“Azərbaycan Dəmir Yolları” QSC-nin məlumatı

Azərbaycan və Ukrayna dəmiryolçuları arasında ikitərəfli əməkdaşlığın inkişafı məsələləri müzakirə olunub.“Azərbaycan Dəmir Yolları” QSC-nin ictimaiyyətlə əlaqələr şöbəsindən Azərtac-a bildirilib ki, martın 30-da “Azərbaycan Dəmir Yolları” QSC-də “Ukrayna Dəmir Yolu” SC-nin İdarə Heyətinin sədri Balçun Voytsexin başçılıq etdiyi nümayəndə heyəti ilə görüş keçirilib.Görüşdə “Azərbaycan Dəmir Yolları” QSC-nin sədri Cavid Qurbanov dəmir yolunda həyata keçirilən islahatlar, ölkənin tranzit potensialının artırılması istiqamətində görülən işlər və qarşıda duran vəzifələr haqqında ətraflı məlumat verib.O bildirib ki, artıq Astara stansiyasından İran İslam Respublikası dövlət sərhədinədək birxətli 8,3 kilometr dəmir yolunun çəkilişi və Astara çayı üzərindəki dəmir yolu körpüsünün tikintisi yekunlaşıb. Bu günlərdə sınaq qatarı sərhədi yeni tikilmiş körpü vasitəsilə keçib. Hazırda Astarada (İran) dəmir yolu stansiyası və yüklərin boşaldılması üçün terminal tikilir.Qeyd olunub ki, Şimal-Cənub Nəqliyyat Dəhlizi əsasən Hindistandan və İran Körfəzi regionundan yüklərin Rusiya, Qərbi Avropa, Baltikyanı və Skandinaviya ölkələrinə çatdırılmasına hesablanıb. Bu dəhlizinin digər marşrutlarla müqayisədə əsas üstünlüyü tranzit məsafəsinin və vaxtının iki-üç dəfə az olmasıdır.Cənub-Qərb Nəqliyyat Dəhlizi barədə də məlumat verən C.Qurbanov deyib ki, bu dəhliz İran, Azərbaycan, Gürcüstan, Ukrayna vasitəsilə Hindistandan Avropaya və əks istiqamətdə yük daşımalarını 7 gün ərzində həyata keçirməyə imkan yaradacaq.xeber100.com  

“Layt” markalı neftin qiyməti ucuzlaşıb

Dünya birjalarında neftin qiyməti müxtəlif istiqamətlərdə dəyişib.Nyu-Yorkun NYMEX (“New York Mercantile Exchange”) birjasında “Layt” markalı neftin bir barrelinin qiyməti 0,24 dollar ucuzlaşaraq 50,11 dollar, Londonun ICE (“InterContinental Exchange Futures”) birjasında “Brent” markalı neftin bir barrelinin qiyməti 0,34 dollar azalaraq 52,62 dollar olub.Azərtac xəbər verir ki, “AzəriLayt” markalı neftin bir barrelinin qiyməti isə 0,84 dollar bahalaşaraq 53,87 dollar təşkil edib.xeber100.com

“Azərişıq” Açıq Səhmdar Cəmiyyəti gücləndirilmiş iş rejiminə keçib

Ölkə ərazisində müşahidə edilən qeyri-sabit hava şəraiti, o cümlədən güclü küləklə əlaqədar "Azərişıq" Açıq Səhmdar Cəmiyyəti (ASC) gücləndirilmiş iş rejiminə keçib.ASC-nin mətbuat xidmətindən Azərtac-a bildirilib ki, qeyri-sabit hava şəraiti zamanı qəza baş verəcəyi ehtimal edilən ərazilər tam nəzarətə götürülüb: “Bütün regionlarda, rayonlarda, qəsəbə və ucqar kəndlərdə əməkdaşlarımız gücləndirilmiş iş rejimində çalışır, maşın-mexanizmlərimiz hazır vəziyyətə gətirilib. Son illərdə paylayıcı elektrik şəbəkələrində həyata keçirilən yenidənqurma və əsaslı təmir-tikinti işləri nəticəsində əhalinin fasiləsiz elektrik enerjisi ilə təchizatı üçün lazımi tədbirlər görülüb. Hər hansı bir ərazidə elektrik enerjisi verilişində problem yaranarsa, əməkdaşlarımız dərhal nasazlığı aradan qaldırmağa tam hazırdır", - deyə “Azərişıq” ASC-nin mətbuat xidmətinin rəhbəri Tanrıverdi Mustafayev bildirib.Hazırda ölkə ərazisində elektrik enerjisinin verilişində heç bir problem yoxdur.xeber100.com

Mərkəzi Bank depozit hərracının nəticələrini açıqlayıb

Mərkəzi Bank tərəfindən vəsaitlərin cəlb edilməsi üzrə depozit hərracının nəticələri açıqlanıb.Bankdan Azərtac-a bildiriblər ki, martın 31-də Mərkəzi Bank tərəfindən vəsaitlərin cəlb edilməsi üzrə keçirilmiş növbəti depozit hərracında tələb 301,5 milyon manat, hərracın nəticəsində bağlanılmış depozit əqdləri üzrə orta ölçülmüş faiz dərəcəsi isə 14,53 faiz təşkil edib.xeber100.com

Rəşt-Astara dəmir yolunun tikintisinə başlanılacaq

Tezliklə Rəşt-Astara dəmir yolunun tikintisinə başlanılacaq.“İRNA” xəbər agentliyi xəbər verir ki, bu sözləri İran İslam Respublikasının Prezidenti Həsən Ruhani deyib.O bildirib ki, Azərbaycan Respublikasının dəstəyi ilə yaxın zamanlarda Rəşt-Astara dəmir yolunun tikintisinə başlanılacaq. Artıq Qəzvin-Rəşt dəmir yolunun tikintisi yekunlaşmaq üzrədir. İran, Rusiya, Hindistan və digər ölkələrin birləşdirilməsində bu dəmir yolu böyük rol oynayacaq.xeber100.com  

Təbii qaz tədarükü üzrə təhlükəsizlik təmin ediləcək

Trans-Anadolu qaz boru kəməri (TANAP) ilə Türkiyə iqtisadiyyatının ən mühüm problemi olan cari kəsir kompensasiya olunacaq və ölkənin təbii qaz tədarükü üzrə təhlükəsizliyi təmin ediləcək.Anadolu agentliyi xəbər verir ki, bunu “Petkim” neft-kimya holdinqinin icraçı direktoru Anar Məmmədov deyib.“Hazırda SOCAR Türkiyənin ən iri xarici sərmayədar mövqeyindədir. SOCAR dünyanın bir neçə ölkəsinə investisiya yatırır. Lakin bu investisiyaların ən böyük həcmi məhz Türkiyədədir. Çünki Türkiyə iqtisadiyyatına çox inanırıq”, - deyə o bildirib.A. Məmmədov qeyd edib ki, Türkiyə nəzərdə tutulan investisiya qoyuluşunun 11 milyard dollarlıq hissəsi başa çatdırılıb. Ümumilikdə isə 18 milyard dollar məbləğində investisiya qoyuluşu nəzərdə tutulur və bütün layihələrin 2020-ci ildə tamamlanması planlaşdırılır.O, Xəzər dənizinin Azərbaycan sektorundakı “Şahdəniz-2” və Xəzərin cənubundakı digər yataqlardan hasil olunacaq təbii qazın əvvəlcə Türkiyəyə, sonra da Avropaya daşınmasını nəzərdə tutan TANAP-ın iki ölkəyə də mühüm töhfələri olacağını vurğulayıb: “TANAP ilə ilk qaz 2018-ci ildə Türkiyəyə çatdırılacaq”.Qeyd edək ki, Xəzərin Azərbaycan sektorundakı “Şahdəniz-2” yatağından çıxarılan qazı Türkiyəyə və bu ölkədən Avropaya nəql edəcək TANAP “Cənub Qaz Dəhlizi”nin tərkib hissəsi olan digər layihədir. TANAP Türkiyə-Gürcüstan sərhədində Cənubi Qafqaz Boru Kəmərinə, Türkiyə-Yunanıstan sərhədində isə TAP qaz boru kəmərinə birləşəcək. Uzunluğu 1810 kilometr olan TANAP-ın Əskişəhərə qədər olan hissəsinin 2018-ci ilin ortasında istismara verilməsi nəzərdə tutulur. Layihə üzrə Azərbaycan şirkətlərinin xərclərinin 2020-ci ilədək ümumilikdə 6,2 milyard dollar olacağı nəzərdə tutulur.xeber100.com

Neft Fondunun da iştirakı ilə hərrac keçirilib

Martın 30-da Mərkəzi Bankda Dövlət Neft Fondunun da iştirakı ilə hərrac keçirilib.Mərkəzi Bankdan Azərtac-a bildiriblər ki, hərracda manatın orta çəkili məzənnəsi 1,7244 səviyyəsində formalaşıb.xeber100.com

Bakı Nəqliyyat Agentliyinin məlumatı

Bakı Nəqliyyat Agentliyi tərəfindən taksi xidmətlərində mövcud olan çatışmazlıqların tezliklə aradan qaldırılması ilə bağlı tapşırıqlar verilib.Azərtac xəbər verir ki, bu barədə Bakı Nəqliyyat Agentliyinin ictimaiyyətlə əlaqələr və maarifləndirmə şöbəsinin müdiri Mais Ağayev deyib.O bildirib ki, Bakı Nəqliyyat Agentliyində paytaxtın inzibati ərazisində taksi xidməti ilə məşğul olan şirkət rəhbərləri ilə görüş keçirilib. Görüşdə əhaliyə, eləcə də paytaxtımıza gələn turistlərə təhlükəsiz, rahat və keyfiyyətli taksi xidmətinin göstərilməsinin təmin edilməsi ilə bağlı məsələlər müzakirə edilib. Hazırda müxtəlif şirkətlər tərəfindən göstərilən taksi xidmətlərində mövcud olan çatışmazlıqlar diqqətə çatdırılıb. Onların qısa vaxtda aradan qaldırılması ilə bağlı tapşırıqlar verilib.M.Ağayevin sözlərinə görə, taksi şirkətləri balanslarında olan nəqliyyat vasitələrini mütləq qaydada şəhərimizin müasir simasına uyğunlaşdırılmalıdırlar.xeber100.com

Dünya birjalarında neftin qiyməti…

Dünya birjalarında neftin qiyməti bahalaşmaqda davam edir.Nyu-Yorkun NYMEX (“New York Mercantile Exchange”) birjasında “Layt” markalı neftin bir barrelinin qiyməti 0,24 dollar bahalaşaraq 48,61 dollar, Londonun ICE (“InterContinental Exchange Futures”) birjasında “Brent” markalı neftin bir barrelinin qiyməti 0,21 dollar artaraq 51,54 dollar olub.Azərtac xəbər verir ki, “AzəriLayt” markalı neftin bir barrelinin qiyməti isə 0,83 dollar bahalaşaraq 52,49 dollar təşkil edib.xeber100.com

“Azərbaycan Dəmir Yolları” QSC-nin məlumatı

Bakı-Horadiz-Bakı sərnişin qatarının hərəkət qrafikində müvəqqəti olaraq dəyişiklik edilir.“Azərbaycan Dəmir Yolları” QSC-nin ictimaiyyətlə əlaqələr və maarifləndirmə şöbəsindən Azərtac-a bildirilib ki, martın 29-dan etibarən Bakı-Horadiz-Bakı sərnişin qatarının hərəkət qrafikində müvəqqəti olaraq dəyişiklik edilir. Belə ki, Vətəgə-Xələc mənzilində aparılan əsaslı təmiri ilə əlaqədar olaraq martın 29-dan etibarən aprelin 7-dək 672/671 saylı Bakı- Horadiz-Bakı sərnişin qatarı İmişli stansiyasına kimi hərəkət edəcək.xeber100.com