Nyu-Yorkun NYMEX birjasında neftin qiyməti ucuzlaşıb

Dünya birjalarında neftin qiyməti ucuzlaşıb.Azərtac xəbər verir ki, Londonun ICE (“InterContinental Exchange Futures”) birjasında “Brent” markalı neftin bir barrelinin qiyməti 0,33 dollar ucuzlaşaraq 66,69 dollar, Nyu-Yorkun NYMEX (“New York Mercantile Exchange”) birjasında “Layt” markalı neftin bir barrelinin qiyməti isə 0,24 dollar azalaraq 59,73 dollar təşkil edib.xeber100.com

“Trans-Adriatik” boru kəməri layihəsində

Azərbaycan təbii qazını Avropaya nəql edəcək “Trans-Adriatik” (TAP) boru kəməri layihəsi İtaliyada qrafik üzrə irəliləyir.Bunu Azərtac-a eksklüziv açıqlamasında TAP-ın kommunikasiya rəhbəri Lisa Givert deyib.O bildirib ki, 2015-ci il mayın 20-də İtaliyanın İqtisadiyyat Nazirliyi tərəfindən verilən əsas icazə sənədinə uyğun olaraq TAP-ın inşasına dair digər ikinci dərəcəli icazələrin alınması üzrə işlər davam etdirilir. TAP-ın 8 kilometrlik İtaliya hissəsinin inşası çərçivəsində bu ilin mart-iyul aylarında mikrotunelin tikiləcəyi ərazidən zeytun ağacları çıxarılıb. Həmin ağaclar yaxınlıqdakı bir uşaq bağçasına (Masseria del Capitano) köçürülüb. Ağaclar burada təmənnasız saxlanılacaq və onlara müvafiq qulluq göstəriləcək. Boru kəmərinin tikintisi işləri başa çatdıqdan sonra həmin zeytun ağacları öz yerlərinə geri qaytarılacaq”.“Bundan başqa, TAP-ın dəniz hissəsinin inşasında istifadə olunacaq boruların sonuncu partiyası da sentyabrın 3-6-da İtaliyanın Brindisi bölgəsində boşaldılıb. TAP-ın Adriatik dənizindən keçəcək 105 kilometrlik hissəsinin tikintisini həyata keçirəcək İtaliyanın “Saipem S.p.A” şirkəti hazırda mikrotunel sahələrində çalışır. Burada müvəqqəti yol və sahə hazırlığı tamamlanıb. TAP-ın podratçısı hazırda mikrotunelin tikintisini həyata keçirmək üçün çuxurun qazılması işlərini görür” – deyə L.Givert əlavə edib.Qeyd edək ki, TAP layihəsi üzrə işlərin - mühəndis, təchizat və tikinti işləri də daxil olmaqla ümumilikdə 60 faizdən çox tamamlanıb. Bu irəliləyiş TAP-ın keçdiyi hər üç ölkəni - Yunanıstan, Albaniya və İtaliyanı əhatə edir. TAP Avropa İttifaqı üçün prioritet enerji layihələrindən olan “Cənub Qaz Dəhlizi”nin bir seqmentini təşkil edir. Boru kəmərinin təməli keçən il mayın 17-də Yunanıstanın Saloniki şəhərində qoyulub.

2018-2020-ci illərdə turizm sektorunda…

İqtisadiyyat Nazirliyində "Azərbaycan Respublikasında ixtisaslaşmış turizm sənayesinin inkişafına dair Strateji Yol Xəritəsi"nin Tədbirlər Planında nazirliyin icraçı olduğu tədbirlərin icra vəziyyəti müzakirə edilib.Nazirliyin mətbuat xidmətindən bildirilib ki, görüşdə Naftalan kurortunda və digər müalicə-sağlamlıq müəssisələrinin yenidən qurulması ilə bağlı aidiyyəti qurumlar tərəfindən həyata keçirilmiş tədbirlər barədə məlumat verilib. İxtisaslaşmış turizm sənayesinin inkişafı ilə bağlı Strateji Yol Xəritəsində sağlamlıq turizmi üzrə müəyyənləşdirilmiş hədəf göstəricisi və turizmin bu istiqamətinin inkişafı, eləcə də Naftalan, Qalaaltı və Duzdağda fəaliyyət göstərən müalicə-sağlamlıq müəssisələrində və turistlər üçün cəlbedici olan digər müəssisələrdə aparılacaq bərpa və yenidənqurma işləri ilə bağlı fikir mübadiləsi aparılıb.Tədbirdə aidiyyəti qurumların təklifləri əsasında 2018-2020-ci illər üzrə görüləcək işləri əhatə edən tədbirlər planının hazırlanması qərara alınıb.xeber100.com

“Azəriqaz” gücləndirilmiş iş rejimində işləyəcək

SOCAR-ın “Azəriqaz” İstehsalat Birliyi (İB) Dünya Azərbaycanlılarının Həmrəyliyi Günü və Yeni il bayramları ilə əlaqədar dekabrın 31-dən başlayaraq gələn il yanvarın 4-dək gücləndirilmiş iş rejimində fəaliyyət göstərəcək.Birlikdən Azərtac-a bildirilib ki, bayram günlərində istehlakçıların təbii qazla fasiləsiz və keyfiyyətli təmin edilməsi, eləcə də “Qaz təsərrüfatında təhlükəsizlik Qaydaları”nın tələblərinə uyğun olaraq qaz təchizatı sisteminə nəzarəti gücləndirmək məqsədilə “Azəriqaz” tərəfindən zəruri tədbirlər həyata keçirilir. Sutkada 24 saat fəaliyyət göstərən 185 və 104 nömrəli “Çağrı Mərkəzi”nin fəaliyyəti gücləndiriləcək, eləcə də birliyin müvafiq şöbələrində, Bakı Regional Qaz İstismarı Departamentində, Sumqayıt Qaz İstismar Sahəsində və Regional Qaz İstismar İdarələrində, həmçinin xidmət sahələrində məsul şəxslərdən ibarət sutkalıq növbətçilik təşkil olunacaq.“Azəriqaz” İB istehlakçılardan bayram günlərində təbii qazdan istifadə zamanı xüsusilə diqqətli olmağı, texniki təhlükəsizlik qaydalarına ciddi əməl etmələrini xahiş edir.xeber100.com

Dünya birjalarında neftin qiyməti…

“Brent” markalı neftin bir barrelinin qiyməti bu ilin ortasından indiyədək 50 faizədək bahalaşıb.Azərtac xəbər verir ki, birgünlük Milad bayramı tətilindən sonra bu gün səhər saatlarında “Brent”in qiyməti 65,34 dollar/barrelədək bahalaşaraq son iki il yarımın maksimumuna yüksəlib. Həmçinin “Brent”in qiyməti 2017-ci ilin ortasından bu vaxtadək 47 faiz bahalaşıb.Hazırda “Brent” nefti Londonun ICE birjasında 65,22 dollar/barreldən, “Layt” nefti isə Nyu-Yorkun NYMEX birjasında 58,49 dollar/barreldən alıcı axtarır.xeber100.com

Neft Fondunun iştirakı ilə hərrac keçirilib

Dekabrın 26-da Mərkəzi Bankda Dövlət Neft Fondunun da iştirakı ilə hərrac keçirilib.Bankdan Azərtac-a bildiriblər ki, hərracda manatın ortaçəkili məzənnəsi 1,7001 səviyyəsində formalaşıb.xeber100.com

“Bakı Metropoliteni” QSC-nin məlumatı

Dekabrın 31-də Bakı metrosu gecə saat 01:00-dək fəaliyyət göstərəcək.Azərtac xəbər verir ki, bu barədə “Bakı Metropoliteni” QSC-nin mətbuat xidmətinin rəhbəri Nəsimi Paşayev deyib.O bildirib ki, 31 Dekabr - Dünya Azərbaycanlılarının Həmrəyliyi Günü və Yeni il bayramı ilə əlaqədar olaraq Bakı metrosu gecə saat 01:00-ə qədər fəaliyyət göstərəcək.N.Paşayev qeyd edib ki, həmçinin bayram ərəfəsində metroda yeni il posterləri vurulacaq, sərnişinlər üçün konsert proqramı, balaca sərnişinlər üçün isə hədiyyələr təşkil olunacaq.xeber100.com

Mərkəzi Bank depozit hərracının nəticələrini açıqlayıb

Mərkəzi Bank tərəfindən vəsaitlərin cəlb edilməsi üzrə depozit hərracının nəticələri açıqlanıb.Bankdan Azərtac-a bildiriblər ki, dekabrın 25-də Mərkəzi Bank tərəfindən vəsaitlərin cəlb edilməsi üzrə keçirilmiş növbəti depozit hərracında tələb 300 milyon manat, hərracın nəticəsində bağlanılmış depozit əqdləri üzrə orta ölçülmüş faiz dərəcəsi isə 14,17 faiz təşkil edib.xeber100.com

Dünya birjalarında neftin qiyməti…

Dünya birjalarında neftin qiyməti yenidən ucuzlaşa bilər.Azərtac xəbər verir ki, analitiklər bu fikirdədirlər. Onların fikrincə, neftin qiyməti gələn ilin ilk rübündə 50 dollar/barrelə qədər azala bilər.Neft İxrac edən Ölkələr Təşkilatına (OPEC) üzv və kartelə daxil olmayan ölkələrin neft hasilatının azaldılmasına dair sazişin müddətini uzatmaları neftin qiymətinin sabit qalmasına imkan versə də, neft bazarındakı gözlənilməz sürprizlər də mübahisələr yaradır.“CNBC”yə müsahibəsində enerji mütəxəssisləri istehsaldakı artım proqnozu və artan geosiyasi risklərin təsiri ilə neftin qiymətdəki yüksəlişin 2018-ci ildə ilk rübünün sonunda azalmağa başlayacağını bildiriblər.“Longview Economics” araşdırma şirkətinin direktoru Harry Colvin deyib: “Qarşıdakı üç aylıq müddətdə neftin qiymətində ucuzlaşma yaşana bilər. Orta Şərqdə təzyiqin yüksəldiyinin şahid ola bilərik. Bu səbəblə qarşıdakı altı aylıq müddətdə neftlə əlaqədar həddindən artıq optimist proqnozlar vermək mümkün deyil”.H.Colvinin fikrincə neftin qiyməti 2018-ci ilin ilk rübünün sonunda 50 dollar/barrelə qədər geriləyəcək: “Hətta “qara qızıl”ın bir barrelinin qiymətinin 45 dollara düşməsi sürpriz olmayacaq”.“Citi Group”un eksperti Chris Main gələn ilin birinci rübünün sonuna qədər neftin bir barrelinin qiymətinin 57 dollara düşəcəyini proqnozlaşdırır.“PVM Oil Associates”in analitiki Stephen Brennock isə deyib: “2018-ci ilin ilk rübündə neftin qiymətini formalaşdıran əsas faktor geosiyasi proseslər olacaq. İran və Səudiyyə Ərəbistanı arasında artan gərginlik, eləcə də dünyanın ən böyük neft ehtiyatlarına sahib olan Venesueladakı borc böhranı neft bazarında sarsıntı yarada biləcək”.OPEC və bəzi qeyri-OPEC ölkələrinin birgə iş birliyi ilə neftin qiyməti 2015-ci ildən etibarən indiyədək təxminən 2,5 dəfə artaraq 65 dollar/barrelə yüksəlib. OPEC-in ötən ay keçirilən iclasında neft hasilatının azaldılmasına dair OPEC+ sazişinin müddətinin 2018-ci ilin sonuna qədər uzadılması qərara alınıb. Lakin neft nəhəngi ABŞ bu sazişə tərəf olan ölkələr sırasında deyil.Dünyanın qabaqcıl investisiya banklarından olan “Goldman Sachs” 2018-ci ildə neftin qiymətinin 62 dollar/barrel ətrafında olacağını proqnozlaşdırır.Qeyd edək ki, Milad bayramı ilə əlaqədar Londonun ICE birjasında “Brent” markalı neftin bir barrelinin qiyməti dəyişməyərək 65,25 dollar, Nyu-Yorkun NYMEX birjasında “Layt” markalı neftin bir barrelinin qiyməti isə 58,47 dollar təşkil edib.xeber100.com

“Azərbaycan Dəmir Yolları” QSC gücləndirilmiş iş rejiminə keçib

“Azərbaycan Dəmir Yolları” QSC-nin Sərnişin Daşımaları Departamentinin kollektivi 31 dekabr - Dünya Azərbaycanlılarının Həmrəyliyi Günü və Yeni il ərəfəsində gücləndirilmiş iş rejimində çalışır.QSC-nin ictimaiyyətlə əlaqələr şöbəsindən Azərtac-a bildirilib ki, departamentin kollektivi sərnişin qatarlarında xidmət mədəniyyətinin yüksəldilməsi istiqamətində ciddi işlər görür. Yeni təqvim ili ərəfəsində, sərnişin sıxlığının artması ilə əlaqədar ölkə daxilində hərəkət edən sərnişin qatarlarına hər gün tələb olunan sayda əlavə sayda vaqonların qoşulması təmin edilir.Sərnişinlərin nəzərinə çatdırılır ki, sərnişin qatarlarına bilet satışı 10 gün qabaqcadan, əlavə vaqonlara isə bilet satışı həmin vaqon qatara qoşulan gün həyata keçirilir.xeber100.com