Alimlərin araşdırmasına görə…

Oksford Universitetinin (Böyük Britaniya) alimləri aşkar ediblər ki, insan beyni amputasiya edilmiş əl və barmaqların müfəssəl təsvirini onilliklər boyu qoruyub saxlayır. Mütəxəssislər əmindirlər ki, bu kəşf gələcək nəsil protezlərinin hazırlanmasına kömək edəcək. “rns.online” saytı xəbər verir ki, tədqiqatın nəticələri “eLife” jurnalında dərc edilib. Tədqiqatçılar kompyuterli tomoqrafiya vasitəsilə iki pasiyentin beyin fəallığını tədqiq ediblər. Eksperiment iştirakçılarından biri 25 il əvvəl, digəri isə 30 ildən artıq əlləri amputasiya edilmiş insanlar olub. Alimlərin sözlərinə görə, onların hər ikisində güclü fantom hisslər olub. Nəzarət qrupuna hər iki əli olan 11 solaxay daxil edilib. Tədqiqat zamanı iştirakçılar sol əlin hər barmağını ayrılıqda tərpətməli idilər. Tədqiqatın müəllifi Tamar Makin yazır: “Biz aşkar etdik ki, əlləri amputasiya olunmuş insanlarda sol əllə bağlı beyin fəallığı azalıb. Bununla belə müəyyən əl formasına uyğun bəzi cizgilər nəzarət qrupundakı insanların müvafiq cizgiləri ilə üst-üstə düşüb”. Alimlərin fikrincə, tədqiqatın nəticələrini çoxfunksiyalı protezlərin hazırlanması prosesinə tətbiq etmək olar.xeber100.com

“Check-up” müayinələrinə başlanılacaq

Respublika Diaqnostika Mərkəzi tərəfindən “ASAN xidmət” mərkəzlərində “Check-up” müayinələrinə başlanılacaq. Mərkəzdən Azərtac-a bildirilib ki, cəmi 6 dəqiqəyə 27 (aclıq) və 23 (toxluq) meyarı üzrə müayinədən keçən hər bir vətəndaşın sağlamlıq nəticələri dərhal SMS şəklində onun telefonuna göndəriləcək. “Check-up” müayinələrinin gələcəkdə daha geniş miqyasda tətbiqi nəzərdə tutulur.xeber100.com

Səhiyyə Nazirliyi press-tur təşkil edib

regionlarda fəaliyyət göstərən tibb müəssisələrində şəraitlə tanış olmaq və real vəziyyətlə bağlı əhalini məlumatlandırmaq məqsədilə avqustun 26-27-də Kürdəmir, Ağsu və Şamaxı rayonlarına press-tur təşkil edib. Azərtac xəbər verir ki, media işçiləri rayonların mərkəzi xəstəxanalarında olublar. Burada jurnalistlər xəstəxanalarda mövcud vəziyyət, xəstələrin qəbulu, müayinə və müalicəsi, ayrı-ayrı şöbələrdə yaradılan şərait, müasir tibbi avadanlıqlarla təchizat və sair barədə ətraflı məlumatlandırılıblar.xeber100.com

Dünya Səhiyyə Təşkilatından İtaliyaya dəstək

BMT-nin baş katibi cümə axşamı İtaliya Prezidenti Sergio Mattarellaya telefonla zəng edərək ölkənin mərkəzi hissəsində baş verən zəlzələ nəticəsində insanların həlak olması ilə əlaqədar dərin hüznlə başsağlığı verib. BMT-nin saytında xəbər verilir ki, Pan Gi Mun səmərəli və operativ tədbirlər sayəsində zəlzələdən zərər çəkən yüzlərlə insanın həyatını xilas etdiyinə görə İtaliya hökumətinə minnətdarlığını bildirib. BMT-nin başçısı əlavə yardım ayırmağa hazır olduğunu da deyib. Son məlumatlara görə, zəlzələ nəticəsində 247 nəfər ölüb. Yüzlərlə insan xəsarət alıb. Bir çox rayonlarda elektrik xətləri zədələnib, binalar, o cümlədən xəstəxanalar dağılıb. Dünya Səhiyyə Təşkilatının (DST) mütəxəssisləri vəziyyəti diqqətlə izləyirlər. “Biz də çox narahatıq ki, tibb müəssisələri ciddi xəsarət alıb. Yaranmış vəziyyətdə çox vacibdir ki, xəstəxanalar normal rejimdə işləməyə davam etsinlər. Biz lazımi kömək göstərməyə hazırıq”, - deyə DST-nin regional direktoru Jujanna Yakab bildirib.xeber100.com

Milli Allergiya və Yoluxucu Xəstəliklər İnstitutunun məlumatına əsasən…

“healthvesti.com” saytı xəbər verir ki, tanınmış alimlər yaxın iki ildə də Zika virusunun ABŞ əhalisinin həyatında təhlükə yaradacağını bildirib. Bu, bir neçə laboratoriya sınağı və təcrübəsinin həyata keçirilməsindən sonra mütəxəssislərin gəldiyi nəticədir. Həkimlərin sözlərinə görə, ABŞ-ın cənub ştatlarının sakinləri arasında Zika xəstəliyinin yayılması riski yüksəkdir. Bu barədə məlumatı Milli Allergiya və Yoluxucu Xəstəliklər İnstitutunun (NIAID) direktoru Entoni Fauçi verib. Hazırda aparıcı alimlərlə əməkdaşlıq edən hakimiyyət orqanları infeksiyanın daha geniş yayılmasının qarşısını almaq üçün bütün vasitələri işə salıblar. Tədqiqatçılar virusun potensial daşıyıcısı ola biləcək ağcaqanadların sayına nəzarət edirlər. Xəstəliyə yoluxma halları Texas, Florida, Alabama, Luiziana və Missisipi ştatlarında qeydə alınıb.xeber100.com

Sağlamlığa dair müzakirələr aparılıb

Azərbaycanda Reproduktiv Sağlamlıq Strategiyasının hazırlanmasına dair milli işçi qrupun görüşü keçirilib. Səhiyyə Nazirliyinin mətbuat xidmətindən Azərtac-a bildirilib ki, görüşdə yerli mütəxəssislərlə yanaşı, Litvadan dəvət olunmuş beynəlxalq ekspertlər Gunta Lazdane və Ruta Nadisaukiene, eləcə də Dünya Bankının aparıcı əməkdaşları iştirak ediblər. Tədbirdə Reproduktiv Sağlamlığa dair Milli Strategiya çərçivəsində (2008-2015-ci illər üçün) həyata keçirilən tədbirlər, alınan nəticələr müzakirə olunub. Eyni zamanda, nəticələrə əsasən növbəti 2017-2025-ci illər üçün qarşıda duran vəzifələrdən danışılıb. Milli işçi qrupun təkrar toplantısı sentyabr ayında nəzərdə tutulub. Reproduktiv Sağlamlığa dair Milli Strategiyanın əsas istiqamətləri ana və uşaq sağlamlığı, cinsi yolla yayılan infeksiyalar, yeniyetmələrin reproduktiv sağlamlığı, gender zorakılığı və cinsi istismardır. Bu istiqamətlər ətrafında hazırlanacaq fəaliyyət planı növbəti görüşlərdə tərtib olunacaq.xeber100.com

Böyük Britaniya alimlərinin araşdırmasına əsasən…

Alimlər sutkanın hansı vaxtında insan orqanizminin viruslara meyilli olmasını öyrəniblər. Kembric Universitetinin (Böyük Britaniya) mütəxəssisləri müəyyən ediblər ki, ziyanverici viruslar sutkanın digər vaxtları ilə müqayisədə səhər daha fəaldır və orqanizmə ziyan vurmağa qadirdir. “informing.ru” saytı xəbər verir ki, britaniyalı alimlər eksperiment apararaq sutkanın müxtəlif vaxtlarında laboratoriya siçanlarını qrip və herpes virusları ilə yoluxdurub və nəticəni müşahidə ediblər. Məlum olub ki, səhər saatlarında heyvanlar infeksiyanın təsirinə daha davamsız olublar – sutkanın bu vaxtında viruslar 10 dəfə çox fəal olub. İmmun sistemi onlara lazımi müqavimət göstərə bilməyib. Alimlər müəyyən ediblər ki, insanın bioloji saatı yuxu rejiminin tənzimlənməsi və oyaq qalmasından əlavə, immun sisteminə də ciddi təsir göstərir. Alimlər bildirirlər ki, bioloji saatın pozulması immuniteti təkcə səhər saatlarında zəiflədə bilməz. Yəni, növbəli işləyən və ya müxtəlif səbəblərdən saat qurşaqlarını tez-tez dəyişən insanlar üzrə aparılan tədqiqatın nəticələrinə də xüsusi diqqət yetirmək lazımdır.xeber100.com

Tibb mütəxəssisləri arasında təcrübə mübadiləsi keçirilir

Oklahoma Milli Qvardiyasının hərbi tibb mütəxəssislərindən ibarət nümayəndə heyəti tərəfindən Azərbaycan Respublikası Müdafiə Nazirliyinin hərbi tibb üzrə mütəxəssisləri ilə informasiya mübadiləsi aparmaq və təcrübələrini bölüşmək məqsədilə seminar keçirilir. Müdafiə Nazirliyinin mətbuat xidmətindən Azərtac-a bildiriblər ki, seminarda ABŞ və Azərbaycanın hərbi tibb mütəxəssisləri arasında hərbi tibb dəstəyinin göstərilməsi üzrə təlimlərin təşkilində metodologiyalar, tibbi kəşfiyyat, ilkin yardımın göstərildiyi məntəqələr, əməliyyatlar zonasının tibbi hava təxliyə sistemi, tibbi personal və avadanlıq ilə bağlı Cenevrə Konvensiyalarının tələbləri və tərəfləri maraqlandıran digər mövzularda müzakirələr aparılacaq.xeber100.com

“Dərman vasitələrinin Azərbaycan Respublikasına idxalına rəy verilməsi Qaydaları”…

Gələcəkdə dərman vasitələrinin saxlanıldığı yerlərdə xüsusi ötürücü qurğuların quraşdırılması nəzərdə tutulur. Həmin qurğular sayəsində dərman vasitələrinin saxlanıldığı yerin temperaturu və dərmanların keyfiyyətinə təsir edən digər amillər barədə məlumatlar Səhiyyə Nazirliyinin Analitik Ekspertiza Mərkəzinə ötürüləcək. Beləliklə, dərmanların keyfiyyətinə nəzarət edilməsi daha operativ şəkildə həyata keçiriləcək. Bundan başqa, dərman vasitələrinin ölkəyə idxalı zamanı laborator analiz üçün nümunələrin götürülməsi və Səhiyyə Nazirliyi tərəfindən rəy verilməsi prosedurunu tənzimləyən “Dərman vasitələrinin Azərbaycan Respublikasına idxalına rəy verilməsi Qaydaları”nın layihəsi hazırlanır. Bu barədə Azərtac-a Səhiyyə Nazirliyinin mətbuat xidmətindən məlumat verilib. Məlumatda bildirilir ki, Analitik Ekspertiza Mərkəzinin dərmanların keyfiyyətinin yoxlanılması laboratoriyasının əməkdaşları mütəmadi olaraq bilik və bacarıqlarının artırılması, yeni üsulların mənimsənilməsi məqsədilə xarici ölkələrdə keçirilən təlim və seminarlarda iştirak edirlər. Eyni zamanda, laboratoriya daxilində illik plana uyğun olaraq təlimlər keçirilir, nəticəsi imtahanla yoxlanılır. Laboratoriya QİÇS, vərəm və malyariya ilə mübarizə üzrə Qlobal Fond, həmçinin Ədliyyə Nazirliyinin Penitensiar Xidməti ilə sıx əməkdaşlıq edərək ölkəmizə idxal olunan antiretrovirus və vərəm əleyhinə preparatların keyfiyyətini yoxlayır. Laboratoriyanın maddi-texniki bazasının daha da yaxşılaşdırılması məqsədilə Səhiyyə Nazirliyinin dəstəyi ilə yeni avadanlıqlar sifariş verilib. Laboratoriya daxilində dövrü olaraq lazımi təmir işləri görülür. Mikrobioloji laboratoriyanın genişləndirilməsi və şəraitinin daha da yaxşılaşdırılması üçün hazırda müvafiq şirkətlərlə danışıqlar aparılır. Bununla yanaşı, laboratoriyanın yaxın gələcək üçün əsas məqsədlərindən biri Dünya Səhiyyə Təşkilatının tövsiyə etdiyi prekvalifikasiya olunmuş laboratoriyaların sihayısına düşməkdir. Dərman vasitələrinin idxalı zamanı sənədlərdə aşkar olunan çatışmazlıqlar barədə idxalçı müəssisələrin məsul şəxsləri məlumatlandırılır. Dərman vasitələrinin istifadə təlimatında aşkar edilmiş çoxsaylı nöqsanlarla bağlı iyun ayında 60-a yaxın idxalçı müəssisənin nümayəndələri ilə birlikdə geniş tərkibdə görüş keçirilib, qarşılıqlı fikir mübadiləsi aparılıb. Həmçinin idxal olunan dərman vasitələrinin saxlanılmasına dair 40-a yaxın topdansatış əczaçılıq subyektinin nümayəndəsi ilə daha bir görüş keçirilib. Dərman vasitələrinin saxlanıldığı yerlərlə bağlı aşkar olunan nöqsanlar diqqətə çatdırılıb və aradan qaldırılmayacağı təqdirdə müvafiq tədbirlərin görüləcəyi barədə müəssisələrə xəbərdarlıq edilib.xeber100.com  

8 avqust – Beynəlxalq Oftalmoloqlar Günüdür

Bütün dünyada 2004-cü ildən etibarən avqustun 8-i Beynəlxalq Oftalmoloqlar Günü kimi qeyd olunur. Bu gündə diqqət oftalmologiyanın problemlərinə, əhali arasında görmə problemlərinin aradan qaldırılması istiqamətində qabaqlayıcı tədbirlərin görülməsinə yönəldilir. Müasir oftalmoloji diaqnostika üsulları göz xəstəliklərini erkən mərhələlərdə aşkar etməyə, effektli müalicə və profilaktika aparmağa imkan verir. Respublika Diaqnostika Mərkəzinin oftalmologiya şöbəsi peşəkar idarəetmə və yüksək ixtisaslı tibb personalı ilə müasir və qabaqcıl texnologiyalardan istifadə etməklə pasiyentlərə ən yüksək səviyyədə tibbi xidmət göstərir. Mərkəzdən Azərtac-a bildirilib ki, uzunmüddətli daxili təlimdən keçən, beynəlxalq təhsilə və böyük iş təcrübəsinə malik olan tibbi heyət öz işində yüksək keyfiyyətli tibbi yardımı layiqli xidmət səviyyəsi ilə uyğunlaşdırmağa hazırdır. Peşəkar həkim-oftalmoloqlar ən müasir avadanlıqların köməyi ilə görmənin vəziyyətini qiymətləndirir, göz xəstəliklərinin diaqnostikasını aparır, görmə orqanının xüsusiyyətlərini araşdırdıqdan sonra görməni saxlamağa kömək edən müalicə təyin edirlər. Mərkəzdə, həmçinin kataraktanın qarşısını alan, qlaukoma zamanı gözün funksional vəziyyətini bərpa edən və torlu qişa qopmaları zamanı itirilmiş görməni qaytaran lazer texnologiyalarının köməyi ilə müalicə aparılır.xeber100.com