdimatlar olub. İstedadların cəlb edilməsi, doğru qiymətləndirmə instrumentlərinin seçilməsi, insan resurslarının idarə edilməsi və digər mövzularda təqdimatlar maraqla qarşılanıb.Maliyyə Bazarlarına Nəzarət Palatasının İnsan resursları departamenti və Azərbaycan Beynəlxalq Bankın mütəxəssisləri də məruzələrlə çıxış ediblər.xeber100.com

“Azərişıq” ASC-də daha bir yenilik…

“Azərişıq” ASC-də daha bir yenilik - “ASAN xidmət”də ASC-nin daha 2 xidməti yaradılıb.ASC-nin mətbuat xidmətindən Azərtac-a bildirilib ki, “Azərişıq” ASC-nin “ASAN xidmət” və “ASAN Kommunal” vasitəsilə abonentlərə göstərdiyi xidmətlərin sırasına daha 2 xidmət əlavə olunub. Bu gündən etibarən ölkədəki bütün “ASAN xidmət” və “ASAN Kommunal” mərkəzlərində “yük hesabatının hazırlanması” (elektrik enerjisinin gücü və keyfiyyət göstəriciləri barədə sənəd) və “istehlakçının balansında olan elektrik şəbəkələrinə, onların avadanlıqlarına texniki xidmətin göstərilməsi” adlı 2 yeni xidmət fəaliyyətə başlayıb.Qeyd edək ki, “yük hesabatının hazırlanması” (elektrik enerjisinin gücü və keyfiyyət göstəriciləri barədə sənəd) üçün ərizə-blank və müraciət edən şəxsin şəxsiyyət vəsiqəsi tələb olunur. Bu xidmət sifarişçinin tələbinə uyğun olaraq dərhal və ya 2 gün ərzində həyata keçirilir.“İstehlakçının balansında olan elektrik şəbəkələrinə və avadanlıqlarına texniki xidmətin göstərilməsi” üçün də ərizə-blank və müraciət edən şəxsin şəxsiyyət vəsiqəsi tələb olunur. Xidmətin müddəti isə işin həcmindən asılı olaraq müqavilə əsasında müəyyən edilir. Beləliklə “Azərişıq” ASC-nin “ASAN xidmət” və “ASAN Kommunal” vasitəsilə göstərdiyi xidmətin sayı bu gündən etibarən 13 olub.Bundan başqa, Nazirlər Kabinetinin “Tikinti obyektlərinin enerji təchizatı şəbəkəsinə qoşulmasına görə qoşulma haqqı məbləği”nin təsdiq edilməsi barədə yeni qərarına əsasən, sahibkarların tələb olunan gücü 150 kVt-a qədər mövcud 0,4 kV-luq şəbəkədən tikinti obyektlərinin enerji təchizatı şəbəkəsinə qoşulmasına görə vahid tarif təsdiq edilib. Bu isə o deməkdir ki, “Azərişıq” ASC-nin “ASAN xidmət” və “ASAN Kommunal” vasitəsilə bu günə qədər xidmət göstərdiyi “qeyri-əhali abonentinin enerji təchizatı şəbəkəsinə qoşulması” xidmətində yeniliklər edilərək vahid tarif tətbiq olunub. Bu isə sahibkarların işini daha da asanlaşdırıb.xeber100.com