Almaniya hökuməti Ankaraya iki həftə vaxt verib

Almaniya hökuməti bundestaq deputatlarının Türkiyədəki “İncirlik” Hərbi Hava Qüvvələri bazasına buraxılması məsələsi ilə əlaqədar münaqişənin nizamlanması üçün Ankaraya iki həftə vaxt verib. Bu barədə məlumat verən “Spiegel Online” onlayn-nəşri bir məqamı da dəqiqləşdirir ki, əks təqdirdə Almaniyaya məxsus yanacaqdolduran və qırıcı təyyarələrin həmin bazadan çıxarılması barədə sərəncam veriləcək.“Spiegel Online” yazır ki, federal hökumət təyyarələrin “İncirlik” bazasından çıxarılması barədə qərar qəbul etməzdən əvvəl Türkiyənin hakimiyyət orqanları ilə danışıqlar aparmaq niyyətindədir. Eyni zamanda qeyd edilir ki, Almaniya Xarici İşlər Nazirliyində, Müdafiə Nazirliyində, yaxud federal kanslerin idarəsində Türkiyə ilə danışıqların bu problemin həlli ilə nəticələnəcəyinə gətirib çıxaracağına ümid etmirlər. Aşkardır ki, Bundestaq qondarma “erməni soyqırımı”nın tanınması barədə qalmaqallı qətnamə qəbul etməklə NATO üzrə özünün müttəfiqi ilə uzunmüddətli qarşıdurma yaranacağını əvvəlcədən bilirdi.Türkiyənin “İncirlik” bazasında 260 nəfərə yaxın almaniyalı hərbçi yerləşdirilib. Onlar havadan kəşfiyyat aparmaqla və təyyarələrə əlavə yanacaq doldurmaqla “İslam dövləti” qruplaşmasının Suriya və İraqdakı bazalarına havadan zərbələri dəstəkləyirlər.xeber100.com

“Emirates” aviakompaniyası uçuşları dayandıracağını bəyan edib

Mərkəzi Dubayda yerləşən “Emirates” aviakompaniyası iyunun 6-dan Qətərə uçuşları dayandıracağını bəyan edib.TASS informasiya agentliyi xəbər verir ki, Dubaydan Dohaya son reys yerli vaxtla saat 2:30-da, əks tərəfə isə 3:50-də yola düşəcək.“Emirates”in reyslərinə bilet alan sərnişinlərə alternativ variantlar təklif ediləcək”, - deyə aviakompaniyadan bildiriblər.Bir qədər əvvəl Səudiyyə Ərəbistanı, Misir və Bəhreynin ardından Birləşmiş Ərəb Əmirliyi də “terrora dəstək verdiyinə görə” Qətərlə diplomatik əlaqələrini kəsdiyini, həmçinin bu ölkə ilə dəniz və quru sərhədlərini bağladığını elan edib. Daha sonra onlara Yəmən və Liviya da qoşulub. Beləliklə, Qətərlə əlaqələri kəsən ərəb ölkələrinin sayı 6-ya çatıb.Qətər isə öz növbəsində qonşularının bu addımını Dohaya təzyiq vasitəsi adlandırıb.xeber100.com

Litva Dövlət Sərhədi Mühafizə Xidmətinin məlumatı

İyunun 5-də Rusiya ilə Litvanın sərhədində qoruyucu hasar tikintisi başlayır. Litva Dövlət Sərhədini Mühafizə Xidmətindən verilən məlumata görə, bu ilin sonuna qədər sərhədin Litva tərəfində uzunluğu 44,6 kilometr olan hasar tikiləcək.Hasarın birinci sütunu Litvanın Şakyayski rayonunun Raminişkes kəndi hüdudlarında basdırılacaq. İşlərin ümumi dəyəri 1,335 milyon avro olacaq. Bu vəsait Litva büdcəsindən ayrılıb.Kalininqrad vilayəti ilə dövlət sərhədi boyunca hündürlüyü təxminən 2 metr olan metal seqmentlərdən ibarət hasar tikiləcək. Bu hasar Viştitis (Viştınets) gölünün yaxınlığında Litva, Polşa və Rusiya üçtərəfli dövlət sərhədlərinin kəsişmə nöqtəsindən başlayan sahələrdə hissə-hissə tikilməklə, Şakyayski və Vilkavişski rayonlarında Neman çayına qədər davam edəcək. 2020-ci ilə qədər Belarus ilə Litvanın sərhədində də hasar tikilməsi nəzərdə tutulur. Litvalı hüquq mühafizəçilərinin sözlərinə görə, bu hasarların tikilməsində məqsəd qaçaqmalçılığa qarşı mübarizəni gücləndirmək və qeyri-leqal miqrasiyadan qorunmaqdır.xeber100.com

Yaponiyada ən böyük oyuncaq sərgisi açılıb

İyunun 1-də Tokioda açılan Yaponiyanın ən böyük oyuncaq sərgisi davam edir.Sayca 56-cı olan bu sərgi Koto rayonunda yerləşən “Tokyo Big Sight” sərgi mərkəzində fəaliyyətə başlayıb. Bu il sərgidə 150 şirkət tərəfindən 35 min eksponat nümayiş olunur. Eksponatlar arasında ən populyar anime filmlərindən tutmuş, istifadəçilərə robotlar vasitəsilə kompyuter proqramlarını öyrənməyə kömək edən oyuncaqlara rast gəlmək olar.Sərgidə virtual texnologiyalara da geniş yer ayrılıb. İstifadəçilərə bu texnologiyalardan yararlanmaq imkanı verən oyuncaq tüfəng onlarda kosmik məkanda atəş açmaq təəssüratı yaradır.İyunun 4-də başa çatan sərginin iki günü alıcılar, qalan günləri isə həvəskarlar üçün nəzərdə tutulmuşdur.xeber100.com

TASS agentliyinin məlumatı

Meksikanın Çiuaua ştatının Kuatemok şəhərində barda baş verən atışmada 6 nəfər ölüb, 22 nəfər yaralanıb. Meksika Baş Prokurorluğun məlumatına görə, naməlum şəxs bara girərək “AK-74” avtomat silahı ilə atəş açmağa başlayıb.TASS agentliyi xəbər verir ki, qanlı hadisənin iki cinayətkar qrup arasında baş verdiyi ehtimal olunur. Lakin hadisənin kim tərəfindən və nə səbəbə törədilməsi hələlik məlum deyil.Cari ilin əvvəlindən bəri bu bölgədə 700 qəsdən adam öldürmə hadisəsi baş verib ki, bu da 2016-ci ilin müvafiq dövründəki göstəricidən xeyli çoxdur.xeber100.com

Londonda törədilən terror aktından sonra…

Avstraliya Londonda törədilən terror aktından sonra Böyük Britaniyaya yardım etməyə hazırdır. Bu barədə bəyanatla Avstraliyanın xarici işlər naziri Culi Bişop çıxış edib.Avstraliya XİN-nin bəyanatında deyilir: “Biz həmin hücumlara cavab vermək istəyən Britaniya hökumətinə yardım etməyə hazırıq. Bizim fikirlərimiz yaralananlar və onların ailə üzvləri ilə birlikdədir”.Bəyanatda qeyd edilir ki, Avstraliya hökuməti terror aktı nəticəsində həlak olan və ya yaralanan ölkə vətəndaşları barədə məlumata hələlik malik deyil.Avstraliyanın Baş naziri Malkolm Ternbull da Britaniya xalqı ilə birlikdə olduqlarını deyib: “Bizim dualarımız və qətiyyətli dəstəyimiz, həmişə olduğu kimi, bu gün də Londonda həyəcan doğuran terror hücumuna məruz qalmış Britaniya xalqı ilə birlikdədir”.xeber100.com

Müdafiə nazirləri Şimali Koreya məsələsini müzakirə ediblər

Yaponiya, ABŞ və Koreya Respublikasının müdafiə nazirləri Şimali Koreyanın nüvə və raket proqramları ilə əlaqədar əməkdaşlıq barədə razılığa gəliblər.Yaponiyanın müdafiə naziri Tomomi İnadanın ABŞ-lı həmkarı Cim Mettis və Koreya Respublikasının müdafiə idarəsinin rəhbəri Xan Min Qu ilə görüşü iyunun 3-də Sinqapurda təhlükəsizlik məsələlərinə həsr edilən ənənəvi illik konfrans çərçivəsində baş tutub.Nazirlər belə bir qənaətə gəliblər ki, Pxenyanın nüvə və raket sınaqları regionla yanaşı bütün dünyada təhlükəsizliyə ciddi təhdiddir.Bununla əlaqədar, nazirlər müdafiə məqsədilə, ballistik raketlərin yaratdığı təhlükənin aradan qaldırılması üçün təlimlərin davam etdirilməsi, qarşılıqlı informasiya mübadiləsi və birgə fəaliyyətlə bağlı digər tədbirlər barədə də razılığa gəliblər.xeber100.com

“WWDC 2017” konfransı işə başlayacaq

İyunun 5-də proqram tərtibatçıları üçün ənənəvi illik “WWDC 2017” konfransı işə başlayacaq. Ənənəyə görə, “Apple” şirkətinin “iOS”, “macOS”, “watchOS” və “tvOS” daxil olmaqla bütün əməliyyat sistemlərinin yeni versiyalarını təqdim edəcəyi gözlənilir. Həmçinin bu il konfransda yeni qurğuların nümayişi nəzərdə tutulur. ABŞ istehsalçısı “Siri” səsli köməkçi funksiyası üçün yenilənmə və “Amazon Echo” və “Google Home” kimi qurğulara bənzər “ağıllı” evin mərkəzi olacaq “ağıllı” kolonka hazırladığı barədə də məlumat yayılıb. Digər “Apple” qurğuları haqqında informasiya isə şirkətin saytının rus versiyasında yerləşdirilib.Azərtac xəbər verir ki, “Apple”ın saytında A1289, A1347, A1418, A1419 və A1481 nömrəli “macOS Sierra” sisteminin idarəetməsi ilə işləyən beş yeni kompüter modeli barədə məlumat yer alıb. Bunun yenilənmiş “MacBook Pro” (13 və 15 düymlü versiyalar), 12 düymlü “MacBook” və “MacBook Air” qurğularının olması ehtimal edilir.Bundan başqa, saytda A1843 model nömrəsi ilə yeni simsiz klaviatura haqqında informasiya qeyd edilib. Onun ötən il buraxılan “MacBook Pro” noutbuklarında olduğu kimi, “Touch Bar” sensorlu ekranla təchiz ediləcəyi gözlənilir. Saytda, həmçinin A1671, A1709, A1670 və A1701 model nömrəli dörd planşet kompüter barədə məlumatlar var. Bu isə 10,5 düymlü yeni “iPad Pro” planşetinin təqdimatı və istehsal xəttinin yenilənməsi ilə bağlı şayiələri təsdiq edir.Təqdimatların iyunun 5-i axşam saatlarında keçirilməsi planlaşdırılır.xeber100.com

Yaponiya parlamenti yeni qanun layihəsini bəyənib

İyunun 1-də Yaponiya parlamentinin komitələrindən birinin üzvləri İmperator Akihitonun taxt-tacdan imtinası ilə əlaqədar qanun layihəsini bəyənib.Ötən il İmperator Akihitonun 83 yaşı tamam olduqdan sonra o, yaşı ilə əlaqədar üzərinə düşən vəzifələrin icrası zamanı çətinlik çəkəcəyini bildirib.Qanun layihəsində qeyd edilir ki, yapon xalqı İmperatorun ifadə etdiyi arzusunu başa düşür və ona həssaslıqla yanaşır. Sənədə əsasən taxt-tacdan imtina barədə qanun qəbul edildikdən sonra üç il ərzində həyata keçirilə bilər. Qanun yalnız hazırki İmperator üçün nəzərdə tutulur.İyunun 2-də qanun layihəsinin parlamentin aşağı palatasının müzakirəsinə çıxarılacağı gözlənilir. Onun gələn həftə təsdiq olunacağı bildirilir.xeber100.com

Trans-Sakit okean Tərəfdaşlığı çərçivəsində…

Cari ilin yanvarında ABŞ-ın Trans-Sakit okean Tərəfdaşlığı (TPP) çərçivəsində azad ticarət barədə razılaşmadan çıxmasına baxmayaraq, Yaponiya onun qüvvəyə minməsi ilə bağlı işləri sürətləndirir.Baş nazir Şinzo Abe mayın 30-da Nazirlər Kabinetinin nümayəndələri ilə görüşdə üzv ölkələrin iştirakı ilə iyulda Yaponiyada keçiriləcək işgüzar görüşə hazırlığı sürətləndirməyi xahiş edib.Razılaşmanı imzalamış 11 ölkə, - ABŞ iştirak etməsə belə, - bu yaxınlarda müqavilə üzərində işi davam etdirməyin mümkün yollarını müzakirə ediblər.Ş.Abe deyib ki, qarşıdakı görüşə sədrlik edəcək Yaponiya müzakirələri sürətləndirmək vəzifəsinin öhdəsindən gəlməyə çalışmalıdır. Qarşıdakı görüşə sədrlik edəcək Baş nazir 11 ölkənin nazirlərindən sıx əməkdaşlıq şəraitində çalışmağı xahiş etmək niyyətindədir.xeber100.com