Nizami Kino Mərkəzi təqdim edir

Nizami Kino Mərkəzində “Ölülər XXI əsr” milli filminin və ABŞ-ın “Leyləklər” animasiya filminin nümayişinə başlanılıb. Mədəniyyət və Turizm Nazirliyindən bildirilib ki, Tahir və Cabir İmanov qardaşlarının prodüseri olduğu “Ölülər XXI əsr” filmi Cəlil Məmmədquluzadəyə ithaf olunub. Ekran əsəri görkəmli yazıçının “Ölülər” pyesinin müasir versiyasıdır. Filmin ssenari müəllifləri Tahir İmanov, Ələkbər Əliyev, Mütəllim Həsənov, Anar Ömərov, Məmmədəli Kazımovdur. Baş rollarda Tahir İmanov, Valeh Kərimov, Elnar Qarayev, Cabir İmanov, Rövşən Kərimduxt, Bəhram Bağırzadə, Azər Məmmədzadə, Dilarə Əliyeva, Mehriban Xanlarova və başqaları çəkiliblər. Xatırladaq ki, filmin premyera nümayişi sentyabrın 22-də “Park Cinema” kinoteatrlar şəbəkəsinin “Metro Park” ticarət mərkəzində olub.xeber100.com

YARAT Müasir İncəsənət Mərkəzində sərgi açılıb

Sentyabrın 23-də YARAT Müasir İncəsənət Məkanının ARTIM layihə məkanında gənc heykəltəraşlar Novruz Məmmədov, Nadir Eminov və Elvin Nəbizadənin əsərlərindən ibarət “Rahat keyləşmə” adlı qrup sərgisi açılıb. Sərgidə metal, daş və taxtadan hazırlanmış sənət əsərləri nümayiş olunub. Azərtac xəbər verir ki, Novruz Məmmədovun paslanmaz metaldan olan “Pozğun şüurun fantaziyaları” adlı trilogiyasında rəssam fetişizm, vuayerizm və eksaudirizm meyilli insanları əhatə edərək, tamaşaçıya onların hiss etdiklərini yaşamağı təklif edir. Heykəltəraş Nadir Eminovun ağlay daşından yonduğu “Yara” instalyasiyasında Bakıda aparılan rekonstruksiya və yenidənqurma işlərinə münasibət bildirilir. Rəssamın fikrincə, binaları yerli və yersiz üzlük daşı ilə örtmək tendensiyası kitç mədəniyyətindən başqa bir şey deyil. Elvin Nəbizadənin “Qara saz” layihəsi isə taxtadan yonularaq deformasiya edilmiş sazları təqdim edir. Rəssamın fikrincə saz, qədim türk mədəniyyətindən bizə gələn bünövrə element kimi bu gün də aktuallığını saxlayır. Qeyd edək ki, sərginin təşkil olunmasında məqsəd istedadlı gəncləri incəsənət sahəsində karyera qurmağa təşviq etmək, habelə onlara öz əsərlərini nümayiş etdirmək üçün müvafiq şərait yaratmaqdır.xeber100.com

Azərbaycan Dövlət Musiqili Teatrı təqdim edir

Azərbaycan Dövlət Musiqili Teatrında ötən mövsümün uğurlu tamaşalarından biri olan “999-cu gecə” adlı ikihissəli musiqili tamaşa nümayiş olunacaq. Teatrın mətbuat xidmətinin verdiyi məlumata görə, səhnə əsərinin növbəti nümayişi sentyabrın 25-də olacaq.  Qeyd edək ki, “Min bir gecə” nağıllarının motivləri əsasında hazırlanan “999-cu gecə” böyüklər üçün nağıl-tamaşadır. Bu nağıl “Min bir gecə”də Şəhrizadın danışdığı 999-cu nağıl olduğundan yaradıcı kollektiv tamaşanı “999-cu gecə” adlandırıb.Tamaşanın quruluşçu rejissoru İradə Gözəlova, quruluşçu dirijoru Əməkdar İncəsənət Xadimi Fəxrəddin Atayev, quruluşçu rəssamı Nabat Səmədova, xormeysteri Əməkdar Artist Vaqif Məstanov, quruluşçu baletmeysterləri Yelena və Zakir Ağayevlər, konsertmeysteri Fidan Babayeva, rejissor assistentləri Sevinc Məmmədova və Sara Kərimlidir. Rolları Məhərrəm Qurbanov, Nicat Əli, Mehriban Zalıyeva, Əliməmməd Novruzov, Gültac Əlili, Ruslan Mürsəlov, Fərid Rzayev və Elməddin Dadaşov ifa edəcəklər.xeeber100.com

TÜRKSOY Opera Günləri Festivalı keçiriləcək

Oktyabrın 5-dən 12-dək Türkiyədə XIX TÜRKSOY Opera Günləri Festivalı keçiriləcək. Azərtac xəbər verir ki, tədbir bu il dünya şöhrətli müğənni Rəşid Behbudovun anadan olmasının 100 illik yubileyinə həsr olunacaq. Festivalda türkdilli ölkələrin tanınmış mədəniyyət və incəsənət xadimləri iştirak edəcəklər. Festival çərçivəsində konsertlər İstanbul və Qirnədə (Şimali Kipr Türk Respublikası) təşkil olunacaq. Ölkəmizi bu mötəbər tədbirdə Azərbaycan Dövlət Akademik Opera və Balet Teatrının aparıcı solistləri, Xalq Artisti Azər Zeynalov və Əməkdar Artist Afaq Abbasova təmsil edəcək. Solistlərimiz klassik dünya bəstəkarlarının əsərləri ilə yanaşı, vaxtilə Rəşid Behbudovun repertuarında yer almış ariya və duetləri də ifa edəcəklər.xeber100.com

Beynəlxalq Turizm Günü ilə əlaqədar “Turizm həftəsi” elan edilib

Bakı Şəhər Mədəniyyət və Turizm Baş İdarəsi 27 sentyabr - Beynəlxalq Turizm Günü ilə əlaqədar “Turizm həftəsi” elan edib. İdarədən Azərtac-a bildirilib ki, “Turizm həftəsi” çərçivəsində Azərbaycanın xalçaçılıq incilərinin, milli sərvətlərin, tarixi abidələrin gənclər arasında təbliği və onların bu sahədə məlumatlandırılması məqsədi ilə Nizami rayonu 1 nömrəli uşaq evinin sakinləri üçün ekskursiyalar nəzərdə tutulub. Ekskursiyalar “İçərişəhər” Dövlət Tarix-Memarlıq Qoruğuna, “Qala” Dövlət Tarix-Etnoqrafiya Qoruğuna, Milli Azərbaycan Tarixi və Azərbaycan Xalça muzeylərinə təşkil ediləcək. Həmçinin Bakı Şəhər Mədəniyyət və Turizm Baş İdarəsi Beynəlxalq Turizm Günü ilə əlaqədar tədbirlər planı hazırlayıb. İdarənin şəbəkəsinə daxil olan müəssisələr - kitabxanalar, mədəniyyət evləri və klublar, muzeylər, uşaq musiqi və incəsənət məktəbləri tərəfindən müxtəlif sərgilər, söhbətlər, “dəyirmi masa”lar, ekskursiyalar, “açıq qapı” günləri təşkil olunacaq.xeber100.com

“Maraqlı Avropa” adlı sərgi açılıb

Sentyabrın 22-də “Art Villa” qalereyasında gənc rəssamlar Rüstəm Hüseynovun və Aydın Sadıqovun fotolarından ibarət “Maraqlı Avropa” adlı sərgi açılıb. Azərtac xəbər verir ki, “Arts Council Azerbaijan”ın təşkilatçılığı ilə keçirilən sərgi Azərbaycan və Avropa İttifaqı münasibətlərinin 25 illiyinə həsr olunub. Sərginin ekspozisiyasında gənc fotoqrafların 30-dək fotosu nümayiş olunub. Sərgidə renessans abidələrin, eləcə də “Dante”, “Faust”, “Drakula”, “Van Helsinq” və başqa Avropa əraziləri tarixinin çox maraqlı fotoları təqdim olunub. Əsərlər arasında “Sümük kilsə” və “Mason çevirmiş qalası” kimi sirli tarixi ilə diqqət çəkən fotolar da yer alıb. Paytaxt sakinləri ilə yanaşı, xarici qonaqların da tamaşa etdikləri sərgi maraqla qarşılanıb.

VIII Beynəlxalq Musiqi Festivalı çərçivəsində…

Üzeyir Hacıbəyli VIII Beynəlxalq Musiqi Festivalı çərçivəsində sentyabrın 22-də Beynəlxalq Muğam Mərkəzində klassik musiqi konserti olub. Azərtac xəbər verir ki, israilli musiqiçilər Haqay Şaham (skripka) və Yulia Qurviç (fortepiano) konsertdə İ.Brams, E.Qriq və R.Şumanın əsərlərini səsləndiriblər.xeber100.com  

“Front” adlı interaktiv performans təqdim olunacaq

Oktyabrın 1-də YARAT Müasir İncəsənət Mərkəzində danimarkalı rəssam Kristian Falsnaesin “Front” adlı interaktiv performansı təqdim olunacaq. Azərtac xəbər verir ki, performans Kristian Falsnaesin yaradıcılığının əsasını təşkil edir. Onun tədqiqat obyekti və səhnəciklərinin əsas “materialı” insandır. Rəssamın çıxışları canlı və ya video şəklində, tamaşaçıların iştirakı ilə və ya onlarsız təqdim edilir. Danimarkalı rəssam tamaşaçıların fəal iştirakı ilə yaratdığı teatral, hətta çox vaxt absurd performanslarında “Bu an baş verənləri, bu anı biz uzun zamandır gözləyirdik!” kimi ruhlandırıcı sözlərlə coşqunluq yaradır. “Front” iri həcmli qurğuların davamlı olaraq spreylə boyandığı, parçalanaraq şəhər içində nümayiş etdirildiyi, daha sonra isə yenidən qurularaq yeni forma aldığı kollektiv performansdır. Rəssam üzərinə rejissor rolunu götürərək, təlimatları ilə səhnə və tamaşaçılar arasındakı estetik səddi aradan qaldırır.xeber100.com

Türkdilli dövlətlərin mədəniyyət festivalı keçiriləcək

Azərbaycanın Koreya Respublikasındakı səfirliyinin təşəbbüsü və Koreya Xarici İşlər Nazirliyinin təşkilatçılığı ilə noyabrın 8-13-də türkdilli dövlətlərin mədəniyyət festivalı keçiriləcək. Səfirlikdən Azərtac-a bildiriblər ki, festivalda Azərbaycan ilə yanaşı, Türkiyə, Türkmənistan, Qazaxıstan və Qırğızıstanın mədəniyyət xadimlərindən ibarət nümayəndə heyətləri iştirak edəcəklər. Noyabrın 8-də paytaxt Seuldakı Koreya Milli Muzeyində festivalın açılış mərasimi keçiriləcək. Növbəti gün Seulda Azərbaycan günü, noyabrın 13-də isə Qimhe şəhərində Azərbaycan, Qazaxıstan və Qırğızıstan mədəniyyət xadimlərinin iştirakı ilə birgə konsert təşkil ediləcək. Festivalda Azərbaycanı Dövlət Mahnı və Rəqs Ansamblı, “Natiq” ritm qrupu, tanınmış cazmen Elçin Şirinov və caz qrupu, instrumental ansamblı təmsil edəcəkdir. Konsert proqramlarına paralel olaraq tədbirin keçiriləcəyi Koreya Milli Muzeyində Azərbaycanın tarixini, mədəniyyətini, milli mətbəxini, təbiətini, memarlığını əks etdirən fotosərgi, həmçinin milli geyim sərgisi açılacaq. Bundan başqa, rejissor Rövşən İsaxın “Aktrisa” filmi Koreya dilində subtitrlə nümayiş etdiriləcək. Festivalda Azərbaycan nümayəndə heyətinin iştirakı, sərgilərin təşkili və filmin nümayişi Azərbaycanın Mədəniyyət və Turizm Nazirliyi, SEBA Azərbaycan-Koreya Mədəniyyət Mübadiləsi Assosiasiyası və “Bakı” Media Mərkəzinin dəstəyi ilə həyata keçirilir.xeber100.com

Aşıqlar Birliyinin məlumatına görə…

Azərbaycan Aşıqlar Birliyində (AAB) səsyazma studiyası, arxiv və muzey yaradılacaq. Birliyin sədri, Əməkdar İncəsənət Xadimi Məhərrəm Qasımlı Azərtac-a bildirib ki, səsi və sənəti ilə xalqa xidmət edən ustad aşıqların, eləcə də gənc, istedadlı aşıqların səsini əbədiləşdirmək üçün digər məkanlara, televiziya, radiolara müraciət etmək lazım olmayacaq. Birliyin 3-cü mərtəbəsində xüsusi studiya yaradılacaq, səsyazma cihazları quraşdırılacaq. Həyatda ikən səsi, ifası yazılmış aşıqların 100 illər sonra da yadigar səsi və çalğısı bu studiyalarda mühafizə edilib gələcək nəslə çatdırılacaq. Bildirilib ki, AAB-də mədəniyyətimizə, milli-tarixi kimliyimizə, dövlətimizə və dövlətçiliyimizə sədaqətlə xidmət edən aşıqlarımızın arxivlərinin yaradılması, ozan-aşıq muzeyinin yaradılması da nəzərdə tutulub. Birliyin sədri bunun üçün də müvafiq yer ayrıldığını bildirib. Məhərrəm Qasımlının sözlərinə görə aşıqların kitabları, diskləri, səsyazıları, onların haqqında mütəxəssislərin fikirləri, aşıq sənəti korifeyləri haqqında yazılmış monoqrafiyalar, dərc olunmuş kitablar da arxivdə toplanacaq, ozan-aşıq muzeyinin bəzəyinə çevriləcək.xeber100.com