Yaponiya hökuməti fövqəladə vəziyyəti müzakirə etməyi planlaşdırır

Yaponiya hökuməti fövqəladə vəziyyət rejiminin ləğvi məsələsini hər həftə mütəxəssislərlə müzakirə etməyi planlaşdırır.Azərtac xəbər verir ki, bu barədə Yaponiya İqtisadiyyatın Bərpa naziri Nişimura Yasutoşi məlumat verib.Həmçinin koronavirusla mübarizəyə cavabdeh olan N.Yasutoşi Yaponiyanın nəhəng işgüzar assosiasiyalarının liderləri və prefekturaların nümayəndələri ilə keçirilən telekonfrans zamanı onları insanlar arasında təmasları azaltmaq yolu ilə koronavirusun yayılmasının qarşısını almaq üçün işbirliyinə çağırıb.Nazir əlavə olaraq bildirib ki, o, mayın 14-də və 21-də fövqəladə vəziyyət rejiminin aradan qaldırılması, hər bir prefekturada iqtisadi və ictimai fəaliyyətin bərpası məqsədilə məhdudiyyətlərin yumşaldılması üçün mütəxəssislərin rəyini dinləyəcək.Bu zaman koronavirusa yoluxanların sayı, yerli səhiyyə sisteminin vəziyyəti və virus testlərinin miqdarı kimi göstəricilər əsas götürüləcək. Bu məsələlərlə əlaqədar rəqəmlərin rəsmi nümayəndələr tərəfindən təqdim ediləcəyi bildirilir.Əlavə olaraq qeyd edək ki, mayın 7-də yerli vaxtla saat 11:30-a olan son məlumatlara əsasən, Yaponiyada koronavirusa yoluxanların sayı 16 min 189 nəfər təşkil edib. Onlardan 5 min 569 nəfərin sağaldığı, 590 nəfərin isə öldüyü bildirilir. Bununla yanaşı, 312 nəfərin vəziyyətinin çox ağır olduğu vurğulanır.xeber100.com

“Türk Hava Yolları”nın uçuş planı bəlli olub

Yeni növ koronavirus (COVID-19) səbəbindən daxili reysləri mayın 20-ə, xarici reysləri isə ayın 28-dək dayandıran "Türk Hava Yolları"nın (THY) uçuşların bərpası üzrə planı bəlli olub.Azərtac xəbər verir ki, plana əsasən, aviareyslər mərhələli şəkildə iyun, iyul və avqust ayları ərzində bərpa ediləcək."Türk Hava Yolları"ndan verilən məlumata əsasən, daxili uçuşlara iyun ayında başlamaq istəyən aviaşirkət üçaylıq uçuş planına görə, iyun ayında 19 ölkə üzrə 22 istiqamətə hər həftə 75 uçuş həyata keçirəcək. Bundan əlavə, iyulda hər həftə 74 ölkəyə və 103 istiqamətə 572 uçuş, avqustda isə 98 ölkə və 160 istiqamətə həftəlik olaraq 987 uçuş yerinə yetiriləcək.xeber100.com

ABŞ senatorları fəaliyyətlərini tam bərpa ediblər

Pandemiya səbəbindən iş yerlərini tərk etmiş ABŞ senatorları infeksiyanın yayılması ilə bağlı təhlükəyə baxmayaraq, beş həftəlik fasilədən sonra bazar ertəsi günü fəaliyyətlərini tam bərpa ediblər.Azərtac Amerika KİV-lərinə istinadla xəbər verir ki, respublikaçıların nəzarətində olan Konqresin yuxarı palatasının müvəqqəti sədri Çak Qrassli iclasın başladığını elan edib.Senatorlar zalda tibbi maska və əlcəkdə, bir-birindən iki metr aralı əyləşməlidir. Onların üzərinə köməkçilərinin sayını müvəqqəti ixtisar etmək, həmçinin müntəzəm həkim müayinəsindən keçmək öhdəliyi qoyulub. Qanunvericilər çıxış etməzdən əvvəl maskalarını çıxarırlar. Ötən beş həftədə Senat təcili qaydada tam tərkibdə yalnız xəstəliyin yayılması ilə əlaqədar iqtisadi tədbirlər paketini təsdiqləmək üçün toplaşıb.Bununla yanaşı, demokratların çoxluq təşkil etdiyi Nümayəndələr palatasının qanunvericiləri işə növbəti həftə qayıdacaqlar. Konqresin aşağı palatasının spikeri Nensi Pelosi bildirib ki, bu qərar baş müalicə həkimi ilə məsləhətləşmələrdən sonra qəbul olunub.Senatın işini bu məqamda bərpa etməsi birmənalı qarşılanmayıb. Ekspertlərin narahatlığı Amerika senatorlarının orta yaşının 60-dan yuxarı olması səbəbindən qanunvericilərdən bir çoxunun infeksiyaya həssaslığı ilə bağlıdır.Pandemiyanın statistikasını aparan Cons Hopkins Universitetinin məlumatına görə, ABŞ-da indiyədək koronavirusa 1,17 milyon yoluxma və 68 mindən çox ölüm faktı qeydə alınıb.xeber100.com

Fransa hökumətinin milli planı Senat tərəfindən qəbul edilməyib

Fransa hökumətinin təcrid olma rejimindən çıxmaqla bağlı milli planı Senat tərəfindən qəbul edilməyib.Azərtac xəbər verir ki, Fransa Baş Naziri Eduard Filip bu gün hökumətin təcrid olma rejimindən çıxmaqla bağlı strategiyasını Senatda təqdim etmişdir.Baş Nazirin təqdimatından sonra debatlar zamanı senatorlar strategiyanın müfəssəl olmadığını bildiriblər.Senatda səsverməyə qoyulan strategiyanın lehinə 81 səs, əleyhinə 89 səs verilib və 174 senator isə bitərəf qalıb. Bitərəflər əsasən Respublikaçılar olub. Bununla da Milli Assambleyada qəbul olunan strategiya Senatda rədd edilib.Qeyd edək ki, hər iki palatada keçirilən səsvermələr rəmzi məna daşıyır. Onların mayın 11-də təcrid olma rejimindən çıxmağa heç bir təsiri olmayacaq.xeber100.com

Qazaxıstanda “S-295” hərbi təyyarəsi eniş etmək məcburiyyətində qalıb

Qazaxıstanda Nur-Sultan-Aktobe reysi ilə uçan “S-295” hərbi təyyarəsi təcili eniş etmək məcburiyyətində qalıb. Nur-Sultanda ön şassisi açılmayan hərbi təyyarə Almatı vilayəti Jetigen hərbi aerodromuna enib.Azərtac xəbər verir ki, uçuş-enmə zolağında təhlükəsizlik tədbirləri görülüb.Gücləndirilmiş təcili yardım maşınları və xilasedicilər hava limanına göndərilib. Təyyarənin sərnişinləri və ekipajı təxliyə olunub, təyyarənin göyərtəsində neçə nəfərin olduğu hələlik məlum deyil.xeber100.com

Yunanıstanın Krit adasının yaxınlığında zəlzələ baş verib

Yunanıstanın Krit adasının yaxınlığında, İrakliondan 127 kilometr cənubda zəlzələ baş verib.Azərtac Afina universitetinin seysmologiya laboratoriyasına istinadən xəbər verir ki, yeraltı təkanların ocağı 10 kilometr dərinlikdə qeyd olunub. Xəsarət alan və dağıntılar barədə məlumat yoxdur.

Berlində yeni aeroportun açılışı oktyabrın sonuna keçirilib

Berlində yeni aeroportun açılışı oktyabrın sonuna keçirilib.Azərtac xəbər verdiyi kimi, yeni aeroportun çoxdan gözlənilən açılışı son 9 ildə altıncı dəfə təxirə salınıb. Tikintisinə 2006-cı ildə başlanmış bu aeroportun açılışı əvvəlcə 2011-ci ilin mart ayına planlaşdırılırdı. Amma çoxsaylı ləngimələr və inşaat smetalarına yenidən baxılması üzündən, layihənin tamamlanması, demək olar ki, on il uzanıb.KİV-lərdə “milli uzunmüddətli tikinti” adlandırılan bu yeni aeroport hazırda Berlində mövcud olan “Teqel” və “Şenefeld” aeroportlarını əvəz edəcək. Ona AFR-in mərhum kansleri Villi Brandtın adı verilib.xeber100.com

Finlandiyada məktəblərin açılacağı bəyan edilib

Finlandiyanın Baş Naziri Sanna Marin mayın 14-də ölkədə məktəblərin açılacağını bəyan edib.Finlandiya KİV-ləri xəbər verir ki, hökumət başçısı məktəbə yalnız doqquzuncu sinifədək olan şagirdlərin qayıdacağını qeyd edib. Daha yuxarı sinif şagirdləri isə, yenə əvvəlki kimi təhsillərini distant formada davam etdirəcəklər.Xatırladaq ki, ölkədə COVID-19 pandemiyanın yayılmasının qarşısının alınması üzrə tədbirlər çərçivəsində Finlandiyada məktəblər martın 18-də bağlanmışdı.Sanna Marin, həmçinin qeyd edib ki, COVID-19 ilə bağlı məhdudiyyətlərin yaratdığı ümumi vəziyyəti hökumət bazar günü müzakirə edəcək.Baş Nazirin məktəblərdə dərslərin bərpa edilməsinə dair təqdim etdiyi layihə Təhsil İşçilərinin Milli Həmkarlar İttifaqı tərəfindən tənqidə məruz qalıb. Onlar bu addımın müəllimlərin sağlamlığı üçün təhlükə yarada biləcəyini vurğulayırlar. Hökumət isə analoji məhdudiyyətlərin artıq Avropanın digər ölkələrində də ləğv edildiyini xatırladır.Qeyd edək ki, koronavirus infeksiyasının yayılmasına qarşı mübarizə məqsədilə tətbiq olunmuş bir sıra məhdudiyyətləri Finlandiya hökuməti bundan əvvəl ləğv etmişdi.

İsveçrə Federal Şurası muzeylərin açılmasına icazə verib

İsveçrə Federal Şurası (hökumət) koronavirusla bağlı məhdudiyyətlərin yüngülləşdirilməsi üzrə ikinci mərhələnin başladığı gün - mayın 11-dən etibarən restoran, muzey və kitabxanaların açılmasına icazə verib.Azərtac RTS telekanalına istinadla xəbər verir ki, bu barədə hökumətin Berndə dərc edilən qərarında deyilir.Məhdudiyyətlərin tədricən ləğv edilməsi planına uyğun olaraq mayın 11-dən orta məktəblərdə məşğələlərin bərpa olunacağı və mağazaların açılacağı nəzərdə tutulurdu. Lakin aprelin 29-da Federal Şura koronavirusdan müdafiə tədbirlərini əlavə olaraq yüngülləşdirmək qərarına gəlib.İsveçrədə pandemiya ilə bağlı məhdudiyyətlərin aradan qaldırılmasının birinci mərhələsi aprelin 27-də başlayıb. Ölkədə stomatoloji, psixoterapevt və baytarlıq klinikaları, həmçinin gözəllik salonları, kənd təsərrüfatı və tikinti materialları mağazaları açılıb, xəstəxanalarda təxirə salınmış əməliyyatlar bərpa olunub. Mayın 11-də başlayacaq ikinci mərhələdə orta məktəblər və digər bütün mağazalar, iyunun 8-dən isə texniki peşə və ali məktəblər fəaliyyətlərini bərpa edəcək.Məhdudiyyətlərin yumşaldılması İsveçrədə virusa yoluxma hallarının kəskin azalması ilə əlaqədardır. Martın sonları – aprelin əvvəllərində hər gün mindən çox yoluxma halı qeydə alınırdısa, aprel ayının 29-da sutka ərzində yoluxanların sayı cəmi 143 nəfər təşkil edib. COVID-19 xəstəliyindən ölənlərin sayında da qeyri-bərabər və zəif azalma müşahidə olunur. Federal Səhiyyə İdarəsinin məlumatına əsasən, son sutka ərzində ölkədə 28 nəfər virus səbəbindən həyatını itirib.Pandemiyanın onlayn statistikasını aparan Worldometers saytının Bakı vaxtı ilə bu gün saat 18:30-a olan məlumatına əsasən, dünyada 3 milyon 163 mindən çox yoluxma və 219 min 332 ölüm faktı qeydə alınıb, 975 min 783 nəfər COVID-19 xəstəliyindən sağalıb.İsveçrədə koronavirusa yoluxanların sayı 29 min 400 nəfəri ötüb, 1699 nəfər isə bu xəstəlik səbəbindən dünyasını dəyişib.xeber100.com  

Avstriyada İkinci Respublikanın 75 illik yubileyi qeyd olunub

Aprelin 27-də Avstriyada İkinci Respublikanın 75 illik yubileyi koronavirus pandemiyası ilə əlaqədar məhdud çərçivədə qeyd olunub.Azərtac xəbər verir ki, Federal Prezident Aleksander Van der Bellen və Federal Kansler Sebastian Kurts bu münasibətlə bir saatlıq vaxt fərqi ilə Vyana şəhərinin mərkəzində yerləşən Heldenplats meydanındakı abidənin önünə əklil qoyublar. Koronavirus pandemiyası ilə əlaqədar ölkədə kütləvi tədbirlər qadağan olunduğuna görə mərasimdə Avstriya Silahlı Qüvvələrinin Fəxri Kampaniyasının cəmi altı əsgəri iştirak edib.Avstriya tarixində mühüm əhəmiyyət daşıyan hadisə ilə bağlı ölkə rəhbərliyi televiziya vasitəsilə əhaliyə müraciət edib. Federal Kansler S. Kurts müraciətində hazırkı dövrü 1945-ci illə müqayisə edib və bildirib ki, İkinci Dünya müharibəsindən sonra olduğu kimi, indi də koronavirus pandemiyasından sonra ölkədə iqtisadiyyatın inkişafı və quruculuq işləri aparılmalıdır.Qeyd edək ki, 1938-ci ildə nasist Almaniyasına ilhaq edilən Avstriyanın müstəqil dövlət kimi mövcudluğuna son qoyulmuş və ölkə Ostmark adı ilə “Üçüncü reyx”in bir əyalətinə çevrilmişdi. İkinci Dünya müharibəsinin son günlərində Avstriya azad edildikdən sonra aprelin 27-də Avstriyanın siyasi qüvvələri (sosial-demokratlar, mühafizəkarlar və kommunistlər) Müstəqillik Bəyannaməsi qəbul ediblər. Həmin gün ölkə tarixində İkinci Respublikanın doğuluş günü kimi qeyd olunur.xeber100.com