Mədəniyyət və Turizm Nazirliyinin məlumatına əsasən…

Mədəniyyət və turizm naziri Əbülfəs Qarayev İslam Əməkdaşlıq Təşkilatının (İƏT) baş katibi İyad bin Amin Mədəni ilə görüşüb. Nazirlikdən Azərtac-a bildirilib ki, görüşdə İƏT ilə ölkəmiz arasında əməkdaşlıq barədə fikir mübadiləsi aparılıb və gələcək perspektivlər müzakirə edilib. İyad bin Amin Mədəni ölkəmizdə yenidən olmasından məmnunluğunu ifadə edərək səfərinin əsas məqsədinin İslam Həmrəylik Oyunlarına hazırlıqla tanışlıq və Azərbaycanla əməkdaşlıq imkanlarının yenidən müzakirəsindən ibarət olduğunu söyləyib. Nazir Ə.Qarayev İslam Həmrəylik Oyunlarının hazırlığının bilavasitə ölkə rəhbərliyinin diqqətində olduğunu və bütün aidiyyəti təşkilatların bu işdə lazımı dəstək göstərdiyini bildirərək, nazirlik tərəfindən də həmrəylik oyunları dövründə maraqlı mədəni tədbirlərin təşkil ediləcəyini diqqətə çatdırıb. Nazir, qonağa cari ilin aprelində keçirilmiş BMT Sivilizasiyalar Alyansının 7-ci Qlobal Bakı Forumunun nəticələri və 2017-ci ilin aprelində keçiriləcək 4-cü Ümumdünya Mədəniyyətlərarası Dialoq Forumu barədə məlumat verdi. Görüşdə, həmçinin İƏT institutları ilə əməkdaşlıq və Naxçıvanın “İslam Mədəniyyəti paytaxtı 2018”ə hazırlıqla bağlı da fikir mübadiləsi aparılıb.xeber100.com

Mədəniyyət və Turizm Baş İdarəsinin təşkilatçılığı ilə…

Bakı Şəhər Mədəniyyət və Turizm Baş İdarəsinin təşkilatçılığı ilə Bakı “SOS uşaq kəndi”ndə Qurban bayramı münasibətilə tədbir keçirilib. Tədbirdə iştirak edən Bakı Şəhər Mədəniyyət və Turizm Baş İdarəsinin və Xətai rayon Gənclər və İdman İdarəsinin əməkdaşları uşaqları bayram münasibətilə təbrik ediblər. Tədbir zamanı tanınmış müğənnilər Rüfət Xəlil, Nihat Məlik, Aidə Feyziteva, Qadir Fətəliyev, Novruz Bəxtiyarlı, “Meqas” qrupu, “Səma” vokal qrupu və rəqs ansamblının ifaları uşaqlarda xoş ovqat yaradıb. Balacalar təşkil olunmuş müxtəlif əyləncəli oyunlarda iştirak edib, musiqi sədaları altında rəqs edərək tədbirdən xüsusi zövq alıblar. Sonda uşaqlara Bakı Şəhər Mədəniyyət və Turizm Baş İdarəsi tərəfindən bayram hədiyyələri təqdim olunub.xeber100.com

Lənkəran teatrı yeni tamaşaların məşqlərinə başlayıb

Lənkəran Dövlət Dram Teatrında paralel olaraq iki yeni səhnə əsərinin məşqlərinə başlanılıb. Bu barədə Apa-nın cənub bürosuna teatrın direktoru Tofiq Heydərov məlumat verib. T. Heydərov bildirib ki, Azərbaycan Dövlət “Yuğ” Teatrının baş rejissoru Gümrah Ömər milli dramaturgiyamızın banisi Mirzə Fətəli Axundzadənin “Hacı Qara” komediyasının stolüstü məşqlərini aparır:”Gümrah Ömər əvvəllər də teatrımızda bir neçə tamaşaya quruluş verib. Truppa, necə deyərlər, bu istedadlı sənət adamına artıq alışıb. Qarşılıqlı anlaşma isə həmişə uğurla nəticələnir”. Teatrın quruluşçu rejissoru, əməkdar artist Adil Zeynalov isə Abdulla Şaiqin “Qoçpolad” əsərini tamaşaya hazırlayır. Bu səhnə əsəri əsasən məktəblilər üçün nəzərdə tutulub. Hər iki tamaşada teatrın aparıcı səhnə ustalarından xalq artisti Qabil Quliyev, əməkdar artistlər Təvəkkül Əliyev, Sucəddin Mirzəyev, Zemfira Əhmədova, artistlər Əlibala Əsgərov, Miraslan Ağayev, Allahverən Babayev, Əbülfəz Ağayev, Niftulla Əsgərov, Qızılgül Quliyeva, Şahrud Mehdiyeva, Aynur Əhmədova, Emin Fərzullayev, Səyyad Əliyev və digərləri rol alıblar. Tamaşaların oktyabr ayının ortalarında sənətsevərlərə təqdim olunması nəzərdə tutulub.xeber100.com

“İpək və alov” beynəlxalq musiqi festivalı keçiriləcək

Fransa mətbuatının məlumatına görə, Müluz şəhərində “İpək və alov” beynəlxalq musiqi festivalı keçiriləcək. Xəbərdə bildirilir ki, Müluz şəhərinin “La Sinne” teatrında keçiriləcək festivalın açılış mərasimi Bakı Xoreoqrafiya Məktəbinin “Bakı ulduzları” rəqs ansamblının ifası ilə başlayacaq. Festivalın ikinci günündə musiqisevərlərə Azərbaycan milli musiqisinin qərb caz sənətinin incə və ritmik çalarları ilə ahəngli sintezindən ibarət konsert təqdim olunacaq. Konsertdə gənc bəstəkar Etibar Əsədlinin bəstələri və onun aranjemanında xalq mahnıları səsləndiriləcək. Festival çərçivəsində “Dədə Qorqud” dastanının motivləri əsasında musiqi gecəsi keçiriləcək.  

YARAT Müasir İncəsənət Mərkəzində rəqs-tamaşa nümayiş olunacaq

Sentyabrın 22-23-də YARAT Müasir İncəsənət Məkanında “Su kimi ol” (Be Like Water) adlı rəqs-tamaşa nümayiş olunacaq. Azərtac xəbər verir ki, Norveçin “Kari Hoas Productions” qrupunun repertuarında təqdim olunacaq müasir rəqs-tamaşanın xronometrajı 60 dəqiqədir. Tamaşada xoreoqrafiya, konsepsiya və quruluş Kari Hoasa, prodüser işi isə Annika Ostvalda məxsusdur. Rəqs-tamaşada Ottavio Ferrante, Tais Hvidt, Asne Storli, Gerd Kaisa Vorren və Yonas Örkner iştirak edəcək. Xoreoqraf Kari Hoas, beş fərqli rəqqasın çıxış etdiyi yeni səhnə əsərində xoreoqrafik strukturların “emosional riyaziyyatı” kontekstində ekstremal və təbii cismaniliyin araşdırılması missiyasını davam etdirir. İqlim dəyişikliklərinin təsirindən törəyən Apokalipsis vahiməsinin fonunda ərsəyə gətirdiyi bu tamaşada, o, bütün canlılar üçün həyati əhəmiyyətli element olan Su ünsürünü araşdırmaq məqsədilə, poetik və impressionist təmayülləri seçib.xeber100.com  

XXI Beynəlxalq Teatr Festivalı keçirilir

Brestdə MDB-nin 25 illiyinə həsr edilmiş “Belaya Veja” XXI Beynəlxalq Teatr Festivalı (BTF) keçirilir. Bu barədə Azərtac-a Birliyin Minskdəki qərargahının mətbuat xidmətindən məlumat verilib. Bu ənənəvi festival MDB-nin mədəni həyatında əlamətdar hadisədir. Yaxın və uzaq xarici ölkələrdən olan yaradıcı kollektivlər burada ən yüksək teatr ustalığı nümayiş etdirirlər. Ekspert Şurası peşəkar seçim yolu ilə geniş repertuar formalaşdırır. Festivalda dünyanın 17 ölkəsindən – Azərbaycan, Belarus, Böyük Britaniya, Almaniya, Gürcüstan, Qazaxıstan, Qırğızıstan, Latviya, Moldova, Polşa, Rusiya, Ukrayna, Fransa, Çexiya və başqa ölkələrdən dramatik, meydan, musiqili və plastik teatrlar iştirak edir. Budəfəki festivalda 26 teatr kollektivi 26 tamaşa göstərəcək. Forumun proqramında müxtəlif janrlar: forma teatrı, qotik triller oyunu, dram, həqiqətə oxşamayan rəvayət, məktəb kvesti, fantasmaqoriya, rok-opera, müzikl və komediya janrları təmsil olunub. “Belaya Veja” BTF tamaşaçılarının diqqətinə monotamaşalar, küçə tamaşaları və xoreoqrafik səhnələr də təqdim olunacaq.xeber100.com  

“Retro Bakı” layihəsi davam edir

Bakı Şəhər Mədəniyyət və Turizm Baş İdarəsinin “Retro Bakı” layihəsi Qurban bayramı ərəfəsində yenidən zəngin konsert proqramı ilə Bakı sakinlərinin və qonaqlarının görüşünə gələcək. İdarədən Azərtac-a bildirilib ki, mədəni tədbirlərin təşkili və yaradıcı gənclərlə iş üzrə mərkəzin təşkilatçılığı ilə keçirilən növbəti konsertlər sentyabrın 10-u və 11-də saat 18:00-da Fəvvarələr Meydanında baş tutacaq. Bu həftə “Retro Bakı”da tanınmış müğənnilər Zaur Əmiraslanov, Samirə Allahverdiyeva, Nurlan Əzizbəyli, Rüfət Xəlil, Mircabbar Cabbarov, Orxan Babazadə və “Gilavar” qrupu çıxış edəcəklər.xeber100.com

Mədəniyyət və Turizm Nazirliyinin təşkilatçılığı ilə…

Moskvada açılan 29-cu Beynəlxalq Kitab Sərgi-Yarmarkasında Mədəniyyət və Turizm Nazirliyinin təşkilatçılığı ilə Azərbaycan stendi təqdim edilib. Sərgidə dünyanın 37 ölkəsindən 500-dən çox iştirakçı təmsil olunur. Rusiya Dövlət Dumasının sədri Sergey Narışkin sərginin açılış mərasimində çıxış edərək bildirib ki, sərgi-yarmarkada ənənəvi olaraq müəllif və oxucuların, əsl peşəkarların görüşləri keçirilir və bu görüşlərin sayəsində yeni, maraqlı ədəbi layihələr yaranır. Azərbaycanın Rusiyadakı səfiri Polad Bülbüloğlu Azərbaycan stendini ziyarət edib, burada təqdim olunan nəşrlərlə tanış olub.xeber100.com

VIII Beynəlxalq Musiqi Festivalının proqramı açıqlanıb

Qeyd etdiyimiz kimi sentyabrın 18-dən 27-dək Bakıda Üzeyir Hacıbəyliyə həsr olunmuş VIII Beynəlxalq Musiqi Festivalının keçirilməsi planlaşdırılır.  Mədəniyyət və Turizm Nazirliyinin məlumatına görə, on gün ərzində M. Maqomayev adına Azərbaycan Dövlət Filarmoniyasında, kamera və orqan musiqisi zalında, Azərbaycan Dövlət Akademik Opera və Balet Teatrında, Azərbaycan Bəstəkarlar İttifaqında, Bakı Musiqi Akademiyasında və digər konsert salonlarında Rusiya, ABŞ, İsrail, Almaniya, Türkiyə, Gürcüstandan tanınmış musiqiçilər və kollektivlər – “Orfeon” xoru, Gürcüstan kamera xoru, Piter Laul, Ü.Mahmudbəyli, K.Moskoviç, R.İsmayılova, Haqai Şaham, Elnarə Kərimova və başqaları iştirak edəcəklər. Festival çərçivəsində F.Əmirov adına Azərbaycan Dövlət Mahnı və Rəqs Ansamblının 80 illiyinə həsr olunmuş yubiley tədbiri, Muzey Mərkəzində “Azərbaycan bəstəkarları və musiqişünasların elektron kataloqu”nun təqdimat mərasimi keçiriləcək.xeber100.com

“Azərbaycan teatrı 2009-2019-cu illərdə”…

Noyabrın 6-dan 10-dək Mədəniyyət və Turizm Nazirliyinin təşkilatçılığı ilə IV Bakı Beynəlxalq Teatr Konfransı keçiriləcək. Konfrans “Azərbaycan teatrı 2009-2019-cu illərdə” Dövlət Proqramının icrası və “Multikulturalizm ili” çərçivəsində təşkil olunacaq. Konfransın əsas mövzusu “Multikulturalizm və teatr” olacaq. Tədbir çərçivəsində beynəlxalq ekspertlər tərəfindən ustad dərsləri və treninqlərin keçirilməsi də nəzərdə tutulur. Konfransda 40-dan çox ölkədən 150-dək teatr mütəxəssisi iştirak edəcək. Azərtac xəbər verir ki, bu məlumatı mədəniyyət və turizm nazirinin müavini Ədalət Vəliyev beynəlxalq konfransa hazırlıqla bağlı keçirilən toplantıda bildirib. Nazir müavini deyib: “Dünyanın məşhur teatr, incəsənət xadimləri – rejissorlar, aktyorlar, dramaturqlar, kossenaristlər, bir neçə ölkənin teatr xadimləri ittifaqlarının, beynəlxalq teatr festivallarının, teatrla bağlı tanınmış qurumların, eləcə də müxtəlif ölkələrin teatr rəhbərləri tədbirdə iştirak üçün təşkilat komitəsinə müraciət ediblər. Müzakirə olunacaq mövzular, treninqlərdə dinləniləcək məruzələr, ümumilikdə konfransın gündəliyində yer alan məsələlər teatr bilicilərinin canlı ünsiyyətini təmin etməklə yanaşı, uğurlu nəticəyə, qarşılıqlı yeni əlaqələrin qurulmasına zəmin yaradacaq”. Ədalət Vəliyev IV Bakı Beynəlxalq Teatr Konfransının yüksək səviyyədə təşkil olunması üçün bir sıra tapşırıqlar da verib. Həmçinin, tədbirin açılış və bağlanış mərasimlərinin təşkili, tərcüməçilərlə təminat, könüllülərin iştirakı, müxtəlif mədəni tədbirlərin keçirilməsi və konfransın mətbuatda geniş işıqlandırılması üçün görülməli olan işləri diqqətə çatdırıb.xeber100.com