“Azneft” İstehsalat Birliyinin “Bibiheybətneft” neft və qazçıxarma idarəsində (NQÇİ) gündəlik hasilat artırılacaq.SOCAR-ın mətbuat xidmətindən Azərtac-a bildirilib ki, bu barədə NQÇİ-də 2016-cı ilin yekunlarına və 2017-ci ildə görüləcək işlərə həsr olunmuş müşavirədə məlumat verilib.Birliyin baş direktoru Daşqın İskəndərov NQÇİ üzrə hasilatın artırılması, eləcə də ekoloji durumun yaxşılaşdırılması istiqamətində həyata keçirilən tədbirlərdən danışıb, idarənin ötənilki göstəricilərini müsbət qiymətləndirib. Bildirib ki, 2016-cı ildə NQÇİ üzrə təqribən 118 min ton neft, 17,1 milyon kubmetr qaz hasil edilib, proqnoza müvafiq olaraq 104,4 və 127,3 faiz əməl edilib.Hazırki qiymətləndirmələrə əsasən, “Bibiheybət” yatağında 8 milyon ton neft ehtiyatı mövcuddur. Qalıq ehtiyatın yüksək hasilat göstəricisinə malik olduğu nəzərə alınaraq, daha dərin laylarda yeni tədqiqat-kəşfiyyat quyusunun qazılması qərara alınıb. Bu il 4 quyunun yan lülə kəsilişi ilə qazılması, fəaliyyətsiz fonddakı 8 quyunun istismara qaytarılması, eləcə də mərkəzi neftyığma məntəqəsinin yenidən qurulması, 10 obyektdə əsaslı təmir aparılması, ekoloji vəziyyətin sağlamlaşdırılması üçün 2 hektar ərazidə torpaqların təmizlənməsi nəzərdə tutulur.xeber100.com
