Qanunsuz sahibkarlıq fəaliyyətinə qarşı mübarizə şöbəsi yaradılıb

Vergilər Nazirliyində ölkə başçısının  “2016-cı ildə vergi sahəsində aparılacaq islahatların istiqamətləri”nin təsdiqi və vergi inzibatçılığının təkmilləşdirilməsi haqqında” 4 avqust 2016-cı il tarixli Sərəncamında verilən tapşırıqların icrası istiqamətində görülən işlərə və qarşıda duran vəzifələrə həsr edilmiş kollegiya iclası keçirilib. İclasda çıxış edən vergilər naziri, 1-ci dərəcəli dövlət vergi xidməti müşaviri Fazil Məmmədov bildirib ki, Azərbaycanda sahibkarlığın inkişafının dəstəklənməsi, vergi qanunvericiliyinin və vergi inzibatçılığının təkmilləşdirilməsi istiqamətində son illər ərzində mühüm addımlar atılıb, görülmüş tədbirlər nəticəsində büdcəyə vergi daxilolmaları üzrə müəyyən edilmiş proqnoz tapşırıqlarına artıqlaması ilə əməl olunub. Kollegiyanın qərarı ilə vergi orqanları tərəfindən nəzarət funksiyalarının həyata keçirilməsi mexanizminin müasir tələblərə uyğun olaraq daha da təkmilləşdirilməsi, büdcə gəlirləri üzrə proqnoz tapşırıqlarının tam həcmdə yerinə yetirilməsi məqsədilə Vergilər Nazirliyində bəzi struktur və kadr dəyişiklikləri aparılıb, Vergi Cinayətlərinin İbtidai Araşdırılması Departamentində bu məsələlərlə birbaşa məşğul olacaq müvafiq struktur bölmə - İqtisadi sahədə mütəşəkkil cinayətkarlığa qarşı mübarizə idarəsinin tərkibində Qanunsuz sahibkarlıq fəaliyyətinə qarşı mübarizə şöbəsi yaradılıb.xeber100.com  

“Expressbank” biznes kreditləri təklif edir

“Expressbank” kiçik və orta sahibkarlığın inkişafı üçün sərfəli şərtlərlə, milli valyutada biznes kreditləri təklif edir. Bankdan Azərtac-a bildiriblər ki, kiçik və orta biznes kreditləri 500 AZN-dən 30 000 AZN-dək məbləğdə olmaqla 30 ayadək müddətə verilir. İllik 25 faizdən başlayan şərtlərlə verilən kreditlərdə nəinki daşınmaz əmlak, həm də zamin və qızıl da təminat qismində çıxış edə bilər.xeber100.com

“Postneft dövründə bankçılıq perspektivləri”…

Noyabrın 24-25-də Bakıda Azərbaycan Banklar Assosiasiyasının (ABA) təşkilatçılığı ilə bank forumu keçiriləcək. “Postneft dövründə bankçılıq perspektivləri” adlı forumun məqsədi maliyyə-bank sisteminin postneft dövrünə adaptasiyası, maliyyə dayanıqlılığına dair məsələlərin müzakirəsi, bankçılıq sahəsində yeniliklər barədə qabaqcıl təcrübələrin öyrənilməsidir. Dörd paneldən ibarət olacaq forum “Postneft dövrünün çağırışları: yeni iqtisadi strategiya”, “Böhran şəraitində bankların idarə edilməsi və fəaliyyətlərinin şaxələndirilməsi: dünya təcrübəsindən dərslər”, “Bank qanunvericiliyi: problemlər və perspektivlər”, “Gələcəyin bankları: yeni texnologiyaların gətirdiyi imkanlar və risklər” mövzularını əhatə edəcək.xeber100.com

Dünya birjalarında neftin qiyməti…

Dünya birjalarında neftin qiyməti bahalaşmaqda davam edir. Nyu-Yorkun NYMEX (“New York Mercantile Exchange”) birjasında “Layt” markalı neftin bir barrelinin qiyməti 0,82 dollar bahalaşaraq 44,89 dollar, Londonun ICE (“InterContinental Exchange Futures”) birjasında “Brent” markalı neftin bir barrelinin qiyməti 0,57 dollar artaraq 46,15 dollar olub.Azərtac xəbər verir ki, “AzəriLayt” markalı neftin bir barrelinin qiyməti isə 0,03 dollar bahalaşaraq 45,40 dollar təşkil edib.xeber100.com

Neft İxrac edən Ölkələr Təşkilatının proqnozu…

Neft İxrac edən Ölkələr Təşkilatı (OPEC) 2040-cı ildə qlobal enerji tələbatının 40 faiz artacağını proqnozlaşdırır. Azərtac xəbər verir ki, bu barədə OPEC-in hesabatında deyilir. Hesabata görə, 2040-cı ildə qalıq yanacaq növlərinin qlobal enerjidəki payı 77 faizə çatacaq. Təbii qaz isə 27 faiz ilə ən böyük paya sahib olacaq. Təbii qazdan sonra 26 faizlə neft və 24 faiz ilə kömür yer alacaq. Enerji tələbatında bərpaolunan enerji mənbələrinin payı 17 faiz, nüvə enerjisi isə 6 faiz olacaq. Qlobal enerji tələbatı 2040-cı ilədək 40 faiz artımla gündəlik 382 milyon 100 min barrel neft ekvivalentinə yüksələcək. Artımın böyük hissəsi inkişaf etməkdə olan ölkələrdən qaynaqlanacaq. Qlobal enerji tələbatında inkişaf etməkdə olan ölkələrin payı 63 faizə yüksələcək. Həmin dövrdə, İqtisadi Əməkdaşlıq və İnkişaf Təşkilatına (OECD) üzv ölkələrdə enerji tələbatı 30 faiz, Avrasiya ölkələrində isə 7 faiz təşkil edəcək.xeber100.com

Mərkəzi Bankda növbəti ikitərəfli valyuta hərracı keçirilib

Noyabrın 8-də Mərkəzi Bankda Dövlət Neft Fondunun da iştirak etdiyi növbəti ikitərəfli valyuta hərracı keçirilib. Mərkəzi Bankdan Azərtac-a bildiriblər ki, hərrac 1 ABŞ dolları üçün 1,6686 məzənnəsi ilə başlayıb və 1,6781 məzənnəsi ilə yekunlaşıb.xeber100.com

Neftin qiyməti bahalaşıb

Neftin qiyməti ABŞ-da prezident seçkilərindən öncə bazardakı qeyri-müəyyənlik, eləcə də Əlcəzairin OPEC-in növbəti sammitində hasilatı idarə edə bilmək üçün ölkələr üzrə kvotaları müəyyən edəcəyinə inandığını açıqlaması fonunda bahalaşmağa başlayıb. Azərtac xəbər verir ki, Əlcəzairin enerji naziri Nurəddin Buterfe “APS” xəbər agentliyinə müsahibəsində OPEC-in sentyabr ayında Əlcəzairdə istehsalın məhdudlaşdırılmasına dair qərarının geri dönüşü olmadığını deyib. Əlcəzair OPEC-in növbəti sammitində hasilatı idarə edə bilmək üçün ölkələr üzrə kvotaları müəyyən edəcəyinə inandığını bildirib. Hazırda “Layt” markalı neftin bir barreli Nyu-Yorkun NYMEX birjasında 44,90 dollara, “Brent” markalı neftin bir barreli isə Londonun ICE birjasında 46,26 dollara satılır.xeber100.com  

Beynəlxalq Bank bankomat problemini aradan qaldırıb

Azərbaycan Beynəlxalq Bankı bankomat problemini aradan qaldırıb. Bankdan Azərtac-a bildirilib ki, problemə səbəb noyabr ayının ilk günlərində bəzi bankomatlarda vəsait çatışmazlığı əməkhaqlarının ödənişi ilə əlaqədar nağdlaşdırma əməliyyatlarının kütləviləşməsi ilə bağlı olub. Bu gündən problem tam həllini tapıb. Bankın bütün bankomatları inkassasiya edilib. Artıq müştərilər nağdlaşdırma əməliyyatlarını Azərbaycan Beynəlxalq Bankının istənilən bankomatında maneəsiz həyata keçirə biləcəklər.xeber100.com

“AZALJET”dən eksklüziv təklif…

“AZALJET” Tbilisi şəhərinə eksklüziv təklif elan edir. Azərtac xəbər verir ki, bu barədə “Azərbaycan Hava Yolları” QSC-nin mətbuat xidmətindən bildirilib. Məlumat verilib ki, noyabrın 25-də Bakı-Tbilisi, noyabrın 28-də isə Tbilisi-Bakı istiqamətində “AZALJET” bütün ekonom sinifi üçün vahid tarif – 49 avro olacaq (bir istiqamətdə).xeber100.com

Əmlak Məsələləri Dövlət Komitəsinin məlumatına əsasən…

Əmlak Məsələləri Dövlət Komitəsi (ƏMDK) tərəfindən dekabrın 6-da keçirilməsi nəzərdə tutulan yeni hərraca ümumilikdə 100 dövlət əmlakı çıxarılıb. Bunun 26-sı səhmdar cəmiyyəti, 50-si kiçik dövlət müəssisə və obyekti, 24-ü nəqliyyat vasitəsidir. Əmlaklar barədə elanlar və ətraflı məlumatlar komitənin özəlləşdirmə portalında (privatization.az) və rəsmi internet səhifəsində yerləşdirilib. Komitədən Azərtac-a bildirilib ki, hərracda əmlak sahibi olmaq istəyən hər kəs iştirak edə bilər. Bunun üçün komitənin elektron xidmətlər portalı vasitəsilə sifariş verilməli və əmlakın satış qiymətinin 10 faizi məbləğində beh elektron və bank vasitəsilə ödənilməlidir. Elektron sifariş hərracın keçirilməsinə 3 bank günü qalanadək verilməlidir. Hərraca çıxarılan 50 kiçik dövlət müəssisəsi və obyektlərindən 14-ü altındakı torpaq sahəsi ilə birlikdə özəlləşdirilməyə çıxarılıb. Torpaq sahəsi ilə birgə hərraca çıxarılan əmlaklar Bakının Nizami, Suraxanı, Sabunçu, Qaradağ, Xəzər, Binəqədi, Pirallahı rayonları, Gəncə, Mingəçevir, Yevlax və Sumqayıt şəhəri, habelə, Sabirabad, Saatlı, Hacıqabul, Neftçala, Balakən, Cəlilabad və digər rayonlarda yerləşir. Belə ki, tikili və torpaq sahəsi ayrı-ayrılıqda qiymətləndirilib. Elanda həm torpaq sahəsinin, həm də tikilinin ayrıca qiymətləri, habelə hər ikisinin birlikdə ümumi ilkin satış qiyməti göstərilib. Hərraca çıxarılan istifadəsiz qeyri-yaşayış sahələrinin isə hamısı Bakıda yerləşir.xeber100.com