Futbol üzrə İtaliya A seriyasında 26-cı tura yekun vurulub

Futbol üzrə İtaliya A seriyasında 26-cı tura yekun vurulub. Turun son oyununda “Milan” öz meydanında “Salernitana”nı qəbul edib. “Rossonyerlər” bu oyunda qələbə qazana bilməyiblər. Görüş 1:1 hesabı ilə başa çatıb. “Milan”ın heyətində 45-ci dəqiqədə Jiru fərqlənib – 1:0. Matçın 61-ci dəqiqəsində Dia fərqlənərək hesaba tarazlıq gətirib -1:1. Beləliklə, hesabında 48 xal olan “Milan” dördüncü pillədə qalıb. “Salernitana” isə 26 xalla 16-cıdır.xeber100.com

Həndbolçuların Azərbaycan çempionatında növbəti oyunları keçirilib

Qadın həndbolçuların Azərbaycan çempionatında növbəti oyunlar olub. XV turda autsayder U-16 komandası ilə qarşılaşan “Qarabağ” pərəstişkarlarını inamlı qələbə ilə sevindirib – 51:20. Turun “Azərsu”–“İdman Akademiyası” matçında da sürpriz qeydə alınmayıb. Oyun meydançaya favorit qismində çıxan nominal qonaqların 42:19 hesablı qələbəsi ilə nəticələnib. XVI turun görüşləri də eyni ssenari ilə yadda qalıb. Bu dəfə meydançaya ev sahibi kimi çıxan “Qarabağ” U-16-nı daha böyük hesabla məğlub edib – 46:12. “İdman Akademiyası” həndbolçuları isə “Azərsu” komandasına göz açmağa imkan verməyib – 42:14. “Azəryol” 34 xalla çempionatın vahid lideridir. “İdman Akademiyası” ondan 8 xal geri qalır. “Qarabağ” 24 xalla üçüncüdür. “Azərsu”nun 9, U-16-nın 3 xalı var.xeber100.com

İHİF İcraiyyə Komitəsinin növbədənkənar sessiyası keçirilib

Səudiyyə Ərəbistanının Ciddə şəhərində İslam Həmrəyliyi İdman Federasiyasının (İHİF) İcraiyyə Komitəsinin 34-cü iclası və növbədənkənar Baş Assambleyasının sessiyası keçirilib. Tədbirdə Türkiyənin gənclər və idman naziri Muharrem Kasapoğlu “Konya 2021” V İslam Həmrəyliyi Oyunları ilə bağlı hesabatla çıxış edib. Eyni zamanda İHİF-in Əsasnaməsinə dəyişikliklərin edilməsi ilə əlaqədar bir sıra önəmli məsələlər, həmçinin VI İslam Həmrəyliyi Oyunlarının keçirilməsi qaydaları ilə bağlı ən son yeniliklər müzakirə edilib.xeber100.com  

Azərbaycan Şahmat Federasiyası: Şahmatçılar arasında Avropa çempionatı keçirilib

Serbiyanın Vrnyaçka Banya şəhərində kişi şahmatçılar arasında şəxsi Avropa çempionatı keçirilib. Azərbaycan Şahmat Federasiyası xəbər verir ki, şahmatçılarımızdan Nicat Abasov 11 oyundan 7,5 xal toplamaqla 17-ci yeri tutub. Bu nəticə ilə N.Abasov dünya kuboku yarışlarına vəsiqə əldə edib. Digər təmsilçimiz Əhməd Xaqan reytinqini artıraraq FIDE ustası titulunun normativini yerinə yetirib.xeber100.com

“Neftçi” klubu Azərbaycan çempionatlarında 500-cü qələbəsini qazanıb

“Neftçi” futbol klubu Azərbaycan çempionatlarında 500-cü qələbəsini qazanıb. Peşəkar Futbol Liqası xəbər verir ki, yubiley Azərbaycan Premyer Liqasının XXVI turuna təsadüf edib. Bakı klubu səfərdə “Şamaxı”nı 1:0 hesabı ilə üstələyib. Paytaxt təmsilçisi ölkə çempionatındakı 879-cu matçında “500”ə çatıb. Komanda evdə 276, səfərdə 217, neytral meydanda 7 dəfə qalib gəlib. Bütün çempionatların iştirakçısı olan “Neftçi” ilk qələbəsini 1992-ci ildə qazanıb. Mayın 8-də Sumqayıt “Xəzər”i ilə qarşılaşan Bakı klubu 1:0 hesabı ilə üstün olub. Qeyd edək ki, “Neftçi” qələbə sayında yalnız “Qarabağ”dan geri qalır. Rekordçu olan Ağdam təmsilçisi 505 dəfə rəqibini məğlub edib.xeber100.com

Futzal üzrə milli komandaların beynəlxalq reytinq cədvəli açıqlanıb

Futzal üzrə milli komandaların beynəlxalq reytinq cədvəli açıqlanıb. Azərbaycan yığması 1363 xalla 14-cü pillədə qərarlaşıb. Baş məşqçi Joze Alesionun yetirmələri ötən reytinq cədvəlinə əsasən mövqeyini qoruyub. Qeyd edək ki, siyahıya Braziliya millisi başçılıq edir. Yığmanın aktivində 1796 xal var. İspaniya (1772 xal) və Portuqaliya (1753) ilk üçlüyü tamamlayıblar.xeber100.com

“Barselona”nın qapıçısı La Liqada yeni rekorda imza atıb

“Barselona”nın qapıçısı Mark-Andre ter Ştegen La Liqada yeni rekorda imza atıb. 30 yaşlı qolkiper cari mövsüm yerli çempionatda çıxdığı 25 oyunun 19-da qol buraxmayıb. Nəticədə o, belə nəticəyə imza atan ilk qapıçı adını qazanıb. Ter Ştegen 1993-1994-cü il mövsümündə La Liqada 25 oyunun 18-də qol buraxmayan "Deportivo"nun qapıçısı Fransisko Llanyonu ötüb. Qeyd edək ki, almaniyalı futbolçu 2014-cü ildən “Barselona”nın formasını geyinir.xeber100.com

Futbol üzrə Ekvador yığmasının yeni baş məşqçisi müəyyənləşib

Futbol üzrə Ekvador yığmasının yeni baş məşqçisi müəyyənləşib. Komanda Feliks Sançesə tapşırılıb. Qırx yeddi yaşlı ispaniyalı mütəxəssislə üçillik müqavilə imzalanıb. Onun qarşısına komandanı 2026-cı ildə keçiriləcək dünya çempionatına çıxarmaq məqsədi qoyulub. Xatırladaq ki, F.Sançes son olaraq Qətər yığmasını çalışdırıb. O, ötən il Qətərdə təşkil olunan mundialdan sonra bu komandadan ayrılmaq məcburiyyətində qalmışdı. Sançes Ekvador yığmasında Qustavo Alfaronu əvəz edib.xeber100.com

Azərbaycan Cüdo Federasiyası: Bakı şəhər birinciliyi keçiriləcək

Martın 14-16-da Azərbaycan Cüdo Federasiyası və Bakı Şəhər Gənclər və İdman İdarəsinin birgə təşkilatçılığı ilə 15 yaşa qədər kiçik yaşlı yeniyetmə cüdoçular arasında Bakı şəhər birinciliyi keçiriləcək. Hövsan qəsəbəsində yerləşən Fövqəladə Hallar Nazirliyinin (FHN) İdman Sağlamlıq Mərkəzində baş tutacaq yarışda Bakının 69 müxtəlif klub, cəmiyyət və idman təşkilatından 1043 (947 oğlan, 96 qız) cüdoçu medallar uğrunda mübarizə aparacaq. Yarışın əsas məqsədi yeniyetmələr arasında idman vasitəsi ilə sağlam həyat tərzinin formlaşdırılması, həmçinin cüdonun kütləvi təbliğinə və təşviqinə nail olmaqdır. Turnir 23-26 mayda keçiriləcək 15 yaşa qədər kiçik yaşa qədər yeniyetmələr arasında Azərbaycan birinciliyinə seçim xarakteri daşıyır.xeber100.com  

Azərbaycan Basketbol Liqasında XXI tura yekun vurulub

Azərbaycan Basketbol Liqasında XXI tura yekun vurulub. Turun son oyunu Şəki Olimpiya İdman Kompleksində keçirilib. “Olimpik Şəki” doğma azarkeşləri önündə “Sabah”la üz-üzə gəlib. Əlavə vaxtın oynanıldığı gərgin idman mübarizəsinin sonunda Bakı təmsilçisi 86:80 hesabı ilə qələbə qazanıb. Oyunda ən məhsuldar basketbolçular “Olimpik Şəki”dən Larri Robinson (36 xal, 9 ribaund), “Sabah”dan isə Entoni Patti (27 xal, 8 ribaund) olub.xeber100.com