Vyetnam Sosialist Respublikasında Xalq şuralarına seçkilər keçirilir

Vyetnam Sosialist Respublikasında Milli Assambleyaya və yerli qanunverici orqan funksiyasını oynayan Xalq şuralarına seçkilər keçirilir.Azərtac yerli mediaya istinadla xəbər verir ki, səhər saat 7-də başlayan səsvermə prosesi ölkə üzrə təxminən 80 min məntəqə üzrə təşkil olunub. Ölkədə 69 milyon seçicinin səsvermədə iştirak hüququ var.Vyetnamın 500 yerlik parlamentinə deputat seçilmək üçün 866 nəfərin namizədliyi irəli sürülüb. Vilayətlərin Xalq şuralarına 3726, rayonların Xalq şuralarına 22 min 953, daha aşağı yaşayış məntəqələrinin Xalq şuralarına isə 242 min 312 nəfər üzv seçilməlidir.Mayın 22-də bəzi yaşayış məntəqələrində erkən səsvermə təşkil olunub.Vyetnamda qanunverici orqanlara 5 ildən bir keçirilən seçki bu il COVID-19 pandemiyası ilə əlaqədar epidemiya əleyhinə sərt qaydalara uyğun təşkil olunur. Dövlət Seçki Komissiyası seçicilərdən məntəqə seçki komissiyalarında olarkən maska taxmağı, sosial məsafəni qorumağı xahiş edib. Xəstəxanalarda, izolyasiya yerlərində və karantin tətbiq olunan yaşayış məntəqələrindəki seçicilərin səsvermədə iştirakını təmin etmək üçün səyyar qruplar fəaliyyət göstərir.Yerli vaxtla saat 19:00-da başa çatacaq səsvermənin nəticələri 20 gün ərzində açıqlanacaq.xeber100.com

Prezident seçkilərində namizədlərin qeydiyyatı mayın 11-də başlayacaq

İyunun 18-də İranda keçiriləcək prezident seçkilərində namizəd kimi iştirak etmək istəyənlərin qeydiyyatı mayın 11-də başlayacaq və dörd gün davam edəcək.Azərtac xəbər verir ki, bu barədə Daxili İşlər Nazirliyi yanındakı seçki qərargahı açıqlama verib. Bildirilib ki, əhalisi 2 milyondan çox olan şəhərlərin merləri və vilayət rəhbərləri, Azadi və Qum universitetlərinin rektorları, silahlı qüvvələrin ali rütbəli şəxsləri, qeyri-hökumət təşkilatlarının rəhbərləri, Milli Təhlükəsizlik Şurasının üzvləri namizəd kimi seçkilərdə iştirak edə bilərlər. Prezident seçkiləri haqqında qanuna edilən dəyişikliyə əsasən namizədliyini irəli sürənlərin yaşları 40-dan aşağı 75-dən yuxarı olmamalıdır.Qeydiyyatdan keçən namizədlərin adları mayın 26-da ictimaiyyətə açıqlanacaq. Mayın 28-də isə seçkiqabağı təbliğat kampaniyası başlayacaq və iyunun 16-dək davam edəcək.Qeyd edək ki, iyunun 18-də prezident seçkiləri ilə yanaşı, şəhər və kənd bələdiyyə şuralarına da seçkilər keçiriləcək.xeber100.com

“Baker Hughes” şirkətinin məlumatı əsasında…

ABŞ-dakı aktiv neft-qaz qazma qurğularının sayı artıb.Azərtac xəbər verir ki, bu barədə “Baker Hughes” şirkəti məlumat yayıb. Bildirilir ki, ötən hesabat həftəsində ABŞ-dakı aktiv neft və qaz qazma qurğularının sayı 8 ədəd artaraq 448 olub. Keçən ilin eyni dövrü ilə müqayisədə ölkədəki aktiv qazma qurğularının sayı 74 ədəd artıb.Ötən həftə ABŞ-dakı aktiv neft qazma qurğularının sayı 2 ədəd çoxalaraq 344 olub. Əvvəlki ilin müvafiq dövrünə görə neft qazma qurğularının sayında 52 ədəd artım qeydə alınıb.Aktiv qaz qazma qurğularının sayı isə 7 ədəd artaraq 103 olub və keçən ilin eyni dövrünə nisbətən ölkədəki qazma qurğularının sayı 23 ədəd artıb. Müxtəlif təyinatlı qazma qurğularının sayı 1-dir.Qeyd edək ki, ABŞ-da aktiv neft qazma qurğularının sayı 1981-ci ildə ölkə tarixində maksimuma, yəni 4 min 530-a çatıb. Neftin qiymətinin ucuzlaşması fonunda ölkədəki aktiv neft qazma qurğularının sayı 2020-ci ilin avqustunda isə minimuma – 244-ə düşüb.xeber100.com

Yaponiya hökuməti fövqəladə vəziyyət rejiminin müddətini uzada bilər

Yaponiya hökuməti koronavirus pandemiyasına görə Tokio, Osaka, Kioto və Hyoqo prefekturalarında aprelin 25-dən tətbiq olunan fövqəladə vəziyyət rejiminin müddətini uzada bilər.Azərtac xəbər verir ki, bu barədə mayın 5-də “Sankei” qəzeti hökumətdəki mənbələrə istinadla məlumat yayıb. Bildirilir ki, Baş nazir Yoşihide Suqanın bu barədə qərarı həmin gün mütəxəssislərlə məsləhətləşmələrdən sonra qəbul edəcəyi gözlənilir.Xatırladaq ki, Yaponiya hökuməti ölkənin bir sıra regionlarında fövqəladə vəziyyət rejimini ilk dəfə yanvarın 7-də tətbiq edib. Bu vəziyyət paytaxt Tokioda və qonşuluqda yerləşən Kanaqava, Saytama və Çiba prefekturalarında martın 22-dək davam edib. Lakin fövqəladə rejimin aradan qaldırılmasından dərhal sonra koronavirusa yeni yoluxma hallarının sayı sürətlə artıb. Bundan sonra koronavirusun yayılmasının qarşısını almaq məqsədilə hökumət bir sıra regionlarda daha iki dəfə fövqəladə vəziyyət rejimi tətbiq edib. Son olaraq Tokio, Osaka, Kioto və Hyoqo prefekturalarında elan edilən fövqəladə rejimin mayın 11-də başa çatması nəzərdə tutulurdu.xeber100.com

2020-ci ildə müdafiəyə ayrılan xərclər 2 trilyon ABŞ dollarına bərabər olub

2020-ci ildə dünya üzrə müdafiəyə ayrılan xərclər təqribən 2 trilyon ABŞ dollarına bərabər olub.Azərtac Stokholm Sülh Problemlərinin Tədqiqatı İnstitutunun (SIPRI) mətbuat üçün yaydığı məlumata istinadla xəbər verir ki, 2020-ci ildə dünya üzrə hərbi xərclər 2019-cu illə müqayisədə 2,6 faiz artaraq, 1981 milyard ABŞ dollarına bərabər olub.2020-ci ildə ən iri müdafiə büdcəsinə malik ölkələrin beşliyinə ABŞ, Çin, Hindistan, Rusiya və Böyük Britaniya daxildir ki, dünya üzrə məcmu hərbi xərclərin 62 faizi onların payına düşür.Tədqiqatçıların qeyd etdiyi kimi, hərbi xərclərin 2,6 faiz artması ÜDM-in dünya üzrə əsasən COVID-19 pandemiyasının iqtisadi fəsadları ilə bağlı 4,4 faiz azaldığı ildə baş verib. İqtisadiyyatın zəifləməsi nəticəsində hərbi xərclərin dünya üzrə orta göstəricisi 2019-cu ildə ÜDM-in 2,2 faizi ilə müqayisədə 2020-ci ildə ÜDM-in 2,4 faizinə çatıb. Bu, 2009-cu böhran ilindən bəri illik hesablamada hərbi xərclərin ən yüksək artımıdır.Bununla belə, pandemiya bu sahədən də yan keçməyib və 2020-ci ildə bir sıra ölkələr müdafiə xərclərinin bir hissəsini koronavirusa qarşı mübarizəyə yönləndirməli olublar. Cənubi Koreya, Braziliya, Rusiya və Çili müdafiə sahəsinə əvvəlcədən planlaşdırıldığından az vəsait xərcləyən ölkələrdəndir. SIPRI ekspertləri pandemiya şəraitində başqa ölkələrdə də bu trendin davamlı olması ehtimalını yüksək dəyərləndirirlər.Ekspertlər ümumilikdə, ABŞ-ın hərbi xərclərinin əhəmiyyətli dərəcədə artmasını qeyd edirlər. 2020-ci ildə ABŞ-ın hərbi xərcləri təqribən 778 milyard dollara çatıb, bu da 2019-cu illə müqayisədə 4,4 faiz çoxdur. İllik hesablamada 2020-ci ildə dünya üzrə hərbi xərclərin 39 faizi ABŞ-ın payına düşür. Beləliklə, ABŞ-ın hərbi xərcləri 7 illik fasiləsiz azalmadan sonra ardıcıl olaraq üçüncü ildir ki, artıb.Ardıcıl olaraq 26 ildir Çinin hərbi xərcləri artaraq, 2020-ci ildə 252 milyard ABŞ dolları təşkil edib. Bu, 2019-cu illə müqayisədə 1,9 faiz artımı ifadə edir.Hərbi xərclərin artımı NATO-ya üzv ölkələr arasında da müşahidə edilib. Praktiki olaraq, Şimali Atlantika Müqaviləsi Təşkilatının bütün üzvləri 2020-ci ildə hərbi yükün artımı ilə qarşılaşıblar. Nəticədə NATO-ya üzv 12 ölkə hərbi xərclərə öz ÜDM-lərinin 2 faizi və ya daha çox vəsait sərf ediblər.xeber100.com    

Ukrayna Prezidenti Minsk sazişi formatının islahatını və ya ləğvini dəstəkləyir

Ukrayna Prezidenti Vladimir Zelenski Donbasda münaqişənin sülh yolu ilə həll olunması üzrə Minsk sazişi formatının islahatını və ya ləğvini dəstəkləyir.Azərtac xəbər verir ki, bu barədə Vladimir Zelenski “Financial Times” qəzetinə müsahibəsində deyib.“Bizim iki variantımız var: Minsk formatını dəyişə, ya da hər hansı digər formatdan istifadə edə bilərik... Bu prosesin sürəti böyük əhəmiyyət kəsb edir”, - deyə Ukrayna Prezidenti bildirib.Nəşrin məlumatına əsasən, Vladimir Zelenski, həmçinin ABŞ, Böyük Britaniya və Kanadanı diplomatik prosesdə daha aktiv iştirak etməyə çağırıb.Qeyd edək ki, Ukraynanın Donetsk və Luqansk vilayətlərinin ərazilərində atəşkəsi nəzərdə tutan Minsk protokolu 2014-cü il sentyabrın 5-də Ukrayna, Rusiya və ATƏT nümayəndələri tərəfindən imzalanıb. 2015-ci il fevralın 11-12-də Minsk şəhərində keçirilən sammitdə imzalanmış ikinci sazişdə Normand dördlüyü ölkələri - Almaniya, Fransa, Ukrayna və Rusiya liderləri iştirak ediblər. Sonradan Minsk razılaşmaları BMT Təhlükəsizlik Şurasının xüsusi qərarı ilə təsdiqlənib.xeber100.com

İyunun 18-də İranda prezident seçkiləri keçiriləcək

Cari il iyunun 18-də İranda prezident seçkiləri keçiriləcək. Koronavirus pandemiyası ilə əlaqədar olaraq seçkilərin təxirə salınması haqqındakı söz-söhbətlər həqiqətə uğun deyil.Azərtac xəbər verir ki, bu sözləri Mərkəzi Seçki Qərargahının rəhbəri Camal Əraf deyib. O bildirib ki, İranda 70 min seçki məntəqəsi fəaliyyət göstərir, onların da əksəriyyəti açıq havada təşkil olunub. Seçki zamanı sosial məsafənin gözlənilməsinə və tibbi maskadan istifadəyə ciddi nəzarət olunacaq.Onun sözlərinə görə, hökumət və Daxili İşlər Nazirliyi prezident seçkilərinin təxirə salınması barədə plana malik deyillər. İranda prezident seçkiləri nəzərdə tutulan vaxtda keçiriləcək. Hələlik isə namizədlərin irəli sürülməsi prosesi gedir.Qeyd edək ki, namizədlər arasında İranın sabiq müdafiə naziri Hüseyn Dehqan, Tehranın keçmiş meri Məhəmməd Əli Əfşani, İranın Demokratlar Partiyasının lideri Mustafa Kevakibian, mərhum prezident Haşimi Rəfsəncaninin qızı Faizə Rəfsəncani, İranın parlament sədrinin birinci müavini əmir Hüseyn Qazizadə və digər tanınmış simaların adları var.xeber100.com

Yaponiyada fövqəladə vəziyyət rejimi elan edilib

Yaponiyanın Baş naziri Yoşihide Suqa koronavirus pandemiyasının yayılmasının qarşısını almaq məqsədilə ölkənin bir neçə prefekturasında fövqəladə vəziyyət rejimi elan edib.Azərtac xəbər verir ki, fövqəladə vəziyyət rejimi aprelin 25-dən başlayaraq Tokio, Osaka, Hyoqo və Kioto prefekturalarında qüvvəyə minəcək. Bildirilir ki, “Qızıl həftə” adlanan tətil günləri ərəfəsində elan edilən fövqəladə vəziyyət rejimi iki həftədən bir qədər çox - mayın 11-dək davam edəcək.Rejimin davam edəcəyi günlərdə spirtli içkilər satan və karaoke avadanlığına malik ictimai iaşə müəssisələrindən fəaliyyətinin dayandırılması xahiş ediləcək. Həmçinin ticarət mərkəzlərinə və univermaqlara da fəaliyyətlərini dayandırmaq tövsiyə olunacaq.Fövqəladə vəziyyət rejiminin artıq üçüncü dəfə tətbiq olunduğu bu prefekturalarda yoluxma sayının artdığı və koronavirusun daha təhlükəli şatmlarının yayıldığı bildirilir.Hökumət, həmçinin vəziyyətin gərgin olduğu Ehime prefekturasında daha ciddi tədbirlərin görülməsi barədə qərar qəbul etsə də, burada fövqəladə vəziyyət rejimi elan etməyib.xeber100.com

Özbəkistan Dövlət Statistika Komitəsinin məlumatına görə…

Aprelin 1-nə olan məlumata görə, Özbəkistanın əhalisi 34,7 milyon nəfərə çatıb.Azərtac Özbəkistan Dövlət Statistika Komitəsinə istinadla xəbər verir ki, bu ilin əvvəlindən ölkə əhalisi 136,7 min nəfər artıb. Artım bu səviyyədə qalarsa, ilin sonunadək əhalinin sayı 35 milyonu ötəcək.Məlumatda qeyd olunur ki, hazırda ölkədə 17,2 milyon qadın, 17,5 milyon kişi qeydə alınıb.Əhalinin sıxlığına görə Səmərqənd vilayəti birinci yerdədir (4 milyon), Fərqanədə 3,8 milyon, Qaşqadərya vilayətində 3,3 milyon nəfər yaşayır.xeber100.com

COVID-19 pandemiyası ilə əlaqədar yeni məhdudiyyətlər tətbiq edilir

Müqəddəs Ramazan ayında COVID-19 pandemiyası ilə əlaqədar yeni məhdudiyyətlər tətbiq edilir.Azərtac xəbər verir ki, son sutkada Misirdə yeni növ koronavirusdan 41 nəfər vəfat edib, həyatını itirənlərin ümumi sayı isə 12 min 694-ə çatıb. Ölkənin 18 vilayətində təravih namazları vaxtı əhalinin toplaşması və ibadət vaxtı məhdudlaşdırılıb. Bundan başqa, xristian kilsələrində də qarşıdakı bayramlarda ibadətlər qadağan edilib. Qibti keşişləri pasxa zamanı insanlara evlərində ibadət etməyi tövsiyə edib. Misirin səhiyyə naziri Halə Zayid əhaliyə müraciət edərək Ramazan ayı boyunca karantin qaydalarına əməl etməyə çağırıb.Tunisdə daha sərt karantin qaydaları tətbiq edilib. Belə ki, axşam saat 7-dən səhər 5-dək insanların küçəyə çıxması və avtomobillərin hərəkəti qadağan olunub. Ölkə Prezidenti Kais Said əhalini karantin qaydalarına əməl etməyə çağırıb. O əlavə edib ki, Ramazan ayında pandemiya nəticəsində minlərlə iş yeri bağlanıb və insanların ağır sosial vəziyyətini yüngülləşdirmək məqsədilə əlavə tədbirlər görüləcək. Bundan başqa, Tunisdə aprelin 30-dək məktəblərdə dərslər də dayandırılıb. Cəmi 11 milyon əhalisi olan bu ölkədə indiyədək 282 mindən çox yoluxma və 9 min 700 ölüm faktı qeydə alınıb.Silahlı münaqişə ilə çalxalanan Efiopiyada da Ramazan ayında yeni məhdudiyyətlər tətbiq edilib. İndiyədək 240 minə yaxın insanın COVID-19-a yoluxduğu və 3 min 300 nəfərin vəfat etdiyi bu ölkədə axşam saatlarında əhalinin küçəyə çıxması və məscidlərdə kütləvi namaz qılması məhdudlaşdırılıb. Bundan başqa, ölkəyə giriş-çıxış da qadağan edilib. Efiopiyanın Tiqray bölgəsində silahlı münaqişə nəticəsində Sudana sığınmış qaçqınların düşərgəsində isə vəziyyət daha ağırdır. Pandemiya ilə yanaşı, evlərindən didərgin düşmüş insanlar aclıq təhlükəsi ilə qarşılaşıblar.xeber100.com