“Kağız və parametrik modelləşdirmə” mövzusunda ustad dərsləri keçiriləcək

“YARAT” Müasir İncəsənət Mərkəzinin ARTIM layihə məkanında yerli memarlar üçün Portuqaliyanın tanınmış memarı Pedro Migel Qomes Xanuarionun rəhbərliyi ilə “Kağız və parametrik modelləşdirmə” mövzusunda ustad dərsləri keçiriləcək. Azərtac xəbər verir ki, beş gün davam edəcək ustad dərsləri, Yaponiyanın qədim oriqami (kağız qatlama) sənətindən istifadə etməklə, parametrik layihələndirmə (modelləşdirmə) üzrə rəqəmsal alətlərin köməyi ilə “qrafik düşüncənin” dəstəklənməsi ilə bağlı yeni konsepsiyanın bir hissəsidir. Ustad dərslərində iştirak etmək istəyənlər ingilis dilini bilməli (minimum B1 səviyyəsi), kompüterlə modelləşdirmə (CAD) proqramları ilə iş təcrübəsinə, ümumi həndəsi və riyazi biliklərə sahib olmalıdırlar. İştirakçılar müraciət tarixi noyabrın 25-də yekunlaşan layihəyə qatılmaq üçün sənədlərini [email protected] elektron ünvanına göndərə bilərlər.xeber100.com

Dövlət Filarmoniyasında konsert proqramı təşkil olunacaq

Noyabrın 17-də M.Maqomayev adına Azərbaycan Dövlət Filarmoniyasında “Gənclərə dəstək” adlı layihə çərçivəsində növbəti konsert proqramı təşkil olunacaq. Filarmoniyadan Azərtac-a bildirilib ki, konsert proqramı Q.Qarayev adına Azərbaycan Dövlət Kamera Orkestrinin müşayiəti ilə reallaşacaq. Orkestrə Xalq Artisti, dirijor Teymur Göyçayev rəhbərlik edəcək. Qeyd edək ki, sözügedən layihə respublikanın tanınmış istedadlı gənc ifaçılarına dəstək olmaq məqsədilə təşkil olunur.xeber100.com

Türkan Şorayla görüş keçiriləcək

Türk dünyasının sultanı Türkan Şoray Bakıya gələcək. Yunus Emre İnstitutundan Apa-ya verilən məlumata görə, institut və Xəzər Universitetinin birgə əməkdaşlığı ilə noyabrın 18-də Bakıda Türkan Şorayla görüş keçiriləcək. Tədbirdə Türkan Şorayın yeni albomunun təqdimatı və imza günü keçiriləcək, “İlin ən yaxşısı” mükafatı təqdim ediləcək.xeber100.com

Milli Dram Teatrında xatirə gecəsi keçiriləcək

Noyabrın 15-də Milli Dram Teatrında xalq artisti Yaşar Nurinin 65 illik yubileyi münasibəti ilə tədbir keçiriləcək. Mərasimdə Y. Nurinin kino, televiziya və teatr tamaşalarından fraqmentlər nümayiş olunacaq, sənətkarın dostları xatirələrini bölüşəcəklər. Gecədə eyni zamanda Y. Nurinin sevdiyi mahnılar səslənəcək.xeber100.com

“Azərbaycan Respublikasının Qanununda dəyişiklik edilməsi barədə”…

Nazirlər Kabinetinin mədəniyyət sahəsində səlahiyyətlərindən birinin ləğvi rəsmiləşib. Apa-nın məlumatına görə, bu,  ölkə başçsının “Mədəniyyət haqqında” Azərbaycan Respublikasının Qanununda dəyişiklik edilməsi barədə” 2016-cı il 30 sentyabr tarixli qanununun tətbiqi və “Mədəniyyət haqqında” 2012-ci il 21 dekabr tarixli qanununun tətbiqi barədə” Azərbaycan Respublikası Prezidentinin 2013-cü il 15 fevral tarixli 828 nömrəli fərmanında dəyişikliklər edilməsi haqqında” 14 noyabr 2016-cı il tarixli fərmanında əksini tapıb. Bu il sentyabrın 30-da “Mədəniyyət haqqında” qanuna edilən dəyişikliyə əsasən peşəkar yaradıcılığın meyarlarının müvafiq icra hakimiyyəti orqanı tərəfindən müəyyən edilməsi barədə müddəa ləğv edilib. Peşəkar yaradıcılığın meyarlarının müəyyən edilməsi sahəsində məsul orqan Nazirlər Kabineti olub. Bununla əlaqədar “Mədəniyyət haqqında” Azərbaycan Respublikasının 2012-ci il 21 dekabr tarixli 506-IVQ nömrəli Qanununun tətbiqi barədə” Azərbaycan Respublikası Prezidentinin 2013-cü il 15 fevral tarixli fərmanı ilə Nazirlər Kabinetinə bu sahədə verilən səlahiyyət də ləğv edilib.xeber100.com

Xor Kapellasının 80 illik yubileyi münasibətilə…

Noyabrın 22-də Bakıda Azərbaycan Televiziya və Radiosunun Cahangir Cahangirov adına Xor Kapellasının 80 illik yubileyi münasibətilə konsert proqramı təşkil olunacaq. Azərtac xəbər verir ki, Dövlət Filarmoniyasının kamera və orqan musiqisi zalında reallaşacaq konsertdə Üzeyir Hacıbəyli, Müslim Maqomayev, Fikrət Əmirov, Səid Rüstəmov, Cahangir Cahangirov, habelə Avropa bəstəkarlarının əsərləri səsləndiriləcək.xeber100.com

Heydər Əliyev sarayında konsert proqramı təqdim olunacaq

Noyabrın 20-də Heydər Əliyev Sarayında Azərbaycan və Gürcüstanın gənc rəqs kollektivlərinin iştirakı ilə konsert proqramı təqdim olunacaq. Azərtac xəbər verir ki, konsertdə Azərbaycanın Sosial və Müasir Rəqs Assosiasiyasının və Gürcüstanın İlori, Liaxvi və Kenari rəqs kollektivləri çıxış edəcək.xeber100.com

“Stars at Tenerife” üçüncü beynəlxalq musiqi müsabiqəsi keçirilib

İspaniyanın Tenerife şəhərində “Stars at Tenerife” üçüncü beynəlxalq musiqi müsabiqəsi keçirilib. On ölkədən iştirakçının qatıldığı müsabiqədə Azərbaycanı Ü.Hacıbəyli adına Bakı Musiqi Akademiyasının (BMA) üçüncü kurs tələbələri Cavid Əzizov və Vüsal Aydəmirov təmsil edib. Müsabiqədə iştirakçıları 9 nəfərdən ibarət münsiflər heyəti qiymətləndirib. Bakı Musiqi Akademiyasının mətbuat xidmətindən Azərtac-a bildirilib ki, müsabiqənin solo nominasiyasında 19-22 yaş qrupu üzrə 8 iştirakçı arasında Cavid Əzizov, 23 və daha artıq yaş qrupu üzrə isə 9 iştirakçı arasında Vüsal Aydəmirov ikinci yerlərə layiq görülüblər.Müsabiqənin yekun konsertində Azərbaycan təmsilçiləri F.Listin “Ballada” və “Raprodiya”sı, eləcə də F.Bədəlbəylinin “Dəniz”, T.Quliyevin “Qaytağı” əsərlərini səsləndiriblər. İfalar tamaşaçılar tərəfindən çox böyük rəğbətlə qarşılanıb.xeber100.com  

IV Beynəlxalq Mstislav Rostropoviç Festivalı keçiriləcək

Noyabrın 30-dan dekabrın 2-dək Orenburqda IV Beynəlxalq Mstislav Rostropoviç Festivalı keçiriləcək. Festivalın təşkilatçısı Orenburq Dövlət Filarmoniyasıdır. Azərtac filarmoniyanın saytına istinadla xəbər verir ki, noyabrın 30-da festivalın açılış mərasimində Orenburq Dövlət Filarmoniyasında C.Verdinin “Riqoletto” operası nümayiş etdiriləcək.Musiqi axşamlarının əsas qəhrəmanları Qalina Vişnevskaya adına Opera İfaçılığı Mərkəzinin solistləri olacaq. Festivala Aydar Qaynullinin və “Eyforiya” ansamblının konserti ilə yekun vurulacaq.

İndoneziya səfirliyinin təşkilatçılığı ilə…

Noyabrın 19-20-də Beynəlxalq Muğam Mərkəzində İndoneziya səfirliyinin təşkilatçılığı ilə Bakıda birinci İndoneziya Mədəniyyət Festivalı keçiriləcək. Bu ölkənin Azərbaycandakı səfirliyindən Azərtac-a bildirilib ki, tədbirdə İndoneziya mədəniyyətinin müxtəlifliyi təqdim olunacaq. Həmçinin bu ölkənin mədəniyyət nümunələri, o cümlədən müxtəlif əyalətlərin musiqi və rəqsləri ifa ediləcək. Eyni zamanda, tədbirə qatılan əyalətlərin iş adamları da Azərbaycana gələcək. Onlar ölkəmizlə əməkdaşlığın perspektivlərini müzakirə edəcəklər.xeber100.com