Fransada parlament seçkilərinin nəticələri elan olunub

Fransada keçirilən parlament seçkilərinin birinci turunun nəticələri rəsmən elan olunub.Bununla bağlı Daxili İşlər Nazirliyinin məlumatında səsvermədə 47 milyon seçicinin 48.7 faizinin iştirak etdiyi və bunun etimad böhranının nəticəsi olduğu qeyd olunub.Seçkilərin rəsmi nəticələrinə əsasən, “İrəli, respublika” hərəkatı 28,21 faiz, Respublikaçılar partiyası 15,77 faiz, Milli Cəbhə partiyası 13,20 faiz, Əyilməz Fransa partiyası 11,02 faiz, Sosialist partiyası 7.44 faiz, Demokratik hərəkat isə 4.11 faiz səs toplayıb.Seçicilər 51.29 faizi səsvermədə iştirak etməyib.Fransa parlament seçkilərinin ikinci turu iyunun 18-də keçiriləcək.xeber100.com

6,2 bal gücündə zəlzələ baş verib

Türkiyədə Egey dənizinin sahillərində 6,2 bal gücündə zəlzələ baş verib.Anadolu agentliyi xəbər verir ki, yeraltı təkanlar Türkiyə vaxtı ilə 15:28-də (Bakı vaxtı ilə 16:28) İzmirin Karaburun rayonunda qeydə alınıb. Zəlzələnin 6,96 kilometr dərinlikdə baş verdiyi bildirilir.NTV telekanalının yaydığı məlumata görə, bundan bir qədər sonra həmin regionda 4,9 bal gücündə ikinci zəlzələ olub. Yeraltı təkanlar İstanbul, İzmir, Çanaqqala, Manisa və Balıkesirdə də hiss edilib.Vahiməyə düşən insanlar evlərini tərk edərək küçələrə qaçıblar. Dağıntı və tələfat barədə məlumat verilmir.xeber100.com

Reuters informasiya agentliyinin məlumatı

Əfqanıstanda ABŞ Hərbi Hava Qüvvələrinin aviasiya zərbəsi nəticəsində azı 3 nəfər yerli polis əməkdaşı həyatını itirib, 2 nəfər isə yaralanıb.Reuters informasiya agentliyi xəbər verir ki, Kabil şəhərindəki ABŞ komandanlığının məlumatına əsasən, hava zərbələri Əfqanıstanın cənubundakı Hilmənd əyalətində keçirilən əməliyyat çərçivəsində endirilib.Əfqanıstan və ABŞ-ın hökumət orqanları insidentin təhqiqatına başlayıb.Xatırladaq ki, 2014-cü ildə Amerikanın hərbi kontingenti Əfqanıstanı tərk etdikdən sonra ölkənin cənub rayonlarının bir çoxu “Taliban” hərəkatının nəzarətinə keçib. Son zamanlar bəzi kənd rayonlarında üstünlüyə yiyələnən yaraqlılar böyük şəhərlər istiqamətində hücumları davam etdirir. Həmçinin regionda İŞİD qruplaşması da aktiv fəaliyyət göstərir.xeber100.com

Avropa İttifaqına vizasız rejim fəaliyyətə başlayıb

Ukrayna Prezidenti Petro Poroşenko ölkəsinin vətəndaşları üçün Avropa İttifaqı ilə vizasız rejimin fəaliyyətə başladığını təntənəli şəkildə elan edib.RİA Novosti informasiya agentliyi xəbər verir ki, Prezident bu münasibətlə Facebook səhifəsində belə yazıb: “Ukrayna üçün vizasız rejimi işləməyə başladı! Yaşasın Avropa! Yaşasın Ukrayna!”.Avropa İttifaqının qanunvericiliyinə dəyişiklik edilməsi haqqında sənəd mayın 17-də imzalanıb. Yenilik iyunun 11-nə keçın gecə qüvvəyə minir. Sənədə əsasən, Ukrayna vətəndaşları turistik, ailə və sahibkarlıq məqsədləri üçün Şengen zonasına 90 günlük müddətə sərbəst giriş imkanı əldə edirlər.xeber100.com

Fransa Daxili İşlər Nazirliyinin məlumatına əsasən…

Fransanın Daxili İşlər Nazirliyinin verdiyi məlumata əsasən, parlament seçkilərinin ilk turunda saat 12:00-dək seçicilərin 19.24 faizi səsvermədə iştirak edib.Qeyd edək ki, 2012-ci ildə bu rəqəm 21.06 faiz olub. Seçicilərin iştirakında 1.82 faiz azalma müşahidə olunub.xeber100.com

“Daily Telegraph” qəzeti yazır…

Böyük Britaniyada keçirilən parlament seçkilərində 25 ilin ən yüksək iştirak səviyyəsi qeydə alınıb – səsvermədə 32 milyondan çox seçici iştirak edib.“Daily Telegraph” qəzeti xəbər verir ki, yalnız 1992-ci ildə keçirilən seçkilərdə iştirak səviyyəsi bundan yüksək olub – 33,6 milyon nəfər. Cari seçkinin nəticəsinə əsasən, britaniyalıların 68,7 faizi səsvermədə iştirak edib. Bu, 2015-ci ildə keçirilən ümumi seçkilərdən 2 faiz çoxdur.Qeyd edək ki, Böyük Britaniyada parlament seçkiləri “Brexit” üzrə danışıqlar astanasında siyasi Londonu birləşdirmək istəyən Baş nazir Tereza Meyin təşəbbüsü ilə keçirilib.Hazırda 650 dairədən 649-da bülletenlərin hesablanması başa çatıb. Seçkinin nəticəsinə görə hələlik mühafizəkarlar 318, leyboristlər 261, liberal-demokratlar 12, Şotlandiya Milli Partiyası – 35, digər partiyalar 23 mandat qazanıb. Beləliklə, partiyaların heç biri müstəqil şəkildə kabineti formalaşdırmaq üçün lazım olan səsləri toplaya bilməyib.xeber100.com

İsveç hökuməti təhlükəsizlik xidmətlərinə yeni səlahiyyət verəcək

İsveç KİV-lərində yayılan məlumata görə, partiyalar arasında uzun-uzadı danışıqlardan sonra ölkə hökuməti yeni antiterror qanunu hazırlamağa nail olub.Əldə edilmiş razılaşmaya görə, daxili işlər naziri Anders İqemanın başçılıq etdiyi Sosial-Demokrat Partiyası və müxalifət bloku yeni fəaliyyət planı hazırlayıb. Bu planın müəyyən bəndləri terror təhdidlərinin dəf olunmasında Krallığa kömək etməlidir.Jurnalistlər qeyd edirlər ki, yeni qanunvericilik çərçivəsində polisə və təhlükəsizlik xidmətlərinə daha artıq səlahiyyət verilməsi nəzərdə tutulur. Vətəndaşların təhlükəsizliyini təmin etmək məqsədilə şəhərlərdə əlavə təhlükəsizlik kameraları quraşdırılması, ictimai yerlərdə piyadaların müdafiəsi üçün maneələr yaradılması planlaşdırılır.Yeni qanunvericiliyin qüvvəyə minməsi üçün o, İsveç parlamenti tərəfindən bəyənilməlidir.Qeyd edək ki, İsveçdə hazırda qüvvədə olan Cinayət Məcəlləsində terror aktlarının təşkil olunmasında iştirak etməyə, terror təşkilatlarının maliyyələşdirilməsinə, habelə ekstremistləri dəstəkləmək məqsədi güdən digər əməllərə görə ciddi cəza tədbirləri nəzərdə tutulur.Mövcud qanunun sərtləşdirilməsi barədə qərar bu il aprelin 7-də Stokholmda baş vermiş bir hadisədən sonra qəbul edilib. Həmin gün terrorçu “İslam dövləti” təşkilatına mənsub olan bir silahlı idarə etdiyi yük maşınını qəsdən adamların üstünə sürüb, nəticədə dörd nəfər həlak olub, təxminən on beş nəfər yaralanıb.xeber100.com

BRİCS ölkələrinin media forumu keçirilir

Pekində Sinxua agentliyinin ev sahibliyi ilə BRİCS (Braziliya, Rusiya, Hindistan, Çin, Cənubu Afrika Respublikası) ölkələrinin media forumu işə başlayıb. Təşkilata üzv dövlətlərdən ümumilikdə 27 mətbuat qurumunun rəhbər şəxslərinin qatıldığı forumda media əməkdaşlığının dərinləşdirilməsi məsələləri müzakirə olunur.Forum çərçivəsində BRİCS Media Forumu rəyasət heyətinin də iclası keçirilib. İclasda Sinxuanın prezidenti Çay Mincao bəyan edib ki, rəhbərlik etdiyi agentlik BRİCS ölkələrinin mətbuat sahəsində əməkdaşlığının dərinləşdirilməsi üçün yaradılan fonda 1 milyon ABŞ dolları vəsait ayırıb.Pekində paralel olaraq BRİCS ölkələrinin birgə fotosərgisi də açılıb. Sərgidə üzv ölkələrin siyasi, iqtisadi, mədəni həyatını əks etdirən 170-dən çox foto nümayiş olunur.xeber100.com

Tasnim agentliyinin məlumatına əsasən…

Dünən Tehranda törədilmiş terror hücumları nəticəsində həlak olanların sayı 17 nəfərədək artıb.Tasnim agentliyi xəbər verir ki, ilkin olaraq 13 nəfərin öldüyü, 52 nəfərin yaralandığı barədə məlumat yayılmışdı.Xatırladaq ki, iyunun 7-də İranın paytaxtı Tehranda eyni vaxtda iki terror hücumu həyata keçirilib. İki terrorçu Ayətullah Xomeyninin türbəsinə soxulub. Onlardan biri özünü partladıb, digəri polis əməkdaşları ilə atışmada öldürülüb. Bundan əlavə, dörd nəfərlik qrup parlament binasına hücum edərək yuxarı mərtəbələrədək qalxıb. Hücum edənlərdən üçü xüsusi xidmət orqanlar tərəfindən öldürülüb, biri isə özünü partladıb.Məlumatlara görə, həmin gün polis planlaşdırılan daha bir terror hücumunun qarşısını ala bilib.xeber100.com

Böyük Britaniyada parlament seçkiləri keçirilir

Böyük Britaniyada növbədənkənar parlament seçkiləri keçirilir. Britaniyanın Baş naziri Tereza Mey və Şotlandiyanın birinci naziri Nikola Sturgeondan sonra Leyboristlər partiyasının rəhbəri Ceremi Korbin, Liberal demokratların rəhbəri Tim Farron, İngiltərə və Uelsin Yaşıl Partiyasının həmsədri Karolayn Lukas Britaniyanın müxtəlif bölgələrində səsvermədə iştirak ediblər.xeber100.com