ABŞ-ın Enerji İnformasiya Administrasiyasının məlumatı

Neft İxrac edən Ölkələr Təşkilatının (OPEC) neft ixracından əldə etdiyi gəlirlərin artacağı nəzərdə tutulur.Azərtac xəbər verir ki, bu barədə ABŞ-ın Enerji İnformasiya Administrasiyası (EIA) məlumat yayıb. Bildirilir ki, OPEC-in neft ixracı üzrə gəlirləri 2016-cı ildə 2004-cü ildən bəri ən aşağı səviyyəyə düşüb. Belə ki, təşkilatın ixrac gəlirləri ötən il neft qiymətinin ucuzlaşması və ixracdakı azalma ilə əlaqədar olaraq 15 faiz azalaraq təqribən 433 milyard dollar olub. Bu, OPEC-in neft ixracı üzrə gəlirlərinin son 12 ildəki minimum göstəricisidir.OPEC-in ixrac gəlirlərinin bu il ərzində 539 milyard dollaradək artacağı proqnozlaşdırılır.xeber100.com

Dünya birjalarında neftin qiyməti…

Dünya birjalarında neftin qiyməti bahalaşmaqda davam edir.Nyu-Yorkun NYMEX (“New York Mercantile Exchange”) birjasında “Layt” markalı neftin bir barrelinin qiyməti 0,19 dollar bahalaşaraq 49,04 dollar, Londonun ICE (“InterContinental Exchange Futures”) birjasında “Brent” markalı neftin bir barrelinin qiyməti 0,18 dollar artaraq 52 dollar olub.Azərtac xəbər verir ki, “AzəriLayt” markalı neftin bir barrelinin qiyməti isə 1,49 dollar bahalaşaraq 53,11 dollar təşkil edib.xeber100.com

Əmlak Məsələləri Dövlət Komitəsinin məlumatı

Mayın 16-da Əmlak Məsələləri Dövlət Komitəsi tərəfindən növbəti hərrac keçirilib.Komitədən Azərtac-a bildiriblər ki, hərracda özəlləşdirilən əmlaklardan 2-si səhmdar cəmiyyəti, 8-i kiçik dövlət müəssisəsi, 6-ı istifadəsiz qeyri yaşayış sahəsidir. Bakı şəhəri üzrə 3 kiçik dövlət müəssisəsi, 3 istifadəsiz qeyri yaşayış sahəsi, respublikanın digər şəhər və rayonları üzrə 5 kiçik dövlət müəssisəsi və 3 istifadəsiz qeyri- yaşayış sahəsi hərrac zamanı özəlləşdirilib.Budəfəki hərracda ən yüksək qiymətə özəlləşdirilən əmlak Bakının Nizami rayonunda yerləşən Təsərrüfat hesablı Təmir-Tikinti sahəsi olub. Belə ki, adıçəkilən əmlak 1 milyon 355 min 500 manata özəlləşdirilib. Həmin əmlakın torpaq sahəsi 7869 kvadratmetr, ümumi faydalı sahəsi isə 958 kvadratmetr təşkil edir. Bundan başqa paytaxtın Sabunçu rayonunda yerləşən Maşın Meliorasiya Stansiyasında qiyməti ilə digərlərindən fərqlənir. Belə ki, həmin əmlakın qiymət 375 min manatdır. Ümumi faydalı sahəsi 566, torpaq sahəsi isə 22 min 239 kvadratmetr təşkil edir.xeber100.com  

Vergilər Nazirliyinin məlumatına görə…

Təqaüdçülər yaşadığı evə və torpağa görə qanunla bələdiyyə vergisi ödəməlidirlərmi?Azərtac-ın məlumatına görə, bu suala Vergilər Nazirliyinin media və kommunikasiya mərkəzindən cavab olaraq bildirilib ki, fiziki şəxslərin mülkiyyətində və ya istifadəsində olan torpaq sahələrinə görə torpaq vergisi və xüsusi mülkiyyətində olan və Azərbaycan Respublikasının ərazisində yerləşən binalara görə əmlak vergisi Vergi Məcəlləsi ilə müəyyən edilmiş dərəcələrlə hesablanaraq yerli (bələdiyyə) büdcəyə ödənilməlidir.Binaların icarəyə, kirayəyə verildiyi, habelə sahibkarlıq və ya kommersiya fəaliyyəti ilə məşğul olmaq üçün istifadə edildiyi hallar istisna olmaqla, təqaüdçülərin binalara görə ödəməli olduqları əmlak vergisinin məbləği 30 manat azaldılır.Torpaq vergisi üzrə isə təqaüdçülərə vergi güzəştinin məbləği Vergi Məcəlləsi ilə müəyyən edilməyib. Bununla yanaşı, bələdiyyələr yerli vergiödəyicilərinin ayrı-ayrı kateqoriyalarını yerli vergilərdən tam və ya qismən azad etmək barədə qərar qəbul edə bilərlər.xeber100.com  

“Azərbaycan Xəzər Dəniz Gəmiçiliyi” QSC-nin məlumatı

“Azərbaycan Xəzər Dəniz Gəmiçiliyi” QSC-nin “Professor Gül” gəmi-bərəsi “Zığ” Gəmi Təmiri Zavodunda əsaslı təmirə dayanıb.Bu barədə Azərtac-a QSC-nin mətbuat xidmətindən bildirilib.Məlumata əsasən, gəmidə olan bütün maşın və mexanizmlər, baş və köməkçi mühərriklər, eləcə də nasoslar, separatorlar, soyuducular, kompressorlar sökülərək təmir sahələrinə gətirilib. Bərənin boru sistemləri və gövdə hissəsində də təmir işləri gedir. Gəmidə əlavə olaraq maye yüklərin daşınması zamanı dağılma baş verərsə, həmin yükün toplanması üçün iki ədəd 13,5 kubmetrlik çən və qazanizator quraşdırılması planlaşdırılır.Uzunluğu 154,5 metr, eni 18,3 metr olan “Professor Gül” gəmi-bərəsinin maksimal sürəti 15 uzeldir. Gəmi-bərə hər səfərdə 28 vaqon götürə bilir.Qeyd olunub ki, “Azərbaycan Xəzər Dəniz Gəmiçiliyi” QSC Xəzərdə yeganə bərə operatorudur. Gəmiçiliyin donanmasında 13 gəmi-bərə, 2 “Ro-Ro” tipli gəmi var. Donanmada mövcud olan 13 gəmi-bərədən 7-si 28 vaqon tutumuna, 6-sı isə 52-54 vaqon götürmə imkanına malikdir.Hazırda bu gəmi-bərələr Transxəzər Beynəlxalq Nəqliyyat Marşrutu üzrə yüklərin daşınmasına xidmət edir.xeber100.com

Mərkəzi Bank depozit hərracının nəticələrini açıqlayıb

Mərkəzi Bank tərəfindən vəsaitlərin cəlb edilməsi üzrə depozit hərracının nəticələri açıqlanıb.Bankdan Azərtac-a bildiriblər ki, mayın 15-də Mərkəzi Bank tərəfindən vəsaitlərin cəlb edilməsi üzrə keçirilmiş növbəti depozit hərracında tələb 420.6 milyon manat, hərracın nəticəsində bağlanılmış depozit əqdləri üzrə orta ölçülmüş faiz dərəcəsi isə 12,01 faiz təşkil edib.xeber100.com

AZPROMO-nun təşkilatçılığı ilə…

AZPROMO-nun təşkilatçılığı ilə Qazaxıstanın Astana və Almatı şəhərlərinə 8-ci ixrac missiyasının nəticəsi olaraq bu ölkəyə Azərbaycan məhsullarının ixracı artırılacaq. 19 yerli şirkətin nümayəndəsi Almatı və Astanada ixrac imkanlarına dair ikitərəfli görüşlərdə bir sıra müqavilələr imzalayıblar. Danışıqlar zamanı Qazaxıstan şirkətləri Azərbaycan istehsalı olan şərab və spirtli içkilərə, meyvə-tərəvəz məhsullarına, tikinti materiallarına və Naftalan neftinə xüsusi maraq göstəriblər.Artıq Naftalan mazlarının istehsalı ilə məşğul olan yerli şirkətlə Qazaxıstan tərəfi ilkin anlaşma əldə edib.Nar İstehsalçıları və İxracatçıları Assosiasiyasının verdiyi məlumata görə narın ölkə daxilində emalı ilə yanaşı ixracı da artır. İxracatçılar Aktauda yaradılan logistika mərkəzindən istifadə etməklə Qazaxıstana və Çinə ixracı genişləndirmək niyyətindədir.Nar istehsalı ilə məşğul olan şirkətlər tərəfindən də bununla bağlı bir sıra müqavilələr imzalanıb.xeber100.com

Anlaşma Memorandumu imzalanıb

Çinin paytaxtı Pekində Azərbaycan və Çin arasında “Texniki tənzimləmə, metrologiya, standartlaşdırma və uyğunluğun qiymətləndirilməsi sahələrində Anlaşma Memorandumu” imzalanıb. Sənədi “Bir kəmər - bir yol” strategiyası çərçivəsində keçirilən beynəlxalq forumda iştirak etmək üçün Pekində səfərdə olan Standartlaşdırma, Metrologiya və Patent üzrə Dövlət Komitəsinin (SMPDK) sədri Ramiz Həsənov və Çin Xalq Respublikasının Keyfiyyətə Nəzarət, Təftiş və Karantin Baş Administrasiyasının sədr müavini (nazir müavini) Vu Çinxay imzalayıb.Sənədin imzalanmasından əvvəl keçirilən görüşdə R.Həsənov Azərbaycanda qeyri-neft ixrac potensialının gücləndirilməsi ilə bağlı Prezident İlham Əliyevin rəhbərliyi ilə aparılan işlər, yerli məhsulların xarici bazarlarda satışının genişləndirilməsi istiqamətində görülən tədbirlərdən danışıb. Bu sahədə Çinlə əməkdaşlığın vacib əhəmiyyət daşıdığını qeyd edən komitə sədri məsələyə Çin tərəfinin marağını yüksək qiymətləndirib.Görüşdə ekoloji təmiz kənd təsərrüfatı məhsullarının Çinə ixracı və bu istiqamətdə keyfiyyət infrastrukturu sahələrinin qarşılıqlı tanınmasına nail olmaqla bağlı razılıq əldə olunub. Belə ki, qarşılıqlı anlaşmaya əsasən Çin tərəfi Azərbaycanda istehsal olunan məhsullara verilmiş sertifikatları tanıyacaq, akkreditasiya olunmuş sertifikatlaşdırma orqanları ilə əməkdaşlığı gücləndirəcək. Bundan başqa, Çin akkreditasiya sahəsində fəaliyyət göstərən beynəlxalq təşkilatlara üzv olmaqla bağlı Azərbaycana öz dəstəyini göstərəcək.xeber100.com

Bakı-Tbilisi-Qars dəmir yolu tezliklə fəaliyyətə başlayacaq

Bakı-Tbilisi-Qars dəmir yolu layihəsi yaxın bir neçə ayda fəaliyyətə başlayacaq və bununla da İpək yolunun mühüm bir hissəsi tamamlanmış olacaq.Anadolu agentliyi xəbər verir ki, bu sözləri Türkiyə Prezidenti Rəcəb Tayyib Ərdoğan Çin Xalq Respublikasının (ÇXR) paytaxtı Pekində “Bir kəmər- bir yol” strategiyası çərçivəsində yüksək səviyyəli beynəlxalq forumda çıxışında deyib.O qeyd edib ki, İpək yolunun bir hissəsi olan Orta Dəhliz layihəsi Türkiyə, Gürcüstan, Azərbaycan, Türkmənistan, Qazaxıstan, Özbəkistan, Əfqanıstan və Pakistanı əhatə etməklə Çində başa çatacaq ticarət yoludur. Dünyada 60-dan çox ölkədən keçən Yeni İpək yolu 40 milyon kvadratkilometrə yaxın ərazini və 4,5 milyard insanı əhatə edən çox önəmli bir layihədir.Çin Xalq Respublikasının Sədri Si Cinpin isə çıxışında müvafiq layihələrə 79 milyard dollar maliyyə yardımı ediləcəyini bildirib. O, İpək Yolunun Asiya, Afrika və Avropa qitələrindəki ölkələri bir-birinə bağladığını, bununla da beynəlxalq iqtisadi və mədəni əlaqəni təmin etdiyini vurğulayıb.Qeyd edək ki, beynəlxalq forumda 29 ölkədən dövlət və hökumət başçıları, 110 ölkədən dövlət və özəl sektor nümayəndələri, sərmayədarlar, 60-dan çox beynəlxalq təşkilatın nümayəndəsi iştirak edir.xeber100.com

Beynəlxalq Bankın müraciəti əsasında…

Nyu-York Məhkəməsi Azərbaycan Beynəlxalq Bankının (ABB) müraciəti əsasında ABB-nin aktivlərinin xarici kreditorların ABŞ-dakı iddia tələblərindən qorunması ilə bağlı qərar qəbul edib.Bankdan Azərtac-a bildiriblər ki, qərara əsasən, ABB-nin xarici öhdəliklərinin könüllü restrukturizasiyası prosesi zamanı xarici kreditorlar bankın aktivlərinə qarşı tələblər irəli sürə bilməyəcək."Bəyan etdiyimiz kimi, ABB-nin xarici kreditorlar qarşısındakı öhdəliklərinin könüllü restrukturizasiyası planı bankın maliyyə vəziyyətinin güclənməsinə xidmət edir. Bu proses nəticəsində ABB-nin uzunmüddətli maliyyə dayanıqlılığı təmin olunacaq və özəlləşdirmə öncəsi bankın bazar dəyəri artacaq. Bu prosesin önəmli istiqamətlərindən biri də restrukturizasiya zamanı xarici kreditorların ABB-nin xarici ölkələrdəki aktivlərinə qarşı hər hansı iddialar irəli sürməməsinə nail olmaqdır. ABB Bankın xarici öhdəliklərinin restruturizasiyası prosesinin ABŞ-da tanınması və bu səbəbdən kreditorlar tərəfindən ABŞ məhkəmələri vasitəsilə onun aktivlərinə qarşı iddia qaldırılmasının qarşısının alınması məqsədilə Nyu-York Məhkəməsinə müraciət edib. Bu müraciətimiz məhkəmə tərəfindən təmin olunub. Bütün bunlar, restrukturizasiya prosesini uğurla həyata keçirməkdən ötrü lazımi addımların atıldığını göstərir", - deyə ABB-nin idarə heyətinin sədri Xalid Əhədov məhkəmə qərarını şərh edərkən bildirib.xeber100.com