“SOCAR Ukraine” şirkəti təbii qazın satışına başlayıb

SOCAR-ın törəməsi “SOCAR Ukraine” şirkəti Ukraynanın daxili bazarında təbii qazın satışına başlayıb.Azərtac Ukrayna KİV-lərinə istinadla xəbər verir ki, keçən il dekabrın 30-da “SOCAR Ukraine” “Eru Trading” şirkətinə 131 milyon kubmetrədək təbii qaz satışı üzrə saziş imzalayıb.Xatırladaq ki, “SOCAR Ukraine” “Ukrtransqaz” şirkəti ilə də müqavilə imzalayıb. Müqaviləyə görə, SOCAR-ın törəməsi Ukrayna şirkətini cari il ərzində 180 milyon kubmetr təbii qazla təmin edəcək. Hazırda “SOCAR Ukraine” “Ukrzaliznitsa” şirkətinə 36,6 milyon kubmetr qazın tədarükü ilə bağlı tenderdə iştirak edir.Qeyd edək ki, “SOCAR Ukraine” Ukraynada 60 yanacaqdoldurma məntəqəsinə sahibdir.xeber100.com

Dövlət Gömrük Komitəsinin məlumatına görə…

Dövlət Gömrük Komitəsi vergi və rüsumlarını ödəməkdən yayınmağa çalışan hüquqi və fiziki şəxslərin adlarını açıqlayıb.Komitənin mətbuat xidmətindən Azərtac-a bildirilib ki, ölkəmizdə sahibkarlıq mühitinin yaxşılaşdırılması, idxal-ixrac əməliyyatlarının sürətli və şəffaf şəkildə həyata keçirilməsi, beynəlxalq ticarət zəncirinin davamlığının təmin edilməsi istiqamətində mühüm addımlar atılır. Son illərdə Dövlət Gömrük Komitəsi tərəfindən həyata keçirilən “Bir pəncərə”, “Elektron bəyannamə”, “Yaşıl dəhliz” və digər yeni tətbiqlərin idxal-ixrac əməliyyatlarının stimullaşdırılmasında və bu sahədə şəffaflığın artırılmasındakı rolu danılmazdır. Lakin gömrük işinin təşkili sahəsində yaradılan münbit şəraitə baxmayaraq hələ də bir sıra Xarici İqtisadi Fəaliyyət iştirakçıları idxal əməliyyatları zamanı qanunvericiliyin tələblərini pozaraq malların dəyərini real qiymətindən aşağı göstərməklə dövlət büdcəsinə çatacaq gömrük vergi və rüsumları tam şəkildə ödəməkdən yayınmağa çalışır.xeber100.com

Neft Fondunun iştirakı ilə hərrac keçirilib

Fevralın 21-də Azərbaycan Respublikasının Mərkəzi Bankında Dövlət Neft Fondunun da iştirakı ilə hərrac keçirilib. Hərracda manatın orta çəkili məzənnəsi 1,7447 səviyyəsində formalaşıb.Bu barədə Azərtac-a Mərkəzi Bankdan bildirilib.xeber100.com

Bakı Telefon Rabitəsi İstehsalat Birliyinin məlumatı

Bakı Telefon Rabitəsi İstehsalat Birliyi (BTRİB) sabit (stasionar) telefon xidməti üzrə “öncədən ödəmə” sisteminin tətbiqinə başlayıb.BTRİB-dən Azərtac-a bildirilib ki, “öncədən ödəmə” sistemi göstərilən xidmətlərə görə sonradan ödəniş edən abunəçilərin debitor borcunun yaranmasının qarşısını alacaq, müvafiq qaydada öncədən ödənilən məbləğə uyğun xidmətin verilməsini təmin edəcək. Bu da müxtəlif səbəblərdən ünvanı tərk edən və ya abunə haqqını ödəyə bilməyən istifadəçilərin borclanması kimi problemləri aradan qaldıracaq.Artıq martın 1-dən etibarən sabit (stasionar) telefon istifadəçiləri hər ayın 5-dək telefon borcunu öncədən ödəməli olacaqlar. Ödəniş edilmədiyi təqdirdə, ayın 6-dan etibarən 101, 102, 103 və 112 qısa nömrələrə zəng imkanı istisna olmaqla, xidmət birtərəfli qaydada dayandırılacaq və abunəçilər yalnız daxil olan zəngləri qəbul edə biləcəklər. Sonrakı bir ay ərzində borc ödənilmədiyi halda, abunəçiyə əlavə borc yazılmaması üçün telefon şəbəkədən çıxarılacaq.Şəbəkədən çıxarıldıqdan sonra, iki ay ərzində (borcun yaranmasından 4 ay) abunəçi iki ayın abunə və istifadə edilmiş xidmətlərin haqqını ödəyərək telefon xidmətini bərpa edə bilər. Əks halda, abunəçi ilə bağlanan müqaviləyə xitam veriləcək. Əgər abunəçi telefon xidməti üçün müraciət edərsə, telefon çəkilişi tarifinə uyğun olaraq ödəniş (30 manat) etməli olacaq.Müqaviləyə xitam verildikdən sonra 2 ay ərzində nömrə digər abunəçilərə satılmır, yəni həmin müddətdə yenidən müraciət edən abunəçi əvvəlki nömrəsini əldə edə bilər. Beləliklə, BTRİB abunə haqqını ödəməyən abunəçiyə yarım il müddətində 2 aylıq abunə haqqını və istifadə etdiyi xidmətlərə görə ödəniş edərək telefondan yenidən istifadə imkanı yaradır.Qeyd edək ki, BTRİB 2016-cı ilin noyabr ayından internet və İPTV xidmətləri üçün “öncədən ödəmə” sistemini tətbiq edir.Telefon, internet və İPTV xidmətləri üzrə aylıq abunə haqlarını onlayn və ödəmə terminalları vasitəsilə ödəmək mümkündür.BTRİB dövlət və idarəetmə orqanlarını, fiziki və hüquqi şəxsləri stasionar, CDMA, İP telefon rabitəsi xidmətləri ilə təmin edir.xeber100.com

Dünya birjalarında neftin qiyməti…

Dünya birjalarında neftin qiyməti bahalaşmaqda davam edib.Nyu-Yorkun NYMEX (“New York Mercantile Exchange”) birjasında “Layt” markalı neftin bir barrelinin qiyməti 0,15 dollar bahalaşaraq 53,55 dollar, Londonun ICE (“InterContinental Exchange Futures”) birjasında “Brent” markalı neftin bir barrelinin qiyməti isə 0,16 dollar artaraq 55,97 dollar olub.xeber100.com

Təbii qaz təchizatında məhdudiyyətlər olacaq

İstehlakçıların qaz təminatının yaxşılaşdırılması, təbii qaza olan tələbatın təmin edilməsi və şəbəkənin gücləndirilməsi üçün daxili qaz şəbəkəsində aparılacaq təmir işləri, qaz xəttində aşkar olunmuş qaz sızmasının ləğv olunması, həmçinin istismarı dayandırılmış qaz xətlərinin şəbəkədən ayrılması ilə əlaqədar, nəzərdə tutulmuş təmir işləri aparılacaq. Görülən işlər zamanı, fevralın 20-də saat 09:00-dan 17:00-dək Abşeron rayonunun, eləcə də Bakının Binəqədi, Nizami, Nəsimi, Yasamal və Xəzər rayonlarının bir hissəsində təbii qazın verilişində fasilələr yaranacaq.“Azəriqaz” İstehsalat Birliyinin ictimaiyyətlə əlaqələr şöbəsindən Azərtac-a bildirilib ki, aparılan işlərin Sabunçu rayonunun Bakıxanov qəsəbəsi, eləcə də Xətai rayonunun Sarayevo, Q.Nəbi, Cavanşir, M.Hadi, S.Ə.Şirvani, Mehmandarov, Şıxlinski küçələrində, Gəncə prospekti və Zığ yolu ərazilərinin bir hissəsinin qaz təchizatına təsir göstərməsi də mümkündür. Görülən işlər gün ərzində yekunlaşdırılaraq təbii qazın verilişində yaranan fasilələr aradan qaldırılacaq.“Azəriqaz” yaranmış məhdudiyyətlə bağlı bütün istehlakçılardan təbii qazdan istifadə zamanı xüsusilə diqqətli olmalarını və texniki təhlükəsizlik qaydalarına riayət edilməsini xahiş edir.xeber100.com

Əmlak Məsələləri Dövlət Komitəsi yeni hərrac elan edib

Əmlak Məsələləri Dövlət Komitəsi (ƏMDK) tərəfindən martın 28-də keçirilməsi nəzərdə tutulan yeni hərrac elan olunub. Bu hərraca, ümumilikdə 76 dövlət əmlakı olmaqla 20 səhmdar cəmiyyət, 48 kiçik dövlət müəssisə və obyekti, 8 nəqliyyat vasitəsi çıxarılıb. Komitədən Azərtac-a bildirilib ki, bu hərraclarda istənilən fiziki və hüquqi şəxs iştirak edə bilər. Vətəndaş hərraca çıxarılan hər bir əmlakla komitənin “privatization.az” saytında tanış ola bilər. Əvvəlcə hərrac tarixinə görə elan linkinə daxil olur, elanda səhmdar cəmiyyət, kiçik dövlət müəssisə və obyekti, eləcə də istifadəsiz yaşayış sahəsi və nəqliyyat vasitəsi üzrə ayrıca göstərilmiş linkə keçir. Burada istədiyi əmlakı seçərək baxır, əgər bəyəndiyi əmlakdırsa elə həmin səhifədəcə “sifariş ver” düyməsini seçir. Xatırladaq ki, elektron sifarişlər hərracın keçirilməsinə 3 bank günü qalanadək qəbul ediləcək. Bununla əmlaka elektron sifariş verərək əmlakın ilkin satış qiymətinin 10 faizi məbləğində behi də elektron qaydada ödəyir. Bu prosedurdan sonra vətəndaş hərracda iştirak etmək statusu qazanır.xeber100.com

Mərkəzi Bank fevralın 21-nə olan USD/AZN rəsmi məzənnəsini açıqlayıb

Azərbaycan Mərkəzi Bankı fevralın 21-nə olan USD/AZN rəsmi məzənnəsini açıqlayıb.Bankdan Azərtac-a bildiriblər ki, Azərbaycan Mərkəzi Bankının fevralın 21-nə USD/AZN rəsmi məzənnəsi 1,7352 manat səviyyəsində müəyyən olunub.xeber100.com

Energetika Nazirliyinin məlumatına görə…

Rumıniya hökuməti “Cənub Qaz Dəhlizi” layihəsinə və bu layihə üzrə Məşvərət Şurasının qarşıdan gələn iclasına yüksək dəstəyini ifadə edib.Energetika Nazirliyindən Azərtac-a bildirilib ki, Rumıniya hökuməti adından bu ölkənin energetika naziri Toma-Florin Petku tərəfindən Azərbaycanın energetika naziri Natiq Əliyevə məktub ünvanlanıb. Məktubda deyilir ki, Rumıniya hökuməti fevralın 23-də Bakıda keçiriləcək “Cənub Qaz Dəhlizi” üzrə Məşvərət Şurası çərçivəsində nazirlərin üçüncü görüşünü dəstəkləyir və bu formatda əməkdaşlıqda əldə edilən nailiyyətləri yüksək qiymətləndirir: “Rumıniya əmindir ki, “Cənub Qaz Dəhlizi” həm qaz mənbələri, həm də nəql marşrutlarının diversifikasiyası vasitəsilə Avropanın enerji təhlükəsizliyini artırmaq üçün ən ardıcıl seçim olaraq qalır”.Rumıniyanın Azərbaycan və Xəzər qazının Avropa qaz bazarına daxil olmasını asanlaşdırmaq üçün Avropa İttifaqı, Azərbaycan və layihə iştirakçıları arasındakı səmərəli əməkdaşlığı dəstəkləməkdə davam edəcəyi, bu məqsədlə Buxarestin BRUA layihəsinin və Vertikal Qaz dəhlizlərinin həyata keçirilməsindən ibarət regional enerji siyasətini təşviq etdiyi qeyd edilib. Bildirilir ki, hər iki təşəbbüs AB-nin strateji prioritetləri olan bazar inteqrasiyası və təchizat diversifikasiyasından irəli gəlir. “Cənub Qaz Dəhlizi” Avropa seqmentinə tamamilə uyğundur.xeber100.com  

Tədris Mərkəzi beynəlxalq sertifikata layiq görülüb

Vergilər Nazirliyinin Tədris Mərkəzi İSO 9001:2015 beynəlxalq sertifikata layiq görülüb.Azərtac xəbər verir ki, mərkəzin direktoru Əli Həsənov fevralın 20-də keçirilən brifinqdə Tədris Mərkəzində İSO 9001:2015 keyfiyyət idarəetmə sisteminin tətbiqinə 2016-cı ilin iyul ayından başlanıldığını deyib.Onun sözlərinə görə, mərkəzin beynəlxalq standartlara uyğunluğunun müəyyən edilməsi məqsədilə Almaniyanın “TUV Thuringen e.V” şirkətinin Azərbaycan ofisi tərəfindən audit aparılıb. Audit zamanı mərkəzin idarəetməsinin, tədrisin keyfiyyətinin, resurslardan istifadənin, aparılan tədris siyasətinin, tədris mərkəzinin fəaliyyətini tənzimləyən normativ-hüquqi aktların, mərkəzin maddi-texniki təchizatının beynəlxalq standartlara uyğunluğu yoxlanılıb. Auditin nəticələrinə əsasən, Vergilər Nazirliyinin Tədris Mərkəzi İSO 9001:2015 beynəlxalq sertifikatına layiq görülüb.Brifinqdə vurğulanıb ki, tədris mərkəzinin keyfiyyətli idarəetmə sahəsində beynəlxalq sertifikasiyadan keçmək təşəbbüsü təlim siyasətinin daha da təkmilləşdirilməsi, bir sıra dövlət orqanları, ali məktəblər, eləcə də beynəlxalq səviyyədə əməkdaşlığın aparılması, mərkəzin gələcəkdə regional akademiya statusu alması məqsədini daşıyır.xeber100.com