“AzəriLayt” markalı neftin qiyməti 0,15 dollar bahalaşıb

Azərbaycan neftinin qiyməti bahalaşıb.Azərtac xəbər verir ki, “AzəriLayt” markalı neftin bir barrelinin qiyməti 0,15 dollar bahalaşaraq 49,94 dollar təşkil edib.xeber100.com

“Goldman Sachs”ın hesabatına əsasən…

Qlobal bazarda neftin qiyməti stabilliyi itirmək üzrədir.Azərtac xəbər verir ki, bu barədə dünyanın qabaqcıl investisiya banklarından olan “Goldman Sachs”ın hesabatında deyilir. Hesabata görə, ABŞ-dakı şist nefti istehsalçıları ilə Neft İxrac edən Ölkələr Təşkilatına (OPEC) üzv ölkələr arasında ciddi rəqabət var. Bu da qiymətə mənfi təsir edir.ABŞ-da artan xam neft istehsalı OPEC ilə Rusiyanın ötən il noyabrın 30-da neft hasilatının həcminin azaldılması üzrə razılaşmasının təsirlərini əksinə çevirir. Nəticədə razılaşmanın bu ilin ikinci yarısında davam etmə ehtimalı da riskə girir.Qeyd edək ki, qlobal bazarda xam neftin qiyməti ötən gün son 5 ayın ən aşağı səviyyəsinə enib. ABŞ-ın xam neft hasilatı isə son 5 ayda 6,9 faiz çoxalıb. Belə ki, ABŞ-ın neft hasilatı keçən il noyabr ayının sonundakı gündəlik orta hesabla 8,7 milyon barrelldən ötən həftə 9,3 milyon barrelədək yüksəlib.xeber100.com

“Bakı Metropoliteni” QSC-nin məlumatı

“Xətai” metro stansiyasının orta zalı istifadəyə verilib.Azərtac xəbər verir ki, bu barədə “Bakı Metropoliteni” QSC-nin mətbuat xidmətinin rəhbəri N.Paşayev deyib.O bildirib ki, yenidənqurmadan sonra metro stansiya görkəmini tam dəyişib. “Xətai” metro stansiyasının orta zalında əsaslı təmir, yenidənqurma və sağlamlaşdırma tədbirləri başa çatdırılıb. Artıq sərnişinlər stansiyanın sərnişinpaylama funksiyasını yerinə yetirən orta zaldan maneəsiz istifadə edəcəklər. Qeyd edək ki, “Xətai” və “Cəfər Cabbarlı” metro stansiyaları arasında gediş-gəlişi tam məhdudlaşdırmamaqla burada təmir-yenidənqurma işlərini mərhələli şəkildə həyata keçirir.N.Paşayev qeyd edib ki, stansiyanın istifadəyə verilən orta zalı görkəmini tamamilə dəyişib. Yol divarının aşağı hissəsində düzülmüş iki cərgəli mərmər üzlüklü səth ağ rəngli alüminium divar-tavan kompozisiyası ilə əvəzlənib. Birinci yolda olduğu kimi, orta zal da “Durlum “GmbH” şirkətinin korroziyaya davamlı özəl metal asma tavan, divar lövhələri və LED işıqlandırma sistemləri ilə təchiz edilib. Metro stansiyalarında ilk dəfə istifadə olunan bu materiallarla yanaşı, bəzi hissələrdə mərmər-qranit örtükdən də istifadə olunub. Təmir zamanı orta zalda görkəmli dövlət xadimi və mütəfəkkir, şair Şah İsmayıl Xətaiyə həsr olunmuş memarlıq kompozisiyası demontaj olunub. Buna səbəb 27 il əvvəl qurulmuş kompozisiyanın stansiyanın ağır hidrogeoloji mühitinin, mürəkkəb və aqressiv mikroiqlim şəraitinin təsiri nəticəsində fiziki aşılanmaya məruz qalmasıdır. Həmin kompozisiyanın vəziyyətini dəqiq qiymətləndirmək və yenidən qurulmasının mümkünlüyünü araşdırmaq üçün “Bakı Metropoliteni” QSC-nin rəhbərliyi Azərbaycan Rəssamlar İttifaqına müraciət edib və mütəxəssislərin daxil olduğu xüsusi komissiya yaradılıb.xeber100.com  

“Brent” markalı neftin qiyməti ucuzlaşıb

Qlobal bazarda xam neftin qiyməti son 5 ayın ən aşağı səviyyəsinə enib.Azərtac xəbər verir ki, "Brent" markalı neftin qiyməti 47 dollar/barrelə, "Layt"ın qiyməti isə 44 dollar/barrelədək ucuzlaşıb. Beləliklə, hər iki neft növünün bir barrelinin qiyməti ötən il noyabrın 30-dan bu günədək ən aşağı səviyyəyə geriləyib. Həmin tarixdə Neft İxrac edən Ölkələr Təşkilatına (OPEC) üzv ölkələr və Rusiya xam neft hasilatı bu ilin ilk yarısınadək azaltmaq barədə qərar qəbul etmiş, nəticədə neftin qiyməti həmin gün 9 faiz artım göstərmişdi.OPEC və Rusiya arasındakı bu müqavilənin ardından qlobal bazarda neftin qiyməti son 5 ayda 50-55 dollar/barrel arasında dəyişib. Lakin son həftələrdə neftin qiyməti aşağı düşməyə başlayıb. İki həftə əvvəl təxminən 7 faiz ucuzlaşan neft hazırda daha 5 faizə yaxın qiymət itkisinə məruz qalıb.Analitiklər müqavilənin bu ilin ikinci yarısını da əhatə etməsi məsələsində qeyri-müəyyənliyin davam etdiyini bildirirlər. OPEC-in mayın 25-də Avstriyanın paytaxtı Vyanada keçirəcəyi toplantının bazar və neftin qiyməti üçün əhəmiyyəti vurğulanır.Bundan başqa, ABŞ-ın artan xam neft hasilatı qlobal təklifi də artırır və bu, qiymətin aşağı düşməsinə səbəb olur. Ölkənin Enerji İnformasiya Administrasiyasının (EIA) məlumatına görə, dünyanın ən böyük üçüncü neft istehsalçısı olan ABŞ-ın neft hasilatı keçən il noyabr ayının sonundakı gündəlik orta hesabla 8,7 milyon barrelldən ötən həftə 9,3 milyon barrelədək yüksəlib. Beləliklə də, ABŞ-ın xam neft hasilatı son 5 ayda 6,9 faiz çoxalıb. EIA-nın məlumatına görə, ölkədə neft istehsalı son 11 həftədir artmaqda davam edir.xeber100.com

“Azərişıq” ASC-nin məlumatına görə…

“Azərişıq” ASC IV İslam Həmrəyliyi Oyunlarına hazırlıq işlərini tam başa çatdırıb.ASC-dən Azərtac-a bildiriblər ki, operativliyi təmin etmək məqsədilə mərkəzi qərargah yaradılıb, əhatəli tədbirlər planı hazırlanıb. İdman oyunlarının keçiriləcəyi yerləri, habelə bununla bağlı digər obyektləri qidalandıran yarımstansiya və transformator məntəqələrində quraşdırılan rele mühafizəsi, avtomat qurğuların istismarı üzrə təlimatların təkmilləşdirilməsi, yarışlar zamanı növbə çəkəcək əməliyyat heyətinin və məsul şəxslərin təkrar treninqlərə cəlb olunması və əks-qəza məşqlərinin keçirilməsi təmin edilib.Keçirilən məşqlər heyətin zəruri biliklərini aşkar etməyə imkan yaradıb, eləcə də işçilərdə operativ məlumatların alınması və sərəncamların verilməsi vərdişləri aşılayıb. Əks-qəza məşqlərinə İslam Həmrəyliyi Oyunlarının baş tutacağı 17 əsas və 6 köməkçi obyekti qidalandıran 25 yarımstansiya və 12 transformator məntəqəsi üzrə ümumilikdə 292 əməkdaş cəlb olunub.Bundan əlavə, yarışların keçiriləcəyi günlərdə elektrik enerji təchizatında fasiləsizliyi təmini məsələsinin operativ həlli üçün Oyunların Əməliyyat Komitəsi ilə koordinasiyalı fəaliyyətin təşkili razılaşdırılıb.xeber100.com

“Quberniya-2009” şirkəti əməkdaşlıq təklif edir

Ukraynanın "Quberniya-2009" şirkəti Azərbaycan şirkətlərinə əməkdaşlıq təklif edir.Azərbaycanda İxracın və İnvestisiyaların Təşviqi Fondundan (AZPROMO) Azərtac-a bildiriblər ki, taxıl emalı sahəsində ixtisaslaşan "Quberniya-2009" şirkəti və istilik, su, qaz və digər boru kəmərlərinin sistemləri üçün mühəndislik texnikasının istehsalçısı olan "Probusiness Plus" şirkətləri Azərbaycan şirkətləri ilə əməkdaşlıq etmək niyyətindədir.xeber100.com

Vəsaitlərin cəlb edilməsi üzrə depozit hərracı keçiriləcək

Mayın 8-də Mərkəzi Bank vəsaitlərin cəlb edilməsi üzrə depozit hərracı keçirəcək.Azərtac Mərkəzi Banka istinadla xəbər verir ki, hibrid hərracda 200 milyon manat məbləğində vəsaitin cəlbi nəzərdə tutulur. Depozit hərracının müddəti 14 gündür. "Bloomberg" ticarət sistemində keçiriləcək hərrac üzrə faiz dərəcələri 12,01-14,99 faiz təşkil edir.xeber100.com

Yeni texnologiya tətbiq olunacaq

“Azneft” İstehsalat Birliyində (İB) yeni texnologiya tətbiq olunacaq.SOCAR-ın mətbuat xidmətindən Azərtac-a bildirilib ki, İB-də quyu məhsulunun ölçülməsində innovativ "Vx" çoxfazalı ölçü texnologiyasının öyrənilməsinə dair seminar keçirilib. Bildirilib ki, “Günəşli” yatağının 7 nömrəli dərin dəniz özülündə həmin texnologiyanın tətbiqi ilə bağlı quraşdırma işləri başa çatmaq üzrədir. Texnologiya quyuların axtarış-qiymətləndirmə işlərində, kəşfiyyat və istismarında, quyu məhsulunun ölçülməsi və hesabatında, məhsulun dinamiki çıxışının təyin edilməsində, hasilatın mexanikləşdirilmiş prosesinin optimallaşdırılmasında, yüksək qaz faktorlu, emulsiya və köpüklü quyunun debitinin ölçülməsində geniş istifadə olunur.Qeyd olunub ki, çoxfazalı sərfölçənlər xam və susuzlaşdırılmış neftin kütləsinin, səmt qazının, həcminin xam neftin orta kütlə sərfinin, səmt qazının orta həcm sərfinin ölçülməsində də tətbiq edilir. Bu cihazlar axının separasiya olunmadan, real vaxt ərzində faza miqdarının, habelə geniş diapazonda quyu debitinin dəqiqliklə ölçülməsini, quyu və axınının rejiminə təsir etmədən birbaşa ölçmənin aparılmasını həyata keçirir.Qurğu təhlükəsiz istismar üzrə ALARA, ISO-2919-C65343, ANSI-N542 və IATA beynəlxalq standartların tələblərinə tam cavab verir.xeber100.com

“Layt” markalı neftin qiyməti ucuzlaşıb

Dünya birjalarında neftin qiyməti yenidən ucuzlaşıb.Nyu-Yorkun NYMEX (“New York Mercantile Exchange”) birjasında “Layt” markalı neftin bir barrelinin qiyməti 0,15 dollar ucuzlaşaraq 47,67 dollar, Londonun ICE (“InterContinental Exchange Futures”) birjasında “Brent” markalı neftin bir barrelinin qiyməti 0,12 dollar azalaraq 50,67 dollar olub.Azərtac xəbər verir ki, “AzəriLayt” markalı neftin bir barrelinin qiyməti isə 0,90 dollar ucuzlaşaraq 51,25 dollar təşkil edib.xeber100.com

Milli Turizm Təbliğat Bürosunun məlumatı

Mayın 6-da Milli Turizm Təbliğat Bürosu “Park Bulvar” ticarət mərkəzində paytaxt sakinləri və şəhərimizin qonaqları üçün əyləncəli proqram təşkil edəcək.Milli Turizm Təbliğat Bürosunun mətbuat xidmətindən Azərtac-a bildirilib ki, Bakı Şopinq Festivalı çərçivəsində saat 12:00-dən etibarən uşaqlar üçün əyləncəli animasiya proqramı, saat 13:00-dən etibarən isə populyar intellektual oyun - "breyn rinq" formatında yarış keçiriləcək.İştirak ödənişsizdir. Qalibləri hədiyyələr gözləyir. Yarış rus dilində keçiriləcək.xeber100.com