Azərbaycan-BMT Tərəfdaşlıq Çərçivə sənədinin imzalanması mərasimi baş tutub

Bu gün Bakıda Azərbaycan-BMT Tərəfdaşlıq Çərçivə sənədinin imzalanması mərasimi baş tutub. "Apa-Economics" xəbər verir ki, sənədi Azərbaycanın iqtisadiyyat naziri Şahin Mustafayev və BMT-nin rezident əlaqələndiricisi Qulam İshaqzai imzalayıb. Tərəfdaşlıq Çərçivə sənədi "Azərbaycan-2020: Gələcəyə baxış" konsepsiyası çərçivəsində nəzərdə tutulan milli məqsədlərə müvafiq olaraq 2016-2020-ci il müddətinə imzalanıb. Sənədin əsasını 2030-cu il üçün davamlı inkişaf gündəliyi təşkil edəcək və bununla da davamlı inkişaf məqsədləri təsbit olunacaq. Ş. Mustafayev qeyd edib ki, sənəd hazırlanarkən milli və beynəlxalq tərəfdaşlar, elm və ictimaiyyət nümayəndələri ilə sıx əməkdaşlıq qurularaq strateji sahələrin müəyyənləşdirilməsi üzrə müzakirələr keçirilib. "Çərçivə sənədi aşağıdakı iqtisadiyyatın şaxələndirilməsi, layiqli əməyi özündə ehtiva edən dayanıqlı iqtisadi inkişafın təşviqi, institusional potensialın gücləndirilməsi, səmərəli ictimai və sosial xidmətlər, ətraf mühitin idarə edilməsinin təkmilləşdirilməsi, risk və təbii fəlakətlərə qarşı dayanıqlılığın artırılması kimi strateji fəaliyyət sahələrini əhatə edir. Konsepsiyada müasir çağırışlara cavab olaraq qeyri-neft sektorunun daha sürətli inkişafına nail olmaq, iqtisadi səmərəliliyin və rəqabətqabiliyyətliliyinin artırılması vəzifələri məqsəd kimi qoyulub", - deyə nazir qeyd edib. M. İshaqzainin sözlərinə görə, imzalanan sənəd təxminən 2 il ərzində Azərbaycan hökuməti və BMT sistemində təmsil olunan qurumlar arasında aparılan sıx məsləhətləşmələr və müzakirələrin nəticəsidir: "Tərəfdaşlıq sənədinin əsas məqsədi milli inkişaf gündəliyinə dəstək verməkdən ibarətdir. Bu sənəd Azərbaycan üçün çox taleyüklü zamanda imzalanır. Çünki hal-hazırda Azərbaycan hökuməti iqtisadi islahatlar və şaxələndirmə üçün müvafiq yol xəritəsi hazırlayır. BMT Azərbaycanın yanındadır və bu proseslərin həyata keçirilməsində öz töhfəmizi verməyə hazırıq".xeber100.com

11 min 968 yeni abonent qeydiyyata alınıb

İyunda “Azəriqaz” İstehsalat Birliyində (İB) əhali sektoru üzrə 11 min 968 yeni abonent qeydiyyata alınıb ki, bunun da 1551-i Bakı və Sumqayıt şəhərlərinin, eləcə də Abşeron rayonunun, 10 min 417-si isə regionların payına düşüb. Beləliklə də, ölkə üzrə təbii qazla təmin olunan abonentlərin sayı 1 milyon 918 min 710-a çatıb. SOCAR-ın mətbuat xidmətindən Azərtac-a bildirilib ki, iyulun 1-nə olan məlumata görə, əhali sektoru üzrə 130 min 964 məcburi köçkün ailəsi dövlət tərəfindən ayrılmış limitə uyğun olaraq təbii qazla təmin edilib. Bundan əlavə, 362 məscid və dini məbədə təbii qazdan əvəzsiz istifadəsi üçün limit ayrılıb.xeber100.com

Amerika fond bazarında əsas səhmlər bahalaşıb

Amerika fond bazarında Dow Jones indeksi 1,40% - 18 146,74 bəndədək, S&P 500 1,53% - 2 129,90 bəndədək, NASDAQ 1,64% - 4 956,76 bəndədək artıb. "APA-Economics" xəbər verir ki, Avropa fond bazarlarında FTSE 100 indeksi 0,87% - 6 590,64 bəndədək, Almaniya DAX-ı 2,24% - 9 629,66 bəndədək, Fransa CAC-40-ı 1,77% - 4 190,68 bəndədək bahalaşıb. COMEX-də sonuncu hərraclarda qızılın unsiyası 3,70 dollar azalaraq 1 358,40 dollara, gümüş isə 0,51 dollar bahalaşaraq 20,35 dollara satılıb.xeber100.com

“ASAN xidmət” mərkəzlərinə 6213 müraciət daxil olub

İyunda Bakıdakı 1, 2, 3, 4 və 5 saylı, eləcə də Bərdə, Sabirabad rayonlarındakı və Gəncə şəhərindəki “ASAN xidmət” mərkəzlərinə “Azəriqaz” İstehsalat Birliyi (İB) ilə bağlı ümumilikdə 6213 müraciət daxil olub. SOCAR-ın mətbuat xidmətindən Azərtac-a bildirilib ki, əsasən “smart” tipli qaz sayğacları ilə təchiz olunmuş istehlakçılara xidmətlərin göstərilməsi, “Azəriqaz” İB-nin müvafiq strukturlarından tələb olunan məlumatların alınması, həmçinin qazlaşdırma ilə bağlı texniki şərtlərin verilməsi barədə edilmiş müraciətlərin hamısı həllini tapıb. İstehlakçılarla münasibətlərin təkmilləşdirilməsi, göstərilən xidmətin keyfiyyətinin yüksəldilməsi məqsədilə “Azəriqaz” bu istiqamətdə fəaliyyətini bundan sonra da davam etdirəcək.xeber100.com

AMB vəsaitlərin cəlb edilməsi üzrə üçüncü dəfə depozit hərracı keçirəcək

Azərbaycan Mərkəzi Bankı (AMB) vəsaitlərin cəlb edilməsi üzrə üçüncü dəfə depozit hərracı keçirəcək. "Apa-Economics" xəbər verir ki, iyulun 11-də keçiriləcək dolayı depozit hərracında 50 mln. manat məbləğində vəsaitin cəlbi nəzərdə tutulur. Depozit hərracının müddəti 30 gün təşkil edir. "Bloomberg" ticarət platformasında keçiriləcək hərrac üzrə faiz dərəcələri 4,01%-6,99% təşkil edir.xeber100.com

“Avtonəqliyyat vasitəsi sahiblərinin mülki məsuliyyətinin icbari sığortası”…

İyun ayı ərzində İcbari Sığorta Bürosunun (İSB) elektron informasiya sistemində "Avtonəqliyyat vasitəsi sahiblərinin mülki məsuliyyətinin icbari sığortası" (AVSMMİS) üzrə büronun iştirakçı sığorta şirkətləri tərəfindən 2 238 sığorta tələbi qeydiyyata alınıb. İSB-dan Azərtac-a bildiriblər ki, bu tələblər üzrə 2,6 milyon manat məbləğdə sığorta ödənişi həyata keçirilib. İyunda nəqliyyat vasitəsinə dəyən zərər üzrə orta sığorta ödənişi 1 144 manat təşkil edib. Ümumilikdə, 2016-cı ilin yanvar-iyun ayları ərzində AVSMMİS üzrə sığorta şirkətləri tərəfindən 9 255 sığorta tələbi üzrə 11 milyon 577 min 849 manat məbləğində sığorta ödənişi həyata keçirilib. Ötən ilin müvafiq dövrü ilə müqayisədə sığorta ödənişlərinin məbləğində 3 faiz azalma müşahidə edilib.xeber100.com

MDB Gömrük Xidməti Rəhbərləri Şurasının 63-cü iclası keçirilib

Qırğızıstanın Çolpon-Ata şəhərində Müstəqil Dövlətlər Birliyi (MDB) Gömrük Xidməti Rəhbərləri Şurasının 63-cü iclası keçirilib. Görüşdə MDB gömrük qurumları arasında əlaqələrin inkişafı istiqamətində geniş fikir mübadiləsi aparılıb, bundan əvvəl qəbul edilən bir sıra sənədlərə əlavə və düzəlişlər edilib. İclasda MDB məkanında azad iqtisadi zonaların yaradılması ilə əlaqədar saziş də ətraflı müzakirə olunaraq müvafiq qərar qəbul olunub.xeber100.com

“Sizinlə Gələcək” adlı yeni kampaniyaya start verilib

“Azər Türk Bank” “Sizinlə Gələcək” adlı yeni kampaniyaya start verib. Bankdan Azərtac-a bildiriblər ki, məqsəd xarici ölkələrdə təhsil alan gənclərimizə dəstək olmaqdır. Kampaniya çərçivəsində tələbə biletini və ya xarici universitetdə oxuduğuna dair hər hansı rəsmi sənədi təqdim edən müştəriyə pulsuz birillik "MasterCard Standart" kartı hədiyyə ediləcək.xeber100.com

118 milyon 916 min manatdan artıq kompensasiya ödənilib

Əmanətlərin Sığortalanması Fondu (ƏSF) tərəfindən seçilmiş agent banklar vasitəsilə "Texnikabank" ASC-nin sənədləri qaydasında olan əmanətçilərinə 118 milyon 916 min manatdan artıq kompensasiya ödənilib. Fonddan Azərtac-a bildiriblər ki, "Texnikabank"ın qorunan əmanətçilərinə kompensasiyaların ödənilməsi üçün agent bank olaraq "Muğanbank", "Rabitə Bank", "Unibank" və "Kapitalbank" seçilib. Fond əmanətçilərin ərizələrini sığorta hadisəsi baş verdiyi gündən başlayaraq bir il ərzində qəbul edir. Sığorta hadisəsi baş vermiş "Texnikabank" ASC-nin qorunan əmanətçilərinə 100 faiz həcmində, lakin 30 min manatdan çox olmamaq şərti ilə kompensasiya ödənilir. Qeyd edək ki, "Texnikabank"ın qorunan əmanətçilərindən ərizələrin qəbuluna fevralın 12-dən etibarən agent bankların filiallarında başlanılıb.xeber100.com

Beynəlxalq Daşınmaz Əmlak və İnvestisiya Sərgisi açılacaq

Dekabrın 15-17-də ELANEXPO-nun təşkilatçılığı ilə Bakı Ekspo Mərkəzində Beynəlxalq Daşınmaz Əmlak və İnvestisiya Sərgisi keçiriləcək. Azərbaycanda İxracın və İnvestisiyaların Təşviqi Fondundan  Azərtac-a bildiriblər ki, sərgidə logistika, infrastruktur, sığorta, arxitektura, daşınmaz əmlakın idarə olunması sahəsində fəaliyyət göstərən şirkətlər, banklar, daşınmaz əmlakların internet təchizatı, insan resursları, marketinq, ictimaiyyətlə əlaqələr üzrə ixtisaslaşan qurumlar və digər sahələri təmsil edən iş adamlarının iştirakı gözlənilir. Qeyd edək ki, ELANEXPO Azərbaycan ilə yanaşı, Əlcəzair, Mərakeş, İraq və Qazaxıstanda bir çox sərgilər təşkil edib və hər il baş tutan sərgilərdə bu günədək yüzlərlə şirkət təmsil olunub.xeber100.com