Anadolu Agentliyinin məlumatı

Türkiyə əhalisinin sayı açıqlanıb.Anadolu Agentliyi xəbər verir ki, əvvəlki illə müqayisədə 2016-cı ildə əhalinin sayı 1 milyon 73 min 818 nəfər artaraq 79 milyon 814 min 871 nəfərə çatıb.Məlumatda qeyd edilir ki, ölkə əhalisinin 50.2 faizini kişilər, 49.2 faizini isə qadınlar təşkil edir.xeber100.com

“Brexit” barədə qanun layihəsinin müzakirəsi başlayıb

Bu gün Britaniya parlamentinin icmalar palatasında hökumət tərəfindən irəli sürülən “Brexit” prosedurunun işə salınması barədə qanun layihəsinin müzakirəsinə başlanacaq. Interfax informasiya agentliyi xəbər verir ki, bu məsələ barədə müzakirə prosesi və final səsverməsi fevralın 8-də başa çatmalıdır. İcmalar palatasında proses yekunlaşdıqdan sonra “Brexit” planları lordlar palatasının müzakirəsinə çıxarılacaq.Xatırladaq ki, bir qədər əvvəl Böyük Britaniyanın Ali Məhkəməsi ölkənin Baş naziri Tereza Meyə parlamentin təsdiqi olmadan Avropa İttifaqından çıxmaq prosesini başlamağa icazə verməyib.xeber100.com

TASS informasiya agentliyinin məlumatına görə…

ABŞ Ədliyyə Nazirliyi məhkəmədə Prezident Donald Trampın miqrasiya siyasətini sərtləşdirən qərarını müdafiə edəcək. TASS informasiya agentliyinə istinadla xəbər verir ki, bu barədə ədliyyə nazirinin vəzifələrini icra edən Salli Yeyts istefaya göndərildikdən sonra qurumun müvəqqəti başçısı təyin olunan Dana Boente məlumat verib.Trampın miqrasiya siyasətini sərtləşdirən qərarının hüquqazidd olduğunu və onu məhkəmədə müdafiə etməyəcəyini bildirən Salli Yeyts vəzifədən kənarlaşdırılıb. 62 yaşlı Dana Boente bu posta Tramp tərəfindən irəli sürülən Ceff Seşnsın təyinatı Senat tərəfindən təsdiq olunana qədər baş prokurorun və ədliyyə nazirinin vəzifələrini icra edəcək.Qeyd edək ki, son günlər ABŞ Prezidenti miqrasiya siyasətini sərtləşdirən bir neçə fərman imzalayıb. Bundan sonra qaçqınların qəbulu 120 gün müddətinə dayandırılıb, Suriya qaçqınlarının yerləşdirilməsi qeyri-müəyyən vaxta qədər qadağan edilib və ölkəyə bəzi giriş qaydaları sərtləşdirilib. Tramp imzalanma mərasimində bundan sonra ölkəni “xarici terrorçulardan” qorumaq üçün qaçqınların seçiminin “ekstremal” olacağını da qeyd edib.xeber100.com

Mərakeş yenidən Afrika İttifaqına üzv qəbul edilib

Afrika İttifaqının hazırda Efiopiyanın paytaxtı Əddis-Əbəbədə keçirilən 28-ci Sammitində Mərakeşin bu təşkilatda üzvlüyünün bərpası ilə bağlı müraciətə baxılıb. Əlcəzair və CAR kimi ölkələrin bunun əleyhinə olmasına baxmayaraq, 54 üzv dövlətdən 39-nun dəstəyi ilə Mərakeş Krallığı yenidən Afrika İttifaqına üzv qəbul edilib.Mərakeş bu təşkilatdan 33 il əvvəl, tanınmamış Saxara Ərəb Demokratik Respublikasının üzvlüyə qəbul edilməsinə etiraz olaraq çıxmışdı. Ötən il isə Mərakeş kralı VI Məhəmməd təşkilata məktub ünvanlayaraq ölkəsinin yenidən İttifaqa üzv qəbul edilməsini istəyib.xeber100.com

2017-ci ildə keçiriləcək prezident seçkilərində…

Fransada solçu partiyaları 2017-ci ildə keçiriləcək prezident seçkilərində təmsil edəcək namizədin müəyyənləşdirilməsi üçün keçirilən seçkilərin ikinci turunun nəticələri açıqlanıb. 7530 seçki bürosunda baş tutan səsvermədə 1 milyon 306 min 852 seçici səs verib.Səsvermənin nəticələrinə görə, Benua Hamon səslərin 58.65 faizini toplayaraq 2017-ci ildə keçiriləcək prezident seçkilərinə namizəd olub.Sabiq Baş nazir Emmanüel Vals 41.35 faiz səslə məğlub olub.xeber100.com

“Volkswagen” avtomobil satışı üzrə liderlik edir

Alman avtomobil nəhəngi “Volkswagen” yapon rəqibi “Toyota”nı qabaqlayaraq, ilk dəfə dünyanın ən çox avtomobil satan şirkəti olub. Anadolu agentliyi xəbər verir ki, son dörd ildir “ən çox satılan marka” adını əlində saxlayan “Toyota” 2016-cı ildə dünya miqyasında 10 milyon 175 min avtomobil satıb. “Volkswagen” isə həmin müddətdə 10 milyon 310 min avtomobil sataraq bu göstərici üzrə önə çıxıb.“Audi”, “Porşe” və “Şkoda” markalarının da istehsalçısı olan “Volkswagen” Çinə satışların həcmini 3,8 faiz artırıb.xeber100.com  

Miqrasiya siyasətinə qarşı nümayiş keçirilib

Vaşinqtonda ABŞ prezidenti Donald Trampın miqrasiya siyasətinə qarşı nümayiş keçirilib.TASS agentliyi bildirir ki, Ağ Evin qarşısında toplaşan minlərlə insan sığınacaq axtaranlarla həmrəylik nümayiş etdiriblər.Aksiya iştirakçıları Trampın miqrasiya ilə bağlı son fərmanlarının qəbuledilməz olduğunu bildiriblər.Qeyd edək ki, D. Tramp İraq, İran, Suriya, Sudan, Yəmən, Liviya və Somali vətəndaşlarının 90 gün ərzində ABŞ-a daxil olmasının qadağan edilməsi barədə fərman imzalayıb. Bundan əlavə, o, qaçqınların ABŞ-da yerləşdirilməsi barədə proqramı 120 gün müddətində dayandırıb.xeber100.com

Rusiya mətbuatının məlumatına görə…

Rusiya və ABŞ prezidentləri Vladimir Putin və Donald Tramp arasında telefon danışığı olub.Rusiya mətbuatının “Röyter” agentliyinə istinadən yaydığı məlumata görə telefon danışığı 45 dəqiqə davam edib.Telefon danışığı zamanı ABŞ Prezidentinin kabinetində vitse-prezident Mayk Pens, Ağ ev aparatının rəhbəri Rays Pribs, prezidentin milli təhlükəsizlik və strateji məsələlər üzrə müşaviri Stiven Bennon da olublar.Qeyd edək ki, bu, Trampın inauqurasiyasından sonra Rusiya və ABŞ liderləri arasında ilk telefon danışığıdır.xeber100.com

İran Xarici İşlər Nazirliyinin məlumatına əsasən…

Rəsmi Tehran ABŞ prezidenti Donald Trampın İran və digər müsəlman ölkələrinin vətəndaşlarının ölkəyə girişinə qadağa qoyulmasına dair qərarına eyni tədbirlərlə cavab verəcək.Bu barədə İran Xarici İşlər Nazirliyinin dünən yaydığı bəyanatda bildirilir.Bəyanatda deyilir ki, hökumət böyük İran xalqını daxildə və ölkə hüdudlarından kənarda qorumaq məqsədilə Amerika hökumətinin qısamüddətli və ortamüddətli qərarlarını diqqətlə təhlil etdikdən sonra konsulluq, hüquqi və siyasi səviyyələrdə müvafiq addımlar atacaq. Bu məhdudiyyətlər ləğv olunanadək hökumət vətəndaşların hüquqlarını qorumaq üçün tədbirlər görəcək.Qeyd olunub ki, İran hökuməti Amerika xalqına hörmət edir və onu ABŞ administrasiyasının aqressiv siyasətindən ayırır. ABŞ administrasiyasının bu addımı bütün İslam dünyası üçün açıq təhqirdir.xeber100.com

Təbii qaz ixracı rekord həcmə çatıb

Rusiyanın enerji nəhəngi “Gazprom” şirkətinin xarici ölkələrə gündəlik təbii qaz ixracı yenidən maksimum həcmə çatıb.Azərtac “Gazprom”a istinadla xəbər verir ki, şirkətin təbii qaz ixracı gündəlik 635 milyon kubmetrə çatıb. “Gazprom” tərəfindən yanvarın 26-da ixrac edilən 635 milyon kubmetr qaz şirkətin tarixində ən yüksək gündəlik ixrac göstəricisi olub.Açıqlamada “Mavi axın”, “Şimal axını”, “Yamal-Avropa” boru kəmərlərinin tam gücü ilə işlədiyi və şirkət tərəfindən Avropaya təbii qaz ixracının bu il də artmaqda davam etdiyi bildirilir.“Gazprom”un idarə heyətinin sədri Aleksey Miller ötən günlərdə açıqlamasında Avropanın keçənilki ümumi təbii qaz idxalının 34 faizinin şirkət tərəfindən təmin olunduğunu bildirib.