“Medicon” şirkətinin təşkilatçılığı ilə…

Dekabrın 3-də Bakıda “Medicon” şirkətinin təşkilatçılığı ilə Türkiyədən dəvət olunmuş həkimlər tərəfindən burun-qulaq-boğaz, stomatologiya və pediatriya üzrə ikigünlük seminar keçiriləcək. “Medicon” şirkətinin mətbuat xidmətindən Azərtac-a bildirilib ki, öz sahəsində sözünü demiş türkiyəli mütəxəssislərin təcrübəsindən yararlanmaq üçün seminara regionlardan həkimlərimizin qatılacağı gözlənilir. Seminarda Azərbaycan və Türkiyənin tibb sahəsində tanınmış ekspertləri fikir mübadiləsi aparacaq, öz təcrübələrini bölüşəcəklər. Tədbirin sonunda iştirakçılar sertifikatla təltif olunacaqlar.xeber100.com

“Psixoloji yardım haqqında” qanun layihəsi müzakirə olunub

Milli Məclisin Səhiyyə komitəsinin oktyabrın 26-da keçirilən iclasında “Psixoloji yardım haqqında” qanun layihəsi birinci oxunuşda müzakirəyə çıxarılıb. Azərtac xəbər verir ki, 7 fəsil 23 maddədən ibarət olan qanun layihəsində psixoloji yardımla bağlı qaydalar, tələblər, şərtlər və bundan irəli gələn məsuliyyət növləri əksini tapıb.xeber100.com

Ümumdünya Sağlamlıq Günü ilə əlaqədar…

Dünya Səhiyyə Təşkilatı depressiya ilə mübarizə ilinin başlandığını elan edib. DST-nin saytı xəbər verir ki, 2017-ci ildə Ümumdünya Sağlamlıq Günü ilə əlaqədar keçiriləcək kampaniya depressiya mövzusuna həsr olunacaq. Kampaniyanın əsas məqsədi depressiya, onun səbəbləri və fəsadları, xəstəliklə mübarizə metodları barədə əhalinin məlumatlılığını artırmaqdır. Mütəxəssislər əsas mövzular üzrə artıq materiallar hazırlayıblar. Materiallarda, həm də istiqamətverici informasiya blokları mövcuddur. Məhz bu informasiyalar əsasında ilk növbədə xəstələrin doğmaları və yaxınları onlara yardım göstərə biləcək, lazım gələrsə, həkimə müraciət edəcəklər. Bütün ölkələrdə müxtəlif kateqoriyalarda və yaşda olan insanlar depressiyadan əziyyət çəkirlər. Depressiya psixi əzab verir, hətta ən adi gündəlik vəzifələri yerinə yetirmək üçün insan qabiliyyətinə mənfi təsir göstərir, dostlar və yaxınlarla münasibətləri korlayır. Bu gün depressiya 15-29 yaşlı insanlar arasında intihara daha çox səbəb olur.xeber100.com

Səhiyyə Nazirliyinin təşəbbüsü ilə…

Oktyabrın 21-də Bakıda ikinci Türkiyə-Azərbaycan onkologiya günləri öz işinə başlayıb. Azərtac xəbər verir ki, Türkiyə Tibbi Onkologiya Dərnəyinin və Azərbaycan Səhiyyə Nazirliyi Milli Onkologiya Mərkəzinin (MOM) təşəbbüsü ilə keçirilən konqresdə onkoloji xəstəliklərin diaqnostikası və müalicəsinin ən aktual problemləri, habelə müasir onkologiyanın qarşısında duran vəzifələr müzakirə edilir. Gün ərzində, eləcə də oktyabrın 22-də “Xəstə müzakirələri”, “Mədə xərçəngi”, “Limfoma”, “Ağciyər xərçəngi”, “Süd vəzi xərçəngi”, “Kolerektal xərçəng” mövzularında sessiyalar keçiriləcək, müzakirələr aparılacaq.xeber100.com

Səhiyyə Nazirliyi xəbərdarlıq edir

Səhiyyə Nazirliyinin Analitik Ekspertiza Mərkəzi dərman vasitəsi idxalçıları və xarici istehsalçı müəssisələrin rəsmi nümayəndəliklərinə xəbərdarlıq edib. Xəbərdarlıqda bildirilir ki, Azərbaycan Respublikası Nazirlər Kabinetinin 2007-ci il 13 iyul tarixli qərarı ilə təsdiqlənmiş “Dərman vasitələrinin dövlət qeydiyyatına alınması və reyestrinin aparılması” Qaydalarına əsasən, dərman vasitəsinin qeydiyyat vəsiqəsi 5 il müddətinə qüvvədə qalır. Farmakopeya qaydalarına əsasən, steril dərman vasitələrinin laborator sınağı 15 gün ərzində həyata keçirilir. Həftənin şənbə və bazar günləri Mərkəzin iş günü olmaması, bəzi hallarda istirahət, bayram və digər qeyri-iş günlərinin həftəiçi günlərə təsadüf etməsi nəticəsində dərman vasitəsinin sənədlərinin ekspertizası və nümunələrinin laborator sınaqlarının aparılmasına qədər qeydiyyat vəsiqəsinin qüvvədəolma müddətinin bitməsi hallarına rast gəlinir. Bununla əlaqədar olaraq dərman vasitəsinin qeydiyyat vəsiqəsinin qüvvədəolma müddətinin bitməsinə 30 təqvim günündən az qaldığı təqdirdə ölkəyə idxal olunması məqsədəmüvafiq hesab edilmir.xeber100.com

Səhiyyə Nazirliyinin məlumatına əsasən…

Gələn il noyabrın 1-dən etibarən Səhiyyə Nazirliyi İctimai Səhiyyə və İslahatlar Mərkəzinin (İSİM) ambulator şöbəsinin nəzdində əhali üçün tütündən imtina üzrə tibbi məsləhət kabineti açılacaq və xüsusi “Qaynar xətt” fəaliyyətə başlayacaq. Nazirliyin mətbuat xidmətindən Azərtac-a bildirilib ki, burada tütündən asılılığı olan və ondan imtina etmək istəyən şəxslər professional tibbi yardım və psixoloji məsləhətlər alacaqlar. Layihə “Azərbaycan Respublikasında qeyri-infeksion xəstəliklərlə mübarizəyə dair 2015-2020-ci illər üçün Strategiya”nın müvafiq tələblərinə uyğun olaraq həyata keçiriləcək. İSİM-in nümayəndələri oktyabr ayında Moskvada keçiriləcək “Tütündən istifadənin dayandırılmasına yardım göstərilməsi problemləri” mövzusunda seminarda iştirak edəcəklər. Məqsəd tütündən imtina ilə bağlı beynəlxalq təcrübəni İSİM-də açılacaq kabinetin fəaliyyətində tətbiq etməkdir. Xatırladaq ki, Azərbaycan Respublikası hələ 2005-ci ildə “Tütünlə mübarizə haqqında” Dünya Səhiyyə Təşkilatının Çərçivə Konvensiyasını ratifikasiya edib. Konvensiyanın 14-cü maddəsinə əsasən, hər bir ölkə tütündən istifadənin dayandırılmasına və tütündən asılılığın adekvat müalicəsinin təmin edilməsinə kömək üçün səmərəli tədbirlər görməli, habelə tibbi-sanitariya yardımı müəssisələrində və reabilitasiya mərkəzlərində tütündən asılılığın diaqnostikası, profilaktikası, müalicəsi və məsləhətlərin verilməsi üzrə proqramlar hazırlamalı və həyata keçirməlidir.xeber100.com

Səhiyyə Nazirliyinin göstərişi ilə…

Səhiyyə Nazirliyinin göstərişi ilə Əziz Əliyev adına Azərbaycan Dövlət Həkimləri Təkmilləşdirmə İnstitutunun ailə təbabəti kafedrası oktyabrın 17-dən başlayaraq icbari tibbi sığortanın tətbiqi ilə bağlı yerli mütəxəssislər üçün üçhəftəlik səyyar kurslar keçirəcək. İnstitutdan Azərtac-a bildirilib ki, kurslara bütün kafedralardan əməkdaşlar cəlb olunacaqlar. Proqrama uyğun olaraq onlar Yevlax rayonunda və Mingəçevir şəhərində mühazirələr oxuyacaq, praktiki məşğələlər aparacaqlar. İmtahandan müvəffəqiyyətlə keçmiş dinləyicilərə müvafiq sertifikatlar veriləcək. Qeyd edək ki, Azərbaycanda icbari tibbi sığortanın tətbiqinə hazırlıq işləri gedir. Artıq tələb olunan bütün qanunvericilik aktları qəbul edilib. Nazirlər Kabineti yanında İcbari Tibbi Sığorta üzrə Dövlət Agentliyi aparılan araşdırmalar və əlaqədar dövlət qurumları ilə müzakirələr nəticəsində Mingəçevir şəhərini və Yevlax rayonunu icbari tibbi sığortanın tətbiqi üçün pilot ərazilər olaraq seçib. Pilot layihənin tətbiqində məqsəd əhalini və tibb müəssisələrini icbari tibbi sığorta sisteminə keçidə hazırlamaq, tibbi xidmətin maliyyələşməsində yeni mexanizmlərin tətbiqini sınaqdan keçirməkdir.xeber100.com

Dünya Səhiyyə Təşkilatının təşəbbüsü ilə…

Dünya Səhiyyə Təşkilatının (DST) təşəbbüsü ilə oktyabr ayının ikinci cümə axşamı hər il Dünya Görmə Günü (World Sight Day) kimi qeyd edilir. Həmin gün təqvimə korluq, görmənin pozulması və reabilitasiyası problemlərinə diqqəti cəlb etmək üçün salınıb. Dünya Görmə Gününün qeyd olunmasında müxtəlif əlaqədar təşkilatlar iştirak edirlər. Bu gün, həmçinin DST və korluğun qarşısının alınması üzrə Beynəlxalq Agentlik tərəfindən yaradılmış “2020-ci ildən baxanda: görə bilmək hüququ” qlobal təşəbbüsünün əsas hadisəsidir. Qeyd edək ki, Dünya Görmə Günü çərçivəsində göz xəstəliklərinin qarşısının alınmasına yönəldilmiş maarifləndirmə və profilaktika tədbirləri davam edir.xeber100.com

“Azərbaycan elmi-2030: yol xəritəsi”…

Azərbaycan Tibb Universitetinin (ATU) Tədris Cərrahiyyə Klinikasında AMEA Tibb üzrə Əlaqələndirmə Şurası və Səhiyyə Nazirliyi Elmi Şurasının birgə toplantısı keçirilib. ATU-dan Azərtac-a bildirilib ki, toplantıda “Azərbaycan elmi-2030: yol xəritəsi”, elektron səhiyyə üzrə işçi qrupunun yaradılması, elmi hesabatların forması, elmi tədqiqatların qeydiyyatı ilə bağlı məsələlər müzakirə olunub. Tədbiri açıq elan edən AMEA-nın müxbir üzvü, professor Nuru Bayramov gündəlikdə olan məsələlər haqqında məlumat verib. Artıq Azərbaycanın dünyaya inteqrasiya etmiş bir ölkə olduğunu diqqətə çatdıran N.Bayramov bildirib: “Bu günlərdə Elmlər Akademiyasında, Prezident Administrasiyasında belə bir qərar qəbul olunub ki, 2030-cu ilədək dövrdə Azərbaycan elminin əsas prioritetləri və istiqamətlərini müəyyən edək. Bütün elm sahələri üzrə, o cümlədən də tibb elmi üzrə elmi strategiyanı hazırlayıb təqdim etməliyik. Daha sonra bu strategiya Akademiyada və Nazirlər Kabinetində müzakirə olunduqdan sonra Prezident Administrasiyasında təsdiq olunacaq və 2030-cu ilə qədərki strategiyamız bunun üzərində qurulacaq".xeber100.com  

Tibb Universitetinin məlumatına görə…

Azərbaycan Tibb Universitetinin (ATU) klinikalarına bu il qəbul olunmuş rezidentlərlə görüş keçirilib. Universitetin mətbuat xidmətindən Azərtac-a bildirilib ki, tədbirdə rezidentura təhsilinin təşkili qaydaları haqqında ətraflı məlumat verilib. ATU-nun rezidentura şöbəsinin müdiri, dosent Rizvan Məmmədov bildirib ki, rezidentlər artıq gələcəyin yüksəkixtisaslı həkimləridir. Onlar üzərlərinə düşən öhdəlikləri layiqincə yerinə yetirməlidirlər. Çünki bu klinikalarda lazımi şərait müasir standartlara uyğun qurulub və rezidentlərin həm nəzəri, həm də praktiki vərdişlərə yiyələnmələri üçün hər cür imkan yaradılıb. Xarici ölkələrdə keçirilən elmi konfranslarda hansı rezidentlərin iştirak edəcəyinə gəlincə, R.Məmmədov deyib ki, əsasən elmi biliklərin mənimsənilməsində daim fəallıq göstərən və xəstələrlə mütəmadi təmasda olan rezidentlər bu kimi konfranslarda iştirak edə biləcəklər.xeber100.com