Mərkəzi Bank depozit hərracı keçirəcək

Dekabrın 19-da Mərkəzi Bank vəsaitlərin cəlb edilməsi üzrə depozit hərracı keçirəcək.Azərtac banka istinadla xəbər verir ki, dolayı hərracda 50 milyon manat məbləğində vəsaitin cəlbi nəzərdə tutulur. Depozit hərracının müddəti 14 gündür. “Bloomberg” ticarət sistemində keçiriləcək hərrac üzrə faiz dərəcələri 12,01-14,99 faiz təşkil edir.xeber100.com

Vergi Məcəlləsinə təklif olunan dəyişikliklər qəbul edilib

Vergi Məcəlləsinə təklif olunan dəyişikliklər Milli Məclisin bu gün keçirilən plenar iclasında qəbul edilib.Azərtac xəbər verir ki, parlamentin iqtisadi siyasət, sənaye və sahibkarlıq komitəsinin sədri Ziyad Səmədzadə Məcəlləyə edilən dəyişikliklər barədə məlumat verib. Bildirilib ki, qanun layihəsində ödəmə qabiliyyətini itirmiş bankların sağlamlaşdırılması tədbirləri çərçivəsində qeyri-işlək aktivlərin təqdim edilməsinin 2017-ci il yanvarın 1-dən üç il müddətində ƏDV-dən azad edilməsi nəzərdə tutulur. Bundan başqa, Azərbaycan Prezidentinin fərman və sərəncamları ilə yaradılan icbari tibbi sığorta və səhiyyə xidmətləri göstərən qurumların gəlirlərinin mənfəət vergisindən müddətsiz, buğdanın idxalının və satışının, buğda ununun və çörəyin istehsalının və satışının, quş ətinin satışının üç il müddətində ƏDV-dən azad edilməsi ilə bağlı müddəalar layihəyə daxil edilib.Qeyd edilib ki, banklar tərəfindən fiziki şəxslərin əmanəti üzrə ödənilən illik faiz gəlirlərinin, habelə emitent tərəfindən investisiya qiymətli kağızları üzrə ödənilən dividendin və faiz gəlirlərinin gəlir vergisindən azad edilməsi müddəti beş ilə qədər artırılır. Sahibkarların vergi yükünün azaldılması ilə yanaşı, onların dövriyyə vəsaitlərinə qənaət edilməsi, habelə ixracı stimullaşdırmaq məqsədilə ixrac fəaliyyəti ilə məşğul olan şəxslərin apardıqları əməliyyatlardan yaranan ƏDV üzrə artıq ödənmiş vergilərin müddətinin 45 gündən 20 günədək endirilməsini əks etdirən düzəlişlər də qanun layihəsində öz əksini tapıb. Həmçinin layihədə topdan və pərakəndə ticarətlə məşğul olan vergi ödəyicilərini fərqləndirən meyarlar da müəyyən edilib.xeber100.com

Dünya birjalarında neftin qiyməti…

Dünya birjalarında neftin qiyməti yenidən ucuzlaşıb.Nyu-Yorkun NYMEX (“New York Mercantile Exchange”) birjasında “Layt” markalı neftin bir barrelinin qiyməti 1,94 dollar ucuzlaşaraq 51,04 dollar, Londonun ICE (“InterContinental Exchange Futures”) birjasında “Brent” markalı neftin bir barrelinin qiyməti 1,82 dollar azalaraq 53,90 dollar olub.xeber100.com

Sığorta sahəsi üzrə işçi qrupları yaradılacaq

Maliyyə Bazarlarına Nəzarət Palatası sığorta sahəsi üzrə aidiyyəti qurumların iştirakı ilə işçi qruplar yaradacaq.Azərtac xəbər verir ki, bu barədə “Azərbaycan Respublikasında maliyyə xidmətlərinin inkişafına dair Strateji Yol Xəritəsi”də deyilir.Sənədə əsasən, işçi qruplar tərəfindən cari vəziyyətin diaqnostikası aparılaraq, qabaqcıl beynəlxalq təcrübə araşdırılmaqla, hər bir sığorta sahəsi üzrə hüquqi, tənzimləyici və institusional çərçivənin formalaşdırılması istiqamətində görüləcək işlər və hər bir sığorta sahəsi üçün əməliyyat modeli müəyyənləşdiriləcək.Sığorta sistemində məlumatların toplanması, məlumat sistemləri və mübadilə prosesləri maliyyə xidmətləri sektorunda bu sahə üzrə müvafiq təşəbbüslər kontekstində nəzərdən keçiriləcək. Məsələn, müxtəlif risk amilləri nəzərə alınmaqla, kənd təsərrüfatı sığortası məhsulları üzrə qiymətlərin təyin olunması üçün məlumat sisteminin yaradılması nəzərdən keçiriləcək.xeber100.com

“Azərbaycan Hava Yolları”nın qərarı…

"Azərbaycan Hava Yolları" (AZAL) QSC-nin İdarə Heyətinin iclasında Azərbaycanın aşağı büdcəli aviadaşıyıcısının yaradılması barədə qərar qəbul edilib.“BUTA AIRWAYS” adlandırılan yeni büdcə aviaşirkəti "Azərbaycan Hava Yolları" QSC-nin tərkibinə daxil olacaq və AZAL-ın 100 faizlik törəmə şirkəti olacaq."Azərbaycan Hava Yolları" QSC-nin mətbuat xidmətindən Azərtac-a bildirilib ki, aviaşirkət Beynəlxalq Aeroportunda yerləşəcək.“BUTA AIRWAYS” aviaşirkətinin özünəməxsus livreyada Embraer təyyarələri əsasında yaradılmış öz donanması, öz işçi ştatı və müstəqil tarif siyasəti olacaq.

“Azəravtoyol”un məlumatına görə…

Bakı-Şamaxı avtomobil yolunun 12,8-ci kilometrində Binəqədi rayonu Sulutəpə qəsəbəsi ərazisində yeni yerüstü piyada keçidinin inşası işlərinə başlanılıb.Bu barədə Azərtac-a tikinti işlərini həyata keçirən “Azəravtoyol”un mətbuat xidmətindən bildirilib.Sözügedən keçid Prezident İlham Əliyevin piyadaların avtomobil yollarını rahat və təhlükəsiz şəkildə keçməsini təmin etmək istiqamətində verdiyi göstəriş və tapşırıqlarına əsasən inşa olunur.

Nyu-Yorkun NYMEX birjasında…

Dünya birjalarında neftin qiymətinin bahalaşması davam edir.Nyu-Yorkun NYMEX (“New York Mercantile Exchange”) birjasında “Layt” markalı neftin bir barrelinin qiyməti 1,33 dollar bahalaşaraq 52,83 dollar, Londonun ICE (“InterContinental Exchange Futures”) birjasında “Brent” markalı neftin bir barrelinin qiyməti 1,36 dollar artaraq 55,69 dollar olub.Azərtac xəbər verir ki, “AzəriLayt” markalı neftin bir barrelinin qiyməti isə 1,94 dollar bahalaşaraq 56,83 dollar təşkil edib.xeber100.com

“Bloomberg”in məlumatına görə…

Nigeriya tam istehsal həddinə çatdıqdan sonra OPEC-in sazişinə qoşulub gündəlik neft hasilatını 50 min barrel azalda bilər. Bunu Nigeriyanın neft naziri Emmanuel İbe Kaçikvu bəyan edib.“Bloomberg” xəbər verir ki, E.İ.Kaçikvunun sözlərinə görə, Nigeriya noyabr ayında hər gün 1,6 milyon barrel neft hasil edib.Xatırladaq ki, OPEC-in üzvü olmayan ölkələr dekabrın 10-da Vyanada gündəlik neft hasilatının ümumən 558 min barrel, o cümlədən Azərbaycan tərəfindən 35 min barrel azaldılmasını razılaşdırıblar. Bu sazişə Azərbaycanla bərabər daha 10 ölkə – Rusiya, Bəhreyn, Bruney, Qazaxıstan, Malayziya, Meksika, Oman, Ekvatorial Qvineya, Sudan və Cənubi Sudan qoşulublar. Saziş yanvar ayında qüvvəyə minəcək. Gələn ilin birinci yarısı üçün nəzərdə tutulan sazişin müddəti uzadıla bilər. Liviya və Nigeriya istehsalı azaltmaq barədə heç bir öhdəlik qəbul etməyiblər.xeber100.com  

Dünya Bankının dəstəyi ilə…

Azərbaycanın informasiya texnologiyaları şirkəti “Cybernet” Dünya Bankının dəstəyi ilə Qazaxıstan Səhiyyə və Sosial İnkişaf Nazirliyinin keçirdiyi “Qazaxıstanın səhiyyə sahəsində texnologiyaların transferi və institusional islahat” layihəsi çərçivəsində tenderin qalibi olub. Bununla bağlı, Astana şəhərində müqavilə imzalanıb. Tenderdə “Cybernet” şirkətinin başçılıq etdiyi və Rusiyanın “BARS Group” şirkətinin də daxil olduğu konsorsiumla yanaşı, Portuqaliya, Slovakiya, Ukrayna, Qazaxıstan, Rusiya və digər ölkələrdən 10 şirkət iştirak edib.Şirkətdən Azərtac-a bildirilib ki, sistem tamamilə Azərbaycan mütəxəssisləri tərəfindən hazırlanacaq və bir Azərbaycan məhsulu olacaq.xeber100.com

Dünya birjalarında neftin qiyməti…

Dünya birjalarında neftin qiymətinin bahalaşması davam edir.Nyu-Yorkun NYMEX (“New York Mercantile Exchange”) birjasında “Layt” markalı neftin bir barrelinin qiyməti 2,57 dollar bahalaşaraq 54,07 dollar, Londonun ICE (“InterContinental Exchange Futures”) birjasında “Brent” markalı neftin bir barrelinin qiyməti isə 2,36 dollar artaraq 56,69 dollar olub.xeber100.com