Nəqliyyat, Rabitə və Yüksək Texnologiyalar Nazirliyinin məlumatı

“Güzəştli Mənzil” elektron sisteminin davamlılığını təmin etmək üçün Regional Data Mərkəzinin texniki imkanlarından istifadə ediləcək.Nəqliyyat, Rabitə və Yüksək Texnologiyalar Nazirliyindən Azərtac-a bildirilib ki, nazirliyin nəzdində fəaliyyət göstərən “AzInTelecom” MMC Azərbaycan Respublikasının Prezidenti yanında Mənzil İnşaat Dövlət Agentliyinin tabeliyindəki “MİDA” MMC ilə əməkdaşlığa başlayıb.Müqaviləyə əsasən, “MİDA” TIER III və ISO 20000 beynəlxalq sertifikatlarına malik Regional Data Mərkəzində əlavə texniki avadanlıq və proqram təminatlarının alınması, quraşdırılması, texniki istismarı üçün vəsait xərcləmədən məlumat itkisi ilə bağlı riskləri minimuma endirən etibarlı infrastruktur əldə edəcək. Bu da, öz növbəsində, digər maliyyə xərclərinə və vaxt itkilərinə qənaət olunmasına imkan yaradacaq.Bundan əlavə, “MİDA” MMC “Elektron hökumət” portalına inteqrasiya etdiyi “Güzəştli Mənzil” elektron sisteminin davamlılığını təmin etmək məqsədilə “AzInTelecom” MMC-nin Regional Data Mərkəzinin texniki imkanlarından yararlanmağı planlaşdırır. Data Mərkəzi tərəfindən təklif edilən müasir texnologiyalar “Güzəştli mənzil” elektron sisteminin səmərəli işinə şərait yaratmaqla yanaşı, habelə mənzil əldə etmək üçün müraciət edən vətəndaşlara yüksək keyfiyyətli xidmət göstərilməsi və onların rahatlığının təmin olunmasına imkan verəcək.Regional Data Mərkəzi bulud texnologiyalarına əsaslanan “İnfrastruktur xidmət kimi” (İaaS) həllər (virtual şəbəkə, virtual saxlama, virtual infrastruktur, “backup” və s.) təklif edir.Büdcə xərclərinin optimallaşdırılması və idarəetmənin avtomatlaşdırılmasına yönələn İaaS xidmətləri potensial müştərilərinə texniki avadanlıq və proqram təminatlarının alınması, quraşdırılması, texniki istismarı üçün vəsait xərcləmədən məlumat itkisi ilə bağlı riskləri minimuma endirən etibarlı infrastruktur əldə etmək imkanı yaradır.xeber100.com  

Dövlət Neft Fondunun iştirakı ilə hərrac keçirilib

Aprelin 20-də Mərkəzi Bankda Dövlət Neft Fondunun da iştirakı ilə növbəti hərrac keçirilib.Mərkəzi Bankdan Azərtac-a bildiriblər ki, hərracda manatın orta çəkili məzənnəsi 1,7022 səviyyəsində formalaşıb.xeber100.com

2017-ci ilin İnvestisiya Reytinqi təqdim edilib

İqtisadi İslahatların Təhlili və Kommunikasiya Mərkəzi ilk dəfə olaraq Azərbaycan Respublikasının inzibati rayonları üzrə 2017-ci ilin İnvestisiya Reytinqini təqdim edib.Mərkəzdən Azərtac-a bildiriblər ki, reytinqin tərtib edilməsinin əsas məqsədi iqtisadi rayonların xüsusi iqtisadi konyunkturunu və ümumi inkişaf səviyyəsini nəzərə alaraq, ixtisaslaşma sahələrinin müəyyən edilməsi, regionların iqtisadi fəaliyyət nəticələri və rəqabətqabiliyyətli sahələrinin müəyyən edilməsi, zaman sırası və sahələrarası təhlilinin aparılması, regionların rəqabətqabiliyyətinin artırılması, investisiyaların cəlb edilməsidir.Reytinqin tərtib edilməsi zamanı qabaqcıl beynəlxalq təcrübə öyrənilib. Həmçinin Dünya İqtisadi Forumu tərəfindən hazırlanmış Dünya Rəqabətlilik İndeksinə oxşar yanaşma tətbiq edilib. Analoji yanaşma Avropa İttifaqının Regionların Rəqabətlilik İndeksinin tərtibi zamanı da istifadə olunub.İnvestisiya reytinqi haqqında tədqiqatlar respublikanın əsas şəhər və rayonlarında aparılıb. Bu araşdırmalar ölkənin əsas 62 şəhər və rayonlarının regional investisiya reytinqlərinə təsir edən amilləri əhatə edib.xeber100.com

Beynəlxalq Valyuta Fondunun proqnozu

Beynəlxalq Valyuta Fondu (BVF) bu il üçün neftin bir barrelinin orta qiyməti üzrə proqnozunu 4,03 dollar artırıb.Azərtac xəbər verir ki, bu barədə fondun hesabatında deyilir. Hesabata görə, cari ildə neftin bir barrelinin orta qiyməti 55,23 dollar olacaq. Fond bundan əvvəlki hesabatında neftin qiymətinin bu il 51,20 dollar\barrel olacağını proqnozlaşdırırdı.BVF-yə görə, 2018-ci ildə neftin qiyməti 55,03 dollar/barrel səviyyəsinə geriləyəcək.xeber100.com

Konqreslər Bürosunun məlumatı

Paytaxtımızın məşhur əyləncə və ticarət mərkəzlərində yerləşən “Chicco” mağazaları da ölkəmizdə keçirilən Bakı Şopinq Festivalına qoşulub.Azərbaycan Konqreslər Bürosundan Azərtac-a bildirilib ki, festival günlərində, bu mağazalarda alış-veriş indiyədək görünməmiş dərəcədə əlverişli olub.Bakı Şopinq Festivalı günlərində Metropark, Port Baku, 28 Mall və Gənclik Mall-da yerləşən “Chicco” mağazalarına seçilmiş mallara 50 faizədək endirim tətbiq edilib. Bundan başqa, geyim və ayaqqabı alarkən 10 faiz endirim qazanacaqsınız. Hələ bu da son deyil! Dükanın güzəşt kartı sahiblərini əlavə olaraq, 10 faiz endirim sürprizləri gözləyir.Bu fürsət mayın əvvəlinədək davam edəcək. Keyfiyyətli məhsulları ilə seçilən “Chicco” mağazasında mayın 10-dək xarici turistlərə və Azərbaycan vətəndaşlarına çox sərfəli şərtlərlə öz mallarını təklif edir. Üstəlik, alıcılar “Baku Shopping Festival – Tax Free” stikerini gördükləri mağazalarda festival zamanı aldıqları malların əlavə dəyər vergisini (ƏDV) geri ala biləcəklər.xeber100.com  

İqtisadiyyat Nazirliyinin məlumatına görə…

Aprelin 18-də İqtisadiyyat Nazirliyinin Bakı Biznes Tədris Mərkəzinin Şəki nümayəndəliyinin təşkilatçılığı ilə Şəki şəhər 1 saylı Peşə Məktəbində gənclər üçün treninq keçirilib. Nazirlikdən verilən məlumata görə, tədbirdə “Biznes ideyanı yarat”, “Biznes planların hazırlanması” və “Marketinq” mövzularında keçirilən treninqdə gənclərə biznes-ideyanın yaradılması və həyata keçirilməsi, biznes planın tərtib olunması, marketinqin istiqamətləri, istehsal olunacaq məhsulların keyfiyyəti və çeşidi, satışın təşkili və idarə edilməsi, marketinq araşdırmalarının aparılması, bu sahədə beynəlxalq təcrübə və s. barədə ətraflı məlumat verilib.Bununla yanaşı, tədbirdə İqtisadiyyat Nazirliyi tərəfindən göstərilən elektron xidmətlər və bu xidmətlərin "E-hökumət" portalına (www.e-gov.az) inteqrasiyası barədə geniş məlumat verilib.Treninq çərçivəsində mövzular üzrə təqdimatlar keçirilib, iştirakçılara Bakı Biznes Tədris Mərkəzi tərəfindən hazırlanmış metodiki vəsaitlər paylanıb, onları maraqlandıran suallar cavablandırılıb.xeber100.com

“Yunayted Kredit Bank” ASC-nin məlumatına görə…

Aprelin 19-dan "Yunayted Kredit Bank" ASC-nin qorunan əmanətçilərinə kompensasiyaların ödənişinə başlanılacaq. ASC-də fiziki şəxslərin ümumi əmanətlərinin cəmi 3 milyon 635 min manat, qorunan əmanətlərin cəmi 3 milyon 315 min manat, kompensasiya olunan əmanətlər isə 2 milyon 132 min manat təşkil edir. Qorunan əmanətçilərin sayı 472 nəfərdir.Azərtac xəbər verir ki, bu barədə Əmanətlərin Sığortalanması Fondunun icraçı direktoru A.Cavadov deyib.xeber100.com

Təbii qaz təchizatında məhdudiyyətlər olacaq

Bakının Xətai və Binəqədi rayonlarının təbii qaz təchizatında məhdudiyyətlər olacaq.“Azəriqaz” İstehsalat Birliyinin (İB) ictimaiyyətlə əlaqələr şöbəsindən Azərtac-a bildirilib ki, abonentlərin təbii qaza olan tələbatının təmin edilməsi məqsədilə yeni çəkilmiş diametri 57 millimetrlik qaz xəttinin dairəvi qoşulması, diametri 159 və 76 millimetrlik qaz xəttinin yerinin dəyişdirilməsi və yeri dəyişdirilmiş xətlərin qaz təchizatı mənbəyinə birləşdirilməsi, eləcədə qaz xətlərində aparılacaq təmir işləri ilə əlaqədar aprelin 18-də saat 10:00-dan işlər yekunlaşdırılanadək Bakının Xətai rayonunun Gəncə və Babək prospektlərinin, Kombinat, Əhmədli kəndi, Şirvani, X.Məmmədov, İnqilab İsmayılov və Mehmandarov küçələrinin, həmçinin Binəqədi rayonunun 6, 7, 8 və 9-cu mikrorayonlarının, Rəsulzadə, Biləcəri və Xutor qəsəbələrinin, Motodrom adlanan ərazinin bir hissəsində təbii qazın verilişində fasilələr yaranacaq.Aparılan işlər gün ərzində yekunlaşdırılaraq təbii qazın verilişində yaranan fasilələr aradan qaldırılacaq.Birlik yaranmış məhdudiyyətlə bağlı bütün istehlakçılardan təbii qazdan istifadə zamanı xüsusilə diqqətli olmalarını və texniki təhlükəsizlik qaydalarına riayət edilməsini xahiş edir.xeber100.com

“Bakı Metropoliteni” QSC-nin məlumatı

Aprelin 18-dən “İnşaatçılar” metro stansiyasının birinci vestibülü yenidən sərnişinləri qəbul etməyə başlayıb.Azərtac xəbər verir ki, bu barədə “Bakı Metropoliteni” QSC-nin mətbuat xidmətinin rəhbəri Nəsimi Paşayev deyib.O bildirib ki, 1986-cı ildə istifadəyə verilmiş stansiyanın birinci vestibülü təmir-bərpa işlərinin aparılması, xüsusən də istismar müddətini baş vurmuş eskalatorların müasir analoqları ilə əvəzlənməsi məqsədilə 2017-ci il yanvarın 23-dən sərnişinlərin giriş-çıxışına bağlanıb.Təmir müddətində stansiyanın 30 illik istismar müddətini başa vurmuş ET-5 tipli 3 eskalatoru Almaniyanın “Thyssen Krupp” şirkətinin “Tugela” tipli analoqları ilə əvəzlənib. Bu eskalatorlar daha qənaətcil, yığcam, lakin iş qabiliyyəti və funksionallığı daha təkmilləşdirilmiş, həm də müasir estetik görkəmi ilə seçilir.Ötən müddət ərzində eskalatorların maşın zalı, vestibülün kassa zalı tam yeniləşdirilib, mərmər-qranit örtüyü dəyişdirilib. Sərnişin keçid-məntəqəsində yeni avtomat-nəzarət buraxılış köşkü və aparatları qoyulub. Əvvəlki kassa zalının qarşısında “BakıKart” kart yükləmə və satışı aparatlarının rahat və sərnişinlərə maneə törətmədən yerləşdirilməsi üçün xüsusi yer inşa olunub. Bundan savayı, həm girişdə eskalatorlara qədər, həm də eskalatorlardan çıxış qapısına qədər relyefli səthə malik tametdən yaradılmış zolaq tətbiq edilib və bu, görmə məhdudiyyətli sərnişinlərin səmti asanlıqla müəyyənləşdirməsi üçün nəzərdə tutulub.Təmir dövründə vestibülün bütün elektrik təchizatı, yanğın təhlükəsizliyi və elektromexaniki qurğuları yeniləşdirilərək müasir tələblər səviyyəsinə çatdırılıb.xeber100.com

Dünya birjalarında neftin qiyməti ucuzlaşıb

Dünya birjalarında neftin qiyməti ucuzlaşmaqda davam edir.Nyu-Yorkun NYMEX (“New York Mercantile Exchange”) birjasında “Layt” markalı neftin bir barrelinin qiyməti 0,43 dollar ucuzlaşaraq 52,75 dollar, Londonun ICE (“InterContinental Exchange Futures”) birjasında “Brent” markalı neftin bir barrelinin qiyməti 0,46 dollar azalaraq 55,43 dollar olub.xeber100.com