TASS informasiya agentliyinin məlumatına əsasən…

Rusiya Federasiyasının Prezidenti Vladimir Putin Sergey İvanovu Prezident Administrasiyasının rəhbəri vəzifəsindən azad edib. TASS-ın Kremlin mətbuat xidmətinə istinadla yaydığı məlumata görə, bu vəzifəyə Anton Vayno təyin olunub. Sergey İvanov isə Rusiya Prezidentinin təbiəti mühafizə, ekologiya və nəqliyyat üzrə xüsusi nümayəndəsi təyin edilib.xeber100.com

Riqa-815

Bu gün Riqa şəhərinin əsasının qoyulmasının 815 ili tamam olur. Riqanın əsasının qoyulduğu tarix 1201-ci ildən hesablanır. Lakin arxeoloji məlumatlara görə, hələ XII əsrin birinci yarısında burada insan məskənləri mövcud olub. Şəhərin adı, linqvistlərin əksəriyyətinin fikrincə, “Rīng” sözündən götürülüb ki, bu da “çayın döngəsi” mənasını verir. Şəhərin əsasını qoymuş şəxsin kimliyi barədə elmi mübahisələr aparılır. Üç yepiskopun – Bertold, Meynxard və Albert fon Appeldernin adları çəkilir. Bunlardan sonuncusunun Riqa şəhərinin əsasını qoyduğu rəsmən qəbul edilib. Bu, Dauqava sahillərinə hərbi dəstə və Livoniyanın fəth edilməsi barədə papa bullası ilə gələn yepiskop olub.xeber100.com

Kibercinayətkarlıqla mübarizə üzrə xüsusi idarə açılıb

Avstraliya hökuməti kibercinayətkarlıqla mübarizə üzrə xüsusi idarə açıb. “banks.eu” saytı xəbər verir ki, idarə terrorizmin maliyyələşdirilməsinə, pulların yuyulmasına və onlayn-ödənişlərdə dələduzluğa qarşı mübarizə aparacaq. İdarə, həmçinin işə qəbul zamanı qanunsuz sxemi aradan qaldırmaq üçün Avstraliya və Yeni Zelandiyanın şəxsiyyətin identifikasiyası üzrə “iDcare” xidməti ilə əməkdaşlıq edəcək. İdarədən bildirirlər ki, ən azı 197 nəfər belə sxemin qurbanı olub, 41 nəfər pulların yuyulması üzrə qanunsuz sxemə sövq edilib. Apreldən iyunadək 112 milyon kiberhücum hadisəsi qeydə alınıb.xeber100.com

Parlament seçkilərinə həsr edilmiş layihəyə start verilib

Belarus Teleqraf Agentliyi (BELTA) öz saytında Belarusda parlament seçkilərinə həsr edilmiş xüsusi layihəyə start verib. BELTA agentliyi xəbər verir ki, xüsusi layihə bir neçə bölmədən ibarətdir. Həmin bölmələrdə rəsmi sənədlər və seçki kampaniyasının gedişinə aid xəbərlər, seçkilər və respublika referendumları keçirilməsi üzrə Belarus Mərkəzi Komissiyasının məlumatları dərc edilir. Layihənin multimedia hissəsini infoqrafika, foto- və videomateriallar tamamlayır. “Testlər” bölməsində istifadəçilər seçki prosesinin incəlikləri barədə biliklərini yoxlaya bilərlər. Deputatlığa namizədlər qeydiyyata alınandan sonra onların seçki dairələri üzrə siyahıları dərc ediləcək. Seçkilər günündə seçicilərin səsvermə məntəqələrinə gəlmələri barədə məlumatların və digər operativ informasiyanın saytda yerləşdirilməsi planlaşdırılır. Mərkəzi Seçki Komissiyası seçkilərin yekunlarını elan edəndən sonra seçilmiş deputatların siyahısı dərc ediləcək.xeber100.com

Yeni tikililər bazarında qiymət artımı qeydə alınıb

Cari ilin birinci yarımilliyində Moskva şəhərinin biznes və premium-klass yeni tikililər bazarında təklifin həcmi müvafiq olaraq 1,1 milyon kvadratmetr və 195 min 800 kvadratmetr təşkil edib. Azərtac xəbər verir ki, bu barədə “Colliers International” şirkətinin hesabatında məlumat verilir. Beynəlxalq konsaltinq şirkətinin mütəxəssisləri keçən ilə nisbətən bazara yeni layihələrin çıxarılması templərinin azalmasını qeyd edir. Bu isə fəal tələb fonunda bazarda təklifin artma templərinin azalması ilə nəticələnib. Yüksək alıcılıq qabiliyyəti sayəsində bu ilin birinci yarımilliyində kiçik qiymət artımı müşahidə olunub. Bu ilin ikinci rübündə istismara verilən obyektlərin sahəsi 111,8 min kvadratmetr metr təşkil edib ki, bu da birinci rübün göstəricilərindən iki dəfə yüksəkdir. Amma 2015-ci ilin ikinci rübünə nisbətən dinamika 16 faiz aşağıdır. Tələb baxımından ikinci rübdə bazarda vəziyyət birinci rübə nisbətən daha pozitivdir. İcarə edilən və alınan ofis sahələrinin həcmi rüb ərazində 50 faiz artaraq 243 min kvadratmetr təşkil edib.xeber100.com

BELTA agentliyinin məlumatına görə…

Belarusda keçirilən seçki kampaniyasına irad yoxdur. BELTA agentliyinin məlumatına görə, MDB-dən olan müşahidəçilər missiyasının qərargah rəhbəri Yevgeni Sloboda bu fikri avqustun 10-da Belarus Ali Məhkəməsinin sədrinin birinci müavini Valeri Kalinkoviç ilə görüşdə söyləyib. Y.Sloboda qeyd edib ki, Birlikdən olan müşahidəçilərin məqsədi seçki prosesini hərtərəfli qiymətləndirmək və missiyanın akkreditə edilmiş üzvləri tərəfindən seçkilərin monitorinqinin nəticələri barədə obyektiv rəy hazırlamaqdır. O qeyd edib ki, aparılan müşahidələrə əsasən indiyə qədər keçirilən seçki kampaniyasına irad yoxdur. Bütün proseslər açıq və aşkar keçirilir, müşahidəçilərin iştirakı və bütün iştirakçılara bərabər şərait yaradılması təmin edilir.xeber100.com  

ABŞ çətin seçim qarşısında?!

Türkiyə Prezidenti Rəcəb Tayyib Ərdoğan ABŞ-ın hakimiyyət orqanlarına təklif edib ki, kimi dəstəkləyəcəyini müəyyən etsin. R.T.Ərdoğan avqustun 10-da Ankarada Prezident Sarayı qarşısında qanuni hakimiyyətin tərəfdarlarının mitinqində çıxışında deyib: “Birləşmiş Ştatlar gec-tez seçim etməli olacaq: ya Türkiyə, ya Gülən, ya su-qəsdçi terrorçular, ya da demokratik ölkə Türkiyə”.xeber100.com

“Haaretz” qəzeti yazır…

İsveçrənin Lozanna şəhərində keçirilən məhkəmədə İsrailin “Trans-Asya Petrol Ltd.” şirkətinə İran Milli Neft Şirkətinə 1,2 milyard dollar təzminat ödəmək cəzası verilib. Bu barədə “Haaretz” qəzeti yazır. İsveçrə məhkəməsi İrana qarşı sanksiyaların ləğv edilməsinin İsrailin bu ölkəyə olan əvvəlki borcunun geri qaytarılmasına bir maneə olmadığına qərar verib. İsrail şirkəti İrana olan borcunu gecikdirmə əvəzi kimi əlavə 200 min dollar da ödəyəcək.xeber100.com

“Berlin açıqlaması”…

Almaniyanın ən böyük nəşr şirkətlərindən olan “Redaksiyalar şəbəkəsi”nin məlumatına görə, XristianDemokratik İttifaqı / Xristian Sosialist İttifaqı Koalisiyası son zamanlar baş verən terror hücumlarının qarşısını almaq məqsədilə bəzi qanunların sərtləşdirilməsini nəzərdə tutan paket hazırlayıb. Paketə polislərinin sayının artırılması, çarşabın qadağan olunması, məscidlərə edilən maddi yardımların izlənilməsi, ikili vətəndaşlığının ləğv olunması daxildir. Sənədə əsasən 2020-ci ilə kimi Almaniyada polislərin sayının 15 min artırılması, polislərin uzun lüləli silahlar və bədən kameraları ilə təmin olunmaları  nəzərdə tutulur. Paketin gələn həftə “Berlin açıqlaması” adı altında son versiyasının hazırlanması gözlənilir.xeber100.com  

NATO Türkiyəyə güvənir?!

“Türkiyənin NATO-ya üzvlüyü müzakirə mövzusu deyil”. Apa-nın məlumatına görə, bu barədə NATO sözçüsünün Türkiyədəki çevriliş cəhdi ilə bağlı təşkilatın mövqeyi barədə rəylərə dair açıqlamasında deyilir. Bildirilir ki, NATO Türkiyənin davamlı töhfələrinə güvənir, Türkiyə də NATO-nun həmrəyliyinə və dəstəyinə güvənə bilər: “Türkiyə NATO-nun ortaq səylərinə töhfə verən dəyərli müttəfiqdir. Bizim alyans kollektiv müdafiə prinsiplərinə sadiqdir və demokratiya, şəxsi azadlıq, insan haqları, qanunun aliliyi prinsipləri üzərində qurulub. NATO baş katibi Yens Stoltenberq Türkiyədə çevrilişə cəhdlə bağlı Tükiyə xarici işlə naziri Mövlud Çavuşoğlu və prezident Rəcəb Tayyib Ərdoğanla danışıb, çevriliş cəhdini sərt şəkildə pisləyərək Türkiyənin demokratiya institutlarına tam dəstəyini vurğulayıb. O, Türkiyənin seçilmiş hökumətinə dəstəyini və Türkiyə xalqının cəsarətinə hörmətini ifadə edib”.xeber100.com