“Bank of Baku”dan yenilik…

“Bank of Baku” internet bankçılıq xidmətindən istifadə edən müştəriləri üçün növbəti yeniliyi təqdim edir. Bankdan Azərtac-a bildiriblər ki, indi müştərilər yol hərəkəti qaydalarının pozulması ilə bağlı cərimə, eləcə də büdcə ödənişlərinin hamısını bir yerdə – internet bankçılıq xidməti vasitəsilə rahatlıqla həyata keçirə biləcəklər. Müştərilərin rahatlığını təmin etmək məqsədilə tətbiq edilən bu yenilik onlara aşağıdakı xidmətlər üzrə ödənişlər etmək imkanı yaradır: Daxili İşlər Nazirliyi, İpoteka Ödənişləri, Vergilər Nazirliyi, Dövlət Sosial Müdafiə Fondu ödənişləri. Qeyd olunan yeni xidmətlər üzrə ödənişlərin siyahısını internet bankçılıqda şəxsi kabinetdən “Kommunal və digər xidmətlərin ödənişi”ni seçib “Büdcə ödənişləri” bölməsinə keçid almaqla tapmaq olar. İstifadəçilər proqram təminatında hər bir ödəniş üzrə mövcud geniş axtarış modullarından istifadə etməklə ödəyəcəyi xidməti seçərək təsdiq düyməsinə basmaqla ödənişi icra edə bilərlər. Tarixçədə saxlanılan hər bir ödənişi növbəti dəfə sadəcə təsdiq əsasında həyata keçirmək olar. İnternet bankçılığa bankın 145 Məlumat Mərkəzinə zəng etməklə və filiala müraciət etməklə qoşulmaq olar.xeber100.com

“Azərbaycan Respublikasının Vergi Məcəlləsində dəyişiklik edilməsi haqqında”…

Ölkə başçısı “Azərbaycan Respublikasının Vergi Məcəlləsində dəyişiklik edilməsi haqqında” Azərbaycan Respublikasının 2016-cı il 30 sentyabr tarixli 318-VQD nömrəli Qanununun tətbiqi barədə Sərəncam imzalayıb. İqtisadi İslahatların Təhlili və Kommunikasiya Mərkəzi Sərəncamı şərh edib. Sənəddə qeyd olunur ki, ölkə iqtisadiyyatının bütün sferaları üzrə həyata keçirilən islahatların səmərəliliyinin, biznes mühitinin həm yerli, həm də xarici sahibkarlar üçün əlverişliliyinin təmin edilməsi məqsədilə vergi sistemində də dövrün tələbinə uyğun bir sıra zəruri dəyişikliklər həyata keçirilib. Qanunda nəzərdə tutulan dəyişikliklərin həyata keçirilməsi ölkədə biznes mühitinin əlverişliliyi, optimal vergi dərəcələrinin tətbiqi, tranzit yük daşınma sahəsində bəzi yeniliklər baxımından da faydalı olacaq. Dəyişiklik həm avtomobil, həm də gəmi ilə tranzit yükdaşımalarının həcminin sahibkarlar üçün gəlirlərin artması deməkdir. Qanunda nəzərdə tutulan dəyişikliklərin həyata keçirilməsini sürətləndirmək və effektivliyi təmin etmək üçün Prezident Nazirlər Kabinetinə 3 ay vaxt verib. Bu müddət ərzində Nazirlər Kabineti aktların yeni vergi Qanununa uyğunlaşdırılması barədə təkliflərini dövlət başçısına təqdim etməli, Nazirlər Kabinetinin normativ hüquqi aktlarının bu Qanuna uyğunlaşdırılması barədə Prezidentə məlumat verməlidir. Mərkəzi icra hakimiyyəti orqanlarının normativ hüquqi aktlarının bu Qanuna uyğunlaşdırılmasının beş ay müddətində həyata keçirilməsinə də Nazirlər Kabineti nəzarət etməli və ölkə Prezidentinə məlumat verməlidir. Bu normativ aktların Qanuna uyğunlaşdırılmasını isə Ədliyyə Nazirliyi həyata keçirəcək.xeber100.com

“AzəriLayt” markalı neftin qiyməti bahalaşıb

Azərbaycan neftinin qiyməti cüzi bahalaşıb. Azərtac xəbər verir ki, “AzəriLayt” markalı neftin bir barrelinin qiyməti 0,18 dollar bahalaşaraq 52,59 dollar təşkil edib.xeber100.com

“AtaSığorta” maliyyə nəticələrini açıqlayıb

"AtaSığorta" ASC 2016-cı ilin 9 ayı üzrə maliyyə nəticələrini açıqlayıb. ASC-dən Azərtac-a bildiriblər ki, bu müddətdə şirkətin ümumi sığorta yığımları 8,0 milyon manat təşkil edib. Keçən ilin müvafiq dövrü ilə müqayisədə ümumi sığorta yığımları 6,4 faiz artıb. "AtaSığorta" doqquz ayda 2,5 milyon manatdan artıq sığorta ödənişi həyata keçirib. Şirkətin nizamnamə kapitalı 12,4 milyon manat olmaqla aktivlərinin ümumi həcmi 35,0 milyon manat həcmindədir. Keçən ilin müvafiq dövrü ilə müqayisədə şirkətin aktivlərinin ümumi həcmi 25,1 faiz artıb. Şirkətin balans mənfəəti 1,8 milyon manat olub.xeber100.com

Vəsaitlərin cəlb edilməsi üzrə növbəti depozit hərracı keçiriləcək

Oktyabrın 24-də Azərbaycan Respublikasının Mərkəzi Bankı vəsaitlərin cəlb edilməsi üzrə növbəti depozit hərracı keçirəcək. Azərtac Mərkəzi Banka istinadla xəbər verir ki, dolayı hərracda 50 milyon manat məbləğində vəsaitin cəlbi nəzərdə tutulur. Depozit hərracının müddəti 28 gündür. "Bloomberg" ticarət sistemində keçiriləcək hərrac üzrə faiz dərəcələri 12,01-14,99 faiz təşkil edir.xeber100.com

2017-ci il üçün neftin qiymətləri ilə bağlı proqnoz…

Dünya Bankı Neft İxrac edən Ölkələr Təşkilatının (OPEC) üzvü olan ölkələr tərəfindən neft hasilatının dondurulması haqqında sazişin hazırlanması fonunda 2017-ci il üçün neftin qiymətləri ilə bağlı proqnozunu yaxşılaşdıraraq, bir barrel üçün 53-55 dollar civarında müəyyən edib. Azərtac Dünya Bankına istinadla xəbər verir ki, enerji daşıyıcılarının, o cümlədən neftin, təbii qazın və kömürün qiymətləri gələn il 25 faiz artmalıdır və bu da iyulda gözlənildiyindən daha böyük artımdır. 2016-cı ildə neftin qiymətləri ilə bağlı proqnoz bir barrel üçün 43 dollar səviyyəsində qalacaq. Dünya Bankının böyük iqtisadçısı Con Baffes deyib: “Gələn il biz neft başda olmaqla, enerji daşıyıcılarının qiymətlərinin xeyli artacağını gözləyirik. Buna baxmayaraq, perspektivlər ətrafında xeyli qeyri-müəyyənlik var, çünki biz detalları və OPEC-in sazişinin həyata keçməsini gözləyirik. Heç şübhəsiz, bu saziş neft bazarlarına əhəmiyyətli təsir göstərəcək”.

“Təsərrüfat fəaliyyət sahələri üzrə risklərin qiymətləndirilməsi metodologiyası”…

Vergilər Nazirliyinin Kollegiyasının qərarı ilə “Təsərrüfat obyektləri və fəaliyyət sahələri üzrə risklərin qiymətləndirilməsi metodologiyası” təsdiq edilib. Sənəd “2016-cı ildə vergi sahəsində aparılacaq islahatların istiqamətləri”nin təsdiqi və vergi inzibatçılığının təkmilləşdirilməsi haqqında” Azərbaycan Respublikası Prezidentinin 2016-cı il 4 avqust tarixli Sərəncamının müvafiq bəndinin icrası məqsədilə hazırlanıb. Nazirlikdən Azərtac-a bildirilib ki, məqsəd - vergi öhdəliklərini tam və vaxtında yerinə yetirilməsini təmin etmək, vergidən yayınma halları üzrə risklərin qiymətləndirilməsi üçün müvafiq vergi nəzarəti tədbirlərini seçmək və vergi potensialını (vergi boşluğunu) müəyyən etməkdir.xeber100.com

BMT-nin Xüsusi Proqramının 11-ci iclası keçirilir

Oktyabrın 19-21-də Qazaxıstanın paytaxtı Astanada Mərkəzi Asiya Ölkələrinin İqtisadiyyatları üzrə BMT-nin Xüsusi Proqramının (SPECA) statistikaya dair layihə işçi qrupunun 11-ci iclası keçirilir. İclasda ölkəmizi Azərbaycan Respublikası Dövlət Statistika Komitəsi sədrinin müavini Rauf Səlimov, komitənin dayanıqlı inkişaf statistikası şöbəsinin müdiri Rasim Səfərov, statistika işlərinin əlaqələndirilməsi və strateji planlaşdırma şöbəsi müdirinin müavini Toğrul Əcəlov təmsil edirlər. Komitədən Azərtac-a bildirilib ki, iclasda SPECA proqramına dair rəsmi fəaliyyətlə yanaşı, statistik biznes reyestri üzrə beynəlxalq tövsiyələrin yerinə yetirilməsi və dayanıqlı inkişaf məqsədləri üzrə göstəricilərin tətbiqinə dair aktual məsələlər müzakirə olunur. İclas Birləşmiş Millətlər Təşkilatının Avropa İqtisadi Komissiyası (BMT AİK), Avropa Azad Ticarət Assosiasiyası (AATA) və Qazaxıstan Respublikasının Milli İqtisadiyyat Nazirliyinin birgə təşkilatçılığı ilə keçirilir. Avrasiya İqtisadi Komissiyası, Avropa Azad Ticarət Assosiasiyası və Birləşmiş Millətlər Təşkilatının Avropa İqtisadi Komissiyasının nümayəndələri ilə yanaşı, tədbirə Azərbaycan, Qazaxıstan, Qırğızıstan, Türkmənistan və Tacikistanın statistika təşkilatlarının rəhbər işçiləri və əməkdaşları qatılıblar.xeber100.com

Beynəlxalq Maliyyə-Bank Forumu keçiriləcək

Oktyabrın 26-29-da Belarusun paytaxtında MDB-nin iştirakçısı olan ölkələrin “Minsk işgüzar görüşləri” II Beynəlxalq Maliyyə-Bank Forumu keçiriləcək. Bu il tədbir Birlik ölkələrinin Hökumət Başçıları Şurasının iclası ilə eyni vaxta təsadüf edir. Forumda MDB-nin iştirakçısı olan ölkələrin, o cümlədən Azərbaycanın hökumət orqanlarının, bank və biznes qurumlarının, habelə beynəlxalq inkişaf təsisatlarının, o cümlədən Avropa və Asiyadan olan təsisatların nümayəndələrinin iştirakı nəzərdə tutulub.xeber100.com

Dünya birjalarında neftin qiyməti…

Dünya birjalarında neftin qiymətinin ucuzlaşması davam edir. Nyu-Yorkun NYMEX (“New York Mercantile Exchange”) birjasında “Layt” markalı neftin bir barrelinin qiyməti 0,41 dollar ucuzlaşaraq 49,94 dollar, Londonun ICE (“InterContinental Exchange Futures”) birjasında “Brent” markalı neftin bir barrelinin qiyməti 0,43 dollar azalaraq 51,52 dollar olub. Azərtac xəbər verir ki, “AzəriLayt” markalı neftin bir barrelinin qiyməti isə 0,06 dollar ucuzlaşaraq 52,06 dollar təşkil edib.xeber100.com