“Bank of Baku” yeni kampaniyaya start verib

Novruz bayramı ərəfəsində "Bank of Baku" bayram alış-verişinə hazırlaşan "Bolkart" müştəriləri üçün yeni kampaniyaya start verib.Bankdan Azərtac-a bildiriblər ki, martın 10-dan 20-dək keçirilən kampaniya çərçivəsində bolkartlılar bayram bazarlığını sərfəli şərtlərlə edə biləcəklər. Belə ki, bu dövr ərzində "Bolkart" sahibləri bayram alış-verişlərini rahatlıqla edib, xərcini 1 ay sonra deyil, 2 ay sonra ödəmək imkanı əldə edirlər. Yəni, martda alıb xərcini apreldə deyil, mayda ödəyəcəklər. Novruz kampaniyasından bütün növ "Bolkart" kredit kart sahibləri faydalana bilər.xeber100.com

Əmlak Məsələləri Dövlət Komitəsi yeni hərrac elan edib

Əmlak Məsələləri Dövlət Komitəsi (ƏMDK) tərəfindən aprelin 11-də keçirilməsi nəzərdə tutulan yeni hərrac elan olunub. Bu hərraca, ümumilikdə 158 dövlət əmlakı olmaqla 20 səhmdar cəmiyyət, 96 kiçik dövlət müəssisə və obyekti, 36 istifadəsiz qeyri-yaşayış sahəsi və 6 nəqliyyat vasitəsi çıxarılıb. Komitədən Azərtac-a bildirilib ki, hərrac barədə informasiyalar komitənin rəsmi internet səhifəsi, Özəlləşdirmə portalı (privatization.az) və “facebook” səhifəsində yerləşdirilib. Mütəmadi yenilənən bu internet resursları vasitəsilə həm hərraca çıxarılan, həm də indiyədək hərraclarda satılmış əmlaklar haqqında məlumat almaq olar.Hərracda əmlak sahibi olmaq istəyən vətəndaşın 2 sadə proseduru yerinə yetirməsi kifayətdir. Birinci mərhələdə komitənin elektron xidmətlər portalı vasitəsilə sifariş verilir, ikincidə isə əmlakın satış qiymətinin 10 faizi məbləğində behi ödənilməklə hərracda iştirakçı statusu qazanılır. Sifarişlər hərracın keçirilməsinə 3 bank günü qalanadək verilməlidir.xeber100.com

“Made in Azerbaijan” brendi altında…

Bakı Limanı və onun ətrafında qurulan Azad Ticarət Zonası “Made in Azerbaijan” brendi altında çeşidli istehsalın yaradılmasına zəmin yaradacaq.Azərtac xəbər verir ki, bu barədə “Bakı Beynəlxalq Dəniz Ticarət Limanı” QSC-nin baş direktoru Taleh Ziyadov Türkiyənin “TRT World” kanalının Azərbaycanın neftdən asılılığını azaltmaq siyasətində Bakı Limanının roluna həsr olunan reportajında deyib.O bildirib ki, Azərbaycanın qeyri-neft sektorunun inkişafı üçün ən önəmli layihələrindən biri Ələt qəsəbəsində tikilməkdə olan Bakı Beynəlxalq Dəniz Ticarət Limanı və Azad Ticarət Zonası layihəsidir. Bu layihədən Avropa ölkələri, Türkiyə, Rusiya, Çin və başqaları yararlana biləcək. Bakı həm logistik, həm də ticarət üçün bir hab rolunu oynayacaq.T.Ziyadov qeyd edib ki, bu il birinci fazası yekunlaşan Bakı Limanı və Azad Ticarət Zonası bütün region ölkələrinə xidmət edəcək. Artıq neft erası bitir və Azərbaycan yeni eraya – uzunmüddətli strateji və güclü əhəmiyyəti olan layihələrdən ibarət bir eraya başlayır.xeber100.com

Azərbaycan, Gürcüstan və Türkiyə üzrə yeni regional prezident təyinatı

BP-yə yeni regional prezident təyin olunub.BP-nin mətbuat xidmətindən Azərtac-a bildirilib ki, BP bu gün Qəri Counzu BP-nin Azərbaycan, Gürcüstan və Türkiyə üzrə yeni regional prezidenti təyin edib. Yeni prezident öz vəzifəsinin icrasına bu il aprel ayının 2-dən başlayacaq və BP-nin Bakıdakı ofisində fəaliyyət göstərəcək. Qəri Counz hazırda BP-nin qazma, tamamlama və quyular üzrə qlobal rəhbəridir.Qəri Counz bu vəzifədə BP-nin regiondakı biznesinə 2012-ci ilin noyabr ayından uğurla rəhbərlik edən Qordon Birrelli əvəz edəcək. Qordonun yeni vəzifəsi isə Londonda BP-nin baş ofisində baş əməliyyat rəhbəri olacaq və o, BP-nin hasilat, transformasiya və karbon üzrə işlərinə başçılıq edəcək.BP-nin baş icraçı direktoru Bob Dadli: “Qəri qlobal miqyasda təcrübəli bir neftçi və yetkin bir biznes rəhbəridir. BP-nin dünya üzrə quyularını idarə edən bölümünə uzun müddət başçılıq etmiş bir şəxs kimi o, bu yeni vəzifəyə Xəzərdəki əməliyyatlarımızla bağlı öz dərin texniki bilgilərini gətirir. Qəri BP-nin Rumeyla yatağı və Şimal dənizindəki yataqlar kimi bir sıra çox mühüm biznesini idarə etmişdir. BP Azərbaycanda öz 25 illiyini qeyd etdiyi bir vaxtda bizim qəti niyyətimiz bütün maraqlı tərəflərlə daha da sıx əməkdaşlıq vasitəsilə regiondakı biznesimizin uğurunu davam etdirməkdir. BP-nin yeni regional prezidenti kimi Qəri bizim uğurlu tərəfdaşlığımızı BP-nin burada idarə etdiyi bütün layihələrdəki böyük nailiyyətlərin üzərində quraraq davam etdirəcək.xeber100.com

“CaspianAgro 2017” sərgisi keçiriləcək

Mayın 17-dən 19-dək Bakı şəhərində kənd təsərrüfatı və qida məhsullarının nəhəng regional forumu – XI Azərbaycan Beynəlxalq Kənd Təsərrüfatı “CaspianAgro 2017” sərgisi keçiriləcək.Iteca Caspian şirkətindən Azərtac-a bildirilib ki, sərgi Azərbaycanda İxracın və İnvestisiyaların Təşviqi Fondu (AZPROMO) və Azərbaycan Respublikası Sahibkarlar (İşəgötürənlər) Təşkilatları Milli Konfederasiyası (ASK) tərəfindən dəstəklənir. Sərginin təşkilatçısı qismində isə “Caspian Event Organisers” (“CEO”) şirkəti çıxış edir. “CaspianAgro 2017” sərgisinin qeydiyyat üzrə sponsoru “Grand Motors” (Azərbaycan) şirkətidir.Qeyd olunub ki, “CaspianAgro 2017” sərgisində Azərbaycan, Belarus, Çin, İtaliya, Rusiya, Şri-Lanka, Türkiyə və digər ölkələri təmsil edən kənd təsərrüfatı məhsul və avadanlıqlarının istehsalçı və distribüterləri iştirak edəcəklər.xeber100.com

“Azəriqaz” İstehsalat Birliyinin məlumatına görə…

Bu ilin fevral ayı ərzində SOCAR-ın “Azəriqaz” İstehsalat Birliyində əhali sektoru üzrə 8 min 951 yeni abonent qeydiyyata alınıb ki, bunun da 3 min 610-u Bakı, Abşeron və Sumqayıt, 5 min 341-i isə regionlar üzrədir.“Azəriqaz”ın ictimaiyyətlə əlaqələr şöbəsindən Azərtac-a bildirilib ki, bununla da ölkə üzrə təbii qazla təmin olunan abonentlərin sayı 2 milyon 27 min 995-ə çatıb.Fevralın 1-nə olan məlumata görə, qeyri-əhali sektoru üzrə 416 məscid və dini məbədə təbii qazdan pulsuz istifadə üçün limit ayrılıb.xeber100.com

“Energy Aspects”nin məlumatı

Neftin bir barrelinin qiyməti bu ilin sonunadək 60 dollaradək bahalaşacaq.Azərtac “CNBC”yə istinadla xəbər verir ki, Neft İxrac edən Ölkələr Təşkilatına (OPEC) üzv olan və kartelə daxil olmayan ölkələr neft hasilatının azaldılmasını nəzərdə tutan sazişin müddətini uzadarlarsa xam neftin bir barrelinin qiyməti bu ilin sonuna qədər 60 dollara yüksələcək.“Energy Aspects” analitiki Riçard Mallinson isə deyib ki, son günlərdə “Layt” markalı neftin bir barrelinin qiymətinin ucuzlaşmasına baxmayaraq qiymətlərdə yenidən tarazlıq olacaq. Bu ucuzlaşma neftin qiymətindəki əsas balansı pozmayıb.xeber100.com

Bakı Fond Birjasında növbəti hərrac keçirilib

Martın 10-da Bakı Fond Birjasında (BFB) “Azərbaycan İpoteka Fondu” ASC-nin faizli, adlı, sənədsiz, təmin edilmiş ipoteka istiqrazlarının yeni buraxılışının yerləşdirilməsi üzrə növbəti hərrac keçirilib.BFB-dən Azərtac-a bildiriblər ki, hərraca çıxarılan istiqrazların (ISIN nömrəsi AZ2011008681) nominal qiymətlə həcmi 20 milyon manat təşkil edib. Hərrac zamanı sifarişlərin qəbulu Bakı Fond Birjasının ticarət reqlamentinə əsasən saat 11:00-dan 12:30-dək həyata keçirilib.İstiqrazların buraxılış şərtlərinə əsasən, hərrac qiyməti 1003.5000 manat təyin edilib. İstiqrazlar üzrə toplanmış tələbin həcmi nominal qiymətlə 20 milyon manat təşkil edib. Hərraca çıxarılmış istiqrazlar tam həcmdə yerləşdirilib.Yerləşdirmənin anderrayteri qismində birja üzvü “Paşa Kapital” İnvestisiya Şirkəti QSC çıxış edir. İstiqrazlar 2026-cı il dekabrın 6-da ödəniləcək.xeber100.com

Ukrayna-Azərbaycan biznes-forumunda müzakirə

Azərbaycan nümayəndə heyətinin Kiyevə səfəri çərçivəsində martın 13-də keçiriləcək Ukrayna-Azərbaycan biznes-forumunda birgə müəssisələrin yaradılması məsələləri müzakirə ediləcək. Biznes-forumun işində iştirak etmək üçün Ukraynaya Azərbaycanın iqtisadiyyat naziri Şahin Mustafayevin rəhbərliyi ilə nümayəndə heyəti gedəcək. Ukraynanın Baş naziri Vladimir Qroysmanın tapşırığına əsasən bu ölkənin Ticarət və Sənaye Palatası biznes-forumun keçirilməsinə hazırlıq işləri aparır.Azərtac Ukraynanın Ticarət və Sənaye Palatasının saytına istinadla xəbər verir ki, forumun mövzuları sırasında qarşılıqlı səmərəli əməkdaşlığın vəziyyəti və perspektivləri də yer alıb. Əsas diqqət aqrar sektor, qida sənayesi, tikinti sahəsi və turizm istiqamətlərində cəmlənəcək.xeber100.com

Dünya birjalarında neftin qiyməti…

Dünya birjalarında neftin qiyməti ucuzlaşıb.Nyu-Yorkun NYMEX (“New York Mercantile Exchange”) birjasında “Layt” markalı neftin bir barrelinin qiyməti 0,79 dollar ucuzlaşaraq 48,49 dollar, Londonun ICE (“InterContinental Exchange Futures”) birjasında “Brent” markalı neftin bir barrelinin qiyməti isə 0,82 dollar azalaraq 51,37 dollar olub.xeber100.com