Rəşid Behbudov – 100

Sentyabrın 27-də Tbilisidəki İvane Saracişvili adına Dövlət Konservatoriyasının akt zalında dünya şöhrətli müğənni Tbilisi şəhərinin fəxri vətəndaşı Rəşid Behbudovun 100 illik yubileyinə həsr olunmuş yubiley tədbiri keçirilib. Konservatoriyanın foyesində R.Behbudovun həyat və fəaliyyətinə həsr olunan foto sərgi açılmışdı. Şota Rustaveli adına Dövlət Teatr və Kino İnstitutu rektoru Georgi Dolidze tədbiri açdıqdan sonra Gürcüstanın mədəniyyət və abidələrin mühafizəsi naziri Mixail Georqadze, Azərbaycanın bu ölkədəki səfirliyinin humanitar və mədəniyyət məsələlər üzrə müşaviri Samirə Ağayeva, məşhur opera müğənnisi Nani Breqvadze, Mirzə Fətəli Axundzadə adına Azərbaycan Mədəniyyəti Muzeyinin direktoru Leyla Əliyeva və başqaları çıxış edərək R.Behbudovun həyat və yaradıcılığından söz açıblar. Səhnədə quraşdırılmış ekranda R.Behbudovun “Arşın mal alan” musiqili komediyasından gürcü dilində parçalar nümayiş etdirilib.xeber100.com

Milli Dram Teatr oktyabr repertuarını təqdim edir

Azərbaycan Dövlət Akademik Milli Dram Teatrının oktyabr ayı üçün nəzərdə tutulan repertuarı maraqlı tamaşalarla zəngindir. Teatrın oktyabr repertuarını təqdim edirik: 1 oktyabr- “Anamın kitabı” 2 oktyabr- “Nağıllar aləmində”, “Biy çiçəyi” 8 oktyabr - “Ölülər” 9 oktyabr- “Aldanmış ulduzlar”, “Qatil” 14 oktyabr- “Generalın son əmri” 15 oktyabr- “Biri var idi, biri yox idi”, “Şah Qacar” 16 oktyabr- “Qaraca qız”, “Mənim günahım” 21 oktyabr- “Xanuma” 22 oktyabr- “Danışan gəlincik”, “Zorən Şorgöz” 23 oktyabr – “Ölülər” (gündüz və axşam) 28 oktyabr- “Müsyö İbrahim və Quran çiçəyi”  

VIII Beynəlxalq Festivalı çərçivəsində…

Sentyabrın 26-da Beynəlxalq Muğam Mərkəzində Üzeyir Hacıbəyli adına VIII Beynəlxalq Festivalı çərçivəsində Əməkdar Artist, Bakı Musiqi Akademiyasının professoru, beynəlxalq müsabiqə laureatı Nərgiz Əliyarovanın solo konserti keçirilib. Azərtac xəbər verir ki, konsertdə Azərbaycan bəstəkarlarının əsərləri ilə yanaşı, bir sıra xarici ölkə bəstəkarlarının da musiqiləri səsləndirilib. Gecədə pianoçunun Belçikanın “ETCETERA” şirkətində yazılan "Nərgiz Əliyarova Azərbaycan musiqisini ifa edir" adlı yeni kompakt diski təqdim olunub. Şirkət tərəfindən hazırda dünyanın müxtəlif ölkələrində həmin diskin satışı həyata keçirilir. Gecədə alqışlarla qarşılanan müəllif, 3 musiqi diskinin Almaniyada və Hollandiyada yazıldığını və Belçikada disklərinin təqdimatının keçirildiyini söyləyib.xeber100.com

“Eskizdən səhnəyə” adlı sərgi nümayiş ediləcək

Sentyabrın 27-də Cəfər Cabbarlı adına Azərbaycan Dövlət Teatr Muzeyində “Turizm işçiləri günü” peşə bayramına həsr edilmiş fond materiallarından ibarət “Eskizdən səhnəyə” adlı sərgi nümayiş ediləcək. Mədəniyyət və Turizm Nazirliyindən Azərtac-a bildirilib ki, sərgidə bu günə qədər sərgilənməyən müxtəlif teatr rəssamları tərəfindən tamaşalara çəkilmiş dekorasiya və geyim eskizləri nümayiş olunacaq, muzeyə gələn qonaqlara Azərbaycan teatrının tarixi və səhnəqrafiya sənətimiz haqqında məlumat veriləcək. Həmin gün muzeydə “Açıq qapı” günü elan ediləcək.xeber100.com

İrəvan Teatrı yeni mövsümə start verib

C.Cabbarlı adına İrəvan Dövlət Azərbaycan Dram Teatrı yeni mövsümə start verib. Teatrdan Azərtac-a bildirilib ki, R.Behbudov adına Azərbaycan Dövlət Mahnı Teatrının səhnəsində, yazıçı Hidayətin “İrəvanda xal qalmadı” əsəri əsasında hazırlanmış eyniadlı səhnə əsəri teatrın yaradıcı heyəti tərəfindən təqdim olunub. Səhnə əsərində əsas rolları Əməkdar artistlər - Vaqif Kərimov, Esmiralda Şahbazova, aktyorlar - Əjdər Zeynalov, Könül Əbilova, Ceyhun Əliyev, Ruhiyyə Paşayeva və digərləri ifa ediblər. Tamaşanın quruluşçu rejissoru və musiqi tərtibatçısı Nicat Mirzəzadə, rejissor assistenti Rövşən Cəfərovdur. Qeyd edək ki, tamaşa, ötən əsrin 80-ci illərində Azərbaycanın tarixi şəhəri olan İrəvanda yaşayan həmvətənlərimizin milli zəmində qarşılaşdıqları repressiya və çətinliklərdən bəhs edir.xeber100.com

Nizami Kino Mərkəzi təqdim edir

Nizami Kino Mərkəzində “Ölülər XXI əsr” milli filminin və ABŞ-ın “Leyləklər” animasiya filminin nümayişinə başlanılıb. Mədəniyyət və Turizm Nazirliyindən bildirilib ki, Tahir və Cabir İmanov qardaşlarının prodüseri olduğu “Ölülər XXI əsr” filmi Cəlil Məmmədquluzadəyə ithaf olunub. Ekran əsəri görkəmli yazıçının “Ölülər” pyesinin müasir versiyasıdır. Filmin ssenari müəllifləri Tahir İmanov, Ələkbər Əliyev, Mütəllim Həsənov, Anar Ömərov, Məmmədəli Kazımovdur. Baş rollarda Tahir İmanov, Valeh Kərimov, Elnar Qarayev, Cabir İmanov, Rövşən Kərimduxt, Bəhram Bağırzadə, Azər Məmmədzadə, Dilarə Əliyeva, Mehriban Xanlarova və başqaları çəkiliblər. Xatırladaq ki, filmin premyera nümayişi sentyabrın 22-də “Park Cinema” kinoteatrlar şəbəkəsinin “Metro Park” ticarət mərkəzində olub.xeber100.com

YARAT Müasir İncəsənət Mərkəzində sərgi açılıb

Sentyabrın 23-də YARAT Müasir İncəsənət Məkanının ARTIM layihə məkanında gənc heykəltəraşlar Novruz Məmmədov, Nadir Eminov və Elvin Nəbizadənin əsərlərindən ibarət “Rahat keyləşmə” adlı qrup sərgisi açılıb. Sərgidə metal, daş və taxtadan hazırlanmış sənət əsərləri nümayiş olunub. Azərtac xəbər verir ki, Novruz Məmmədovun paslanmaz metaldan olan “Pozğun şüurun fantaziyaları” adlı trilogiyasında rəssam fetişizm, vuayerizm və eksaudirizm meyilli insanları əhatə edərək, tamaşaçıya onların hiss etdiklərini yaşamağı təklif edir. Heykəltəraş Nadir Eminovun ağlay daşından yonduğu “Yara” instalyasiyasında Bakıda aparılan rekonstruksiya və yenidənqurma işlərinə münasibət bildirilir. Rəssamın fikrincə, binaları yerli və yersiz üzlük daşı ilə örtmək tendensiyası kitç mədəniyyətindən başqa bir şey deyil. Elvin Nəbizadənin “Qara saz” layihəsi isə taxtadan yonularaq deformasiya edilmiş sazları təqdim edir. Rəssamın fikrincə saz, qədim türk mədəniyyətindən bizə gələn bünövrə element kimi bu gün də aktuallığını saxlayır. Qeyd edək ki, sərginin təşkil olunmasında məqsəd istedadlı gəncləri incəsənət sahəsində karyera qurmağa təşviq etmək, habelə onlara öz əsərlərini nümayiş etdirmək üçün müvafiq şərait yaratmaqdır.xeber100.com

Azərbaycan Dövlət Musiqili Teatrı təqdim edir

Azərbaycan Dövlət Musiqili Teatrında ötən mövsümün uğurlu tamaşalarından biri olan “999-cu gecə” adlı ikihissəli musiqili tamaşa nümayiş olunacaq. Teatrın mətbuat xidmətinin verdiyi məlumata görə, səhnə əsərinin növbəti nümayişi sentyabrın 25-də olacaq.  Qeyd edək ki, “Min bir gecə” nağıllarının motivləri əsasında hazırlanan “999-cu gecə” böyüklər üçün nağıl-tamaşadır. Bu nağıl “Min bir gecə”də Şəhrizadın danışdığı 999-cu nağıl olduğundan yaradıcı kollektiv tamaşanı “999-cu gecə” adlandırıb.Tamaşanın quruluşçu rejissoru İradə Gözəlova, quruluşçu dirijoru Əməkdar İncəsənət Xadimi Fəxrəddin Atayev, quruluşçu rəssamı Nabat Səmədova, xormeysteri Əməkdar Artist Vaqif Məstanov, quruluşçu baletmeysterləri Yelena və Zakir Ağayevlər, konsertmeysteri Fidan Babayeva, rejissor assistentləri Sevinc Məmmədova və Sara Kərimlidir. Rolları Məhərrəm Qurbanov, Nicat Əli, Mehriban Zalıyeva, Əliməmməd Novruzov, Gültac Əlili, Ruslan Mürsəlov, Fərid Rzayev və Elməddin Dadaşov ifa edəcəklər.xeeber100.com

TÜRKSOY Opera Günləri Festivalı keçiriləcək

Oktyabrın 5-dən 12-dək Türkiyədə XIX TÜRKSOY Opera Günləri Festivalı keçiriləcək. Azərtac xəbər verir ki, tədbir bu il dünya şöhrətli müğənni Rəşid Behbudovun anadan olmasının 100 illik yubileyinə həsr olunacaq. Festivalda türkdilli ölkələrin tanınmış mədəniyyət və incəsənət xadimləri iştirak edəcəklər. Festival çərçivəsində konsertlər İstanbul və Qirnədə (Şimali Kipr Türk Respublikası) təşkil olunacaq. Ölkəmizi bu mötəbər tədbirdə Azərbaycan Dövlət Akademik Opera və Balet Teatrının aparıcı solistləri, Xalq Artisti Azər Zeynalov və Əməkdar Artist Afaq Abbasova təmsil edəcək. Solistlərimiz klassik dünya bəstəkarlarının əsərləri ilə yanaşı, vaxtilə Rəşid Behbudovun repertuarında yer almış ariya və duetləri də ifa edəcəklər.xeber100.com

Beynəlxalq Turizm Günü ilə əlaqədar “Turizm həftəsi” elan edilib

Bakı Şəhər Mədəniyyət və Turizm Baş İdarəsi 27 sentyabr - Beynəlxalq Turizm Günü ilə əlaqədar “Turizm həftəsi” elan edib. İdarədən Azərtac-a bildirilib ki, “Turizm həftəsi” çərçivəsində Azərbaycanın xalçaçılıq incilərinin, milli sərvətlərin, tarixi abidələrin gənclər arasında təbliği və onların bu sahədə məlumatlandırılması məqsədi ilə Nizami rayonu 1 nömrəli uşaq evinin sakinləri üçün ekskursiyalar nəzərdə tutulub. Ekskursiyalar “İçərişəhər” Dövlət Tarix-Memarlıq Qoruğuna, “Qala” Dövlət Tarix-Etnoqrafiya Qoruğuna, Milli Azərbaycan Tarixi və Azərbaycan Xalça muzeylərinə təşkil ediləcək. Həmçinin Bakı Şəhər Mədəniyyət və Turizm Baş İdarəsi Beynəlxalq Turizm Günü ilə əlaqədar tədbirlər planı hazırlayıb. İdarənin şəbəkəsinə daxil olan müəssisələr - kitabxanalar, mədəniyyət evləri və klublar, muzeylər, uşaq musiqi və incəsənət məktəbləri tərəfindən müxtəlif sərgilər, söhbətlər, “dəyirmi masa”lar, ekskursiyalar, “açıq qapı” günləri təşkil olunacaq.xeber100.com