“Barselona” futbol klubu 2019/2020-ci il mövsümündə

İspaniyanın “Barselona” futbol klubunun 2019/2020-ci il mövsümündə loqosunda dəyişiklik olunacaq.Azərtac klubun rəsmi saytına istinadla xəbər verir ki, istifadəyə veriləcək yeni loqonun forması saxlanılıb. Dəyişiklik yalnız “FCB” yazısının yığışdırılması olub. Sonuncu dəfə klub 2002-ci ildə loqo dəyişikliyi edib.“Barselona” 25 dəfə İspaniya çempionu olub, həmçinin 30 dəfə İspaniya kubokunun, 13 dəfə İspaniya Super kubokunun, 5 dəfə UEFA Çempionlar Liqasının və UEFA Super kubokunun qalibidir.xeber100.com

Avropa çempionatının ilkin seçmə mərhələsi çərçivəsində

Sentyabrın 28-də AFFA-nın baş katibi Elxan Məmmədov 19 yaşadək futbolçulardan ibarət Azərbaycan yığmasının üzvləri ilə görüşüb.Azərtac xəbər verir ki, baş katib Avropa çempionatının seçmə mərhələsində mübarizə aparacaq yığmamıza uğurlar arzulayıb.Qeyd edək ki, yığmamız Avropa çempionatının ilkin seçmə mərhələsi çərçivəsində oktyabrın 3-də Türkiyə, 6-da İsveçrə, 2 gün sonra isə Kipr komandası ilə qarşılaşacaq. Yığmamızın mübarizə aparacağı ikinci qrupun oyunları Türkiyədə təşkil olunacaq.xeber100.com

43-cü Ümumdünya Şahmat Olimpiadasının üçüncü turunda

Azərbaycanın şahmat ustaları Gürcüstanın Batumi şəhərində keçirilən 43-cü Ümumdünya Şahmat Olimpiadasının üçüncü turunu da qələbə ilə başa vurublar.Azərtac xəbər verir ki, kişilərdən ibarət Azərbaycan millisi bu turda Sloveniya yığmasına qarşı oynayıb. İdman ustalarımız Arkadi Naydiç Matey Şebeniki, Rauf Məmmədov Yure Şkobereneni, Eltac Səfərli isə Boris Markojanı məğlub ediblər. Şəhriyar Məmmədyarovun Yure Borişeklə görüşü isə heç-heçə başa çatıb.İngiltərə komandası ilə qarşılaşan qadın şahmatçılarımız rəqiblərinə 3:1 hesabı ilə qalib gəliblər. Zeynəb Məmmədyarova, Xanım Balacayeva və Gülnar Məmmədova görüşləri qələbə ilə başa vurub, Günay Məmmədzadə isə məğlubiyyətə uğrayıb.Qeyd edək ki, Azərbaycanın hər iki komandası indiyədək keçirilən üç turun hamısında qələbə qazanıblar.xeber100.com

“Qarabağ” klubu “Zirə” kollektivini qəbul edib

Sentyabrın 26-da Topaz Premyer Liqasının ikinci turundan təxirə salınmış matçı oynanılıb.Azərtac xəbər verir ki, “Azərsun Arena”da keçirilən görüşdə “Qarabağ” klubu “Zirə” kollektivini qəbul edib. Görüşdə hesabı 28-ci dəqiqədə meydan sahibləri açıblar. Oyunun baş hakimi Ramin Diniyevin təyin etdiyi 11 metrlik cərimə zərbəsini Filip Ozoviç dəqiq yerinə yetirib. Birinci hissə ağdamlıların 1:0 hesablı üstünlüyü ilə başa çatıb.Fasilədən sonra Qurban Qurbanovun yetirmələri hesab arasındakı fərqi artırıblar. İnnosent Emeqara cinah ötürməsini dəqiq baş zərbəsi ilə tamamlayıb - 2:0. Qarşılaşmanın 58-ci dəqiqəsində hakim bu dəfə “Qarabağ” klubunun qapısına 11 metrlik cərimə zərbəsi təyin edib. Mirsahib Abbasov zərbəni dəqiq yerinə yetirərək adını tabloya yazdırıb - 2:1. Matçın 82-ci dəqiqəsində M.Abbasov dublunu rəsmiləşdirərək hesaba tarazlıq gətirib - 2:2. Lakin “Qarabağ” qələbə topunu vurmağa nail olub. Qoldan üç dəqiqə sonra Abdullah Zubirin cinah ötürməsini İ.Emeqara dəqiq zərbə ilə tamamlayaraq oyunda özünün ikinci komandasının isə üçüncü qolunu vurub - 3:2. Komandaların cəhdlərinə baxmayaraq, qalan dəqiqələrdə hesab dəyişməyib.Beləliklə, görüş Ağdam təmsilçisinin 3:2 hesabı ilə qələbəsi ilə başa çatıb.Bu qələbə sayəsində xalını 13-ə çatdıran “Qarabağ” 1-ci pilləyə yüksəlib. Qurban Qurbanov rəhbərlik etdiyi kollektiv “Neftçi” ilə eyni xala malik olsa da, top fərqindəki üstünlüyə görə liderə çevrilib.xeber100.com

İspaniya La Liqasının altıncı turunun oyunları keçirilib

Sentyabrın 26-da İspaniya La Liqasının altıncı turunun oyunları keçirilib.Azərtac xəbər verir ki, son çempion “Barselona” klubu səfərdə “Leqanes”ə məğlub olub (1:2). Kataloniyalılar Koutinyonun qolu sayəsində hesabı erkən açsalar da, qarşılaşmanın 52-ci və 53-cü dəqiqələrində meydan sahibləri iki qol vuraraq oyunun taleyini həll ediblər.La Liqanın digər favoriti “Real Madrid” klubu “Sevilya”nın qonağı olub. Matçın 17-ci dəqiqəsində Andre Silva hesabı açıb. Qoldan dörd dəqiqə sonra Andre Silva dublunu rəsmiləşdirərək hesab arasındakı fərqi iki topa çatdırıb. Qarşılaşmanın 39-cu dəqiqəsində “Sevilya” klubu üçüncü dəfə “Kral klubu”nu meydanın mərkəzinə dəvət edib, Ben Yeder fərqlənib. Birinci hissə 3:0 hesabı ilə meydan sahiblərinin xeyrinə başa çatıb.Oyunun ikinci hissəsində irəli atılan “Real Madrid” futbolçularının bütün cəhdlərinə baxmayaraq, hesab dəyişilməyib.Turun digər oyunlarında aşağıdakı nəticələr qeydə alınıb: “Espanyol” – “Eybar” - 1:0 “Real Sosyedad” – “Rayo Valyekano” - 2:2 "Atletiko Madrid” – “Ueska” - 3:0 “Atletik Bilbao” – “Vilyareal” - 0:3 “Valensiya” – “Selta Viqo” - 1:1.xeber100.com

Cüdo üzrə dünya çempionatının finalçıları müəyyənləşib

Bakıda keçirilən cüdo üzrə dünya çempionatının qarışıq komanda yarışlarının finalçıları müəyyənləşib.Azərtac xəbər verir ki, qızıl medal uğrunda görüşdə Yaponiya və Fransa komandaları üz-üzə gələcəklər.Üçüncü yer uğrunda isə Azərbaycan millisi Rusiya, birləşmiş Koreya komandası isə Almaniya ilə qarşılaşacaq.xeber100.com

TASS informasiya agentliyinin məlumatına görə…

İngiltərə Futbol Assosiasiyası Londondakı “Uembli” (Wembley) stadionunun 600 milyon funt-sterlinqə (788 milyon dollara) “Fulham” futbol klubunun sahibi Şahid Xana satılmasına razılıq verib.TASS informasiya agentliyi xəbər verir ki, Şahid Xan stadionu hələ bu ilin aprelindən satın almağa çalışsa da, yalnız son günlər danışıqlarda irəliləyiş əldə olunub. Lakin yekun qərar İngiltərənin Futbol Assosiasiyasının komissiyası tərəfindən verilməlidir.Sövdələşmə bəzi məhdudiyyətlərlə baş tuta bilər. Belə ki, sponsorlardan heç kim stadionun adının dəyişdirilməsi və ya mövcud olan brendə əlavələr edilməsi kimi hüquqa malik olmayacaq. Həmçinin Xan öz öhdəliklərini lazımi qaydada icra etməsə, assosiasiya stadionu geri almaq hüququnu özündə saxlayacaq.Biznesmen stadiondan sahibi olduğu “Jacksonville Jaguars” (Amerika Milli Futbol Liqası) komandasının oyunları üçün istifadə etmək niyyətindədir.xeber100.com

“Expo Arena”da 43-cü Beynəlxalq Şahmat Olimpiadasında

Batumidəki “Expo Arena”da 43-cü Beynəlxalq Şahmat Olimpiadası davam edir.Azərtac xəbər verir ki, sentyabrın 25-də keçirilən ikinci turda Azərbaycanın qadın şahmatçıları Belçikadan olan idmançıları məğlub edərək turu qələbə ilə başa vurublar.İdmançılarımız Ülviyə Fətəliyeva rəqibi Annelies Kuvelieri, Günay Məmmədzadə Xanne Qussensi, Zeynəb Məmmədyarova Darya Vanduyfyusu, Gülnar Məmmədova isə Viebke Barbiieri məğlub ediblər.Kişi şahmatçılarımız bu turda İtaliya komandası ilə qarşılaşıb. Arkadi Naydiç Luka Moroniyə qalib gəlib. Şəhriyar Məmmədyarovun Daniel Vokaturo ilə görüşü heç-heçə yekunlaşıb. Maykl Qoden – Teymur Rəcəbov və Sabino Brunello – Rauf Məmmədov qarşılaşması isə hələ davam edir.xeber100.com

Avropa Liqasında keçiriləcək II tur matçına satılan biletlərin sayı açıqlanıb

Avropa Liqasında “Qarabağ” və İngiltərənin ”Arsenal” komandaları arasında keçiriləcək II tur matçına satılan biletlərin sayı açıqlanıb.Azərtac “Qarabağ” klubunun rəsmi “Facebook” səhifəsinə istinadla xəbər verir ki, artıq 20 min bilet sahibini tapıb. Oyunun keçiriləcəyi Bakı Olimpiya Stadionu 70 minədək tamaşaçı tutumuna malikdir. Biletlərin qiymətləri sektorlara uyğun olaraq 2, 3, 5 və 10 manat arasında dəyişir. VIP biletlər isə alıcılara 50 manata təklif olunur.Biletlərin “qara bazar”a çıxarılmasının qarşısının alınması üçün onları ilkin mərhələdə iki satış məntəqəsindən - “Qarabağ” futbol klubunun fan-mağazalarından və Tofiq Bəhramov adına Respublika Stadionunun kassalarından, həmçinin “iticket.az” saytından əldə etmək mümkündür. Biletləri əldə edərkən şəxsiyyət vəsiqəsi təqdim olunmalıdır. Ətraflı məlumatla iticket.az saytından tanış olmaq mümkündür.Qeyd edək ki, “Qarabağ” - ”Arsenal” oyunu oktyabrın 4-də Bakı vaxtı ilə saat 20:55-də keçiriləcək.xeber100.com

Cüdo üzrə dünya çempionatı davam edir

Yaponiya millisi Bakıda keçirilən cüdo üzrə dünya çempionatında komanda hesabında liderliyini davam etdirir.Azərtac xəbər verir ki, yaponiyalı cüdoçular Bakı mundialında 6 qızıl, 5 gümüş və 3 bürünc medal qazanıblar.Koreya Respublikası 2 qızıl və 1 bürünc medalla ikinci, Fransa yığması isə 1 qızıl, 1 gümüş və 2 bürünc medalla üçüncü pillədə yer alıblar. Aktivində 1 qızıl və 1 bürünc medal olan İran və Ukrayna seçmə komandaları 4-5-ci pilləni bölüşürlər.İyirmi bir ölkədən cüdoçular mükafatçılar sırasında yer alıblar. Hesabında 1 bürünc medal olan Azərbaycan millisi 16-cı pillədə qərarlaşıb. Medalı millimizə 73 kiloqram çəki dərəcəsində çıxış edən Hidayət Heydərov qazandırıb.xeber100.com