2018-ci ildə referendum keçiriləcək

Danimarkanın muxtar bölgəsi olan Farer adalarında 2018-ci ildə yeni Konstitusiya ilə əlaqədar referendum keçiriləcək. Danimarka KİV-lərində verilən məlumata görə, yeni Konstitusiyaya əsasən, bu adaların vətəndaşları təyini-müqəddərat hüququ əldə edəcəklər.Farer adalar qrupu Atlantik okeanının şimalında Şotlandiya, Norveç və İslandiya arasında yerləşir. 1948-ci ildən etibarən bu adalara Danimarka krallığından tam muxtariyyət verilib. Əhalisinin sayı 48 min nəfər olan Farer adaları qrupu müdafiə və xarici işlərlə bağlı məsələlər istisna olmaqla bütün dövlət sahələrində öz hakimiyyətini qurmaq hüququna malikdir.Adaların Baş naziri Aksel Yohannes jurnalistlərə müsahibəsində deyib: “Farer Konstitusiyası bizim bir millət kimi identikliyimizi, əsas hüquq və vəzifələrimizi, o cümlədən təyini-müqəddərat hüququmuzu müəyyən edəcək”.xeber100.com

NHK telekanalının yaydığı məlumata görə…

Yaponiyanın qərbində Sakit okean və Yapon dənizinin sahillərinə yağan güclü qar nəqliyyatın hərəkətini iflic edib və tıxaclara səbəb olub.NHK telekanalının yaydığı məlumata görə, ölkənin cənub-qərbində yerləşən Tottori prefekturasının Yapon dənizi sahillərində qar örtüyünün hündürlüyü 91 santimetrə çatıb. Bu, normadan 10 dəfə çoxdur. Sinoptiklər yaxın günlərdə yağıntının miqdarının arta biləcəyi barədə xəbərdarlıq ediblər.Prefekturada ağacın relslərin üzərinə aşması nəticəsində elektrik qatarı bütün gecə yoluna davam edə bilməyib. Səhər ağac yoldan götürülsə də, qatar qarın çoxluğu səbəbindən 300 metr getdikdən sonra yenidən dayanmağa məcbur olub. Sərnişinlərə qaynar içki paylanıb, dəmiryol kompaniyasının administrasiyası onların təxliyəsi üçün avtobuslar hazırlayıb.Sanyin prefekturasında isə uzun tıxaclar yaranıb. Sakit okean sahillərində yerləşən Sidzuoka prefekturasında baş verən yol nəqliyyat hadisəsi nəticəsində xəsarət alan 6 nəfər xəstəxanaya yerləşdirilib.xeber100.com

BMT-Türkiyə əlaqələrinin inkişaf etdirilməsi…

Türkiyəyə səfər edən BMT-nin baş katibi Antonio Quterreş bir sıra rəsmi şəxslərlə görüşüb. Həmçinin Türkiyənin Baş naziri Binəli Yıldırım və Antonio Quterreş birgə mətbuat konfransı keçiriblər.Jurnalistlərə BMT-Türkiyə əlaqələrinin inkişaf etdirilməsi, regional proseslər, qaçqınlar problemi, Kiprə dair danışıqların nəticələri barədə məlumat verilib.xeber100.com

Associated Press agentliyinin məlumatına görə…

İndoneziyanın mərkəzi hissəsində baş verən qəfil daşqınlar ümumilikdə 40 min insana təsir edib və Bali adasında torpaq sürüşməsi 13 nəfərin ölümünə səbəb olub.Associated Press agentliyinin yerli hakimiyyət orqanlarına istinadla yaydığı məlumata görə, 5 gün ərzində davam edən leysan yağışları Sumbava adasında çayların məcrasından çıxması ilə nəticələnib.Təbii fəlakətdən zərər çəkənlərin əksəriyyəti məscidlərə və dövlət müəssisələrinə sığınıb. Su basmış iki rayonda isə 8 mindən çox sakin öz mənzillərində təcrid olunmuş vəziyyətdə qalıb. Bu rayonlarda yalnız qayıqla hərəkət etmək mümkündür.xeber100.com

Konstitusiya dəyişikliyi referendumu aprelin 16-da keçiriləcək

Türkiyə konstitusiyasında dəyişiklərlə bağlı referendum aprelin 16-na təyin olunub. Anadolu informasiya agentliyi xəbər verir ki, bu barədə qərar fevralın 11-də Türkiyə Ali Seçki Şurası tərəfindən qəbul edilib.Prezidentin səlahiyyətlərinin genişləndirilməsini nəzərdə tutan dəyişikliklər referendumda qəbul olunacağı təqdirdə, 2019-cu ildə qüvvəyə minəcək. Dəyişikliklər paketinə əsasən, millət vəkillərinin sayı 550-dən 600-dək artırılacaq, parlament üzvü seçilmək yaşı 25-dən 18-ə endiriləcək. Parlament və prezident seçkiləri beş ildən bir eyni gündə keçiriləcək.Yeni qanun Türkiyədə idarəetmə formasının dəyişdirilməsinə və prezident idarəçiliyinin tətbiqinə yönəlib.xeber100.com

Tolo News informasiya agentliyinin məlumatı

Əfqanıstanın Gilmənd vilayətində terrorçu kamikadzenin minalanmış maşını partlatması nəticəsində 11 nəfər ölüb. Tolo News informasiya agentliyi xəbər verir ki, ölkənin Laşkarqax şəhərində baş verən terror aktında 21 nəfər yaralanıb.xeber100.com

Federal Məclis yeni dövlət başçısının adını elan edəcək

Fevralın 12-də Almaniyada müstəsna olaraq prezident seçmək məqsədilə çağırılacaq Federal Məclis yeni dövlət başçısının adını elan edəcək. Böyük ehtimal ki, bu, sabiq xarici işlər naziri Frank-Valter Ştaynmayer olacaq. Onun prezidentliyə namizədliyi hakim koalisiyaya daxil olan üç partiyadan – Xristian Demokrat İttifaqı, Xristian Sosial İttifaqı və Almaniya Sosial Demokrat Partiyasından (ASDP) irəli sürülüb.Bu partiyaların liderləri vahid namizəd barədə uzun müddət razılığa gəlməyə çalışsalar da, bir nəticə əldə etməyiblər. Bir çox debatlardan sonra Angela Merkelin partiyası – Xristian Demokrat İttifaqı ASDP-nin üzvü Ştaynmayeri dəstəkləməyə razılıq verib. O, xeyli vaxtdır ki, Almaniya siyasi mühitində mühüm simadır.Ölkə əhalisinin əksəriyyəti üçün Ştaynmayer Almaniya diplomatiyasının simasıdır. Altmış yaşlı sosial-demokratın 20 ilə yaxın siyasi karyerasında tutduğu vəzifələr çox olub: federal kansler idarəsinin rəhbəri, bundestaqda ASDP lideri, Almaniyanın xarici işlər naziri... AFR-in əvvəlki prezidenti Yoaxim Qaukun yerinə Berlində Belvyu sarayında almanların yaxşı tanıdığı siyasətçi əyləşəcək.xeber100.com

Kyodo agentliyinin məlumatına görə…

Kyodo agentliyinin yaydığı məlumata görə, Yaponiyaya yağan güclü qar bir sıra yerlərdə fəsadlar törədib. Belə ki, Tottori prefekturasının Kurayoşi şəhərində yağan güclü qar nəticəsində 1300 ailə elektrik enerjisiz qalıb.Güclü qar Tottori ilə yanaşı, Okayama və Hiroşima prefekturalarında nəqliyyatın hərəkətində çətinliklər yaradıb. Qatarlar fasilələrlə hərəkət edir. Naqoya və Osaka şəhərləri arasında sürətli qatarların hərəkət sürəti zəifləyib. Vakayama prefekturasında təqribən 40 nəfər sərnişin 90 dəqiqə ərzində Koyasan dağına qalxan funikulyorda qalıb.Son sutkalar ərzində Yaponiyanın qərbinə 40 santimetrdən çox qar yağıb. Paytaxt Tokioya yağan qar havanın temperaturunun müsbət 9 dərəcə olması səbəbindən tezliklə əriyib. Yaponiya Meteorologiya Agentliyinin məlumatına əsasən, ölkə ərazisində güclü qar bazar gününədək davam edə bilər.xeber100.co

Konstitusiya dəyişikliyi haqqında qanun imzalanıb

Türkiyə Prezidenti Rəcəb Tayyib Ərdoğan ölkə konstitusiyasında dəyişikliklər paketini imzalayıb. Qanun dərc olunmaq üçün Nazirlər Kabinetinə göndərilib. Anadolu informasiya agentliyi xəbər verir ki, konstitusiya dəyişikliklərinin referendumda qəbul olunacağı təqdirdə, millət vəkillərinin sayı 550-dən 600-dək artırılacaq, parlament üzvü seçilmək yaşı 25-dən 18-ə endiriləcək. Parlament və prezident seçkiləri beş ildən bir eyni gündə keçiriləcək. Qanun ümumilikdə Türkiyədə idarəetmə formasının dəyişdirilməsini və prezident idarəçiliyinin tətbiqini nəzərdə tutur.Bir qədər əvvəl rəsmi mənbələrdən verilən məlumata görə, referendumun aprelin 16-na təyin olunması gözlənilir.xeber100.cm

Sietl Federal Məhkəməsinin qərarına görə…

San-Fransiskodakı 9-cu federal dairə apelyasiya məhkəməsi yeddi müsəlman ölkəsindən (Suriya, Sudan, Somali, İraq, İran, Liviya və Yəmən) bütün immiqrantların və müsafirlərin 90 gün ərzində ABŞ-a gəlişinə müvəqqəti qadağa qoyulması haqqında ABŞ Prezidenti Donald Trampın fərmanının qüvvədən düşməsi barədə Sietl Federal Məhkəməsinin (Vaşinqton ştatı) qərarını təsdiq edib.Xatırladaq ki, Sietl Federal Məhkəməsinin qərarına görə, yeddi müsəlman ölkəsindən gələnlərə daha əvvəl verilmiş, amma Prezident D.Trampın ölkəyə gəlməyə qadağa qoyan 27 yanvar tarixli fərmanından sonra ləğv edilən vizalar bərpa olunub, onların sahibləri ölkə ərazisinə daxil olublar və yenə gələ bilərlər.Fevralın 7-də iş üzrə dinləmələrdən sonra D.Tramp Administrasiyası Sietl Federal Məhkəməsindən apelyasiya şikayəti verib. Bir çox ştatların federal hakimləri, o cümlədən Sietlin hakimi Ceyms Robart vurğulayıblar ki, bu ölkələrdən ABŞ-a gəlməyə qadağa qoyulması təkcə ayrı-ayrı vətəndaşlara deyil, həm də biznesə və universitetlərə ziyan vurub. Onlar D.Trampın müsəlmanların ABŞ-a gəlməsinə qadağa qoyulması barədə seçkiqabağı vədindən danışarkən bildiriblər ki, dini xurafata əsaslanan qadağa Konstitusiyaya ziddir.xeber100.com