Rusiya kinosu günləri keçiriləcək

Oktyabrın 10-dan 14-dək Azərbaycanda Rusiya kinosu günləri keçiriləcək. Mədəniyyət və Turizm Nazirliyinin məlumatına görə, bu münasibətlə Rusiya Kino Fondunun direktoru Anton Malışev, rejissor və prodüser Renat Davletyarov, aktrisa Yevgeniya Malaxova (Davletyarova), rejissor Yuriy Vasilyev, prodüser Mixail Deqtyar və “Kinofest” Prodüser Mərkəzinin direktoru Sergey Braqindən ibarət nümayəndə heyəti ölkəmizə səfər edəcək. Nizami Kino Mərkəzində keçiriləcək kino günlərinin açılışı oktyabr 10-da Rusiya kinematoqrafçıları ilə görüş və rejissor Renat Davletyarovun “Təmiz sənət” bədii filminin nümayişi ilə başlayacaq. Kino günləri çərçivəsində tamaşaçılara rejissor Yuriy Vasilyevin “Qəhrəman”, İndar Djendubayevin “O, drakondur”, İlya Çijikov və Anton Çijikovun “Bizim qəbiristanlığın oğlanı” və Eduard Bordukovun “Qutu” bədii filmi təqdim olunacaq.xeber100.com

“CinemaPlus” kinoteatrı açılıb

“Gənclik mall” ticarət mərkəzində “Dolby Atmos” texnologiyası ilə təchiz olunmuş regionun ən böyük “CinemaPlus” kinoteatrı açılıb. Azərtac xəbər verir ki, açılış mərasimində çıxış edən “CinemaPlus” kinoteatrlar şəbəkəsinin baş direktoru Zaur Darabzadə “Dolby Atmos” texnologiyasının ilk dəfə Azərbaycanda “CinemaPlus” kinoteatrında təqdim edildiyini deyib. Kinoteatrın doqquz zaldan ibarət olduğunu söyləyərək bildirib ki, 300 yerlik ən böyük eksklüziv zal xüsusi diqqət çəkir. “Dolby Digital Atmos” texnologiyasının hesabına səs tamaşaçını hər tərəfdən əhatə edir. Səs müşayiətini kinoteatrın istənilən yerinə yerləşdirmək və yerini dəyişmək imkanı hesabına “Dolby Digital Atmos” film yaradıcılarına kinoda səsi yeni bir mərhələyə çıxarmaq imkan yaradır. Nəticədə, tamaşaçı ekranda baş verənləri sadəcə izləmir, hadisənin mərkəzinə daxil olur. Qeyd edək ki, “Dolby Digital Atmos” texnologiyası ilk dəfə 2012-ci ilin aprel ayında təqdim edilib və bütün Hollivud studiyaları tərəfindən istifadə olunur. “Oskar” mükafatına layiq görülmüş 11 rejissor və 23 səs rejissoru bu texnologiya ilə işləyir. Bu günə kimi, bütün dünya üzrə 300-dən artıq kinoteatr bu texnologiyaya keçib. Tezliklə dünyanın bütün iri kinoteatrlarının “Dolby Digital Atmos” texnologiyasından istifadə edəcəyi gözlənilir.xeber100.com

“YARAT Akademiyası” adlı layihəyə start verilib

“YARAT” Müasir İncəsənət Mərkəzi “YARAT Akademiyası” adlı layihəsinə start verib. Azərtac xəbər verir ki, “YARAT Akademiyası” artıq ərizə qəbuluna başlayıb. Dekabradək davam edəcək ərizə qəbulu ilə hər kəs sözügedən sənət ocağına müraciət edə bilər. Qeyd edək ki, layihənin əsas məqsədi tələbələr və incəsənətə marağı olan hər kəs üçün bu sahəyə maraq oyatmaq və araşdırmaq imkanı yaratmaqdır.xeber100.com  

Mədəniyyət və Turizm Nazirliyinin dəstəyi ilə…

Mirbala Səlimlinin “Qırmızı bağ” bədii filminin beynəlxalq premyerası keçirilib. Cəfər Cabbarlı adına “Azərbaycanfilm” kinostudiyasından Azərtac-a bildirilib ki, filmin nümayişi 12-ci Avrasiya Beynəlxalq Film Festivalının əsas müsabiqə proqramında keçirilib. Qazaxıstanda keçirilən festival çərçivəsində bu ekran əsəri üç dəfə nümayiş etdirilib. Festivala dəvət alan ssenari müəllifi və quruluşçu rejissor Mirbala Səlimli filmin nümayişləri və mətbuat konfranslarında iştirak edib. Qeyd edək ki, Azərbaycan və Rusiyanın birgə istehsalı olan “Qırmızı bağ” filmi Azərbaycan Respublikası Mədəniyyət və Turizm Nazirliyinin dəstəyi ilə “Azərbaycanfilm” kinostudiyasında və Rusiyanın “WeiT Media” kino şirkətində lentə alınıb. Filmin quruluşçu operatoru Maksim Drozdov, quruluşçu rəssamı Leonid Karpov, bəstəkarı Salman Qəmbərov, icraçı prodüserləri Tofiq Musayev, Timur Cəfərov, Nazim Hüseynov, prodüserləri Müşfiq Hətəmov (“Azərbaycanfilm”) və Timur Vaynşteyndir (“WeiT Media”). Əsas rollarda Maqsud Məmmədov, Gülzar Qurbanova, Taleh Bədiyev və başqaları çəkiliblər.xeber100.com

“Jewish Journal” yazır…

ABD-də yayınlanan “Jewish Journal” qəzetində Azərbaycanın Dağ Yəhudiləri İcmasının rəhbəri Milix Yevdayevin Roma Papasının Bakıya səfəri haqqında məqaləsi dərc edilib. Müəllif Azərbaycandakı Heydər məscidində müsəlmanların, katoliklərin, protestant və pravoslav xristianların Roma Papası ilə görüşü barədə geniş məlumat verib.xeber100.com

VII Avropa film festivalı keçiriləcək

Noyabrın 3-də Bakıda VII Avropa film festivalı keçiriləcək. Azərtac xəbər verir ki, builki film festivalında Azərbaycanla yanaşı, Almaniya, Avstriya, Belçika, Birləşmiş Krallıq, Çexiya, Estoniya, Finlandiya, Fransa, Xorvatiya, İspaniya, İsveç, İtaliya, Latviya, Litva, Macarıstan, Portuqaliya, Rumıniya və Yunanıstanı təmsil edəcək rejissorların ekran əsərləri təqdim olunacaq. Festival Avropa İttifaqının (Aİ) Azərbaycandakı nümayəndəliyi və ittifaqa üzv ölkələrin Bakıdakı səfirliklərinin birgə təşkilatçılığı ilə gerçəkləşəcək. Noyabrın 12-dək davam edəcək festival çərçivəsində tamaşaçılara komediya, dram, fantastika, macəra janrlarında bədii filmlərlə yanaşı, həm də animasiya və sənədli ekran əsərləri də təqdim olunacaq. Qeyd edək ki, festival çərçivəsində nümayiş olunacaq filmlərin adları yaxın günlərdə müəyyənləşəcək.xeber100.com

Rəssamlar İttifaqında sərgi açılacaq

Oktyabrın 14-də Azərbaycan Rəssamlar İttifaqının V. Səmədova adına sərgi salonunda tanınmış rəssam İntiqam Ağayevin əl işlərindən ibarət “Xatirələrim” adlı sərgi açılacaq. Sərgi Mədəniyyət və Turizm Nazirliyi və Azərbaycan Rəssamlar İttifaqının təşkilatçılığı ilə baş tutacaq. Rəssamlar İttifaqından Azərtac-a bildirilib ki, bir həftə davam edəcək sərgidə fırça ustasının müxtəlif janrlarda işlədiyi sənət əsərləri nümayiş olunacaq.xeber100.com

Dövlətlərarası Şuranın XXI iclası keçiriləcək

Oktyabrın 3-4-də Çolpon-Atada (Qırğızıstan) MDB üzvü olan ölkələrin dövri mətbuat, kitab nəşri, kitab yayımı və poliqrafiya sahəsində əməkdaşlığı üzrə Dövlətlərarası Şuranın XXI iclası keçiriləcək. Bu barədə Azərtac-a Birliyin Minskdəki İcraiyyə Komitəsinin mətbuat xidmətində məlumat verilib. İclas iştirakçıları Dövlətlərarası Şuranın XX iclasının qərarlarının yerinə yetirilməsinin gedişini, MDB iştirakçıları olan ölkələrin XIII Beynəlxalq “Kitab sənəti” müsabiqəsinin yekunlarını və növbəti, XIV müsabiqənin keçirilməsinə hazırlıq məsələlərini müzakirə edəcəklər.xeber100.com

“Front” adlı interaktiv performans təqdim olunub

Oktyabrın 1-də “YARAT” Müasir İncəsənət Mərkəzində danimarkalı rəssam Kristian Falsnaesin “Front” adlı interaktiv performansı təqdim olunub. Azərtac xəbər verir ki, performans Kristian Falsnaesin yaradıcılığının əsasını təşkil edir. Onun tədqiqat obyekti və səhnəciklərinin əsas “materialı” insandır. Rəssamın çıxışları canlı və ya video şəklində, tamaşaçıların iştirakı ilə və ya onlarsız təqdim edilir. Danimarkalı rəssam tamaşaçıların fəal iştirakı ilə yaratdığı teatrla, hətta çox vaxt absurd performanslarında “Bu an baş verənləri, bu anı biz uzun zamandır gözləyirdik!” kimi ruhlandırıcı sözlərlə coşqunluq yaradır. “Front” iri həcmli qurğuların davamlı olaraq spreylə boyandığı, parçalanaraq şəhər içində nümayiş etdirildiyi, daha sonra isə yenidən qurularaq yeni forma aldığı kollektiv performansdır.xeber100.com

İstiqlal Muzeyinin təşkilatçılığı ilə…

Bakıdakı şəhid Mirələkbər İbrahimov adına 153 nömrəli orta məktəbdə Azərbaycan İstiqlal Muzeyinin təşkilatçılığı ilə “Torpaq uğrunda ölən varsa Vətəndir!” layihəsi çərçivəsində tədbir keçirib. Azərtac xəbər verir ki, tədbir Mirələkbər İbrahimova həsr olunub. Əvvəlcə tədbir iştirakçıları Milli Qəhrəmanın məktəbin önündəki abidəsi üzərinə tər çiçəklər düzüblər. Sonra tədbir məktəbin akt zalında davam etdirilib. Mədəniyyət və Turizm Nazirliyi tərəfindən hazırlanmış milli qəhrəmanların həyat və fəaliyyətini əks etdirən sənədli filmlər nümayiş olunub. Məktəbin direktoru Təranə Paşayeva, direktor müavini Mətanət Cəfərova, şəhidin oğlu Cavid İbrahimov və başqaları milli qəhrəmanların keçdikləri şərəfli döyüş yolundan danışıblar. Onların şərəfli həyat yolunun gənc və yeniyetmələrə örnək olduğu bildirilib. Tədbir şagirdlərin ifasında milli qəhrəmanlara həsr edilmiş ədəbi-bədii kompozisiya ilə sona çatıb.xeber100.com